حاجات كتير كنت فاكرة انها هتتغير لما أكبر ، حاجات كتير كنت حباها ومصدقاها ولما كبرت عرفت انها مش كدهكنت فاكرة لما اكبر هعرف اختار ومش هضطر للمجاملة او للنفاق الاجتماعي اللي كل الدنيا ماشية بيه !
دلوقتي مش هبقى حريصة ان كلامي يبقى مرتب ومفهوم انا هكتب كل اللي جوايا
هي ليه الدنيا مكلكعه كده وفي غيوم كتير فيها مش واضحة وكل واحد فيها مش بيعبر عن احساسه صح بيحب يبقى بيحب بيكره يبقى خلاص بيكره
ليه نهاية القصص الواقعية مش زي القصص اللي اتربينا عليها واحنا صغيرين مش النهايات السعيدة
ليه كذا واحدة وواحد يقولولي ايوة يا عم اتخرجتي ( مع ان لسه قدامي شهرين عالتخرج )
وهتسافري وتشتغلي على طول علشان دراستك مجال شغلها كتير ! نبرة الصوت نفسها مش مريحة الكلام بالطريقة دي شبه الحسد أكتر من التشجيع
هما مش واخدين بالهم ان حتى لو حصل واشتغلت فالشغل ده مش حاجة مريحة ، يعني مش هروح اخر الشهر البنك وأقبض المرتب وخلاص
شغل يعني كورسات كتير في اللغة والكمبيوتر والتنمية البشرية لازم اخدها بعد التخرج
شغل يعني انترفيوهات وامتحانات في الأول
شغل يعني مدة اختبار في الأول
شغل يعني تعب وصحيان بدري
شغل يعني مسؤلية
شغل يعني مجتمع كامل فيه الكويس وفيه الوحش واللي مش هيبقى طايقني ، اللي بيحبني واللي بيحقد عليا
وسفر يعني غربة
سفر يعني حرمان من كل مكان بحبه في مصر من النيل ومن المكتبة ومن راس البر
سفر يعني عزلة
سفر يعني تعامل مع جو تاني وناس تانية وحياة تانية
سفر بره مصر يعني بكون سفيرة لبلدي واي حاجة محسوبة عليا
سفر يعني رمضان بره مصر والعيد بره مصر بكل مظاهرهم واحتفالاتهم
سفر يعني حياة عملية مفيش فيها دفا كتير زي اللي بحسه في بيتنا في مصر
سفر يعني بسيب الأوضة بتاعتي بكل تفاصيلها ولعبها وأثاثها وديكورها وطاقتها اللي عارفاني وعارفاها من 21 سنة
سفر يعني أيام بتفوت بطيئة اوي وحنين
سفر يعني حاجات كتير ميحسهاش الا اللي بره بلده
السفر في مميزات بس مش زي ما الناس فاكرة انهم بيسافروا يلاقوا الفلوس في الشارع
وبعدين أنا عايزة اعرف غلطت في ايه لما بسأل ازاي ممكن اعمل ماستر
ايه المشكلة لما أكون طموحة !
دائما بيحبطوني
حتى زميلة من زميلاتي قالتلي يختي اتجوزي واقعدي في البيت بلا ماستر بلا نيلة
يعني حتى لو بسأل من باب العلم بالشيء ليه مفيش تشجيع ولا البنت في مجتمعنا طموحها عيب ولا ايه
ليه كل ما بحس ان المسافة بيننا قربت بحس اننا برضه بنبعد تاني ! انا خايفة ومستاءة
على فكرة مفيش مشكلة اني اكرر كلامي حتى لو كررته مليون مرة والمفروض انك تسمعني لو عايزني أسمعك
توقيع مواطنة مصرية سعيدة بشقائها على رأي الكاتب بلال فضل
هناك 8 تعليقات:
سافرى اعملى الماسترز برا ^_^
السلام عليكم
مش تسمعي لاحباط اى حد حواليكي
احلمى واحلمى وكوني طموحة
حتى لو مش وصلتى لكل اللى انتى عاوزاه
بس لازم نتعود بجد اننا نحلم
ونسعى لحلمنا
على اد امكانيتنا
عندمآ يسخر أي شخص من هوآيآتك أو طموحآتك أو أمنيآتك أو كتآبآتك
فلاتبالي
وكوني كما تتمني وتريدي
رزقكي الله ماتتمني وزيادة :)
تقبلي مروري
