رحلة الأمس

طبعا انا بحب السفر وامبارح يوم 30/3 استعديت وظبطت الكتكوتة وسيري يا نورماندي على بركة الله

من قبل السفر بأسبوع كنت قلقانة علشان ذكرياتي مع أخر رحلة للقاهرة مش لطيفة خالص ختمت بحادثة شوفت فيها رحمات كتير من ربنا سبحانه وتعالى وفعلا ربنا هو المنجي من المهالك

طبعا منمتش الا ساعتين كالعادة
اتحركنا بعد الفجر على طول ع المطار لأن الطيارة كانت هتوصل الساعه 8 ونص وكان لسه النهار بيطلع والقمر لسه ظاهر ، انا مغرمة بالقمر وعندي استعداد أبص له وأسيب الطريق :)

الجو رائع وهادي ودمياط هادية جدا وروحانية جدا مليانة بأصوات المساجد والقرأن والصلاة وكأن الملايكة ماشية في الوقت ده

بدأنا رحلتنا بسورة البقرة بصوت المقرئ الشيخ الطبلاوي وبدأ النور يظهر ومنظر الشروق على الطريق الدولي الساحلي مع منظر البحر أو البحيرات اللي على الطريق مع منظر السحاب ياخد العقل

الجو برد شوية أوي وأخيرا النهار طلع وبدأت أشوف الطريق بوضوح أكتر
أحلى الصباحات على صوت بابا وصوته كان مرهق جدا وعنده برد وقلقت جدا عليه
وطبعا من وصايا بابا امشي على مهلك ومتستعجليش لسه قدامك وقت وربنا يحميكم
تفاصيل صغيرة زي دي بتفرق معايا جدا وبتخلي معنوياتي في السما

بعد شوية لقيت العربيات ماشية بطيء عرفت ان في رادار

بدأت اتعب ومعدتي توجعني وقعدت افتكر ايه اللي ممكن يخلي معدتي توجعني دلوقتي ؟
افتكرت تحذير جدتي الله يرحمها وخالتو مينفعش تاخدي شاور سخن وتنزلي في البرد علشان هتاخدي برد

قعدنا في أول استراحة في الاسماعيلية ودار الحوار التالي :

انا : في نيسكافيه ؟

- : أيوة يا فندم

انا : طيب في شوكولاته باللبن

- : أيوة في نسكويك

انا : طيب هاخد نيسكافيه

ورحت ظبطت حجابي وغسلت وشي ورجعت لقيت شوكولاته باللبن مش نيسكافيه قلت يمكن ده نوع نيسكافيه جديد :) وهو شكله كده بس فشربت منه لقيته مش نيسكافيه عااااااا بعد بشوية ندهت ل اللي اخد مننا الطلبات وقلتله على فكرة انا طلبت نيسكافيه وجالي شوكولا :) هو مفيش نيسكافيه؟

-قاللي بجد حضرتك طلبتي نيسكافيه ؟
-- أيوة :)
- أنا أسف والله يافندم هاتيه وأنا أغيره
-- حصل خير انا خلاص شربت منه
-لا يافندم بجد مينفعش هجيبلك نيسكافيه حالا
-- خلاص مش هقدر أشرب الاتنين مفيش مشكلة

وبعد شوية

- انا هجيب لحضرتك نيسكافيه حالا
-- خلاص والله انا مسامحة
- انا بجد أسف يا فندم بجد أسف وهجيبلك النيسكافيه
-- الموضوع منتهي بجد قدر الله وما شاء فعل

قلت في سري فينكم يا مطعم سي ستار تشوفوا المعاملة

ومشينا م الاستراحة وحسيت بألم في معدتي تاني طب وبعدين كده مش عارفة أركز في الطريق
وقفنا في استراحة تانيه وتالتة وبعدين تحاملت على نفسي وكملت الطريق وجينا عند بوابة الاسماعيلية وكان أقصى شعور بالتعب وقتها وحسيت ان روحي بتتسحب فحاولت أفوق نفسي وعملت تمرينات تنفس اتعلمناها في الHUMAN RESOURCE خففت شوية من احساس الألم

بعدها مشيت بسرعة نوعا ما وأنا مستمرة في التنفس بعمق وفجأه لقيت عربية ربع نقل بتشاورلي ان في رادار وفي لجنة قدام :( فهديت السرعة وفي اللجنة الأمين اللي هناك قاللي اركني – مش لابسة الحزام وبجري بالكتكوتة – وتقريبا شكلي صعبت عليه وحس اني فعلا مريضة جدا فقاللي بعدها على طول قبل ما اركن عدي
حتى انا اندهشت

وأول ما دخلت القاهرة حسيت ان روحي رجعتلي وسمعت جنات والجو كان حالم أوي وجميل وزحمة أوي
وقفت على المكان اللي المترو بيمشي فيه وعايزة أدخل الشارع طبعا ابتسم انا في القاهرة مفيش حد راضي يديلي طريق ف استخدمت طريقة الBASE بوز يعني تدخل ببوز العربية الشارع وكله هيوسع لك ما هو محدش عايز يخبط عربيته :) عملت الطريقة دي وطبعا العربيات اللي كانت معديه اتنرفزوا عليا :) بس ولا اهتميت مش هفضل مش عارفة أعدي الطريق أكتر من 10 دقائق يعني

ورحت المطار في المعاد بالظبط هما 9 دقائق تأخير بس علشان الزحمة
وطبعا فرحة كبيرة لما أي حد يكون رايح المطار بيستقبل ناس بيحبهم وواحشينه

وبعدين طلعنا على كارفور العبور والساعه كانت 9 ونص وهو بيفتح الساعه 10 قعدنا بره كارفور على الكراسي بتاعت ستاربكس واتكلمنا لغاية لما كارفور فتح

