السبت، 29 مايو 2010

كلام ميهمش حد - بوست طويل-


احساسي دلوقتي ان رجلي بتوجعني جدا ونفسي احطها في مية وملح زي ما بيقولو في التلفزيون علشان اعملها مخلل :)

الكام يوم اللي فاتو كانو وحشين اوي اووووووووووي يعني ، كنت بقعد في ركن على جنب في البيت والدنيا ضلمة وانا شايفة السما ومبطلش اعيط ، بس الحقيقة ان الواحد يعيط احسن بكتير من انه ميعرفش يعيط

حصلت حاجات كتير مش لطيفة مامتي وبابايا خاصموني والجو كان مغيم والغريب ان قبل الخصام ده بيوم كنت كاتبالهم ربنا يخليكو ليا .... الظاهر اننا اخدنا عين مصلتش عالنبي يلا الله يسامح اللي مصلاش عالنبي

الحاجة التانية قفلت باب الكتكوتة على ايدي بس اللي أتأثر اوي صباعي والغريب انه ورم وازرق مسافة ما طلعت البيت بس لحقته وحطيت عليه ميه ساقعه وبرغم كده كان الألم بشع مش عارفة ليه مبنتعلمش الاسعافات الأوليه علشان لو حصل حاجة زي دي لا قدر الله نعرف نعالجها ! حاولت انزل المستشفى بس كنت مرهقة لدرجة اني مقدرتش اتحرك من مكاني اساسا

حصلت حاجات تانية مش لطيفة بس دول ارخم حاجتين

النهاردة بقى مواويل علشان انزل الكلية اول مرة نسيت كتاب فطلعت جبته تاني وبعدين نسيت اللاب فطلعت جبته وبعدين بعدما وصلت الكلية اكتشفت اني نسيت البحث والكتاب في الشارع ههههههه اتجننت طبعا لأن الأطفال في المنطقة ممكن ياخدوا البحث اللي انا طالع عيني فيه ويعملوه مراكب وقراطيس :) ورجعت تاني والحمد لله لقيت الكتاب والبحث في مكانهم

وبعدين برغم اني كنت مستعجلة جدا ونازلة من البيت بدري الا اني اتعطلت بسبب الحاجات اللي كنت بنساها ولما رحت الكلية لقيت معظم سنة رابعه هناك وعلى ما عرفت اكلم الدكتر كانت الساعه بقت تلاتة :) وكمان مصححش البحث بتاعي اخده معاه والله اعلم هيجي تاني الكلية ولا لأ عااااااااااااا عااااااااااااا عاااااااااااااا
بس سألته على شوية حاجات في الامتحان وان شاء الله كل الأسئلة اللي لفتت نظري مش هتيجي نياهاهاهاهاهاها

كنت مضايقة اوي من حاجة اول الترم
دكتر أشرف بيشرح لنا بطريقة جديدة بيعرض لنا في المحاضرة ملفات باور بوينت وافلام عن كل حاجة بندرسها فقال لنا في الأول اللي عايز اي حاجة من الحاجات دي يجيب ميموري وياخدها او سي دي وعلى ما انا رحت كان الموضوع ده بقى FORBIDDEN ممنوع
لأن اللاب بتاعه اخد فيروسات كتير من الميموريهات والسيديهات اللي نقل عليها كانت متشرخة وبرضه بوظتله حاجات في اللاب فلما رحت اطلب منه الحاجات اللي بندرسها واخدت معايا الميموري رفض وقاللي ان الحل الوحيد اني ابعتله ميل وهو هيبعتلي ملفات الباور بوينت او الوورد قولتله يا دكتر لسه هتعمل اب لود وانا كمان عايزة الأفلام علشان افهم القصص اللي درسناها وتعب عليك وهتاخد وقت كبير في رفعها عالنت
قاللي افلام ايه انا مش هبعتلك كل حاجة طبعا وموافقش ابدا اني اخد اي حاجة عالميموري لأن احتمال كبير تكون متفيرسه ! - في حين ان في دكتر تاني كان بيدرس كورس ادارة اعمال وتسويق وقال يا جماعة اللي عايز اي حاجة من اللي بشرحها يقوللي وفعلا وديتله الميموري ونقل لي كل حاجة عاللاب عنده محاضرات تنمية بشرية وجداول وكتب كل حاجة وده دكتر من كلية تانية وبيدينا مجرد كورس يبقى الدكتر بتاعنا ميرضاش ينقلي معلومات شرحها - :(
يوميها روحت البيت وانا مضايقة جدا وكمان في بنوتات في المحاضرة كانوا بيضايقوني وبيردوا هما وبيأيدوا الدكتر في كلامه وبيحاولوا يتريقو على كلامي وكأني عدوتهم مش عارفه ليه
تاني يوم في محاضرة تانيه نفس جروب البنات رخمو عليا لكن واحدة منهم قالتلهم انتو بتضايقوها ليه دي رقيقة جدا :) انا رقيقة :)))
قالتلي انا اسمي سارة قولتلها شكرا يا سارة انتي الأرق قالتلي قولي اسمي تاني كده ايه الرقة دي قولت اكيد البنت دي عندها هسهس
وبنوتة تانية من نفس الجروب دافعت عني وباقي البنات اللي بيضايقوني ربنا انتقملي منهم وهما نفسهم خرجوا من المحاضرة مضايقين

