الأربعاء، 6 يناير 2010

أخيرا عرفت السر



عمالة اسأل نفسوياتي هو في ايه؟ بجد ليه كده؟ هو كل ما يجي معاد امتحاناتي لازم أي حد يتعب وأروح معاه عند الضاكطور كل يوم أو يومين؟

اشراقة سابقا و روفان حاليا -البيبي بنت عمي بدأت مشوار المرمطة- تعبانة وانا معاها عند الضاكطور من كام يوم ونقدر نوصف الضاكطور في كلمتين رهيب والله رهيب وفرحان بنفسه وكاتب انه معاه ماستر من القصر العيني -يا عيني عليه يا عيني -

ده طبيب اطفال ازاي؟ ازاي بقى حد يفهمني !

مش عايز حد يسأله عن حاجة ومكشر وكشف ع البنوتة وكإنه ماسك عروسة لعبه بيفعص فيها بكل همجية وكأنها مش روح قدامه ، ولولا اني مش عايزة اعمل مشاكل كنت اتخانقت معاه بس احنا رايحين للضاكطور ده علشان عمو اللي قال لنا نروحله بس انا قررت بعد عمر طويل ان شاء الله مش هوديله ولادي
وقال ايه بيوجهلي كل الاسئلة عن روفان طيب هو سيادتك شوفت في ايدي دبلة مثلا ! هبقى مامتها ازاي هه حد يفهمني
كان المفروض يسأل مين مامة البيبي بدل ما يحرجني

المهم كل مرة بنروح العيادة بتعب جدا وبصدع وحالتي بتبقى حالة وببقى مضايقة وتعبانة وعايزة اناااااااااااااام وده مش وقت نوم خاااااااااااالص انا مش عارفة اذاكرلي كلمتين على بعض
حد رخم هيقوللي وبتكتبي ليه ما تذاكري هقوله يا عم الحج ويا عمة الحاجة الضغط بيولد الانفجار وانا قربت انفجر فبكتب لكي لا انفجر - رحماك يا ربي - والموضوع ده ليه تفسير علمي على حد علمي - يا سلام ع الجناس :)

التفسير العلمي اللي درسته في الH.R ان الإنسان المريض وتعبان بيحتاج طاقة كبيرة علشان يخف ويرجع تاني صحته كويسة وبياخد الطاقة دي منين يا حلوين؟ منين ؟ أيون مننا احنا الأصحاء فنبقى عاملين زي البطارية اللي بتفضى حبة بحبة ونبقى محتاجين نشحن بطاريات طاقتنا تاني والشاحن هو النوم وبرضه بيبقى شاحن بايظ :)

وانا ما شاء الله بدي طاقتي لأي حد محتاجها وأقعد محتاسة بعد كده أقول لله يا محسنين شوية طاقة لله
طاقة قليلة تمنع بلاوي كتيرة وهنيالك يا صاحب الطاقة والثواب :)

المهم ليه كل الدنيا بتفتكرني ايام امتحاناتي او ايام أكون فيها محتاجة للراحة وعايزة انام فعلا يعني من غير دوشة وليه بفتكر مقولة هاملت
ليه كل الأحداث جاية ضدي وانا ماشي في حتة والأرض بتلف في عكس اتجاهي

واخيرا اكتشفت السر العظييييم اسمي حبيبي يا نور عيني هو اللي مخلي حياتي ثرية ومخلي الناس تفتقدني وتسألني السؤال خالد الذكر : انتي فين يا بنتي ؟ ومعنى اسمي الألفة ، اليقين ، الملاطفة ، الطمأنينة

ان الناس تأنس بقربي والاسم يشير الي الشيء القريب للقلب والروح

إحساس بالشيء والناس

طيبة النفس محبوب قربها وحديثها :) فهو ده قدري ولما بكون اسم على مسمى وببطل انطواء بسعد نفسي قبل ما بسعد الناس اللي حواليا ، صحيح أخدت كام لسعة محترمين من ناس يا سبحان الله مظهرهم غير جوهرهم خااااااااالص بس ده ميمنعش ان الدنيا فيها ناس كتير راقيين ورائعين ومحترمين وطيبين
وموجودين في حياتي