وبدأت أتعب تاني وبعدين لمحت من بعيد محل BABY SHOP جت في بالي مرمر أنا كده وابنها حبيب خالتو عبدالرحمن ، وبرغم ان المحل بعيد عن الهايبر لكن تقمست دور خالة عبد الرحمن و روحت واتفرجت على ملابس الأطفال وبجد جميلة ورقيقة أوي

وأنا طالعة م المحل لمحت صورة بيبي برضه فكرني ب عبد الرحمن ربنا يجيبه بالسلامه يا مرمر ويباركلك فيه

كان نفسي أصور اكتر من كده بس مقدرتش

قررت أجازف وأدخل محل THE BODY SHOP مع اني عارفة ومتأكده ان أسعاره هتبقى غالية جدا والمشكلة ان هو ده الأساس في مصر بالذات ، الحاجة تتكلف ويبقى فيها ربح كويس لكن بيضيفوا عليها ربح 500 في ال100 :(
الحاجة الوحيدة اللي عجبتني خلصت :( وبعدين استحرمت اني أشتري كريم مثلا سعره نفس مرتب موظف في شهر وقلت لما اشتغل ان شاء الله –عندي أمل- أبقى اجيب بال 145 جنيه كل اللي انا عايزاه :)

لفت نظري اعلان في كارفور أشتري بقيمة 1000 جنيه -بحد أدنى- وأربح 4 تذاكر سينما :) عمار يا أوكرانيا ولا تعليق على الإعلان هسيب كل واحد يفكر فيه بطريقته

رحنا ركن الكتب في كارفور وملقيتش كتاب زغازيغ ولا لماذا من حولك أغبياء :( بدأت اتعب تاني وروحي تتسحب تدريجيا ، رحت أغسل وشي يمكن أفوق وتعبت جدا لدرجة اني مكنتش عارفة هخرج من كارفور ازاي أصلا مش هسافر ازاي ، لمحت صيدلية وخالتو راحت معايا قلت للدكتورة اللي هناك عايزة أي حاجة للبرد في المعدة وكتبتلي حاجات بس دي حاجة انا مضطرة ليها لكن اللي أدهشني بجد ان كذا واحدة جت شرحت للدكتورة الصيدلانية حالتها وكإننا في مستشفى مش في صيدلية ، بيتهيألي اننا شعب مبيحبش المستشفيات وبيثق في الطبيب الصيدلي أكتر من الطبيب البشري

ماما كان معاها بنادول اخدته برضه ، 3 اصناف دوا اخدتهم ومفيش فايدة برضه لسه تعبانه يا خسارة الفسحة أنا كده ضربت اليوم ومستمتعتش بالرحلة

الدكتورة قالتلي المفروض عالغدى تاخدي شوربة خضار أو سوتيه
قلتلها المفروض اني هتغدى بره النهاردة وانتي بتقوليلي شوربة خضار ! :(
وقلت في سري على رأي كيكي اللي كنت حاسه انها معايا وشفت بنوتة شبهها بالظبط في هايبر كارفور
"عند أمه يا أدهم " ومع ذلك مقدرتش أصلا اتغدى بره

ورجعنا وفي الطريق اتحسنت شوية والألم
بدأ يزول والمسكن عمل مفعول والطريق كان رايق

و برغم اني أول مرة اتعب كده في السفر
الحمد لله وصلنا بالسلامه وكانت رحلة جميلة جميلة جميييييييلة ضحكنا فيها كتير ومتوهناش :)

نايمة الشوارع والبيوت

نايمة الشوارع والبيوت
والخطوة بتشق السكوت
وحدي وذكرى حب ضاع
بيطل من شباك قديم

عارفة ان احلامنا
تاهت في أيامنا
وحنيني وشعوري بقى شيء ملوش معنى

من أغنية شباك قديم للرائعة حنان ماضي

رضينا بالكلية وهي مش راضيه بينا

صورة للكلية يوم الريدكاربت وأخر يوم اروح فيه الكلية

انا نجحت اه والله نجحت في الكلية –الترم الأول- مع اني مكنتش حاطة أمل اني انجح مش علشان مذاكرتش كويس بس لكن علشان معظم الامتحانات كان فيها تخلف عقلي واضح
يعني مثلا عندنا الكتاب جزئين يجيبوا الأسئلة من جزء واحد بس واللي مذاكر الجزئين يذهب الى الجحيم

الا في مادة واحدة بس هي شكسبير ودراما لأني نزلت البوست بتاع عطيل وديدمونة عالمدونة
شمعة الروح

ولأني اصلا كان نفسي ادرس الرواية دي وكنت متأثرة بيها جدا وحافظة منها اقتباسات كتير والامتحان جه كله من البوست اللي كتبته في المدونة لدرجة اني في اللجنة كنت هقوم وأقول هيييييييييييييييييه يحيا العدل يحيا العدل
Yes هو ده الكلام وارقص يا حضري

وحليت حل يخليني اجيب امتياز بالمستريح لأن ده مش مجرد امتحان ده انا بشرح رواية بحبها وفيها مزيج معقد من أحاسيس الحب والبراءة والخيانة والموت وتكون المفاجعه اني اجيب جيد في المادة دي ! انا بجد مش مصدقه
دكتور زكي مش بيصحح لأنه كفيف فالمعيدات هما اللي بيصححوا ليه يضيعوا تعبنا ويحطمونا كده
من امتياز لجيد طب باقي المواد مش مشكلة حتى مادة دكتر اسلام اللي قاللي لما قدمتله بحث عن الروايات قاللي انتي مستواكي امتياز وجبت حاجه احسن من الامتياز بكتييييير ههههههههههههههه الا وهي مقبول بس مش زعلانه الا على مادة شكسبييييير لأن تقديري وقع في البيييييييييير

انا متعودة على الكوميديا السوداء دي من وانا في اولى كلية بس على رأي ثومه : متصبرنيش ما خلاص انا فاض بيا ومليت وقررت قرار منيل بنيلة مش نازلة الكلية تاني الا قبل الامتحانات اما اشوف اخرتها ايه مع كلية الهباب دي

