الثلاثاء، 26 يناير 2010

امبارح كان عمري عشرين



امبارح كان عمري عشرين لكن النهاردة تفرق بقى 21 يعني مش أي سن ده سن الرشد وسن العقل على رأي حنين الذكريات انتيمتي اللي عملتلي مفاجأه وكتبتلي بوست جميل أوي
أجمل زهره وأنا عارفه اد ايه هي مشغولة ومفيش عندها وقت (بحبك أوي يا حنين وربنا يجمعنا في الخير دائما) وتسلميلي ع الورد اللي في البوست والتورتايه الجميله اللي في البوست برضه




كمان أميرة مرمر على كوكو مهجور بعتتلي مسجات واتصلت بيا وانا بعتذرلها جداااا علشان مردتش ع التليفون لأني كنت فاصلة شحن بجد بعدما برجع من الامتحان بفصل شحن طول اليوم وأسفة مرة تانيه يا مرمر
وتسلميلي ع الورد اللي في المسج علشان انا بجد كان نفسي في الورد جدا

والنهاردة أوشي بعتتلي مسج جميلة أوي وبعدين يا أوشي مليون سنة قليلين أوي :) ربنا يخليكي ليا يا أجمل بنوته

وسومة أختي الصغننة بعتتلي مسج وعملتي بوست عنوانه كل سنة وانتى طيبة يا ارق واطيب قلب


ربنا يخليكي ليا يا سومه يا أرق وأطيب بنوتة صغنونه بجد انتي عسولة أوي

النهاردة جالي أول وأجمل بوكيه ورد جالي في حياتي كلها من بابايا ومامتي
بجد كان نفسي جدا في بوكيه ورد أكتر من أي حاحة في الدنيا
والحمد لله جالي بوكيه أحلى من اللي كان نفسي فيه
تسلمولي يا مامتي وبابايا ربنا ميحرمنيش منكم يارب


اييييييييه عشرين سنة فاتوا بحلوهم ومرهم
السنة اللي فاتت كانت أصعبهم كان فيها حاجات كتير قاسية أوي أوي منها الحادثة اللي عملتها ولولا عناية ربنا سبحانه وتعالى
كان زمانكم بتقرأوا على روحينا الفاتحة انا ومامتي ليا نصيب أوصل للواحد وعشرين :)


وبالرغم من أي حاجة الحمد لله خرجت من سنتي
العشرين وأنا أقوى قوة نفسويه داخليه وثقة بالنفس ورضا بقضاء الله سبحانه وتعالى وتحمل كامل المسؤليه عن قراراتي في الحياه
الحمد لله عملت حاجات جميله وحصلت حاجات جميلة جدا السنة دي
هقول شويه منها بالنسبة للتدوين :-
1- الصحفية الجميلة أسماء رمضان كتبت عن مدونتي في جريدة العالم اليوم وكمان عملت معايا حوار جميل بجد
وكفايه اني اتعرفت ب سومه بجد شخصية جميلة جدا
2- حضرت لقاء مدونين وكان رائع في المنصورة واتعرفت بمدونين رائعين وكمان قابلت أوشي وبجد هي في التدوين وبره التدوين جميله جدا وبنوتة تتحب بجد
3- اتعرفت بناس زي الفل من التدوين وبره التدوين ومن التدوين زي شيما الشعب ، مرمر على كوكب ، سومة اسماء احمد ، بسمة انور ، احساس طفله
اما بره التدوين
1- اخدت كورسات في التنمية البشريه ودي حاجه كنت بفكر فيها من فترة كبيرة وأخيرا حولتها لواقع وبجد الكورسات دي مفيدة جدا لحياتنا
2- تجاهلت موضوع اني لما اناقش دكتر في كليتنا واسأله في المواد اللي بندرسها يبقى ده معناه اني هشيل المادة ، في دكاترة كتير في الكلية نموذج راقي ومحترم جدا من الناس ورحبوا جدا بمناقشاتي وأفكاري وحتى أرائي عنهم ، مش كل الناس زي الضاكتور اللي ف بالي واللي قدري هيخليني اذاكر مادته لرابع وأخر مره ان شاء الله
3-صورت مع قناة النيل للتعليم العالي :) بس مسألتش عن معاد البرنامج هيتذاع امتى :)

وأخيرا بدأت في السنة الأولى بعد العشرين ، فرحانه أوي بال 21 وخلاص هقف عند السن ده أي حد هيسألني بعد كده عندك كام سنه هقلوا واحد وعشرين حتى لو بعد 10 سنين انا واحد وعشرين برضه مليش دعوة ، انا بستنى ابقى 21 من زماااااااان وانسى بقى كلمة قاصر الكلمة دي كانت بتنرفزني اوي وبتضايقني أوي