المهم فاتت الأيام وراحت الأيام وعملت البحث بتاعي عن ليجيا ولقيت الفيلم بتاعها عالنت وضايقني جدا ان الفيلم لاسع منهم في مشاهد خارجة كتير بعكس القصة اللي مفيهاش اي حاجة من دي ، عملت للفيلم بريزنتيشن وحذفت حاجات كتير فيه ووقت البريزنتيشن معرفتش احكي القصة كويس :( وكمان حذفت المشاهد الخارجة وعملت الفيلم سبع أجزاء ويومها الدكتر مكنش جايب اللاب توب بتاعه فنقلت ليه الفيلم والبريزنتيشن ومن ذكائي الخارق نقلتله الفيلم الأصلي اومال ليه بقى قعدت 4 ساعات اظبط في الفيلم واخليه اجزاء ! ونقلتهم عالميموري بتاعته :) قولت للدكتر انقل لك الفيلم عالميموري يا دكتر ، عالميموري صح :) قاللي ايوة اللاب يتفيرس مفيش مشكلة :)
وبعدها قولت للدكتر اني عايزة الحاجات اللي درسناها الترم ده ووافق انه ينسخها لي على سي دي مع انه كان برضه معترض على السيديهات :) والنهاردة اخدت السي دي عليه كل حاجة درسناها ولا تتخيلوا اد ايه فرحانه ومزقططة بجد
كويس ان الواحد ميفقدش الأمل ويصر على اللي هو عايزه طالما حاجة كويسة

اول مرة من زمان اعمل خير ويتردلي خير - الحمد لله- دايما كنت بعمل خير واخد على دماغي في الأخر لكن النهاردة الوضع كان مختلف
في بنوتة قالتلي مش عارفة أسئلة الشيتات ولسه مشترتوش وعايزة تعرف الأسئلة وبعدين بكرة تبقى تشتريه فأنا كان معايا الشيتات قولتلها خديها وصوريها والبنوتة اتأخرت كتير وانا مستنياها ولا حياة لمن تنادي قولت بس اخدت الشيتات وخلعت وكل عام وانتم بخير وانا مش عارفاها اساسا المهم فضلت ادور عليها لغاية لما شوفتها وبعدين قولتلها بجد شيت الترجمة منيل بنيلة ومش عارفة أحله قالتلي فعلا مكلكع اوي المهم عرفنا الحلول بتاعت شيت الترجمة الحمد لله بعدما البنوتة صورت الشيتات يعني لولا انها صورتهم مكنتش لا انا ولا هي عرفنا الحلول والترجمة الصحيحة :)

الفترة اللي جاية هتبقى امتحانات هتبدأ بحبيب هارتي الفرنساوي ادعولي بقى من المعاميق الجوانيه اني انجح فيه بقى علشان كده كتير بقيت معيدة فيه سنتين ورى بعض نياهاهاهاها وبعدين السنة دي دكتورين اللي بيشرحوا المادة وكتابين يعني م الاخر 1000 فل مش 100

هناك 19 تعليقًا:

غير معرف يقول...