حاسة اني ضيعت 4 سنين في كلية ملهاش لازمة – انا اللي اختارتها ومش علشان المجموع كان قدامي كليات كتير غيرها-

ومع اني عملت اختبار تحديد مستوى في الانجليش عالموقع ده
http://www.englishjet.com/english_courses_files/tests.htm ولقيتني اتقدمت level عن قبل ما ادخل الكلية بس برضه انا لسه صفر عالشمال في اللغة بالنسبة لواحدة كمان شهرين هتبقى خريجة كلية أداب اللغة الانجليزية – يا فرحتي-

في كلام مكتوب في موقع الكلية بتاعتي بالنسبة لقسم اللغة الانجليزية ولا تعليق :

رؤية قسم اللغة الإنجليزية وآدابها :

أن يكون قسم اللغة الانجليزية بالجامعة مركزا علميا ذو طابع متميز بين أقسام اللغات بالجامعات المصرية المختلفة في مجالات التدريس باللغة الانجليزية والترجمة والبحث العلمي والخدمات والاستشارات.

فعلا متميز اخر 25 حاجه
ايووووووووووة بدليل ان لسه لغاية النهاردة مفيش معمل لغات في الكلية

رسالة قسم اللغة الإنجليزية وآدابها :

يهدف القسم إلي مساعدة الدارسين علي إجادة المهارات الأساسية للغة الانجليزية وكذلك الترجمة بين الانجليزية والعربية وتزويد الدارسين بالمعلومات عن الأدب الانجليزي بفروعه المختلفة بغرض تأهيلهم للعمل في المجالات المختلفة ذات الصلة باللغة الانجليزية كالتدريس والترجمة والسياحة وغيرها. كما يسعي القسم إلي النهوض بالبحث العلمي سواء في التخصصات اللغوية والأدبية بالقسم أو سائر أقسام الجامعة من خلال إعداد الكوادر اللازمة والنهوض بالدراسات العليا فيما يتعلق باللغة الانجليزية وكذلك الخدمات .

هههههههههههههههههههههه وعاللي الضحكايه عاللي
الكلام ده علينا احنا؟ انتوا متأكدين؟ كلية الأداب بره مصر اسمها كلية العلوم الانسانية لكن في دمياط اسمها العلوم البتنجانيه



في أبيات من قصيدة للشاعر الجميل فاروق جويدة بتقول :

مهما توارى الحلم في عينى
وأرقنى الأجل
مازلت ألمح في رماد العمر
شيئا من أمل
فغدا ستنبت في جبين الأفق
نجمات جديده
وغدا ستورق في ليالي الحزن
ايام سعيده

اتمنى ان ده يحصل لأني بجد ، فعلا يعني زهقت واتخنقت

أمي يا ملاكي يا حبي الباقي الى الأبد

طبعا أكره كل المسميات لكل الأعياد ذات اليوم الواحد عيد الحب ، عيد الأم حتى عيد العمال :)

الحب عموما أو الأمومة مش محتاجه ليوم علشان نعبر عنها والا كنا عملنا يوم الأبناء بالمره وكل أب وام يراعوا أولادهم فيه وباقي السنه ولا يعبروهم

ف من الأخر الاعياد دي فيها كم كبير من الأنانية والاستعباط واصلا ملهاش معنى

ليه ؟ لأن في عيد الحب مثلا مش كل الناس بتحب وانا الحمد لله بحب ربنا وماما وبابا بس مش ده الحب اللي بيجيب ورد ودباديب في عيد الحب :)

وفي عيد الأم مش كل الناس أم وانا برضه منهم :)

بس طبعا النقط اللي فاتت دي مؤقته يعني مش هفضل كده طول عمري يعني ان شاء الله الوضع ده هيتغير ، بس برضه مش بحب الاعياد دي ولا هحبها

وتعالوا نتخيل مع بعض أي حد يتيم بيكون احساسه ايه في اليوم ده

ولأن الأنانية سمة البشر ولأن أمي هي أغلى وأعظم انسانة في حياتي ولأن محل الورد كان زحمة جدا النهاردة ولأن كل

الناس بتجيب هدايا النهاردة بالذات فبهدي لمامتي الكلمات البسيطة دي مع اني كاتباها من زماااااااان

حين يجن العالم من حولي

حين أشعر بالإغتراب

عندما ارتعب من الزمان

عندما تقيدني الأحزان

يتلاشى كل شيء ويبقى حضنك يا أمي يشعرني بالدفء والأمان

ربنا يخليكي ليا وانا بعشقك لأن كلمة بحبك قليلة عليكي

ربنا يحميكي ويباركلي في صحتك وعمرك ويحميكي من الانس والجن ومن أي شر

وربنا يسعدك ويفرح قلبك

-----------------------------------------------------

ع الهامش : كل ليلة من ليالي البعد عدت عليا وانت مش جنبي يا روحي يا نور عينيا يا نوووووور عينيا

حبي فيها كان بيكبر 100 ليلة واكتر والله 100 ليلة واكتر

انا بحب الاغنية كلها بس المقطع ده في بالي اوي النهارده عليكي

زهرة المدائن

برغم كل المواضيع اللي كتبتها وجهزتها للنشر في المدونة وبرغم ان المدونة دي مساحتي الخاصة اللي بتكلم فيها عن نفسي لكن الموضوع اللي هتكلم عنه بيلح عليا انه يخرج من عقلي وقلبي للمدونة ولعقل وقلب كل اللي هيقرأوه

جتلي كذا رسالة عالموبايل بالعربي والانجليزي بتقول ان هيحصل هدم للمسجد الأقصى وان الموضوع ده اليومين دول !!!!!!!!!!! وانا مش عارفة الكلام ده حقيقي ولا لأ لكن عالعموم
البوست ده مجرد تذكير بمكانة المسجد الأقصى

