الأربعاء، 20 يناير 2010

اغتصاب


بغض النظر عن ان الامتحان كان بشع النهاردة كان سؤالين اللي يعرفهم ينجح واللي يتلخبط يبقى بالسلامه يا حبيبي بالسلامه بس في حاجة تانية
الاغتصاب يعني ان حد ياخد حاجة من حد غصب عنه بس للأسف في مجتمعنا ارتبط الاغتصاب بمعنى الاغتصاب الجسدي بس زي ما معاني كتير اتغيرت وارتبطت بمعنى واحد بس زي مثلا
لما نقول الحب يبقى حب بين واحد وواحدة مش الحب بمعناه الشامل زي الحب الالهي وحب الخير وحب الوطن ....الخ
المهم انا عرفت قرار وزير التعليم اللي المفروض عالي انه هيمنع النقاب جوه اللجان ولازم اللي لابسة النقاب تكشف وجهها طول وقت الامتحان جوه لجان الامتحانات وقلت الكلام ده هيتطبق في القاهرة وعين شمس يعني الكليات اللي في القاهرة بس لكن اتفاجئت النهاردة ان القرار ده اتطبق في اللجنة في كليتنا اللي هي كلية اقليمية منفيه
ولجنة الامتحان كان كلها دوشة واعتراض اول نص ساعة من الامتحان وفي بنات لابسين النقاب جوه اللجان خرجوا
عجبني موقف المراقبة اللي على لجنتنا انها قالت للبنت حاولي متظهريش انك لابسة نقاب (وكأنها لابسة بكيني مش نقاب) علشان محدش يخليها تشيله ، لكن دكتور من الكلية جه وتقريبا امين الكلية في نفس الوقت وزعق للبنات اللي مش شايلين النقاب وقال لهم
(كل واحدة تكشف وشها ، انتي يا بت شيلي النقاب ده ) الهي يشيلوك انتا ويتزحلقوا وتقع وتتفشفش في يوم كله مطر ومش باين اوله من اخره ده غير ان المراقب اللي في اللجنة اللي قدامي كان عمال يزعق عالنقاب برضه
يعني بكل بجاحة كده ممكن مراقب عيني عينك يقول لبنت شيلي حجابك او شيلي الجاكت اللي انتي لابساه ده ؟ محدش يقوللي في فرق لأ مفيش فرق المبدأ هو نفس المبدأ
الموضوع ده ضايقني اوي انا مش لابسة النقاب بس احساس بشع ان واحدة تفرط في حاجة هي مقتنعة بيها
يعني ماشي هو مش فرض وفي اختلاف اراء عليه والبنات لابسينه فضل عايزين ياخدوا ثواب أكبر هما مقتنعين انهم كده صح او انهم حلوين اوي فممكن يعملوا فتنة بجمالهم هما احرار في وجهة نظرهم وفي لبسهم طالما مش بيأذوا حد
لو حصلت مشاكل كتير بسبب النقاب خلاص خلوا موظفة من الكلية تمر على المنتقبات وتشوف هما اللي في البطاقة فعلا ولا لأ او حتى عالبوابة لكن كده بجد الوضع مقرف
الله اعلم ايه اللي حصل علشان القرار ده يطلع بس القرار فعلا صعب
ومش فاهمه ايه اللي كاتبينه على اللجان من بره " تحقيقا لمبدأ تكافؤ الفرص النقاب اتمنع جوه لجان الامتحانات " مين تكافؤ الفرص دي هو احنا بنقدم على شغل ولا ايه ! انا مش فاهمه حاجة وبجد دمي محروق من الصبح
على فكرة فتشوا شنطنا واحنا طالعين ل لجنة الامتحانات الجديد ان واحد هو اللي بيفتش الشنط مش واحدة زي كل سنة
يارب اخد الليسانس قبل ما يمنعوا الحجاب جوه لجان الامتحانات ما هما بيقولوا انه طريقة للغش

هناك 32 تعليقًا:

كيــــــــــــارا يقول...

والله الموضوع دا بيحرق دمي بشكل بشع لاني قريت مقاله لواحد من جباااهزه الازهر اللهي يحرقوا بيقول ان الحجاب مش من الاسلام

ربنا يعدينا منها واحنا مستورين

لولا وزهراء يقول...

