الاثنين، 11 يناير 2010

الحمد لله الفرحة صالحتني شوية


صدق اللي قال اللي تخاف وتكتئب منه ميجيش أحسن منه

امبارح كنت محبطة جدا ان عندنا امتحانين في نفس ذات اليوم ومكنش ليا نفس افتح كتاب خالص
المهم خلصت الsheets الحمد لله وقرأت شوية عن المادتين اللي كنت مطنشاهم وقررت ولأول مرة اني مش همتحن شفوي
وصحيت الصبح على اساس اني مش همتحن شفوي لبست براحتي وفتحت المدونة لقيتها زي ما هي مفيش جديد
واتصلت بزميلاتي زعقولي وقالولي لسه مجيتيش ليه دايما متأخرة بس انا مع مقولة ان تأتي متأخرا خيرا من أن لا تأتي

المهم من غير تفاصيل كتير دخلت المدرج ودورت على البنوتات زميلاتي (الجروب بتاعنا) ولقيتهم وبدأت أغير رأيي في اني أقول للدكتور مش عايزة امتحن أصل انا لو مكان دكتور أنور وطالب قاللي كلمة مش عايز امتحن دي هتستفزني وممكن ادي للطالب اللي قاللي كده صفر كبيييييييييييرة وبعدين هو بيدرسلنا مش مادة او اتنين دول تلااااته يعني لو شلتهم تبقى السنة كلها طارت
حلو ان الواحد يحط نفسه مكان الأشخاص اللي بيتعامل معاهم أحيانا

خليت داليا شرحتلي شوية حاجات في النقد أو اللي انا مسمياه نكد
وركزت على شخصية الناقد الفوق الفظيع ماثيو ارنولد وقولت مهما حصل مش هجاوب غير السؤال ده وخير وسيلة للدفاع الهجوم :)

قعدت اهزر مع داليا وباقي البنوتات وأقولهم فاكرين فيلم مورجان احمد مورجان لما كان بيمتحن شفوي
الدكتر قال له what is your name
فمورجان قال له : what?

فالدكتر قال له : what is your name

فمورجان قال له :yes yes yes Morgan

أهو انا دلوقتي لو الدكتور سألني عن اسمي هعمل زي مورجان

بعد شوية انتظار وانا على اعصابي لمبة من اللمبات الكبيرة في المدرج وقعت بس الحمد لله مفيش اصابات واسكتوا مش الحفر اللي اتكلمت عنها في الكلية رحت لقيتها كأنها مكنتش موجودة :) بجد حاجة غريبة

المهم بعدها بشوية الدكتر نده اسمي وسط جروب يعني الاحراج مش بيبقى خاص بيبقى عام ودي اكتر حاجة كانت مخوفاني اصل مش انا اللي اتحرج وسط زمايلي علشان سؤال هزولت وتنيلت وتبهدلت جدا
وأصلا من كتر الاسترس والاستبحس كنت باكل نص الكلام وانا بتكلم وأخيرا أخيرا جه دوري
والدكتر قال اسم بابا غلط فبكل أنفه وعزة نفس وثقة في النفس رديت ع الدكتر
وكإني واسيق في الفوز واسيق في الفوز :)
وقولتله اسم بابا صح اومال ايه من جوايا مرعوبة بس من بره هادية جدا وواثقة من نفسي جدا وبعدين الا اسم بابا التار ولا العار
وبعدين الدكتر نده زميل لينا اسمه أمير وسأله سؤال ماثيو ارنولد (السؤال اللي انا ناوية اجاوبه)
وأمير قال كلمتين وبس المهم الدكتر استنى شوية وبعدين قاللي yes
Can you answer >>>>>>>>> art>>>>>>>
انا : can we talk about Matthew Arnold?
الدكتر : this question about Mattew
انا : but I want to introduce him
الدكتر : ما شاء الله انتي بتختاري السؤال كمان
انا : ده سؤالي أصلا يا دكتر بس أمير جاوبه ( كان دوري في الامتحان ونده زميلنا يجاوب انا مالي؟ )
الدكتر : ضحك وقاللي بالانجليزي لكي ما تريدين جاوبي :)

وطبعا انا وقتها حسيت اني معرفش ماثيو ارنولد ده ولا عمري شفته عاااااااا بس الحمد لله اللي افتكرته قولته
وفجأه سكتت خلاص حسيت اني ناسية كل حاجة بجد

فالدكتر قاللي : مستواكي حلو ويجي منك بس نظرة عينيه بتقول كان ممكن تجاوبي احسن من كده

انا : يا دكتر اللي بيقعد هنا أساسا بينسى كل حاجة ( كنا كلنا اللي هنتسأل قاعدين على بنش وعلى حسب دورنا في كشف الأسماء بنتسأل ) فالبنات اللي جنبي كلهم في البنش قالولي ينصر دينك كلنا نفسنا نقول الكلمة دي والله عندك حق وابتسموا كلهم وبعدها الدكتر قاللي thank you

وعدى الامتحان على خير وامتحنت الحمد لله هييييييييييه ونفسوياتي في السما وفرحانه بجد
لسه بقى امتحانات الترم (التحريري) وربنا يسهل ان شاء الله خير

هناك 24 تعليقًا:

SHAPE YOUR LIFE (ABOALI) يقول...