ل اللي نسيوا في زحمة الحياه يعني ايه المسجد الأقصى

قال تعالى : " سُبْحَانَ الَّذِي أَسْرَى بِعَبْدِهِ لَيْلًا مِنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آَيَاتِنَا إِنَّه هُوَ السَّمِيعُ الْبَصِيرُ " سورة الاسراء

صورة الصخرة المشرفة التي عرج منها الرسول محمد صلى الله عليه وسلم ليلة الاسراء والمعراج

عن أبي ذر الغفاري قال : تذاكرنا - ونحن عند رسول الله صلى الله عليه وسلم - أيهما أفضل : أمسجد رسول الله أَم بيت المقدس؟ فقال رسول الله :"صلاة في مسجدي أفضل من أربع صلوات فيه، ولنعم المصلى هو، وليوشكن أن يكون للرجل مثل شطن فرسه من الأرض حيث يرى منه بيت المقدس خير له من الدنيا جميعا.قــال : أو قال خير له من الدنيا وما فيها ". (أخرجه الحاكم وصححه ووافقه الذهبي)


البناء

ثاني مسجد وضع في الأرض, عن أبي ذر الغفاري،، قال: قلت يا رسول الله أي مسجد وضع في الأرض أول؟ قال:" المسجد الحرام"، قال: قلت ثم أي؟ قال:" المسجد الأقصى"، قلت: كم كان بينهما؟ قال:"أربعون سنة، ثم أينما أدركتك الصلاة فصله، فان الفضل فيه." (رواه البخاري.)

للمسجد الأقصى قدسية كبيرة عند المسلمين ارتبطت بعقيدتهم منذ بداية الدعوة. فهو يعتبر قبلة الأنبياء جميعاً قبل النبي محمد صلى الله عليه وسلم وهو القبلة الأولى التي صلى إليها النبي قبل أن يتم تغير القبلة إلى مكة.

وقد توثقت علاقة الإسلام بالمسجد الأقصى ليلة الاسراء والمعراج حيث أنه أسرى بالنبي من المسجد الحرام إلى المسجد الأقصى وفيه صلى النبي إماماً بالأنبياء ومنه عرج النبي إلى السماء. وفي السماء العليا فرضت عليه الصلاة

ويعتبر المسجد الأقصى هو المسجد الثالث الذي تشد إليه الرحال، فقد ذكر النبي صلى الله عليه وسلم ان المساجد الثلاثة الوحيدة التي تشد إليها الرحال هي المسجد الحرام ، والمسجد النبوي والمسجد الأقصى .

قال نبي الإسلام محمد صلى الله علية وسلم: {لا تشد الرحال إلا إلى ثلاثة مساجد: المسجد الحرام ومسجدي هذا، والمسجد الأقصى}.

وروي عن أم المؤمنين أم سلمة أنها سمعت رسول الله يقول:
منْ أَهَلَّ بِحَجَّة أوْ عُمْرَة من المسجد الأقصى إِلى المسجد الحرام غفر له ما تقدّم من ذنبه وما تأخّر" (سنن أبي داود)
وللصلاة في المسجد الأقصى ثواب يعادل خمسمائة صلاة في غيره من المساجد

. قال : "الصلاة في المسجد الحرام بمائة ألف صلاة، والصلاة في مسجدي بألف صلاة، والصلاة في بيت المقدس بخمسمائة صلاة".

فهذه الاحاديث كلها تدل على مكانة المسجد وعمق علاقته بالإسلام وهناك العديد من الاحاديث الأخرى التي ذكرت المسجد الأقصى وحثت على زيارته والصلاة فيه

كل المعلومات مأخوذة من موقع ويكيبديا

http://ar.wikipedia.org/wiki/%D8%A7%D9%

84%D9%85%D8%B3%D8%AC%D8%AF_%D8%A7%D9%84%D8%A3%D9%82%D8%B5%D9%89

زعلنا أوي بعد مباراة مصر والجزائر لما كانت مصر صورتها مشوهه في الاعلام العالمي وان في تعتيم اعلامي ع اللي حصل في السودان بعد ماتش مصر والجزائر

أيامها افتكرت فلسطين المنسية والتعتيم الاعلامي الكبير عليها وان محدش عارف عنها حاجه وان الاعلام بيظهر ان الفلسطينين وحشين وارهابيين وده شوفته وسمعته بنفسي في قناة اخبار عالمية واتغاظت جدا يوميها ان الحقيقة مش واصله او بمعنى اصح الحقيقة مقلوبه

يمكن الكلام اللي في مدونتي ده مش هيغير الوضع لكن بيقول ان المسجد الأقصى في قلوبنا وبرغم الهبل اللي شغال في الاعلام ليل نهار برضه بالعند فيهم مش ناسيينه

لقاء الخير+تحديث هغني

تحديث : لما رحت الكلية النهاردة لقيت ريد كاربت زي ما نكون في هوليود ومشيت عالريد كاربت :) كان في ندوة شعرية -اخت الملوخية بالضبط- واتحاد الطلبة وهما صحباتي اساسا قالولي ان في حفلة في الكلية يوم الاتنين بعد بكرة
ان شاء الله هغني فيها هي صحيح مش الحفلة اللي كانت في دماغي لكن أهي يلا حفلة والسلام وقلقانة خصوصا ان صوتي اليومين دول بقى عامل زي ال اف ام كل شوية بيقطع واحيانا بيروح
غالبا هغني لفيروز وغالبا كمان الاغنية هتبقى بكتب اسمك يا حبيبي او من زمان لعايدة الأيوبي لسه مقررتش

حاجة تانية انا رجعت للقهوة تاني ومش فنجان ولا حاجة ده مج كبير علشان أقدر اكمل باقي اليوم يااااااارب عدي الأسبوع ده على خير
---------------------------------------
الصورة من حديقة التاريخ بعدستي