اولا
الاغنيه عجباني اوي .. مين اللي بيغنيها ؟

ثانيا بقي .. نيجي للبوست
بالنسبه لرجلك ، لو وارمه حطي عليها تلج وحاولي ترفعيها علي حاجه عاليه وممكن تستعملي رباط ضاغط وحاولي تريحيها شويه ..
بس لو مجرد وجع بس ، لو الالم ده جديد حطي تلح لكن لو بقاله فتره يبقي المايه السخنه هتبقي فعاله جدا وهتريحك ..
ولو لسه وجعاكي ابقي قوليلي حاسه بإيه :D

بطلع عليكي شويه من اللي باخدها في المستشفيات :))))

وسلامة ايديكي :(
...

عارفه .. ساعات بنتوجه اننا بنعيط ، وبتصعب علينا نفسنا اوي ... بس ، ساعات الدمع بيهدي ..

بالنسبه للعين بقي ، متنسيش تحطي خرزه زرقا :)))))

...

بس ايه النحس ده يا بنتي ؟!

متخليش الاستعجال يطير برج من دماغك كده :))

اما بالنسبه للدكاتره ده مثال حي وبسيط لنوعين من البني آدمين اللي ممكن الواحد يقابلهم في حياته .. في اللي هيخدمك حتي لو مش دوره يعمل كده وفي اللي هيكسل و هيستخسر !

اما بالنسبه للبنات .. حركات بنات بقي كبري دماغك :)

انا حاسه انني اتكلمت كتير .. بس مبسوطه اوي انني اول تعليق :)

وربنا معاكي في الامتحان يارب :)

قلم رصاص يقول...

ربنا يوفقك
وشدي حيلك في الامتحانات

تقبلي مروري

Lady E يقول...

سوري يا هاجر اول تعليق محجوز لحنين الذكريات انتيختي :)

يارب يا اختي يارب اللي قولتيه يتحقق :) يسمع منك ربنا ومنك لباب السما

فراشة يقول...

الف سلامه على رجليكي يا قمر
والف سلامه على صوباعك وعلى نفسيتك وربنا مايجيب خصام تاني ابدااااا

يوووه لما ببقى مستعجله بنسى مليون حاجه وابقى خلاص هعيط

والبنات دول فعلا حركات بنات بقى فيه ناس كدا بتحب تغلس على الناس

والدكاتره انواع كتير انا عندي دكتور مره كويس و10 العكس جابلي هسهس ودكتور تاني بفيرسله جهازه دايما بفلاشتي :)) ودكتور تاني عنده ممنوع نصور اى ورق عشان حقوق الملكيه :)

ربنا معاكي ف الفرنساوي وكل المواد ياااارب ويوفقك وتنجحي وتفرحي يارب وتجيبي تقدير يبسطك وتكملي ماستر وكل اللي نفسك فيه

سلام يا قمر

Lady E يقول...

ђager ZaǮbal : هاجر بجد بفرح لما بتيجي هنا ده اولا

ذوقك حلو في الأغاني زي ما هو حلو في الكتابة اللي بيغني الأغنية هيثم نبيل

ثانيا ثانكيو ثانكيو يا دكتر
هو ده الكلام مش أي حاجه
بجد تسلمي عالمعلومات الجميلة دي
اقولك سر الكعب العالي هو السبب منه له منـــــه له :)

الله يسلمك من كل شر يا حبيبتي

ايوة ايوة عارفاها
ساعات الدمع بيهدي وليه وعلى ايه هنتألم ما هو كله بيمشي ويعدي :)
لما الواحد بيعيط ده بيسموه في الأدب الانساني التنفيس الأنسان بينفس عن مشاعيره وبعدها بيرتاح بس طبعا لو الموضوع مطولش وبقى دايما دموع دموع دموع في الحالة دي يبقى الشر بره وبعيد استئكاب

- بطلع عليكي اللي بدرسه في الكلية نياهاهاهاها-

أينعم ومع اللي هيكسل او يستخسر لازم نصبر ومنملش لأن من حقه انه يخاف عاللاب بتاعه ومن حقي اني اخد المعلومات ولو في اخر الترم :)

مبسوطة بيكي وبكلامك يا هاجر بجد وماشي خليها اول تعليق مكرر :)

وربنا معاكي في الامتحانات برضه :)

نورتيني بجد

Lady E يقول...

