الجمعة، 8 يناير 2010

أيام الإنطحانات

أيام الانطحانات

النوم بيحلى ، الكمبيوتر بيحلى ، المدونة بتحلى ، التليفزيون بيحلى ، الشوكولاتة بتحلى ، الشيتوس بيحلى

القراءة في كل حاجة ما عدا كتب الكلية المؤكسدة بتحلى ، الخروج بيحلى ، السفر بيحلى ، وبالنسبة للبنوتات الميك اب بيحلى ، الموسيقى والأغاني بتحلى
وبالمناسبة البوم اليسا الجديد مش حلو الالبوم اللي قبله كان احلى بكتير

بيستحي اغنية هطلة بيتهيألي تليق ان مطرب يغنيها لحبيبته بس مش لايقه ان واحدة تغنيها لحبيبها

امري لربي اغنية كلماتها عاجباني لكن لحن وصوت :( لا تعليق

سلملي عليه تقليد باين اوي لأغنية سلملي عليه بتاعت فيروز بس الكبير كبير يا اليسيا

ما عاش ولا كان لذيذه

متعرفش ليه جميله بس بالنسبة لي كلماتها عادية علشان لسه محستش الاحساس ده مع حد

مصدومة غريبة

تصدق بمين وعيشة والسلام تحففففففففه

اليسا اتفزلكت كتير الالبوم ده ، هي مطربة استديو ممتازة لكن لايف بتنشز وصوتها مبيتسمعش ، يا ترى هتغني الالبوم ده ازاي لايف وهي اصلا بتنشز في الاغاني العادية !

، كمان عاجبني مطربة اسمها أمنية سليمان اغنيتها الاولانيه الحب بيجي في ثانية وأغنية مش هوه وبتحنلي

صوت يتسمع بجد لسه مسمعتهاش لايف بس شكلها بتغني بجد

وكمان في الامتحانات التهييس وقلة التركيز بيبقوا عاليين شوية ، النهاردة رحت لتالت مرة مع روفي للدكتور
والنهاردة مكنش خنيق واصلا مسألتوش عن حاجة بس ارتحت لما روفي الحمد لله بقت كويسة احسن من الأول بكتير الحمد لله – تقريبا انا خلفتها ونسيتها - وقعدنا سوى في الكتكوتة انا وروفي (روفان بس انا بدلعها)


ماما راحت تجيب لها الدوا وبتاعة كده الأطفال بيحطوها في بقهم فيبطلوا يعيطوا وفي الفترة اللي ماما راحت فيها الصيدلية روفي مبطلتش تعيط وفرجت عليا أمة لا اله الا الله وكل الناس بيبصولي على اني أم قاسية ومش بأكل بنتي يا جماعة والله مش انا مش اناااااااااااا انا مش مامتها واحدة من الواحدات بصتلي شذرا وكنت متوقعة انها تفتح باب الكتكوتة تضربني وتمشي علشان روفي بتعيط ، واحد تاني شخص كبير كنت بركن الكتكوتة فقاللي اهدي اهديييييييييي –كان بيزعق لي - قولتله حاضر مش عارفة ليه لغاية دلوقتي قولتله حاضر ولا عارفة ليه قاللي اهدي هو انا اللي كنت بعيط ولا روفي ؟ بس مع انه حرق دمي الا اني فعلا هديت لأني كنت متوترة جدا وروفي بتعيط وبصيت لروفي وقولتلها عارفة يا روفي كل ده هيتنسى انتي نفسك دلوقتي مش عارفة انا بعمل ايه علشانك مش عارفة انا خايفة عليكي اد ايه ومش عارفة انا بحبك اوي اد ايه مش عارفة حاجات كتير
يا ترى لما تكبري هتفتكريني الله اعلم ومسحت دموع روفي وتأكدت انها لسه مش بتشوف علشان لما ايدي جت جنب عنيها مرمشتش واخيرا ماما جت وانقذتني من بكاء روفي

وأخيرا في الامتحانات بيحلى الهروب وهو ده اللي انا بعمله دلوقتي وانا بكتب البوست :)

طبعا الكلام ده عن الطلاب العاديين اللي زي حلاتي ، الكلام ده مش للطلاب الدحاحين اطلاقا

ولكل الطلاب المطحونين بهديلهم الأغنية اللي بهدلتها :

ليلي نهاري بنااااااام يا حبيبي لا ملامة حبيبي واعمل ايه

ليلي نهاري مخنوقة يا حبيبي والكتاب عايزة ارميه

مش عايزة انا اشوفك قصادي (يا كتاب)

ياريت امتحانك امتحان عادي

قدامك حياتي دي اصعب حياااااااااااة


يوم الامتحان يصبح العقل بتنجان

هناك 21 تعليقًا:

بسمه عبدالباسط يقول...

ههههههههههههههه

معلش يا حبيبتى كلنا كده أيام الأمتحانات بس نعمل إيه دنياااااااا

وبخصوص اليسا فعلا أكتر حاجة غاظتنى ومش منطقية أغنية بيستحى أزاى يعنى بيستحى هو مين اللى المفروض يستحى
بس لما تفكرى فيها شوية وتشوفى الست اليسا وطريقتها ولبسها وكل شىء أعتقد ممكن يكون فيه رجالة تستحى معاها

هههههههههههههههه

dramaqueen يقول...