ملحوظة البوست طويل واللي هيضايق ميقرأش من الأول متفقين؟

لقاء القمة في بورسعيد بجد الحضور كان رااااااااائع
نبدأ من الأسبوع اللي قبل اللقاء علشان السؤال اللي اتسئلته كتير عن البوست اللي فات

كنت مضغوطة جدا-ومازلت- كلية وبعدها كورسات لغاية الساعة 8 بالليل فالبوست اللي فات نتيجة اني ضغطت على نفسي زيادة عن اللزوم ولو مكنتش كتبته مكنتش هقدر أواصل وأحضر اللقاء النهاردة

المهم ليلة اللقاء امبارح مجاليش نوم تيرارارا :) كنت بتفرج على mbc max الفيلم الفوق الفظيع brave heart
وبعدين نمت الصبح وبصراحة كنت قلقانة وبفكر مروحش اللقاء وخصوصا بعدما أميرة قررت انها مش هتروح اللقاء فمبقاش في حد من دمياط يشجعني اني اروح بس كنت خلاص ظبطت كل حاجة اني رايحة اللقاء وكمان قولت انا رايحة في نية خير فمش لازم اضيع فرصة عمل خير وكمان كان نفسي أشوف المدونين الحلوين اللي كنت معاهم النهاردة

المهم فتحت عينيا قبل ما المنبه يرن بدقيقة وفضلت في صراع مع نفسي أقوم ولا لأ
وفي الأخر الحمد لله قمت
وجبنا حاجات للرحلة واتوكلنا على الله قولنا دعاء السفر وروحنا طريق بورسعيد طبعا بالكتكوتة
وخالتو حبيبتي كالعادة تورست جايد هايلة احنا رايحين بورسعيد ودتني طريق الاسماعيلية الدولي :)

ولفينا ورجعنا تاني على بورسعيد وطبعا الردار على الطريق الدولي الساحلي يوم الجمعة بيكون خنيق وبيكون في لجنة كل شوية
المهم اخيرا وصلنا بورسعيد وسألنا تاكسي نروح للممشى بتاع ديليسبس منين فقال لنا وصفة سهلة ووصفة هايلة بس الحمد لله وصلنا وملقيناش مقلة لب وبعدين اتصلت بالقمرايا شفقة فجت خدتني هي واحسان
وايناس – اسم غالي - :) نهر الحب

وبعدين رحنا حديقة التاريخ ، بجد يا ايناس – نهر الحب- يسلم ذوقك حديقة بجد الطبيعة فيها ساحرة
والشجر والورد وشكلها كله على بعضه حلو وكمان تخطيطها ليه علاقه بالنكسة وبالانتصار ومحدش يسألني ليه لأني مش هشرح :)

وبعدين أول لما دخلت ايناس عرفتني بالموجودين ومعلش مش هقولهم لأن انا حاليا مش مركزة خاااالص وبرضه اتلخبطوا بيني وبين احساس طفلة وفعلا مفيش فايدة لازم يا احساس طفلة لما ترجعي من اليابان ان شاء الله نروح لقاء مدونين سوى علشان محدش يتلخبط بيننا تااااني

قعدنا واتكلمنا مع بعضينا شوية وسلمنا ع الأطفال ذوي الاحتياجات الخاصة وبعدين لقيت حد بيقوللي انتي ليدي قولتله أيوة وعلى فكرة يا باشا والله انا كنت حاسه ان انت بس خفت أقول ويطلع حد تاني :) وكنت هبقى محرجة جدااااااا

وكمان أنوسه نهر الحب جابت دي جي وكان فيه فقرات جميلة أوي وفي ناس كانوا لابسين دباديب وكرمبو وشخصيات تانيه كانوا بيرقصوا مع الأطفال وكمان كان في فقرة الأراجوز والرقاصة :) ومحدش يفهم غلط الرقاصة دي عروسة زي اللي بيبقوا موجودين في مسرح العرائس
وكمان الدي جي بجد فنان وعرف يتعامل كويس مع الأطفال

بعدها روحنا عالمطعم وعملوا لنا طربيزة كبيرة وكإننا في قاعة مؤتمرات –زي لقاء المنصورة-وكل الناس جالهم أكلهم ما عدا انا وفاتيما وسومة وبيوتيفول مايند
وفاتيما حبيبتي بعدما لما جت البيتزا بتاعتها مرضيتش تاكل غير لما البيتزا بتاعتي تجيلي وعزمت عليا كتير
وذنبت نفسها معايا لغاية لما البيتزا بتاعتها بردت وأكلتها باردة بسببي - ربنا يكرمك يا أحلى مذيعة عالبلوجر المصري :)وبعدين اخيرا البيتزا بتاعتي جت بعد ساعة ونص :) وكل المدونين عملولي انا وهي احتفال وسقفوا :) يا سلام لو يكونوا موجودين في حفلة التخرج ويسقفولي نفس التسقيف – ده لو عملولنا حفلة تخرج اساسا – بجد كانت لحظة عاطشيفية :) ومش بس كده كمان في المطعم فين وفين على ما عرفت احاسب
وواقفة مستنية الفرج اني أحاسب والمفاجأه كمان بعدما دفعت الحساب وروحت اكتشفت ان في غلط في الحساب وحاسبوني على حاجات أكتر من اللي أخدتها ومن الاستعجال مأخدتش فاتورة واتصلت بالمطعم
وقولتلهم والله أعلم بقى ايه اللي هيحصل
بس على أي حال مش هدخل المطعم ده تاني اطلاقا مطلقا بالتلاتة
بس برضه مميزات موضوع المطعم ده هو أكيد ليه مميزات لما افتكرها هبقى اقولها
روحنا انا وسومة وليساندرا وبرضه ضللنا الطريق واحنا راجعين والطريق كان زحمة وضلمة في نفس الوقت
بس الحمد لله وصلنا بالسلامة