قلم رصاص : الهي ربنا يسعدك قادر يا كريم

الدعوة في وقتها :)

دمت بخير

gehad mousa يقول...

ربنا معاكى ان شاء الله وسلامتك الف سلامه لرجلك ....ربنا يوفقك فى الامتحانات باذن الله دوما ..
مع خالص حبى واحترامى
gehad mousa

مهموهة أحمد يقول...

بجد بوستاتك طويييييييييييلة اوي اوي
بس حلوة اوي اوي اوي
كلامك جميل اوي يا احلى ليدي
و ربنا يسعدك و يهنيكي يا رب

خالص حبي و تقديري

شفـقــة و إحســــان يقول...

سيبك بقى من البوستات يا هانم وذاكرى الامتحانات على الابواب
اياك وانا تجيبى تقدير وحش ابهدلك
بجد ربنا معاكى ويوفقك
وحشتينى يا بنوتة

Bent Men ElZman Da !! يقول...

انا لو منك ونسيت الحاجات دى كلها احلف ماانا رايحه الكليه اصلا ههههههههههه
ربنا يهديلك الحال مع مامتك وباباكى ان شاء الله
ويهديلك دكاتره الكليه بتوعك
وان شاء الله تخلصى على خير
ربنا معاكى فى امتحاناتك كلها
والف سلامه على اديكى :)

الزهرة البرية (Joudy) يقول...

ايه يا بنتى على طول كده موجوعة هههههههه صعبتى عليا خالص خالص ابقى خدى بالك

ربنا معاكى يارب وينهى الامتحانات دى على خير وتفرحى بالتخرج يارب

دمتى بكل الخير والحب والسعادة

بسمة انور يقول...

حبيبتى
وحشتييييييييييييييييينى
والف سلامة على صابعك

تعرفى العيط بيريح اوى برضو
انا اكتشفت ده قريب

خدى بالك على نفسك يا قمرة

امووووووواه

Ana keda يقول...

حبيبتى
شكلك مودك مقريف وده اكيد من ضغط الامتحانات
يلا هانت اهى اخر امتحانات حاولى تصفى دماغك شويتين ومش تشغليها بكل حاجة حواليكى
ومتزعليش باابكى وماماتك مش هتهونى عليهم وبكره تبقوا زى الفل ومتستنيش روحى بوسيهم وقالويلهم انتى معلش :)
وكبرى دماغك من حركات الدكاترة كلنا كنا كده يا حبيتبى
روقى انتى بس

غير معرف يقول...

حبيبتى سلامه ايدك ورجلك
كل اللى انتى فيه ده عشان المذاكره وامتحانات صفى انتى بس ذهنك وكله هايبقى تمام
تحياتى

Lady E يقول...

gehad mousa : الله يسلمك يا قمريا
اللهم أمين

منوراني جدا يا جهاد وسعيدة بدعائك وزيارتك الجميلة وتعليقك الجميل

دمتي بخير وسعادة

Lady E يقول...

مهموهـــــــة : ههههههههه طويلة طويلة يا سكة العاشقين اه
طويلة على العاشق طويلة يا عيني :) مش عارفة ليه افتكرت الأغنية دي من كلامك يا مهموهة يا جميلة

انتي الأحلى والاجمل وبجد دائما سعيدة بيكي

انا وانتي والمسلمين ان شاء الله

دمتي بخير

Lady E يقول...

فراشة :بعتذر اني مشوفتش تعليقك في الاول يا فراشه

الله يسلمك من كل شر

اللهم امين

تسلميلي يا حبيبتي وليكي مثل دعائك

دمتي بخير وسعادة

Lady E يقول...

شفـقــة و إحســــان : تسلميلي يا شفشوقة يا قمر

دمتي بخير وسعادة

momken يقول...

انا علقت على البوست ده فين تعليقى