اولا وقبل اى كلام ربنا يوفقك ويكرمك وتخلصى وتاخدى الليسانس على خير ان شاء الله
بس عاوزه اعرف هو ليسانس ايه بالضبط حقوق او اداب
نتكلم بقى عن موضوع النقاب بصى يا قمرايه رغم انى مش منقبه كلن كل واحد حر فى لبسه طالما مش بياذى غيره يعنى نفرض ان واحده جت لكم الامتحان لابسه ماويه ياترى هيعملوا ايه
او نفرض ان حد جه الامتحان لابس لبس قصير او محزق ياترى الوضع هيكون ايه ياترى هيطلبوا منها انها تلبس حاجه طويله
حاجه تجنن
ربنا ينجحك باعلى تقدير

ABOALI يقول...

لا تتعجبين يا ليدى من شىء يحدث فى زمن اختلت فيه جميع المعايير وغاب وجه الحق فيه .....فنحن فى عصر يطلق فيه على المتدين متشدد واحيانا ارهابى ويتخوف الناس منه واحيانا يتهمونه بقله الذكاء والفكر....عصر معظم الاهتمام فيه لمن لا اهميه له فى المجتمع ولا فى الحياه .
وضع بجد يستحق ان تغضبى وتتخوفى من ان يقولوا ويقرروا خلع الحجاب ايضا(مش بعيده والله اصلهم حججهم ومبرراتهم كتيره قوى)
المهم اكملى مسيره المذاكره بجديه واتركى الامور للخالق

ربنا يوفقك ان شاء الله
بس متنسيناش فى الحاجه الساقعه

أسماء أحمد فى حفلة تنكرية يقول...

الو حول
معايا
الوووووو
هل تسمعنى؟
1/2/3 الو الو حول...
بلا كلام فاضى
ادخل فى الموضوع
بيان رقم واحد: صدر حكم بمحاكمت المتهمه ليدي انى مخصمااااااكى وهذا للاسباب الاتية؛1.لاهمالك الشديد ليا
2.عدم ردك ع تليفوناتى
3. وبعد كل هذه الاتصالات المميته
تغلقى الموبايل ولا يهمك عادى ياباشا مقدرة انك مشغولة وبتذاكرى
بيان رقم اتنين: مش عارفه اقول ايه الصراحه ع موضوع النقاب ده
بس فى نظرى قرار مالوش معنى
ذى ماقولتى فعلا يعنى ايه شيل النقاب كأنه فعلا بيقول اقلعى الجاكيت حاجه ذى كده يعنى
بيان رقم تلاته: نرجو المتهمه ليدي بالاهتمام بالمذاكرة قدر امكانها
وهذا القرار للاسباب الاتيه:
1. لتنال النجاح بتفوق
2. ثم تحقيق كل امالها
وبهذا قد اكون انتهيت من صدور بعض احكامى على المتهمه ليدي
فوتك بعافيه يا قمرايا
ههه

sookra يقول...

يارب تكونى حليتى كويس
اما موضوع النقاب دا فلاتعليق
عشان بس اتخنقت

الشعب لابد له من حكومه تشكمه يقول...

الموضوع ده فارسنى فرسه وغايظنى غيظه حاجه تقرف.
احنا كده فى البلد علمنى الهيافه قاله تعالى فى الهيفا واتصدر,
يقدر لو شاف وحده لابسه مينى جيب ولا بادى ولا ستومالك يقدر يقولها اتغطى كانت جمعيات حقوق الانسان تاكلهم.
لكن دول عاااتى.
واللى يغيظ اكتر انه كلعلهم قرار من المحكمه انهم ميقلعوش النقاب.
حاجه تقرف.

ليس فقيرا من يحب يقول...

يابت انتى مش هتتهدى

ههههههههههههههههه

طعا لا تعليق على موضوع النقاب

الكلام خلص فيه

ربنا يهد المفترى

ربنا معاكى ويوفقك يارب

Mr.Hazem يقول...

لا حول ولا قوة الا بالله
والله عيييب بجد عيب
ربنا يغير احوالنا ويبدل حكامنا بأحسن منهم ..
معلش ما في ظالم بيدوم , والا ما ييجي يوم وربنا ينصر فيه المظلوم

ربنا يكون معاكم وربي يحميكم
ربنا يوفقك بامتحاناتك , وتتخرجي من الكلية باذن الله
ويسعدك بحياتك ويحققلك احلامك

مع حبي

ستيته حسب الله الحمش يقول...