واكتشفت كمان حاجة مهمة أوي اني بعامل ربنا سبحانه وتعالى مش بعامل البشر بمعنى اني بعمل خير ومش عارفة بعمله ليه ومش منتظرة ليه مقابل بس في وقت ما بعمله بقول يارب الخير اللي بعمله ده ملوش معنى غير اني بعمله ليك بجد لاحظتها كتير في حياتي وان بتجيلي فرص كتير اني ادوس على اي حد اذاني وجرحني في يوم من الأيام بس مبعملش كده مش معنى كده اني ملاك انا بتحمل كتير لكن لما بقفل من حد بتبقى قفلة سودا وبيبقى ملوش وجود ولا اعتبار بالنسبة لي
-------------------
ع الهامش ليك لواحدك : بحبك اد عمري قبل عمري بعد عمري ، حبي ليك فوق المشاعر والحدود
كل سنة وانت طيب وربنا يبارك في عمرك يا أغلى الحبايب

هناك 22 تعليقًا:

عاوز اصحي يقول...

ايه حكايه علي الهامش بعد كل بوست دي
طيب مليش دعوه

طيب انتي عاوزه تذاكري طيب دي حاجه حلوه خالص اى حد يقرب منك صدري الوش الخشب وقوليله ورايا امتحانات ولا انتي اللي عاوزه كدا وتعمليها حجه؟

تحياتي

اللى موش عارف يتغير يقول...

اول مرة ادخل هنا
اللى شدنى اسم المدونة
حلوة قوى الاتش آر
ههههههه
تقبلى مرورى

صاحب رأى يقول...

حلو اوى اننا نساعد غيرنا
بس دايما ركزى شوفى اللى بتساعديه يستاهل ولا لا
وربنا يشفي البنوتة القمراية

وبلاش تهلكى نفسك اوى عشان تقدرى تعطى دايما
سلام

dramaqueen يقول...

اوووووووووووووووووووول تعليق
ازيك يا بنوتة
واحشانى

ربنا يصلح نفسوياتك يا قمر وتعدى على الخير والنونو تخف
الف سلامة عليها

بجد واحشانى كتير
باى

ABOALI يقول...

اممممممممممممممممم
طب حاولى بقى تخرجى من الجو ده باى طريقه وتخلى حد غيرك يتولى مسئوليه عموووو الضاكطووووور ده علشاااااان امتحاناتك.
وعلى العموم يا بنتى اهو كله بثوابه وان شاء الله ربنا هيباركلك فى وقتك علشان نيتك الصافيه دى .

بالتوفييييييق يا ليدى باشا وربنا معاكى.
وكل سنه واعز الناس بخير.

Lady E يقول...

عاوز اصحي : كويس انك قولت مليش دعوة :)
لأن انا مش بسأل حد بتكتب ايه في مدونتك فمش من حق حد يسألني بكتب ايه في مدونتي

وأكيد لو متعمدة اني اضيع الوقت مش هبقى مضايقة ان الوقت بيضيع

Ana keda يقول...

هييييييييييه
كنت هذا الرجل يوما واياما وسنين كتار والله يبنتى دانا قبل ما تاجوز كان الى عاوز كيس شيبسى بيقولى وانا كبيرة كده انزلى جيبى عشان خاطرى بصى هى حاجة كويسة انك تكونى كده بس حطى انتى الاول برضه انتى اخر سنة يا كوكى ولازم تزاكرى وتشدى حيلك وقوليلهم ستوب وكده يعنى
احسن حاجة انك بتعاملى ربنا الناس بتتعب يا اوختى
كل سنة وهو طيب وخدى الشاحن وخدى حبة طاقة من هناك الطاقة بتبقى عالية اسألينى انا واتكلمى فى كل ما يحلو لكى مع الطاقة وربنا يكرمك ويسعدك يا حبيبتى :)

اقصوصه يقول...