بجد الحضور كان مميز
نيفين صاحبة مدونة صباح ومسا ، ايناس نهر الحب ، نوران بنت خيخية والجميل شريف ابن نوران
، فاتيما ، شفقة ، ماما أمولة ، سارة رحيل ، داليا اهو ده عيبه ، دعاء ربع ضارب ،
خالد همس الأحباب ، شريف PASHA ، أبو خالد أبو المدونين ، الشرير وليد هي وظروفها
بيوتيفول مايند ، عسقول ، محمد ابو العربي ، احسان ويارب مكونش نسيت حد

البوست الجاي ان شاء الله هيبقى عن انطبعاتي عنهم علشان مطولش البوست اكتر من كده

اللي بجد افتقدتهم النهاردة حبيبتي حنين الذكريات وكيكي وأميرة على كوكب مهجور وفراشة وطبعا خالتو ستيتة

كل لقاء وانتم طيبين ويارب دائما متجمعين في الخير وبجد كان يوم جميل جدا بيكم

عجز الروح

"اكتشفت ان كل كتابة هكتبها ستؤرق شخص أو ترضي غرور أخر "

بتصرف من كتاب اسكندرية / بيروت ل نرمين نزار

نفسي أوي أقول طظ في الليسانس وطظ في الحياه وطظ في طيبتي اللي مودياني في داهيه

مسا النور والهنا عالموجودين هنا

أصبحت أيامي تمر بسرعة البرق

اليوم يمر كدقيقة والأسبوع كثواني معدودة

والشهر يمر كلحظات

والسنة تمر كالحلم الوردي الجميل

هذا ما أردته لنفسي أن أكون شيئا مذكورا وسر النجاح ان انت لازم تخلقه لازم نتعب ونعافر ونحاول نقدم أحسن حاجة عندنا علشان ننجح وبجد النجاح طعمه حلو أوي وبينسي أي تعب قبله

نرجع ل اللغة العربية الفصحى تاني

أردت أن أذيب روحي في روح الكون الكيبر وأستشعر السعادة اللامتناهية من تحقيق ذاتي وحبها وتقديرها وبجيبلها شوكولاته كمان :)

المهم ده كان كلام كتبته في المذكرة الصغنونة بتاعتي أصل انا بقى لي كام يوم مشغولة لدرجة ان معنديش وقت أكتب حاجة جديدة عالمدونة وأخيرا ارتحت شوية قبل ما أدخل في دوامة كورسات وشيتات وأبحاث جاديدة

يوم السبت اللي فات كان في لقاء مدونات دمياط والفكرة كانت بيني وبين أميرة على كوكب مهجور بس في الأخر قولتلها مش لاعبة :) والبونيه يا عيني هي اللي عملت اللوقاء
والمعاد الأخير ل اللوقاء جه فأجه وكنت مترددة اني احضر اللقاء لولا مرمر كانت بتتصل بيا كل 5 دقائق وتأكد عليا اني أحضر
وقلت هحضر نص ساعة أسلم عالبنوتات وأتعرف عليهم وأمشي فورا :)

ولأني روح طفلة مش عايزة تكبر رجعت في كلامي أول لما اتعرفت بالبنوتات والنص ساعة بقت ساعة ونص
بجد بنات عسولين وطيوبين وحبوبين أوي وأكتر حاجة عجبتني اني حسيت اني عارفاهم من زمان وكمان أفكارنا كانت متقاربة وكمان انهم بنوتات متدينين ومش متشددين يعني نقدر نقول عليهم صحبة صالحة

أميرة على كوكب مهجور : طبعا مش محتاجة كلام أنا اتكلمت عنك كتير قبل كده وبجد شكرا ليكي على تشجيعك ليا اني أحضر اللقاء لأنه بجد كان لقاء جميل وأنتي عملتي مجهود انه ينجح
ربنا يسعدك ويفرح أيامك

امرأة من ثلج : لما اتكلمنا قولتلها ايه الصقيع ده :) بنوتة عسولة وطيوبة أوي ومتحدثة لبقة وأفكارها جميلة جدا
وبالتوفيق يا قمرايا وعقبال ما مدونتك النونو تحبي وتمشي وتطلع سنان كمان :) ، عقبال مليون سنة تدوين وانتي منورانا وعايزة أشوف الاحتلال الدمياطي :) و ولا تزعلي احنا الاتنين روح طفلة مش عايزة تكبر

ريمان : شخصية ودودة جدا وطيوبة جدا وروحها جميلة بجد وريمان فعلا تستحق اسم مدونتها ملائكيه
و ولا يهمك يا ريمان أنا واحساس طفلة واحد :) كلنا أطفال :)

يارا : هي الهدوء والسكينة والطيبة بتاعت اللقاء ، هادية جدا ورقيقة جدا ، بنوتة مبقتش موجودة في العصر اللي احنا فيه ده

بنت الاسلام : أو خلينا نقول أم المدونين- مع انها صغنونة- عملت جو ل اللقاء بأسئلتها ومناقشاتها وبجد بنوتة مثقفة جدا ولبقة جدا وطيوبة جدا وطول اللقاء كانت عمالة تقوللي يا طفلة وانا كنت عمالة اقنعها اني روح طفلة مش طفلة بس :)

بجد بجد اتشرفت بمعرفتكوا يا بنوتات ومدونات بلدي ويارب تبقى معرفة خير دائما
وكان نفسي أشوف باقي مدونات دمياط بس ملحوقه ان شاء الله يوم الخميس11/3 الجاي هنروح جمعية رسالة اللي في دمياط والبنوتات اللي عايزين يجو معانا ويشاركوا في عمل الخير يقولولي في التعليقات وأنا هحاول اجيبلكم رقم موبايل علشان البنوتات اللي تحب تحضر يعرفوا مكان جمعية رسالة