هههههههههههههههههههههههه
ربنا يوفقك يا ليدى
شدى حيلك

وجميل كواليس الامتحانات بتاعتك دى الواحدبيستمتع بيها ويتذكلا الزمن القديم
ايااااااااااااااااام
يلا سلاااااااامى ليكى

بنجاواتى يقول...

congratulations

نصيحتى عاملة شغل ;)

ذاكرى
ذاكرى
ذاكرى

بسمه عبدالباسط يقول...

ههههههههههههههههه

موتينى من الضحك بجد ربنا معاكى يا جميل

الشعب لابد له من حكومه تشكمه يقول...

انه الاورااااااااال يعععععععععععععععع متفكرنيش ههههههههههههههه.
الحمد لله انه عدى ياجميله وعقبال باقى الامتحانات ان شاء الله:)

♥نبع الغرام♥♪≈ يقول...

السلام عليكم


نونو حبيبتى وحشتينى يا قمرى أوووى

كل سنه وانتى طيبه حبيبتى

بتمنالك السعاده من كل قلبى
ربنا يسعدك يارب ويوفقك
بتمنالك النجاح ووالسعاده من كل قلبى بيبتى

انتى جميله اووى
أسفه لتأخيرى عليك بس بجد بقالى فترة كنت مريضه
ورجعت رغم انى لسه تعبانه
ربنا يوفقك يارب واشوفك فرحانه ومبسوطه على طووووووول
سلامى لأمى الحبيبه
تحياتى لكم
ايناس

بسمة انور يقول...

ezyk ya ledy
wa7shaaaaaaany
kol ent7an we enty tiba
emt7any bokra rbna yostor

أسماء أحمد فى حفلة تنكرية يقول...

بس انت بتاخدى قرراتك كده بسرعه يا ليدى وده غلط اوى
وبعدين انا قولتلك قبل كده انك مشكلة
بس والله مشكلة حلوة
احلى مشكلة كمان
كان حقك تقومى تضربى الدكتر علشان غلط فى اسم باباكى ههههه
وعارفه ايه اكتر حاجه عجبت الدكتر فيكى هى ايه؟
اكيد اسلوبك ذى ما انا بردو عجبنى اوى حاجه اسلوبك
وربنا يوفقك فى كل الامتحانات

Cute Kitty **sookra يقول...

ربنا يوفقك يارب وتنجحى
ربنا معاكى بس انا ماعتش فاكره اى حاجه عن العنجليزى ياليدى والله حاسه ان مخى صواميله صدت وعاوزه تتشحم
هههههههههههه
ربنا معاكى والمره الجايه ابقى اضربى الدكتر ياتوتا
هههههههههههههههههه

شلاطة يقول...

يا باي
ههههههه
امتحانات الشفوي دي بتجيبلي شلل نصفي

اصل انا كنت تجارة انجليزي

بعيد عنك بقى استف الدكاترة اعوذ بالله من غضب الله وبالذات كده لما يبقى معقد نفسيا

بس اقولك على حاجه ونصيحة
الا انك تسيبي امتحان او تفكري في الموضوع دا

لان اي دكتور لما بيلاقي الطالب غاب ممكن يسقطه عادي
لانه ممكن يقول انه مش مدي لمادتي اهتمام

وحصلت معايا في سنة 2 جامعة
بس انا مغبتش

كان عندنا دكتور بيديني وانا في سنة 1
وبعديها مات
فكان المرحوم مادته عادي يعني ممكن تكتبي كلام ملوش علاقه بالمادة وتنجحي

كان اسمه د عدلي ومادة عدلي معروف انها مش بتتذاكر اصلا وكانها مش من ضمن المواد

المهم جالنا خليفته

وكان بيعمل شفوي وميد تيرم ومشروعات وامتحانات صعبه

وقرفني في سنة 2

وادالي في تالته لقيته دكتور فري جدا

اتضحلي انه بيعمل كده عشان يعمل لمادته قيمة وهذه هي عقدة اغلب الدكاترة يا آنستي الفاضلة

ومن دا كتير
واحمدي ربنا انك في رابعه وخلاص كلها كام شهر وتنتهي من الفيلم الهندي الا اذا كنتي ناوية على دراسات عليا

سلام

اقصوصه يقول...

بالنجاح والتوفيق يا رب

حاسه باحساسك

يلا هم وانزاح

وعقبال باقي الهموم :)

موناليزا يقول...

