الاثنين، 10 مايو، 2010

عملت رياضة النهاردة ؟




دائما في اعلانات الشوكولاتة والايس كريم والمياه الغازية بأنواعها والسمنة والزيوت والوجبات السريعة والحلويات بيبقى فيها موديلز رفيعين وشيك وحلوين ومقطقطين ، طيب ليه بقى الناس بتتخن من الحاجات دي بجد ملهومش حق ما هما الموديلز زي الغزلان وبيعلنوا عن كل حاجة بتتخن ومش تخان خالص

نيجي بقى للحقيقة الناس بتشتري الشوكولات والحلويات والوجبات السريعة ، وبيحبوا كل حاجة بتسبب سمنة لأن طعمها دائما بيكون أحلى من الأكل الصحي الطازج و الخضروات والفواكة والأكل المسلوق واللي عالبخار
وفي ثقافتنا المصرية معظم الأكل دسم



بالنسبة لينا أهل بحري فعندنا لازم الرز يبقى كتير مع السمك والطحينة والسلطة والخضرة ومع ان السمك مشوي الا ان الرز بيتخن من النشويات اللي فيه ، ده غير السمك المقلي وباقي السي فود اللي المفروض مش بيتخن بس بنطبخه بطريقه تتخن العفريت




نيجي على باقي مصر معندهومش موضوع السمك ده كتير وأغلب الاوقات بيبقى مقلي مش مشوي ، لكن برضه عندهم أكلات تشيب الكتكوت -وفي بحري برضه في الاكلات دي بس الأساسي السمك- ، والاكلات دي زي المكرونة البشاميل والمحشي اللي اساسي كل أسبوع وباقي انواع المكرونات والمقليات والبوفتيك اللي اكيد مبقاش حد يعمله علشان اللحمة دلوقتي غير انها غالية كمان بيدبحوا حاجات تانية غير الحاجات المتعارف عليها ان لحومها بتتاكل

المهم يعني ثقافتنا في الأكل ملهاش حل وتتخن العفريت وفي الأخر نسأل نفسنا بنتخن ليه؟

وكمان ثقافة الرياضة برضه مش عندنا ، والمشكلة ان اللي بيعمل رياضة وبيبطلها بيتعب صحيا ونفسيا كمان
اخر مرة عملت فيها رياضة كنت في اعدادي وكنت في فريق كرة السلة ، وبعدين قريب رحت الجيم ولما اتكلمت عنه في المدونة في تعليقات قالولي مش بتروحي الجيم اضربي اللي يضايقك :)
فكرة الجيم هي أجهزة رياضيه مش اكتر لكن مش العاب قتالية زي الكونغو فو والكراتيه وغيرهم

امبارح رحت الجيم واتفاجئت بالأحجام اللي هناك ، بنوتات اوزانهم 150 و200 وكمان في المدرج من كام يوم شوفت بنوتة برضه تقريبا بنفس الوزن وسرحت شوية وكتبت عنها في كشكول المحاضرات
" مع اني مبحبش اتكلم على شكل حد ولا لبس حد ، لكن صعبتي عليا وعارفة انك بتعاني في صمت "

وموضوع الرياضة مش بيبقى سهل في الاول ، وعايز صبر


تاني مرة مشيت ع المشاية وقعت من عليها :) وعرفت بعد كده ان في بنوتات كتير غيري وقعوا من عليها وكمان حصلت لهم اصابات في وشهم وايديهم ورجليهم
ولغاية دلوقتي لسه بخاف اجري عالمشاية
لكن عالعموم انا كان ناقصني حاجة كبيرة في حياتي ولقيتها لما بدأت اعمل رياضة
، وجربوا تعملوا رياضة وقولولي احساسكم

هناك 19 تعليقًا:

لـــولا وزهراء يقول...

لـــيدى


الرياضه حاجه جميله بجد بتخلى الواحد يبقى على الاقل نفسه تماموز ويقدر انه يتحرك بسهوله
كمان فى حاجه بقى غير مرتبطه بالوزن اعرف واحده الى حد ما وزنها زياده بس حركتها خفيفه اوى تنزل وتطلع فى المقابل جارتها نحيفه جدا جدا ومع ذكل لو مشيت شويه تقول تعبانه رجلى وجعانى
الرياضه عن جد حاجه مهمه وعلى اقل حاجه ممكن الواحد يمشى بس هى فى الاول متعبه جدا جدا

قلم رصاص يقول...