اولا امين الكلية موظف مش دكتور
ثانيا طالما قرار من رئيس الجامعة اي حد من عميد وانتي نازلة لازم يلتزم واللي يرجع يرجع بقضية على رئيس الجامعة
ثالثا انا مش ها اقول لأي بنت في اي لجنة تقلعه بس ها اشوف وشها وها افتشها ولو قالت لأ ها اخرجها من اللجنة كلها وفورا ولو بمبكت معايا ها اعمل لها محضر بلا اي تهاون
رابعا من امتى الشنط بتطلع اللجان؟
فيه فراشين بيشيلوها تحت وبيدوا الطلاب رقم أمانات وينزلوا ياخدوها بعد الأمتحان من الأمانات وبرضه ممنوع عندي حد يدخل جوا اللجنة بشنطو أو مقلمة أو اي شيء يجيب فسفس لنفوخي

دي حاجات لا تعصب ولا تضايق
دي اصول تكافيء الفرص الأصلية

انتي بقى عملتي فعليا ايه في امتحان السؤالين ده؟
والا قعدتي تتابعي ماتش اقلعي النقاب والبسي النقاب؟

Lady E يقول...

كيـــــارا : عاش مين شافك يا كوكي

كمان من جهابزة الازهر يعني مش اي حد

ربنا يهدينا للحق ويرزقنا اتباعه ويبعدنا عن الباطل ويرزقنا اجتنابه

اللهم امين

دمتي بخير

Lady E يقول...

لولا وزهراء : لولا وزهراء انا مش عارفه مين فيكو اللي كاتبه الكومنت بس اهلا بيكم انتوا الاتنين

اللهم امين ربنا يكرمكم ويرضى عليكم يارب

ليسانس ادب اللغة الإنجليزية

لو لابسه مايوه هيرحبوا بيها طبعا دي حرية المرأه والبونيه حرانه يعني تعمل ايه لكن تلبس نقاب عيب عليها !

والقصير والمحزق والميك اب الكامل موجود منهم كتييييير في كل الكليات محدش بيعترض ولا بيقول لهم اي حاجة والا تبقى تخلف ورجعية !

اللهم امين

تسلمولي ونورتوني

Lady E يقول...

ABOALI : انا بس نفسي افهم ليه القرار ده يعني ايه اللي حصل فبناءا عليه صدر القرار ده

وللأسف في بعض المتدينين او اللي مظهرهم من بره متدينين بيكون صعب التعامل معاهم وبيبقوا قريبين للتطرف اكتر من الوسطية
ده غير كمان الاعلام اللي زود تشويه صورتهم

وبعدين تفتح معظم القنوات تلاقي حوارات مع ممثلين ومطربين ولاعبين الكورة
هما دول فئة متميزة مقولناش حاجة
كتير منهم عندهم موهبة مقولناش حاجة برضه بس التركيز عليهم بالطريقة دي وان الشباب ياخدوهم قدوة ليهم حاجة غريبة !

اي حد شاف منظر البنات دول وهما بيشيلوا النقاب ليه الحق انه يغضب وخصوصا ان الدكتور المحترم مرضاش يمشي الا لما كل بنت شالت النقاب

ونعم بالله
ان شاء الله خير
ولا تقلق اطلاقا مش هنسى الحاجة الساقعه :)

Lady E يقول...

أسماء أحمد فى حفلة تنكرية : اسمعك بوضوح حول :)

يا ساتر يارب بريييييييييئه يا بييييييييييه :)

يا حجه في واحدة صبحتي اسمها اسماء من حوالي 4 ايام بعتتلي مسج وقالتلي متبعتليش مسجات علشان بذاكر صح ولا مش صح؟ فأنا مش راضيه اعطلك انا بعمل كده بناءا على كلامك
وموبايلي حاليا سايلنت ومش بشوفه الا قبل ما انام فمتزعليش يا قمرايا

تم قبول بيان رقم 3 وتنفيذه :)

دمتي بخير يا سومة وانتي كمان اعملي ببيان رقم 3

Lady E يقول...

sookra : يارب

هو موضوع يخنق فعلا بس لازم يكون لك تعليق يا سكره

Lady E يقول...

الشعب لابد له من حكومه تشكمه : اينعم هو فعلا موضوع يفرس ويغيظ

وكل يوم بيدخل مئات الطالبات كلياتهم وهما لابسين ومش لابسين وحجابهم مجرد حاجة مكملة للموضة مش اكتر ومع ذلك محدش بياخد بطاقتهم او بيفتشهم !

