الأحد، 24 يناير 2010

قلت أغير مود الامتحانات الخنيقة شوية والسيول والكوارث والبرد وكل الحاجات اللي بتضايق

بمناسبة السيول ياريت اي حد بيكلم موني الشريف يطمنني عليها علشان هي في اسوان وانا قلقانه جداااااا عليها

الفيديو اللي فوق ده أغنية الرقصة السلو اللي كانت في فرح ابن خالي يوميها لما روحنا من الفرح دخلت عالنت وعملتلها داون لود

الأغنية هادية ورمانسية جدا وجميلة بجد أنا بحبها أوي وان شاء الله لما تسمعوها هتحبوها انا محبتش اترجمها لأنها زي ما هي أحلى ما تكون مترجمة

ع الهامش : موضوع النقاب والمشاكل اللي كانت عليه خلصت الحمد لله من تاني امتحان اللي هو كان امبارح وكان نكد بمعنى الكلمة (نكد= نقد أدبي ) ومع ذلك اللجنة برضه كانت منيلة بنيله وفي بنوتات كتير جالهم اغماء اقربهم البنوتة اللي كانت في البنش اللي قدامي والضاكتور خريج كلية الزراعه مش الطب اللي في كليتنا معملهاش حاجة !

لو انا لوحدي كنت حاسة ان الامتحان صعب كنت هقول في حاجة غلط لكن الامتحان الحمد لله كان صعب علينا كلنا نكد فعلا يعني وكمان الكتكوتة عملتها معايا وحلفت مش هتوصلني الكلية ومرضيتش تدور

بس انا ان شاء الله متفائلة بإمتحان بكرة ان شاء الله مع انها مادة نفس ذات الدكتر اللي بيدرسلنا المادتين الاولنيين واللي امتحاناتهم كانت صعبة نوعا ما لكن بكرة ان شاء الله عندي احساس اني هحل كويس في ال classical drama متفائلة ويارب ظني يطلع في محله

اللي غايظني بقى ان مكاني في اللجنة السنة دي متغير عن ال3 سنين اللي فاتوا وكمان مكاني على طرف البنش ف المراقبين والدكاترة رايحين جايين بيبصوا في ورقة الاجابة بتاعتي عااااااا انا بكره الحركة دي جدا

هناك 17 تعليقًا:

أسماء أحمد فى حفلة تنكرية يقول...

انا قريت البوست
بس مش عارفه اعلق
هعلق بعدين بأه يا جميلة

لــــ زهــــــراء ــــولا يقول...

ليدى
-*-*-*

ااولا الاغنيه تحفه ويارب عقبال فرحك ان شاء الله ربنا يفرح قلبك ويسعد ايامك
ثانيا بقى موضوع الامتحانات هما بيبصوا فى ورقتك علشان يتعلموا منك ده اكيد يعنى
ان شاء الله تحصلى على اعلى تقدير فى مادتك بكره وهادعى لك ان شاء الله
ربنا يوفقك

على فكره احنا عادة بنوقع باسم اللى كتبت فينا التعليق لكن للاسف المره اللى فاتت نسيت اكتب اسمى

زهراء

مي يقول...

دخلت اطمن عالحلوين اللى بيمتحنوا ربنا معاكى يا حبوبتى والامتحان يكون سهل وتعرفى تحلى ان شاء الله
الاغنية رائعة جدا وعجبتنى وعقبال مانرقص عليها يوم فرحك
موووووووواه

Lady E يقول...

أسماء أحمد فى حفلة تنكرية : ماشي يا سومة

نورتيني

Lady E يقول...

لولا وزهراء : ايوه مين بينادي ؟ زهراء يا مرحبا يا مرحبا نورك غطى عالكهربا :)

same to you يا قمرايا ده اولا

ثانيا : ههههههه اومال لأ بيتعلموا كيف يكون التخريف والتهييس في ورقة الاجابة :)

اللهم أمين ربنا يكرمك ويرضى عليكي يا زهراء على فكرة اسمك حلو اوي

كلك زوق ومتشكرة جدا على كلامك الجميل

ولا يهمك حصل خير المدونة مدونتك انتي ولولا

دمتم بخير

Lady E يقول...

مي : وانا بقول المدونة متعطرة بعطر الورد ليه اتاري رحيق الورد هنا

امين يااااارب من بؤك لباب السما يا مي

الاغنية رائعه لأن ذوقك رائع
وهبقى شوريرة وأقولك يوم فرحي ان شاء الله محدش هيرقص سلو غيري انا وعريسي
اصل دي الرقصة الوحيدة اللي بحلم بيها من زمااااااااان فلما يجي الفرح
لازم تبقى اكسكلوسف

ممكن نبقى نرقص على اغاني تانيه :)

وعقبال فرحك يا قمرايا

القدر و انا يقول...

ليدى
عقبال فرحك يا بنوتة على من يرتضيه قلبك ويهيم به قلبك
اما الامتحانات فلك وامثالك الله
ربنا يعينكم على نظام التعليم والاساتذة والمناهج
تحياتى

Lady E يقول...

القدر و انا : تسلميلي يا حبيبتي

وزي ما قلتي بس يبقى قلبي وعقلي الاتنين مع بعضيهم وان شاء الله هو كمان قلبه يرتضيني ويهيم بيا علشان الحب يبقى بيننا احنا الاتنين مش يبقى اتجاه واحد وبس :)

اللهم أمين

ربنا يسعدك ويكرمك ويرضى عليكي

ستيتة يقول...

ربنا ييسر لكم كلكم يارب تيسيرا عجبا

مش عارفة افهم يعني ايه ألعب مصارعة مع طلبة
دول طلبة
طب اعجزهم ليه؟
إثباتا اني بفهم؟
عقد ومحتاجة طبيب نفسي شاطر جدا
هانت شدي حيلك

حنين الذكريات يقول...

كل سنة وانتى احلى زهره فى ربيع حياتى كل سنة وانتى حبيبة عمرى
كل سنة وانتى حبيبتى وانا حبيبتك
وربنا يوفقك فى الامتحانات وتنجحى بتفوق ويحقق كل احلامك

صوت من مصر يقول...

ربنا يوفقك

Unknown يقول...

الووووو
الووووووو
الووووووووو
هل تسمعنى حووول
ياليدى الاغنيتين
داخلين فى بعض بمعنى
أغنية المدونة والاغنية
بتاعة البوست لو سمحتى أعملى
فض اشتباك عايزة أسمع واتمززززج
هو ما فيش حد علق على الحكاية دى
غيرى ليه؟ هو أنا بيتهيألى ؟

Unknown يقول...

عملتى ايه فى
الامتحان ولا
لسه النهاردة
ياترى بأعتبار
أنه أتأجل علشان
عيد الشرطة؟

dramaqueen يقول...

ربنا يوفقك يا قمر

سلام يا حبيبتى

أسماء أحمد فى حفلة تنكرية يقول...

كل سنة وانتى طيبه يا قمر
ده بوست هديه منى ليكي بمناسبة عيد ميلادك
http://noloveinthislife.blogspot.com/2010/01/blog-post_26.html

ليس فقيرا من يحب يقول...

كل سنه وانتى طيبه يا قمرايه

عقبااااااااال 100 سنه

ربنا يوفقك فى امتحاناتك

شد حيلك يا جميل

Sonnet يقول...

كل سنة وانت طيبة
مع تحياتي