اكره المستشفيات

والعيادات

وقاعات الانتظار

وكل ما يتعلق بالمرض

عافى الله كل من تحبين:)

بـــــسمة انـــــــــور يقول...

يا ام قلب كبييييييييير
وحشتينينى جداااا

ربنا يوفقك يارب وتذاكرى يا قمرايتى

Lady E يقول...

اللى موش عارف يتغير : أهلا بيك في المدونة

اكيد الاتش ار حلو لأن اللي ميعرفوش يبقى ميعرفش حاجات كتير مفيدة ومهمة

الشعب لابد له من حكومه تشكمه يقول...

طب ايييييه نغيرلك اسمك ولا اييييه:))

بقولك انا عاوزه اخرج اشترى حجات متيجى معايا هههههههههههه..

ربنا يوفقك ياقمر وينجحك ياااااااااااارب,يارب تنجح ياتتح:)

Lady E يقول...

صاحب رأى : لو فكرت اللي بساعدهم يستاهلوا ولا لأ يبقى مش هساعد حد خالص الا مامتي وبابايا :)

امين يارب

مش بهلك نفسي ولا حاجة بس اولوياتي متلخبطة

دمت بخير

ليس فقيرا من يحب يقول...

ربنا يخليكى للغلابه يارب

واعتبريها من باب تفريج كرب عن اخوكى

المسلم

ربنا يسعد قلبك يارب ويوفقك وذاكر يا جميل

ستيته حسب الله الحمش يقول...

انا عاوزة شوية طاقة ايجابية
ما تيجي تديني طااااااااااقة

يالا شدي حيلك
وبعدين هو انتي متعهدة الضاكاترة؟

حتى لو متعهدة
سيبي الأفراح بتاعة العيادات اليومين دول يا عمري علشان الوقت ضيق
واصلا اصلا الخروج بيستفذ الطاقة

ربنا ينجح لك المقاصد ياليدي يا بنت ام ليدي انت وكل الشوباب يارب

Lady E يقول...

dramaqueen : ماشي كلامك نعتبره اول تعليق :)

الحمد لله بخير طول ما انتوا بخير

وانتي كمااااان اخبار الشغل ايه

امين يارب ربنا يسلمك من كل شر يا احلى كوين

Lady E يقول...

ABOALI : عارفة نفسي مش هخرج م الجو ده الا بعد الامتحانات

مسؤلية عمو الدكتور انا اللي متولياها والحمد لله ان روفي خفت

امين يارب

تسلم يا ابو علي ربنا يكرمك دائما

Lady E يقول...

Ana keda : معلش كله في ميزان حسناتنا ان شاء الله ويارب يتقبل

والناس فعلا بتتعب يا اختي واللي عندهم بيضيع لكن اللي عند ربنا سبحانه وتعالى عمره ما يضيع

Lady E يقول...

اقصوصه : صدق اللي بيقول الصحة تاج على رؤوس الأصحاء

ربنا يعافينا ويعافي كل اللي بنحبهم ويشفي كل مريض

Lady E يقول...

بـــــسمة انـــــــــور : قلبي طيب بس يا بسبوسة مش كبير

امييييييين انا وانتي وكل اللي بيمتحنوا

Lady E يقول...

الشعب لابد له من حكومه تشكمه : ههههههههه نو نو نو اسمي حلو وعاجبني

بقى كده ماشي يا شوريرة

أمين

Lady E يقول...

ليس فقيرا من يحب : يارب :)

امين

ربنا يكرمك

Lady E يقول...

ستيته حسب الله الحمش : خالتو حبيبتي اتفضليها كلها اوعدك ان شاء الله اخلص امتحانات وهبعتلك شحنة طاقة ايجابية وبجد مش بهزر

هههههههه ايوة تقريبا كده

أمين يااااااارب

ربنا يكرمك ويسعدك يا خالتو