موش هقدر اقولك حاجه غير معلشي
لانك موش لوحدك فالجو ده برده
كل الناس اللي حوليكي وحولينا بردو بيحبطونا
كلنا بنتعرض لنفس الموقف بس بدرجات مختلفه
انتي بتجيلك من اللي معاكي بره
انا بيجيلي الاحباط ده من جوا
الاهل والقرايب...نفس الكلام بالميلي بيتقالي
بصي بجد انا خلصت دماغي
عملت بمبدأاضربيها طبنجه:)
يعني كبر الدي وروق الجي...اعملي اللي انتي عوذاه ومتلتفتيش لكلام حد خالص لان الكلام الكتير محبط اكتر منه مشجع
ربنا معاكي:)
هو كل حاجة كدا
ابقي كبري دماغك من الناس
طب تعرفي انا فيه ناس بيحسدوني اني دبلرت السنة اللي فاتت وبيقولولي يابختك لسه قدامك سنة كمان مش احنا
هنتخرج ونقعد في البيت
طب بزمتك دول يترد عليهم ازاي
انا كان نفسى اعلق
بس مش عارف ليه توقفت وراح الكلام
اكيد فى حاجة
بس هرجع ان شاء الله
مش عارفه أديكي دفعه تفاؤل لأن كلامك منطبق عليا 90% بس انا الحاجات دي اتقالتي وحصلت معايا خلاص :)
الدنيا مكلكعة دي حقيقة بس حاولي تعشيها ببساطه متكلكعيهاش على نفسك .. والنهايات مبتبقاش سعيده لاننا عمالين نحلم بنهايات خياليه جدا مش واقعية اعتقد الحل اننا نحلم ايوه ويبقى عندنا تفاؤل بس لو متحققش ميبقاش دي نهاية العالم لو حلم راح فيه غيره كتير لسه هنحققهم ان شاء الله
ههههه تقريبا بيحسدوكي فعلا فاكرين ان انتي هتروحي تلاقي الشغل بيتحدف عليكي وبمرتبات خيالية فبيبقى نفسهم يكونوا ف نفس الموقف مع انهم لو هم سافروا هيقولوا ع الغربه اضعاف الكلام اللي انتي قلتيه عليها ومش هيشوفوا اي جانب مشرق فيها
يوووه على احباطات الناس دي بجد مشكله لوحدها انا بس نفسي اعرف هم مالهم كملنا ولا اشتغلنا كل واحد رزقه مكتوب عند ربنا مش هياخد لا اكتر ولا أقل حتى لو عمل البدع
مش عايزة أقولك انا بيتقالي الكلام دا قد ايه بس سيبك انتي ابقى حطي الهيدفون او اعتبري كلامهم بالعكس يعني حد يقولك هتكملي ليه اعتبريه بيقولك ايوه كدا جدعه كملي وربنا معاكي اعتبريهم زي اللي فيلم آسف ع الازعاج يمكن احنا مبنسمعش صح هههههه
روقي كدا يا نونتي لسه الايام جايه كتير واللي متحققش النهارده يبقى هنحققه بكره والناس مفيش حاجه بتعجبهم على فكره ف (فكك منهم)
وطولت قوي معلش ويمكن آجي تاني كمان :) اضحكي بقى
ربنا معاكى يا ليدى
عارفة الى انتى حاسة بيه
بس انتى مسافرة فين يا بنتى انتى؟
وابنى ده مين الى هيقولها يا خالتو
عيب كده ع فكرة يا ليدى
هى دى الدنيا وياما هتشوفى منها بس كل ده ميجيش حاجة لو انتى واثقة فى نفسك وفى قدراتك صح
ساعتها لو مين قدامك مش هيهزك ابنى نفسك صح اوى عشان تبقى جامدة يا ليدى
وحشانى اوى ع فكرة
مش عارفة أقولك ايه يابنوتة بس بجد عندك حق تبقى مستاءة حياتنا غريبة زى ما تقولى ماشية على حبل بتتمرجع مش عارفة تمشى ثابتة واحنا كمان حواها بنتمرجح مش لاقين اللى بندور عليه والناس بقت غريبة الكسلان عايز الكل زية والمحبط عايز يحبط غيره
أقولك سيبك دورى على مستقبلك اللى بتحلمى بيه واوعى تندمى أو تملى اعملى اللى عليكى وإن شاء الله ربنا يرزقك بكل الخير
دمتى بكل الخير والحب والسعادة
إرسال تعليق