اول مرة اعرف منك ان في قرار من المحكمة ولما في قرار من المحكمة مبيعملوش بيه ليه ؟؟؟

Lady E يقول...

ليس فقيرا من يحب : بحب تعليقاتك يا قمرايا وبكون سعيدة بزيارتك لمدونتي ومتابعتك ليها

بس موضوع "يابت انتى مش هتتهدى " انا عارفة انك بتهزري بس انا مش بحب الهزار بالطريقة دي

امين يارب

نورتيني وياريت متتضايقيش من كلامي لأني مقصدش ابدا اني اضايقك

Lady E يقول...

Mr.Hazem : زي ما قلت قبل كده يا مستر حازم الكلام ملوش علاقة بحكامنا

الناس هي اللي بتظلم بعض قبل ما اي حد تاني يظلمهم

اللهم امين

دمت بخير

Lady E يقول...

ستيته حسب الله الحمش : الاختلاف لا يفسد للود قضية اطلااقا وكلامي متفق مع كلام حضرتك تماما مع اني حسيت ان حضرتك منفعلة شوية في التعليق

اولا شكرا على التوضيح بس الدكتور ده مش دكتور وبس هو ليه منصب تاني في الكلية انا مش فاكره هو ايه بالضبط وقلت تقريبا امين الكلية مش اكيد :)

ثانيا : في حاجة اسمها روح تطبيق القانون زي ما حضرتك قلتي في ثالثا
كلامك فيه رحمة وتقدير للطالبة اللي قدامك مش اهانة وتجريح زي ما الدكتور عمل
انا حاطة نفسي مكان البنات دي هي خلاص واحدة لبست النقاب ومع الوقت اتعودت انها مش بتظهر وشها لأي راجل مش محرم ليها ويجي الشخص ده ايا كان بكل بجاحة يزعق لها ويهينها ولا كأنها طالبة اكاديمية بتطلب العلم وبتحاول ترضي ربنا بطريقتها وبحسب ما تفكيرها هداها يبقى ليه يتعامل معاها كده؟
بالنسبة لحضرتك ده هيبقى كرم منك انك تشوفي وشها وتفتشيها لأن مفيش مشكلة ان حضرتك تشوفيها او تفتشيها وكمان حضرتك دكتورة ومش مطالبة بإنك تعملي كده الا علشان مصلحة طلابك اللي وثقوا فيكي واحترموكي وأكيد كمان حبوكي
وما شاء الله نجحتيهم كلهم :) يا بختهم بيكي وعقبالنا زيهم يارب :)

رابعا : نياهاهاهاهاها خالتو حبيبتي احنا مش في كامبريدج احنا في كلية اقليمية كانت لوقت قريب تتلخبطي بينها وبين الحضانة :( يعني مفيش اجهزة انذار حريق واللمبات في المدرج بتقع علينا هيبقى في امانات والله يا خالتو انتي عسل بجد :)

ارجوكي فهميني ايه موضوع تكافئ الفرص ده يعني ايه؟ علشان انا مش فاهمه النقاب هيعمل ايه في الفرص ! معلش معلوماتي على ادي

ههههه لا انا مش بتابع ماتشات بس صعبوا عليا بجد
والحمد لله حليت يعني نقدر نقول كويس مع ان الامتحان كان منيل

نورتيني يا خالتو وبحب التعليقات اللي فيها مناقشة دي من زمان مفتقداها

هي وظروفها يقول...

انا معنديش مانع البلد كلها تقلع النقاب زي مهما بيقولي بس بشرط اللي يتمسك بحشيش يتعدم اللي يتمسك في اغتصاب يتطبق عليه حكم قاطه الطريق اللي بيلبسه لبس مستفز ويخللو الواحد نيه التحرش عنده اساس يلبسو كويس بس احنا بندن في مالطه والله ملطه لو ادنا فيها يمكن تسمع

لكن علي الشعر اللي مش فاكره

لقد اسمعت لو ناديت حيا
ولكن لاحياه لمن تنادي

Lady E يقول...

هي وظروفها : لحظة بقى ! بيلبسوا لبس مستفز ويخلوا الواحد نية التحرش عنده اساس !!!!!!!!!