انا متفائله ان بإذن الله السنة دي هتبقى جميله مع اني بدأتها النهاردة وأنا متوعكه صحيا وعندي امتحان بكرة لسه مذاكرتوش
بس برضه متفائلة
الامتحان اللي فات تفائلت والحمد لله كان أحسن من أول امتحانين ان
شاء الله السنة دي أخد الليسانس وأحقق شوية احلام من أحلامي ان شاء الله

ع الهامش لكيكي وبس : السنة اللي فاتت نسيت عيد ميلادك بس افتكرته يوميها وللأسف كنتي تعبانه فمعرفتش أكلمك والنهاردة انتي نسيتي عيد ميلادي واحدة بواحدة :) وكده استريحت من عذاب الضمير اني نسيت عيد ميلادك

ع الهامش تاني : موبايلي معظم الأوقات مقفول أو سايلنت فمحدش من صبحاتي يضايق

هناك 26 تعليقًا:

موناليزا يقول...

كل سنة وانتى طيبة ياحبيبتى وعقبال110 سنة وانتِ فى صحة وسعادة
وان شاء الله تاخدى الليسانس السنة دى وتحققى كل ماتتمنيه

الشعب لابد له من حكومه تشكمه يقول...

سؤالين الاول كده:

هى شيما الشعب دى غير اوشى ههههههههههه؟؟

ثانيا:
هو فى ورد ازرق؟؟؟؟؟؟؟؟؟ تصدقى اول مره اخد بالى:)


ثالثا:
انا اتصلت مرتييييييييييييييييين ياهااااااااااانم ولما يأست قلت اسيبلك مسج باه,
كل سنه وانتى طيبه يادودو وعقبال يارب مليون سنه وانتى بصحه وسعاده ومحققه كل الى بتحلمى بيه يارب:)

KEBLAWYAT يقول...

كل سنه وانتى طيبه يا فندم

وعقبال 100 سنه

وانا شاء الله تحققى كل اللى تتمنيه

كيكى عوووووو يقول...

مليش عين اعلق!!!
ولا انطق بنص كلمة
ووشى عليه اتنين كيلو طماطم لمة افوق من الخدة هرجع اعلق تانى
طب قبل ما امشى ينفع اقول وانا حاطة راسى فى الارض
كل سنه وانتى انتيمتى واختى وحبيبتى رغم كل الظروف الى بتعارضنا....كل سنه واحنا فى بال بعض ع طول
**كل سنه واحنا فاكرين عيدميلادات بعض**
يخرررررررررررررربيت الكسوف
سلاموا عليكوا

شاب فقرى يقول...

كل سنة وانتى طيبة يا طيبة


ويارب تفضلى دايما انسانة قلبها طاهر ونقى وجمبك كل اللى بتحبيهم

يارب يحفظك ويعزك ويكرمك

كان نفسى أعملك إحتفال فى التعليقات واعلق بتاع عشرين مرة زى ما بعلق فى كل بوستات العيد ميلاد

بس مينفعش للاسف

كل سنة وانتى طيبة

تحياتى
فقرى

mohamed ghalia يقول...

كل سنة وانتى طيبة
ويارب زى ما اتمنيتى إلى جاى يكون أحلى

dramaqueen يقول...

هابى هابى هابى هابى
هابى بيرث داى يا قمراية وعقبال ال 221 وبرضه تفضلى جميلة وزى العسل زى ال21
كل سنة وانتى لالف خير

صيدلانيه طالعه نازله يقول...

كل سنه و انتى جميله و مبسوطه
و دايما من نجاح لنجاح و ربنا يوفقك فى امتحانات الترم ده و الجاى ان شاء الله

romansy يقول...

يعنى بقى محتاجه ايه تانى غير حب اصحابك ليكى والهدايا ووكيه الورد الجميل اللى من بابا ماما
كل سنه وانتى طيبه وتفضلى طول عمرك طفله مش عايزه تكبر احساس الطفوله والبراءه اجمل احساس فى الدنيا

شاب فقرى يقول...

كلاكيت تانى مرة

:)


كل سنة وانتى طيبة

كان نفسى اجيب اغنيه من اليوتيوب

بس مليش فى اغانى العيد ميلاد

انما نتمنى لكى عيد ميلاد سعيد

هابى فيرى جود بيرذ داى عام سعيد :D

سواحة يقول...