ولأول مرة أقول اني هحضر لقاء قبلها ، بس انا ان شاء الله ناوية أحضر لقاء بورسعيد وفكرة اني اروح كانت موجودة لكن بعد كلام وتشجيع شفقة وفاتيما ليا وانا بحبهم اوي هما الاتنين ف ان شاء الله هروح ويارب نقدر نسعد الأطفال اللي هنشوفهم ويارب أعرف أوصل بورسعيد بالكتكوتة ويارب يبعد عني يوميها اني ارجع في كلامي :)
ويارب تيجي يا خالتو ستيتة نفسي أشوووووووفك جداااااااا

------------------------------------------------------------

ع الهامش : حنين حنين حنين أنا دايبة فيكي حنين أنا دايبة فيكي حنين وحشتيني ومفتقداكي
اوي يا حنييييييييييييين
بجد انا من غيرك زي المساكين يا حنين

كيكي : انا بقيت مدمنة أورنج جوس وأغنية عوعو عو علشان بيفكروني بيوم لما اتقابلنا ، وحشتيني أوي ومفتقداكي بجد ومسجاتك اكتر مسجات بتضحكني من قلبي

حنين وكيكي بحبكو أوي وربنا يخليكو ليا

ملحوظة كل اللي هيعلقوا عالبوست ليهم وردة من اللي في الصورة

من أيامي

اذا أردت شيئا بشدة هيجيلك

كان في كورس مش تنمية بشرية خالص لكن كورس ادارة أعمال – تبع العفاريت مش اعمال يبقى عفاريت على طول اشتاتا اشتوت :) – نياهاهاهاها

يعني الموضوع مش تبع دراستي خالص
المهم الكورس ده سبحان الله كان الترم الأول أيام امتحاناتي ومكنش ينفع بأي حال من الأحوال اني أخده وبعدين جه نفس الكورس بنفس المدرب الترم التاني برضه في وقت صعب وزحمة بالنسبة لي وبصيت للإعلان وقلت في سري والله نفسي أحضر وحابة الكورس جدا بس المعاد مش مناسب يلا الحمد لله على كل حال

رحت المكتبة النهاردة ولقيت ايه؟ لقيت المعاد اتغير :) والمعاد مناسب بالنسبة لي الحمد لله
بس الاستفسار مكنش في المكتبة كان في مكتب اسمه في السما – عجبني الاسم- طبعا مش هقولكوا لفيت عالمكتب ده أد ايه -وأنا أصلا بتوه قدام بيتنا - :) لحد ما الحمد لله لقيته ، كان في هناك بنوتتين عسولين أوي بنوتة اسمها رنا وبنوتة اسمها نسرين – بقول أسمائهم علشان منساش – ولقيتني تلقائيا بحجز الكورس ، وانا كنت رايحة استفسر بس


دعاء رائع

في دعاء جميل جدا عرفته من فترة وافتكرته النهاردة

" بسم الله الرحمن الرحيم

وصلى الله على سيدنا محمد وعلى آله وصحبه وسلم تسليما كثيرا

اللهم إني أسألك بالعرش والكرسي والنور الذي عليه سيدنا محمد صلى الله عليه وسلم

أن تسخر لي قلب من أحوجتني إليه وأن تكفيني شر من يقدر علي ولا أقدر عليه يا من بيدك ملكوت

كل شيء أنت عالم به وقادر عليه "

تنويه :

لمدونات دمياط الأعزاء اللي عارفة انهم كتير وعزوة ما شاء الله زي دودو دعاء
وفتافيت وندى نصر اللي عرفت مدونتها بالصدفة في لقاء مدونات حريمي طبعا يوم 17/ 3 ان شاء الله والموضوع بالتفصيل عند أميرة على كوكب مهجور

http://amira3lakawkab.blogspot.com/2010/02/blog-post_28.html

أغنية

الأغنية اللي في البلوج حاليا هي بحار ل بلاك تيما والحقيقة الأغنية عاجباني جدا وحبيتها أيوة انا حبيتها
و الفريق ده فيه المطرب اللي مثل دور سواق التاكسي في فيلم 1000 مبروك الفيلم اللي لما شوفته كنت بغني نفس أغانيه لما ببقى في الكتكوتة " يا دريكسيوني يا دريكسيوني يا دريكسيوني ، يا دبرياجي يا دبرياجي يا دبريااااجي " :)

أخيرا :-

لعيون حنين انتيمتي ولعيونكم كتبت استبيان التقييم الذاتي في ملف وورد ورفعته
علشان اللي عايز يحل الأسئلة ، واللي هيحل الأسئلة يبعتلي الاجابات وأنا هقول له الاجابة لأن علشان يعرف الاجابة في جداول وحسابات وحاجات غريبة فبدل ما اكتب كل الكلاكيع دي هوفرها عليكو وهحسب الاجابات وابعت لصاحبها أو صاحبتها الانماط الأربعة لشخصيته وأعلى وأقل نمط

وحاجة كمان أنه يهمني أعرف أنماط الشخصيات الجميلة اللي بتتابع مدونتي

لو حد مش حابب يبعت الاجابات في أخر بوست ممكن يبعت الاجابة ع البوست اللي فات أو اللي قبله علشان المدونة عليها موديريشن في البوستات القديمة

بالنسبة لأنماط الشخصيات ففي شخصيتين بحبهم أوي ومتأكده من نمط شخصياتهم وهما فراشة ومرمر تعبت بجد الاتنين نمطهم حسي – مشاعرهم وأحاسيسهم عالية ما شاء الله – ودي حاجة أنا متأكده منها من قبل ما يعملوا الامتحان

وده اللينك :

http://www.4shared.com/account/file/233933873/ef3587db/___online.html

بالتوفيق ويارب تنجح يا تتح :)

--------------------

ع الهامش : وقد يجمع الله الشتيتين بعدما يظنان كل الظن أن لا تلاقيا
شعر قيس الملوح
وغناء فيروزة الروح فيروز