اللي عايز يلبس حاجة يلبسها براحته لكن مش من حق حد يتحرش بأي واحدة سواء لبسها محتشم او لأ وكمان موضوع اللبس المحتشم ده بيختلف من طبقة اجتماعية للتانية

مفيش مبرر في الدنيا يخلي واحد يبقى عده نية التحرش او يتحرش فعلا بواحده حتى لو لابسه مايوه وماشيه بيه في الشارع ! دي حاجة

الحاجة التانية ان كله نايم في الطراوة ومحدش اصلا بيتكلم علشان يتسمع

يعني امبارح لما حبيت اروح اقابل الدكتور واكلمه عن الامتحان بعد الامتحان لقيت ناس كتير بيقولولي اوعي هيخليكي تشيلي المادة ! علشان مجرد كلام هشيل المادة ! الخوف من جوه الناس مبيتكلموش اصلا علشان يتسمعوا ولو اتكلموا اسلوبهم بيبقى مش مناسب

حسام غانم يقول...

عملتي ايه في الامتحان المهم ؟

كويس ؟

عال

المحكمة حكمت لصالح المنقبات امبارح

ولغوا القرار السابق الحمد لله


مش عارف ايه الهدف من التقييد ده

صوت من مصر يقول...

اظن ان الحرية وجدت لنكون وليس لنغتصب

norahaty يقول...

ربنا على المفترى
ياليدى وزى ما سمعتى
المحكمة ألغت القرار بس
ايه الفايدة بعد القلق
اللى البنات كانوا فيه؟

Lady E يقول...

حسام غانم : الحمد لله

هو الامتحان فكرته كانت جديدة وغريبة شوية بس الحمد لله حليت نوعا ما كويس

يعني الحكم لسه صادر امبارح ولا قبل كده؟

عالعموم ان شاء الله هقول لزميلاتي اللي لابسين النقاب في الكلية عالقرار ده


في فئة لما بيمسكوا مناصب حتى لو كان منصب صغير اوي بيحبوا يظهروا انهم اعلى من الناس وفي نظرهم هي دي الطريقة اللي بيعوضوا بيها نقص شخصياتهم !

Lady E يقول...

صوت من مصر : ده المفروض بس اللي بيحصل العكس

أم .. بوبه يقول...

والله يا أختى هما لو عايزين يتصرفوا ويلموا الموضوع ويسهلوها على الناس .. هيتصرفوا .. زى ما قولتى يجيبوا واحدة تشوف البنات وتفتشهم
وممكن يطلبوا من المنتقبات إنهم يحضروا نص ساعة بدرى عن الإمتحان علشان يتفتشوا

وفى حل تانى ممكن يعملوا لجنة منفصلة للمنتقبات ويشيلوا النقاب قدام بعض ويبقى المراقبين ستات

أنا مش عارفة هما مازمين الموضوع ليه يعنى

أومال بلد زى السعودية وغيرها عايشين إزاى وهما كلهم منتقبات ومحدش بيسمع عندهم بجرايم ولا حاجات زى إللى بيخترعوها عندنا ويقولوا بسبب النقاب

حسبنا الله ونعم الوكيل

بس على فكرة إمبارح انا سمعت فى التيليفزيون إن القرار ده إتلغى

MaNoOoSh يقول...

لازم تحصل اي حاجة تعمل دوشة في أوقات معينة

بس بغض النظر عن القرار المستفز اللى اتلغي الحمد لله

مفيش أي مراعاه للطلبة اللي بيحلو في الامتحان ولا المحافظة على الهدوء والتركيز.. دي كمان حاجة مستفزة أكتر وأكتر

لجين أبو الدهب يقول...

لا حول ولا قوة الا بالله

بجد حاجة تسد النفس ..

ولا منهم ولا كفاية شرهم ..

حسبنا الله ونعم الوكيل ..

وما تستغربيش ياليدى اى قرارات ضد الدين هاتلاقيه اتنفذت هوا فى كل المحافظات

انما تعالى كده لحاجة هاتفيد الشعب تقعد سنين عقبال ما تنتقل للمحافظات ..

:((

Lady E يقول...

norahaty : يا رب

Lady E يقول...

أم .. بوبه : فعلا القرار اتلغى وتاني لجنة امتحان مكنش فيها مشاكل بالنسبة للمنتقبلات الحمد لله

Lady E يقول...

MaNoOoSh : أيوة فعلا حاجة مستفزة مفيش اي مراعاة لينا يا منوش :(

وحشاني بجد

نورتيني

Lady E يقول...

لجين أبو الدهب : ربنا يعدل الأحوال

الحمد لله القرار اتلغى وقرار الغائه اتنفذ على طول في المحافظات

دمتي بخير يا لوجي