:) عقبال بقية الامتحانات

هي وظروفها يقول...

اولا ربنا يوفقك

احساس المتحانات في نظام تعليمنا اكننا هنحارب اسرائيل بالشوم

احساس مرعب ربنا يوفقك وشدي حيلك ومتخليش المدونه تاخد وقت كبير منك

لأنك بجد مش هتحسي بمتعه الا اما تخلصي دراسه ولا دكتور رخم يندهك ولا معيد
ميعرفش اسم خالته وجاي يعمل فيها كبير الدهشانه

ونصيحه من جامعي سابق استغلي الفتره دي في الأستمتاع بصاحبك لأن بعد كده الدنيا بتاخد الناس انا شاب وحصل كده

فمابالك بالبنات شدي حيلك وربنا يوفقك

Tears يقول...

الحمدلله ان الامتحان عدى على خير ...ابقى ذاكرى احسن من وجع القلب ده....طول عمرى اهون عندى اذاكر عشر ساعات فى اليوم و لا يحصلى القلق ده...زمان ايام الدراسة كنت دايما بطلع من الاوائل بس لما كبرت شوية و بقيت ادرس لطلبة الجامعه شفت قد ايه فيه ناس مكبرة دماغها جدا

Lady E يقول...

ABOALI : امين يارب

سعيدة ان في حد بيستمتع بقراءة مدونتي

ويارب دايما

شفـقــة و إحســــان يقول...

ربنا يوفقك وينجحك بس ذاكرى كويس
مع العلم انى زعلانة منك جدااااااااااااا
كل ما ادخل المدونة اقول ليدى هتسال عليا زى زمان
لكن للاسف لا حس ولا خبر انتى زعلانة منى ولا ايه؟؟

هناء محمود يقول...

ربنا يوفقك والحمد لله إللى تخاف منه متلاقيش أحسن منه

احساس طفلة محبة للرومانسية بس واقعية يقول...

هاهاهاهاهاهاها
عارف انا جو الامتحانات دا
مزنق رهيب واحراج حتى للى مذاكر
بس برضو ايام حلوة هتفتكريها ان شاء الله بعدين وتبقى ذكريات سعيدة

عايزة اقولك رغم انك عارفة :)
امنية سليمان صوتها جميل جدا ليف وافضل كمان من صوتها مع الموسيقى
سمعتها على اف ام الخميس اللى فات
لو لقيت الحلقة مسجلة هبعتهالك

وبرضو هقولك انى متابعة وباجى على طول وانتى بتشوفينى وانا شفت نفسى فى المرايا اللى تحت دى بس المعركة السوماوية نسبة لسوما وما ادراكى ما الاطفال زى روفى كدا بس بدل العياط خدى اتخاذ قرارات ولازم تتنفذ امال بنعلمهم الديموقراطية والحوار كدا بالكلام :)

الحمد لله ان الامتحان عدى على خير
عقبال السنة كلها :)
ربنا يوفقك يا قمراية

دمتى بكل خير
تقبلى مرورى

تامر علي يقول...

كويس انها جت سليمة المرة دي بس بعد كده ممكن تتسألي عن ارنولد شوارزينجر ومش هاتعرفي تقولي ايه .... انت قولتيلي انت في كلية مين ؟؟:)))

لجين أبو الدهب يقول...

طب كويس والله الحمد لله ..

فعلا اللى تخاف منه ما يجيش احسن منه ..

احنا كنا انا وزميلاتى نبقى مرعوبين كده من الامتحان الشفوى..

بس مع القعدة ولما الدكتوربدأ يكلمنى وكده الاستريس بيفك خالص وبنطمن حتى لو مجوبناش

بس ان حد اتكلم معانا دى لوحدها بتطمنا ..

يارب عقبال الباقى ياجميل .ز

دمتِ بخير ..

صوت من مصر يقول...

اظن ان الفرحة تمتلكنا
لكن لثوانى

Lady E يقول...

بنجاواتى : جدااااااااا ما انا مش بعمل بيها :)

Lady E يقول...

bos bos بسمه عبدالباسط : ربنا يسعد ايامك

اللهم امين

Lady E يقول...

شيما : مش يع أوي :)

ساعات بحس ان الامتحانات الشفوي احسن بكتير من الامتحانات التحريري علشان الشفوي فيها حياه لكن التحريري انتي والورقة والقلم مع نفسك بقى :)

ان شاء الله

Lady E يقول...

إبتسامة ملاك : وعليكم السلام ورحمة الله وبركاته

وانتي كمان وحشاني يا انوس

وانتي بالصحة والسعادة يا قمرايا

امين يارب ربنا يتقبل ويستجيب

الف سلامة عليكي وربنا يتمم شفائك على خير يارب

دمتي بخير