الثلاثاء، 20 يوليو 2010

كلام تلقائي

صورة من شاطئ المغسيل في صلالة الطبيعة رائعة والجو جميل بس الرطوبة عالية جداااااا


بعدما أصابتني لعنة الفراعنة بإني بكتب وكل كلامي بدفنه في ملف في اللاب او بكتب من غير تحمس والكلام اللي زي ده مبيبقاش له لازمة انه يتنشر أساسا فقررت ان كلامي دلوقتي هيبقى كلام تلقائي واللي يجي على بالي هكتبه


* المصريين بره مصر أسخف ناس في الدنيا كلها ما عدا 1% يمكن احكيلكو على مواقف مطينة للمصريين بره مصر ويمكن محكيهاش انا دافنة الكلام في الموضوع ده في اللاب وصعبان عليا انشره لأن الكلام مش لطيف على اللي اسمهم مصريين لكن روحهم مش مصرية والله يجازي الناس دول هما والإعلام بقت حاجة لا تدعو للفخر انك تقول انا مصري
وبيسألوني بتحبي مصر قلت مش عارفة على رأي الشاعر تميم البرغوثي


* كليات البلد كلها نتيجتها طلعت ما عدا جامعتنا جامعة المكسورة - المنصورة سابقا-


* حينما ترتدي السماء المعطف الأسود المرصع بالنجوم بنسى خالص اني اعرف انام لغاية الصبح ومش عارفه هفضل لغاية امتى زي عمر دياب ليلي نهاري :( وانا مبحبش النهار بشمسه الموجعه للعين وحره القاسي ودي حقيقة لكن بحب الفجر ورائحة الهواء ولسعة البرد والندى في الوقت ده .


* بقرأ في كذا كتاب اليومين دول مع بعض لغاية لما حاسة ان دماغي بقت عاملة زي حلة الضغط وهتنفجر ومش فاكرة أي حاجة من اللي بقرأها :( محتاجة أركز اكتر في قراءة حاجة واحدة مش كذا كتاب مع بعض
حاليا بقرأ كتاب لعنة الفراعة اول يوم قرأت كتاب لعنة الفراعنة اتفزعت جدا من الكتاب كالعادة لأني مش اول مرة اقرأ عن لعنة الفراعنة بس اول مرة اقرأ الكتاب لأنيس منصور نصيحة محدش قلبه خفيف يقرأ بداية الكتاب بالليل


* حقيقة علمية تانية انا بحب أبو سلكة اكتر من اللاب
الكمبيوتر تلاقيه حمش كده وليه هيبته ومتخذ شعار اللي عايزني يجيلي انا مبروحش لحد لكن اللاب معاك في كل مكان وأكيد أكيد هيسهرك وهيطير النوم من عنتينك
كنت بقول لبابا ع اللاب مخدوش يا بابا مخدوش عاااااااااا ولما بابا جابه قاللي ميدخلش أوضتك وانا زعلت بقى وقلت ازاي يعني هو مبيتكشفش على بنات ولا ايه بس عرفت بعد كده ان طالما اللاب معايا يبقى مستحيل هنام عندك حق يا والدي


* في رمضان استهبالك عندنا

ايه كمية المسلسلات اللي جاية في رمضان دي كل سنة بيزيدوا مش بينقصوا وايه كمية العنف الكبير والصعايدة اللي في المسلسلات اللي هتيجي في رمضان السنة دي
وبعدين هما الصعايدة شريرين وقاسيين وتجار سلاح ومخدرات وأثار ولا الصعايدة هما الناس اللي اتعاملت معاهم ناس كرماء وعندهم شهامة ومرحين وبيحبوا الحياة وده ميمنعش برضه اني عرفت صعايدة سيئين جدا
بس ده ميخليش الاعلام والمسلسلات يظهروهم بشعين وبعدين الملك فاروق هيعملوا له كام مسلسل ! في رأيي المتواضع بعد مسلسل الملك فاروق بتاع الكاتبة لميس جابر وتيم مفيش الملك فاروق تاني خلاص ليس في الامكان احلى مما كان

ومش ناوية اتابع غير عايزة اتجوز علشان غادة عبد العال المدونة والكاتبة الجميلة مش علشان هند صبري المملة والمصطنعه والمبالغة جدا في تمثيل دور غادة وكمان مش محجبة مع ان غادة محجبة ولا هي ولا مامتها سوسن بدر
لما هي القصة واقعية يبقى يعملوها صح ولا بلاش واحتمال كمان اتابع مسلسل تيم لأنه بيمثل كويس أوي
والى هنا ينتهي الكلام لغاية لما اكتب تاني :)

هناك 9 تعليقات:

sony2000 يقول...