سمعني سلام بودعك

احلى حاجة في الكلية انها بتفتح شهيتي عالكتابة وبلاقي مادة ممكن اكتب عنها علشان بعد كده ابقى افتكر ذكريات أيام الكلية وخصوصا اني اخر ترم ويارب يجعله أخر الأحزان عايزة اخلص بقى من الكلية دي بكل حاجة فيها

خلاص بقى 4 سنين اللي نقول نعيده ده لو كان بيضة وفيها كتكوت كان زمان الكتكوت في الحضانة دلوقتي ، وبعدين اصلا اول مرة أنجح اني اقعد في مكان دراسي كل الفترة دي ، دائما كنت كل سنتين بالكتير أغير المدرسة مش علشان مشاغبة لا سمح الله دي حاجة اتمناها لكن تبع شغل بابا والمكان اللي كنا بنبقى فيه

اللي مش حلو بقى اني لما بحتفل بنفسي اني نزلت الكلية يوم بعدها مش بنزل الكلية أسبوعين أيوة هذه حقيقة

قضيت ليلة غريبة بحاول اجبر نفسي اني انام بالعافية بنظام هتنامي يعني هتنامي ولما كنت بصحى كنت بقول شوية أدعية مع حسبي الله ونعم الوكيل وبنام تاني
نزلت النهاردة والجو كان برد بغلاسة ومكنتش عاملة حسابي انه هيبقى برد أوي كده ومع اني صحيت بدري على غير العادة الا اني نزلت متأخر كالعادة

مفاجعة البطارية بتاعت الكتكوتة نايمة وشده اللحاف والبطانية ما هو الجو برد حقها
في الوقت ده المطر كان لسه نازل خفيف (زي وقت الحادثة) حسيت ان ربنا بيحبني مش مستعدة أسوق في الجو ده والطرق المزحلقة وحسيت ان لو كنت رحت الكلية بالكتكوتة النهاردة اكيد كانت هتحصل حاجة مش كويسة
وكان احساس قوي اوي -وقد كان وانا راجعه من الكلية كان في حادثة كبيرة موتوسيكل خبط بنوتات أطفال جايين من المدرسة والحادثة كانت في الطريق اللي دائما بمشي منه الحمد لله غالبا احساسي مبيخيبش- ، نرجع لقبل المحاضرة تاني قلت الحمد لله واخدت تاكسي ووصلت الكلية دكتر أنور لابس بدلة جميلة وشيك أوي انا استغربت انه مش جايب عروسته معاه ما هي بدلة بالشياكة دي تنفع في الأفراح لكن خسارة في الكلية

وطبعا زي ما زميلاتي حكولي زي محاضرة الأسبوع اللي فات ان احنا كطلاب سنة رابعة فاشلين في الانجليزي والمفروض منتخرجش م الأخر محناش نافعين ، والمحاضرة كلها كان بيعلمنا الجرامر من أول وجديد وعمال يتريق علينا وعلى اخطائنا في الامتحان والبنات الهاطلة بيضحكوا وبعدين صبحتي قامت وقالت للدكتر انت بتتريق علينا ليه – عجبتني أوي- قالها مش قصدي انا قصدي اضحكوا على أخطائكوا علشان متكرروهاش يا سلاااااااام

والدكتر قال لنا ممكن نخلي المحاضرة الساعة 12 وانا قولت هيييييييييييه هنام براحتي بقى والبنات ولاد اللذينا
قالوله لأ يا دكتر 10 يا جماعة 12 قالولوا لأ 10 اه يا دفعة عايزة يتولع فيها بجاز الساعتين دول يفرقوا معايا هنام براحتي بس أقول ايه بقى ما نصهم متجوزين وعايزين يروحوا علشان يطبخوا

بعدها رحنا نشوف السكشن امتى وقابلنا مين دكتر الفرنساوي ويا حبيبي اللي يخاف من العفريت يطلعلو
حبيبي الفرنساوي حبيبي بقيت معيدة فيه 3 سنين معايا وكل سنة المنهج بيتغير فعلا وزارة التعليل

رحت السوبر ماركت وانتقمت بقى جبت شوكولاتات كتير وحبيبي شيتوس بعد كده هيسموني فتاة الشوكولاته والشيتوس ، بعدها رحنا مكتبة مبارك انا وزميلاتي من اول اسبوع عاملين لينا بحث عن قصة قصيرة نختارها
دورنا في القصص والروايات ، من يوم ما دخلت الكلية نفسي اقرا كتاب واحد انجليش من اوله لأخره غير كتب الكلية وحتى كتب الكلية مش بقرأها من أولها لأخرها والغريب ان كان في روايات درسناها ومفتكرناش منها ولا كلمة الا العنوان :(((((((( خيبة والله خيبة

بعدها رحت قاعة من القاعات في المكتبة قرأت شوية في كتاب الأحاديث القدسية
ايه الروعة دي وايه الجمال ده والطمأنينة اللي حسيت بيها دي
واحد ربنا دخلة الجنة بحسنة واحدة
واحد ربنا غفرله علشان قاعد مع ناس بيذكروا ربنا بس مكنش في نيته ذكر لكن
اهل الذكر جليسهم لا يشقى

الله
معقول يا رب سبحانك انت جميل كده وبتحبنا كده اومال ليه بيخوفونا منك وكل كلامهم نار وعذاب وعقاب

انا بحبك وواثقة انك بتحبنا وخلقتنا علشان بتحبنا ومهما اتألمنا فبنتألم علشان نتعلم

ياللي بتبحث عن اله تعبده

بحث الغريق عن اي شئ ينجده

الله كريم ورحمن رحيم

احمل صفاته وانت راح توجده

وعجبي

-----------

ع الهامش : في دايرة الرحلة أيامنا ع المولى

ليلنا أيا ليلنا مرة هتحلى لنا

تميل على ميلنا في دايرة الرحلة

محمد منير