زي مابيقولوا:
العقل السليم في الجسم السليم

يعني الرياضه مش غذاء للجسد وبس
لأ طبعا دي كمان غذاء للروح والعقل

فيه حديث نبوي شريف لرسول الله صلى الله عليه وسلم ، قال فيه :
"المؤمن القوي خيرٌ وأحب إلى الله من المؤمن الضعيف"

لاخلاف على سوء عاداتنا الغذائيه ولكن صدقيني احنا في المسألة دي بالتحديد يمكن احسن وافضل من شعوب كتير وفي دول متقدمه جدا زي مثلا الولايات المتحده.. من المعروف ان امريكا فيها اعلى نسب للسمنه على مستوى العالم.

الرياضه طبعا بتعوض كتير مساوئ العادات الغذائيه وبتعطي للجسم قوه ورشاقه دائمه .. علاوه على الراحه النفسيه الكبيره والمظهر الُمريح بردو!

بس مش بالضرورة عشان اعمل رياضه اني اروح جيم .. انا ضد الأجهزه في الرياضه .. مفيش احسن من الطبيعه .. المشي والبطن والضغط والحاجات دي ولو مبدأيا .. نفسي بجد نرجع للطبيعه في كل حاجة زي زماااااااان

النهارده الحياه كلها أجهزه والكترونيات .. يعني الواحد بيبقى قاعد في البيت وحوالين منه كمبيوتر وتلفزيون وموبايل في ايده .. دا غير الغساله والتلاجه والبوتاجاز والشفاط والمراوح والكهربا والسخان
الخ الخ
الواحد من الوضع دا حاسس ان لو حد لمسه هيتكهرب ههههههههههه

انتي مثلا لما استخدمتي المشايه لأول مره وقعتي وربنا ستر .. وغيرك وقع واكيد اتصاب .. انما لو الواحد مشى او جري حتى ووقع اكيد النتيجه مش هتكون كدا

كذلك لو الواحد جه يلعب بطن ولا ضغط وتعب هيقف وياخد نفسه.. انما لو مع جهاز بيقوم بالحكايه دي زي اللي ف الجيم .. اكيد دماغه هتخبط في حاجة ولا ايده تتلوي وراه !

شكرا جدا للزوق الرفيع لردك على ردي في البوست اللي فات


واحييكِ على الموضوع المتميز

تقبلي مروري وتحيتي

قبلاوى يقول...

هو انا من أكسل الشخصيات اللى عرفتها فى حياتى .. ومن أكثرها حبا للأكل

قررت أروح جيم السنه دى .. رحت مره واحده

قررت أعمل ريجيم .. عملت اسبوع واحد بس

أحمد شريف يقول...

السلام عليكِ

هو موضوعك أجبرني على التحدث عن عدة أمور

ثقافتنا الغذائية مختلة وهي جزء من ثقافة استهلاكية مختلة بتسبب للمجتمع أزمات ، أتصور لو عُدلت ما شعرنا بكثير من أزمات مفتعلة منها الحاجة الشرهة للخبز والسكر رغم أننا نحتل المرتبة الأولي عالمياً في تجاوز المعدلات الاستهلاكية العالمية لنصيب الفرد من السكر ورغم أن مثلاً نصيب الفرد التمويني المدعم من السكر هو نصيب صحي جداً ويكفي الفرد إلا أننا نستهلك المزيد والمزيد وندعي بوجود أزمات ونحن من يختلقها بسلوكيات غير منضبطة وغير صحية

رسولنا الكريم صلوات الله وسلامه عليه يقول :
" نحن قوم لا نأكل حتى نجوع وإذا أكلنا لا نشبع "

نحن بحاجة لأن يلتف الجميع حول تثقيف الناس والمجتمع لتعديل الأنماط الاستهلاكية لهم

جيد أنك تمارسين الرياضة .. موفقة

sony2000 يقول...

هي فعلا الرياضه ممارستها صح لينا وبالذات علشان يهضم كول اللي قلتي عليه وبناكلو ده
بس اهو كسل بقي بعيد عنك
:)
ربنا يارب يهدينا للاصلح لينا:)

فراشة يقول...