ياستى كل سنة و انت 21 سنة طيبة :-))

بس ملها قاصر مضيقاكى فى ايه بس ؟؟
و بعدين انا يا ليدى بتعامل على انى عيلة
مع انى عديت البلوغ و النضوج و القصور و كله من زمممممممممان :-)))
و مع ذلك علشان الناس تعاملنى بجديه ساعات بطلع البطاقة تخيلى :-)) اه ياكسوفى يانى :-))

بس حلو الورد ده كله
صحيح ورد جاردينا ازرق ؟؟

غير معرف يقول...

كل سنة وانتي طيبة





تامر وهبه

-_- يقول...

كل سنة وانتى طيبة

شاب فقرى يقول...

قلت اجيب ورد

http://www.majalisna.com/gallery/41/41_3431_1066668996.jpg

بنفسج

انا مبحبش غيره

انا قلت اعلق كتير

عشان تحسى ان فى حد بيحتفل معاكى

انا بيبقى نفسى الناس تعمل كدا زى ما حصل فى عيد ميلادى مش غلاسة والله

كل سنة وانتى طيبة

فقررررررررررى

الشعب لابد له من حكومه تشكمه يقول...

جييييييييييييت تااااااااااانى:)
قلت اجيبلك بوكيه ورد نفسك فيييييه:)

http://www.alsowar.com/Upload/dory/a495f4faa839200870313.jpg

http://www.alkhubr.biz/vb/imgcache2/57611.gif


كنت هدورلك على اللى يهديكى الورد باه بس قلت لااا اسيبك تختاريه على مزاجك ده:)

hend mossallam يقول...

haaaaaaaaaappy bd ya amar w 3o2bal milion sana enjoy it ;D

Cute Kitty **sookra يقول...

كل سنه وانتى طيبه
الريدر عندى موش قرا البوست دا غير دلوقتى
بيهزر بغلاسه
عقبال 2 مليون سنه اكتر من شيما اهو
انشاءالله ماحد حوش ياطيوبه انتى
كدا احنا الاتنين برج الدلو الدلو
يعنى الدردل
كلمه تبدا بحرف الدال (دردل)
كل سنه وانتى ناجحه ومتفائله وسعيده ومحققه كل امنياتك

ليس فقيرا من يحب يقول...

كل سنه وانتى طيبه ياروح قلبى

وعقبال 100 سنه ياااااااارب

ربنا يسعد قلبك دايما

ويوفقك ويحققلك كل احلامك

كيكى عوووووو يقول...

عاااااااااااا
بضايق لمة اخش ولاقى البوست دة
انا بقى جيبلك تورتة مختلفه عن اى حد تورتة اسبيشل ليا انا وانتى بس
http://forum.hawahome.com/nupload/34849_1197499522.jpg
غير كدة بقى اكسبى فيا ثواب وقوليلى بالتفصيل الحرفى احط اغنية ازاى
واسترى عليه

safa7_karmooz يقول...

كل سنة وانتى طيبة

هازى بازى تو يووو

^_^

يارب تكون السنة الجديدة حلوة عليكى ..:)

MaNoOoSh يقول...

كل سنة وانتي طيبة يا ليدي
ويااااااااااار يحققلك كل الخير ويسعدك مع أحبابك

Lady E يقول...

نورتوني جميعا وكل سنة وانتوا بخير وصحة وسعادة

شكرا يا شاب فقري على الورد بجد جميل جدا مع انه حزين

شكرا يا اوشي عالورد الأحمر بجد زوقك جميل اوي

Lady E يقول...

كيكي يا حبي

تسلميلي ع الكشري عقبال لما يتحول لحقيقة ونأكله سوى ان شاء الله

Bent Men ElZman Da !! يقول...

كل سنه وانتى طيبه يا جميله
وعقبال مليون سنه
وان شاء الله تكون السنه دى احلى من ال20 سنه اللى فاتوا
وتحققى كل اللى بتتمنيه يارب
واسفه لو جايه متاخر شويه :)

لجين أبو الدهب يقول...

حبيبتى معلش متاخرة ..

وانا اسفة بجد بس لسه قارئة البوست دلوقتى بس لازم اقولها ..

كل عام وانتِ لله قريبة ..
عن النار بعيدة ..

كل عام وانتِ طيبة وعسولة ودمك خفيف وكل حاجة حلوة ..

كل سنة وانتى حبيبتنا ..

كل سنة واخر السنة دى تكون مخلصة ان شاء الله ونقولك كفارة D:

Lady E يقول...

بنت من الزمن ده ولوجي نورتوني وانتوا طيبين وبصحة وسعادة