وانا كمان هشوفو
لاني موش ناويه اخد ذنوب فرمضان:)

Lady E يقول...

سوني : كويس انتي كمان رافضة موضوع المسلسلات الكتيرة زيادة عن اللزوم في رمضان مش فاهمه ليه كل ده مع ان فرصة اننا نكسب حسنات اجرها مضاعف مش موجودة الا في رمضان بس ومفيش ليلة قدر الا في رمضان يبقى ليه يحاولوا يلهو الناس بدل ما يساعدوهم

Malooka Yousef يقول...

اولا كل سنة وانتى طيبة وامة محمد كلها بخير بالنسبه المصرين برة مصر ممكن عشان الغربة وانهم ف بلد غريبه يمكن
بالنسبه للنتيجة متقلقيش ان شاء الله خير ولسه ف ناس كتير بردو مظهرتش نتايجهم ومنهم انا وبلا فخر ربنا معانا كلنا يارب
بالنسبه لمسلسلات رمضان فهى السنة دى اوفر اوى وبالذات المسلسلات التاريخية كتيرة جدا وبشكل ملاحظ عن كل سنة انا بصراحه اللى نفسى اشوفه الناصر صلاح الدين لانى بحب الشخصيه دى جدا وكمان بحب احمد السقا وتمثيله
وكلامك تلقائى وحقيقى
تسلمى ياجميلة وبالنجاح باذن الله

Mafrousa يقول...

عجبنى الكلام التلقائي ده جداااااا
تحياتي ليكي
اه بالمناسبة
انا مش عجبنى تمثيل هند صبري فى البرومو بتاع عاوزة اتجوز
حسيت انها اوفر اوي

Unknown يقول...

يمكن نقول فضفة
يمكن نقول فشة خلق
اعتقد هيك كانت مدونتك , لكن ما علينا بالنهاية الا أمرين , التغيير ولو بكلمة نكتبها , أو ندعوا لهم بالهداية

Lady E يقول...

ملوكة يوسف : وانتي طيبة وبخير وصحة وسعادة يا قمرايا

علشان الغربة يبقى أحسن أنهم يبقوا سفراء لبلدهم بدل ما تبقى تصرفاتهم وحشة جدا

الحمد لله نجحت عقبالك يا قمرايا ويارب يكون تقديرك احسن من تقديري جاتلي النتيجة م الكنترول :)

ايوة اوفر جدا
تصدقي عرفتيني ان في مسلسل عن صلاح الدين الأيوبي جاي احتمال اشوفه هو كمان :)

نورتيني يا ملوكة ومتقطعيش الزيارات

Lady E يقول...

واحدة مفروسة : أخيرا نورتي بلوجي
بجد يا مرحبا يا مرحبا نورك غطى عالكهربا :)

تسلمي انتي كلامك الأحلى

وهند صبري فعلا تمثيلها أوفر جدا في الاعلان

نورتيني

Lady E يقول...

مستر حازم : هي كدهو هتفضل كده فضفضة ووجهة نظر بقولها

التغيير بيجي من الإنسان نفسه لو عايز يتغير لكن الكلام مفيش منه أي فايدة لو مفيش استعداد للتغيير للأحسن

Lady E يقول...

علاء سالم : وعليكم السلام ورحمة الله وبركاته

فعلا كتابات الكاتب انيس منصور جميلة جدا وبيصيغها بصيغ رائعة هو بارع في نقل الثقافات من كتاب تانيين لكتاباته بس بينقل المعلومات بطريقة مميزة وتشد القارئ

الكاتبة لميس جابر بحثت وقرأت كتير عن حياة الملك فاروق وأنا شوفت المسلسل محسيتش فيه بأخطاء ولا لأن المسلسلات والأفلام بيظهروا الملك فاروق أنه وحش وظالم والمسلسل نفى الكلام ده عنه يبقى المسلسل فيه أخطاء ؟ وبالنسبة لأن المسلسل أغفل شخصيات ف ده طبيعي لأن التركيز على شخصية الملك فاروق بس

شكرا على كلامك الجميل اللي أسعدني

دمت بخير