بيجيبوا الموديلز مقطقطين عشان ينسونا ان المنتج بيتخن أصلا ونسرح ف الاموره والشيكولاته اللي معاها

الأكل ف ثقافتنا دسم جداوالاكلات مليانه نشويات لا وكمان بنحط زبده

انا صحيح بحب الشيكولاتات والمحشيات بس مش باكل بكميات وجسمي من النوع اللي لو اكلت كتير مش بيتخن بسرعه

بس المهم الصحة.. بنفكر نشتري المشاية هم شايفين انها هتخسسهم بس انا بحس ان التمرينات العادية مفيده أكتر للجسم

الرياضه عموما مفيده صحيا ونفسيا بدرجه كبيرة اولها بتزيل التوتر من الواحد احلى حاجه بقى لما بعمل رياضه بلاقيني منشكحه وبضحك طول اليوم

وحمدالله ع السلامه وحشتيني يا عسولتي

حنين الذكريات يقول...

وحشتنى ووحشنى التعليقات على موضعاتك الحلوه
هو بجد ليه دايما الواحده مننا تفضل ناسيه انها بتزيد فى الوزن لما فجأه تلاقى نفسها فوق ال150 كيلو تبدأ تفكر لما العماره تكون خلاص مش قادره تتحمل اكتر
ياريت نقلب المحطة لما لاتيجى الاعلانات بتاعت الحاجات اللى كتبتى عنها
وكل واحده تفكر قبل متدخل المطبخ او تجيب اكل من التلاجه اخرته ايه معاها مفيد ولا
والرياضه دى حاجه جميله جدا لابد عدم نسيانها دى زاى القراءه بترتقى بروح
ولعلمك أكلات بحرى جميله ومفيده جدا بس لو مركزناش مع الرز
ممكن سمك مع عيش وسلطه وبعدين فيه اسماك بتتعمل بطريقة السلق ودى بتكون افيد من الشوى
حتى المحشى مفيد جدا لو اتعمل صح ومش هيكون ضار على الديت
والمكرونه الباشمل لو حشيناها خضار هتكون افيد من اللحم مجهول المصدر الان
وبصى بقى كلامك عن الاكل فى الموضوع ده هيخلى ناس كتير عايزه تاكل انا مش منهم

ولما اجى اقبلك مش هجيبلك شيكولاته تانى
ونمشى سواى من غير مشايه على الكورنيش او على اللسان

SHAPE YOUR LIFE (ABOALI) يقول...

اممممممممممممممممم
جميل الدعوه للرياضه والنشاط دى ويا سلام بقى لو الرياضه دى تكون فى الهواء النقى كده الصبح بدرى وكمان تبقى روتين فى اليوم بتاعنا مش يومين موضه وخلاص ..لان الجسم فعلا محتاج للرياضه مش بس علشان الرشاقه لكن لانها بتقيه من امراض كتير جدا .

شكراااااا يا ليدى على التشجيع لان فى ناس فعلا الرياضه بعيده كل البعد عن حياتها.

ساسو يقول...

ازيك يا عسل
انا متابعاكي علطول
تصدقي اني كنت بفكر اني اروح جم والعب رياضه بس مش عارفه مكان كويس في دمياط ومضمون لو تعرفي دليني عليه

Lady E يقول...

لولا وزهراء : اكيد الرياضة بتخلي الانسان نفسيا مرتاح وبتخلي الحركة خفيفة

اضافة جميلة اوي اللي قولتيها يا قمرايا ومجتش على بالي وانا بكتب البوست

الرياضة مهمة جدا بس أغلبنا ناسينها

في الأول متعبة جدا جدا جدا علشان كده قولت عايزة صبر وارادة

نورتيني

Lady E يقول...

قلم رصاص : اينعم

ما احنا استوردنا اكلات كتير من امريكا وبقينا زيهم زي الهمبرجر والسوسيس والفرايد شيكن واي مقليات عموما ده غير باقي المشهيات زي الكاتشب والمايونيز يعني نص اكلنا ومطاعمنا امريكية

بالنسبة للجيم والاجهزة الرياضية فهي حاجه اختيارية يعني انا بفضل الاجهزة الرياضية اكتر من المشي او الايروبكس لأن في الجيم بيبقى ده وقت الرياضة لكن في الحياة عامة ممكن تقول طيب هعمل رياضة كمان شوية طيب مش مهم امشي دلوقتي الموضوع بيبقى فيه كسل شوية

وللرياضة العادية مميزات وللرياضة بالاجهزة الرياضية برضه مميزات المهم في الاخر يبقى في رياضة

