الاثنين، 18 يناير 2010

لا شيرين ولا واحد وعشرين


الحج تي اس اليوت T.S Eliot كاتب ومفكر وشاعر وفيلسوف م الأخر مخلاش حاجة الا واشتغلها زي الداكتور اللي في الصورة الموضحة أعلاه :)
الحج اليوت بقى كاتب متشائم وعنده طاقة سلبية كفيلة بإنها تجيب اكتئاب وفسفس هستيري وطبعا الكلام ده متوفر من غير حاجة عند معظم الناس والحمد لله لأنهم بيبصوا لنص الكوباية الفاضي (نفسي اعرف فين الكوباية أصلا )
المهم اليوت مقرر ليه عندنا قصيدتين من اروع قصائد القرن العشرين هو صحيح متشائم بس كلامه يوزن دهب وهو يا ضنايا يا ابني كان متشائم علشان الحرب العالمية الاولى اخدت هنادي في الوبا وييييييييييين هنااااااااادي يا اماي ( الرقم الذي تطلبه مش هيرن لأن هنادي راحت في الوبا هذه رسالة مسجلة )
وكمان بيقول ان الانسان في القرن العشرين وفي الحياة الحديثة والمستقبل مش هيدمر نفسه بس لأ هيدمر الكون كله ( للأسف عنده حق)
عالعموم خير ان شاء الله خير انتوا عارفين ان اليوت اخرته كانت مصحة عقلية (معلومة مش متأكده منها بس قرأتها في كتاب ارز باللبن لشخصين لرحاب بسام ) بس كتاباته بتقول انه ذكي يا ذكي يا ذكي زيادة عن اللزوم
في مسجتين من امطار المسجات اللي عمالة تجيلي عجبوني وقلت اكتبهم بالمرة عن الانطحانات اللي هتبدأ بعد بكرة وانا برضه بكتب بوست جديد نياهاهاهاهاه (ضحكات شريرة متقطعة)
اول مسج
ذاكر وفك من الصياعة
لا تدعها تتوقف عندك
انشرها
طالب نشرها وجاب جج و2 إمتياز
وطالب تاني استهزأ بيها
شال السنة كلها (مش عارفة شالها ازاي وهي ثقيلة يعني؟)
تاني مسج من كيكي :
ترقبوا قريبا وحصريا على قناة محناش نافعين الفيلم المرعب
(الامتحانات) الحاصل على جايزة كله كلام فارغ لتعذيب الطلاب
نرجو لكم مشاهدة مفزعة
بالمناسبة اللذيذة دي ادعوكم انكم تبكوا معانا ليه بقى؟ علشان كنت بدردش مع
مرمر على كوكو مهجور و بعتتلي لينك موسيقى جميلة اوي
ومن موقعي هنا ولأني بعشق الكمنجات بس الرومانسية مش اللي بتعيط بدعوكم انكم تسمعو الكمنجه الزعلانه ومتأثره
وكمان بناءا على طلب مرمر ولأني بحب الموسيقى جدا فهقول المعلومات التالية اسم العازف مروان أنور هو عازف مصري موهوب مش بيعزف بس ع الكمان لكن كمان عنده مهارات رائعة ومتمكن من العزف على البيانو والعود والناي (يا بخته )
واللي هيسمع الموسيقى هيتضحله انها اغنية اه م الفراق اللي بتوجع قلبي بس الموسيقى فعلا روعه
نرجع للواقع (مش عارفة مين اللي كعبله ووقعه)
عندي امتحان شعر ودقن في العصر الحديث القرن 19 و20:) بعد كام ساعة مش هقول يومين بقى ما العد التنازلي بدأ خلاص
وعلى رأي خالتو يا فاشل يا فاشل :) ربنا ميجبش فشل ابدا ان شاء الله

هناك 14 تعليقًا:

لــــ زهــــــراء ــــولا يقول...

ربنا يوفقك فى الامتحانات وتحصلى على اعلى التقديرات ان شاء الله

بوست تحفه بجد تسلم الايادى
وان شاء الله كل الطلبه يا ناجح يا اما ناجح بتقدير عالى كمان
ربنا يوفق الجميع

SHAPE YOUR LIFE (ABOALI) يقول...

هههههههههههههههه
لذيذه بجد يا ليدى وكلامك بيعملى ريفريش كده وببتسم بس اهم شىء ياباشا انه يعملك انتى ريفريش كده وتبقى تمام علشان الامتحانات ومتخفش من حاجه يا جامد انت قدها وهتعدى على خير
بالتوفيق وتحياتى لكى وشكرى على المقطوعه الموسيقيه.

dramaqueen يقول...

ربنا يوفقك يا قمر

وحشتينى

هي وظروفها يقول...

انتي شكلك فقريه

حلوه اوي الهاتف اللي بتطلبه مش هيرن هنااااااادي راحت في الوبا

هههههههههههههههه

وبعدين امتحان شعر ده ايه الجمال ده

اظن دي احلي ماده الواحد يمتحنها لنها الوحيده اللي ممكن يتقال عليها
ماده بتشغل خيالنا انما بقيت المواد تخللي صفيحه الجبنه احسن منه

شدي حيلك وبكره تروق وتحلي وتحلي كويس
ربنا معاكي

Lady E يقول...

لولا وزهراء : أهلا بيكم في اول تعليق في المدونة وان شاء الله ميكونش اخر تعليق :)

اللهم أمين

تسلم الايادي اللي كتبت تعليق جميل كده

وحلو التفاؤل ده ربنا يكرمكم ويرضى عليكم

دمتم بخير

القدر و انا يقول...

مونى
وحشانى جدا
هناك دائما شعرة رفيعة جدا بين العبقرية والجنون
وممكن جدا اخونا اليوت فلتت منه الشعرة دى
وواضح تاثير الامتحانات جدا
ربنا معاكم يا قمر

Lady E يقول...

ABOALI : ربنا يجعلك مبتسم وفريش دائما يا ابوعلي

ربنا يكرمك على كلامك الجميل وتشجيعك ده

وانا اللي بشكرك علشان لسه في حد بيتذوق الموسيقى

شكرا يا ابوعلي
اسعدني تعليقك

KEBLAWYAT يقول...

بالتوفيق ان شاء الله

بس اليوت مشغتغلش باطنه على فكره

ليس فقيرا من يحب يقول...

هههههههههههههههههههههههههههههه

وربنا انتى عسل وبوست زى العسل

معرفش حاله النشاط التدوينى اللى مش

بتيجى غير ايام الامتحانات دى يابت

ركزى شويه

مجرد حلم صغنتوت يقول...

شدي حيلك يا جميل ربنا معاكي يا رب
ربنا يوفقك ويكرمك ويعدي الامتحانات على خير عليكي وعلى كل اللي بيمتحنو يا رب :)


بوست جميل واللينك بتاع مروان أنور روعة
انا اول مرة اسمعه من يومين.. بجد تحفة ما شاء الله

اقصوصه يقول...

اول مره اسمع عنه

شكرا للطرح :)

الشعب لابد له من حكومه تشكمه يقول...

شعر وامتحانات وادب بتفكرينى بااااااااااااااايه انا كنت بدرس حجات من قبل الميلاد :( ونفسى افهم فايدتها اييييييييييييييييييه لحد دلوقتى غير اننى كنت بترجم اللغه العربيه الى لغه عربيه اسهل علشان افهم:)

مجرد بنت يقول...

ههههههههههههه

Lady E يقول...

شكرا ليكم يا جماعه فردا فردا

نورتوني