بتقول فيها فعلا احيانا في ناس بتكهرب من كتر تعرضهم للشحن من الاجهزة الكهربائية ده غير كمان انهم بالموضوع ده بيتعبوا نفسيا وصحيا وعلشان كده الصلاة بتقلل من الشحنات دي لأن الشحنات دي سالبة والارض موجبة فبتمتص شحنات الانسان

الاصابات كلها زي بعضها لو حد بيجري ووقع برضه هتحصل له اصابات
كمان انا وقعت من المشاية تاني مرة مش اول مرة :) حبيت اخد بريك وأكمل رياضة فوقعت لاني ممشيتش والمشاية بتتحرك :)

وفي اوبشن انك تقفل الأجهزة اول لما تحس بالتعب لكن علشاني مكنتش اعرف المشاية كويس وقعت

تحياتي لقلمك الراقي وبجد مش مجاملة لما بقول انك من الاقلام اللي بحترمها وبنتظر تعليقاتها

دمت بخير

Lady E يقول...

يتبــــــــــــــــــع

Lady E يقول...

قبلاوى : مش انت لوحدك بس اللي كده :)

بس لازم يكون عندك ارادة اكتر من كده في موضوع الرياضة اما الريجيم ففي ريجيمات بتبقى قاسية جدا علشان كده اللي بيجربها بيزهق منها ، أحسن حاجة ان اللي عايز يحافظ على صحته ياكل كل حاجة بيحبها بس بمقدار مش كتير

وكويس انك وصلت لأسبوع في الريجيم :)

Lady E يقول...

أحمد شريف : وعليك السلام ورحمة الله وبركاته

فعلا اضافة مهمة جدا ، احنا اللي بنصنع أزمات الغذاء مع اننا أصلا مبنصنعش غذائنا يعني أغلب السكر والدقيق مستوردين وكمان بنستهلك كتير أوي منهم

نحن بحاجة لأن يلتف الجميع حول تثقيف الناس والمجتمع عن حاجات كتير اوي مش بس تعديل ثقافتهم الاستهلاكية

شكرا

Lady E يقول...

sony2000 : عارفاه انا الكسل ده :(

اللهم امين

Lady E يقول...

فراشة : :)

زبدة وسمنة كمان

اخدت بالي يا فراشة :) انتي اسم على مسمى فراشة وانتي فراشة

المشاية كنت بحبها قبل ما استخدمها لكن بعدما جربتها محبتهاش وممكن تعمل اصابات كمان لو حد وقع من عليها لو حابين الأجهزة الرياضية في اجهزة كتير احسن من المشاية

اكيد

الله يسلمك من كل شر يا قمرايا

Lady E يقول...

حنين الذكريات : وانا كمان وحشتيني ووحشتني مدونتك وموضوعاتك الجميلة ووحشني التعليق في مدونتك
ارجوكي اكتبي حاجة جديدة

بننسى لأن الحياة بتاخدنا والزيادة مش بتيجي مرة واحدة دي على فترات لغاية لما فجأه الوزن يبقى كبير مرة واحدة

جميلة اوي النصايح دي بس خيالية نوعا ما لأننا بنحب الأكل اللي متعودين عليه

وعن نفسي مبحبش السمك المسلوق :(

ومش ههون عليكي وهتجيبيلي شوكولاته :)

بحبك اوي

نورتيني

Lady E يقول...

SHAPE YOUR LIFE (ABOALI) : فعلا من اجمل الأوقات للرياضة بتكون الصبح بدري الهوا في الوقت ده بيكون منعش والطاقة الحيوية بتكون في أعلى وأحسن معدلاتها وزي ما قال الرسول صلى الله عليه وسلم البركة في البكور

انا بشجع نفسي معاكو يا ابو علي

دمت بخير

Lady E يقول...

ساسو : أهلا بيكي يا قمرايا اكيد عارفاكي وهل يخفى القمر انتي صاحبة مدونة فتافيت
واكيد سعيدة بمتابعتك للمدونة

هو في كذا مكان للجيم في دمياط انا مجربتهمش كلهم بس هقولك عن الجيم اللي بروحه هو للبنوتات والسيدات فقط فمحدش ممكن يضايقنا كمان معانا مدربة عسولة أوي المكان الأعصر عمارة الشرق اللي جنب الامريكين رابع دور هتلاقي الجيم على ايدك الشمال
بيفتح من الساعه 6 ونص ل9 كل يوم ما عدا الخميس والجمعة
اتمنى اكون افدتك ويارب تعملي رياضة وتدعيلي