عسل يا ليدى
ربنا يوفقك يارب فى الامتحانات
وبلاش نوم وشيبسى والحاجات دى

والبوم اليسا فى حاجات حلوة لكن فى حاجات بتتفزلك زى ما قلتى
وفعلا اللى قلتيه على الاغانى صح

امنية سليمان صوتها روعة
واحساسها حلو اوى
اتفرجى على كليب مش هو هيعجبك اوى

بالنجاح يا توتة
والف سلامة على روفى
مقلتيش صحيح هى تقرب لك ايه؟

سلام يا قمر

اقصوصه يقول...

ذكرتيني بكل هالاحاسيس الصعبه

ايام الامتحانات ايام طوارئ

الله يعيننا!

الله يشفي الصغيره يا رب

ولو اني ما فهمت لحد الحين

شو صلة القرابه بينكم؟

R-H-S يقول...

دي عدوى بقى كلنا بتجيلنا نفس الحاله ايام الامتحان بس فين الاراده تيجي منين
لو عرفتي قوليلي الله يخليكي

علي الهامش :تعليقي علي البوست اللي فات انا كنت بهزر انا مش عارف انتي قلبتيها بجد ليه

تحياتي

ستيتة يقول...

يا ماما روحي ذاكري
ههههههههههههههههههههه

انا كمان حاسة انك بتدوني اكتر من الصيف وبتعلقي اكتر من اول السنة وروفي واضح جداااااااااااا انك خلفتيها ونسيتيها

سيبك من روفي وامشي ع الإنطحانات
ههههههههههههههههههههههههه

MǿиY El-Shreef يقول...

لا لا لا لا لا لا لااااااااا اتفق قبل اي حاجه ف موضوع اليسا والبومها الاخراني

نو نو نو نو

بييستحي اغنيه تحفففففه انا بسمعها كتير اوي ومصدومه كمان وتصدق بمين وماعاش ولا كان ومن غير مناسبه ده غير تحفة الالبوم كله عا بالي الاغنية دي مالهاش حل ابقي اسمعيها انتي ماجبتيش سيرتها اساسا هنا :(

اما كل حاجه انتي قلتيها ف حوار الامتحنات فهي فعلا حاصله معايا بكل حذافيرها بالذات الاغاني والميكاب والنت والمدونه :))

وع فكره اخويا ابراهيم عمل معايا موقف قبل كده شبه الي حصل معاكي :)))) وكان ف الشارع وقعد يصوت واانا مستنيه ماما ومسكاه ولم علينا الناس وكان بيخبط اي حد معدي برجله :))

كان يوم مسخره

ربنا معاكي يابنتي ومعانا كلنا لاني فعلا مش من الطلبه الدحيحه دول :))

ليس فقيرا من يحب يقول...

هههههههههههههههههههه

انت مشكله

يابت روحى ذاكرى

على فكرة انتى زى العسل

MǿиY El-Shreef يقول...

اه صحيح نسيت اقولك ان البوم اليسا فعلا اقل من الي قبله بس مش وحش للدرجادي :D

بسمة انور يقول...

ازيك يا قمرتى

حلو التهيس مش كده هههههههههههههه

شردتى اليسا خالص
بس بجد اومنيه سليمان تحفه وليها اغنيه كمان اسمها بتحنلى بجد تحفه

كل تهيس وانتى طيبه يا اختى
ويعوض عليك يا عمرو

هناء محمود يقول...

عندك حق بجد كل حاجة بتحلى أيام الإمتحانات دى بصراحة مع إن الجواز والخلفة وشغل البيت متعبين وبردوا مملين ومش بيخلصوا بس أرحم من المذلكرة والإمتحانات وحملان الهم .. يلا هم وانزاح عقبالك

بس روحى يا ماما ذاكرى وبطلى تلاكيك بدل ما أقول لبابا وماما يطلعوا الكمبيوتر من أوضتك والتليفزيون يحطوه فى الكرتونة فوق الدولاب هاااااااا عايزين إمتياز

مي يقول...

هههههههههههه وحشانى ياقمرر اعذرينى قليل اوى بدخل عاملة ايه ربنا معاكى فى الامتحانا يا حبيبتى بس انا بحب الالبوم ده بتاع اليسا وبالذات مصدومة بحبها وتصدق بمين
انتى يابت ذاكرى بقى وبطلى لعب
ربنا معاكى يا قمر
اموواه

شوكولاتة يقول...

وحشتيني قوي يا ليدي ياللي مش بتسألي عليا أبدا بس أنا هسامحك علشان البوست التلقائي اللذيذ ده وربنا يخلي روفي ونشوف ولادة كده يارب والامتحانات تعدي على خير وطبعا لو عوزتي حاجة انا تحت أمرك أنا خبرة سابقة برضو بس بقولك إيه أنا مش مسؤلة عن اللي هايحصلك أوك

ياللا بقى روحي ذاكري وربنا معاكي
أمووووووووواااه

بنجاواتى يقول...

ذاكرىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

لجين أبو الدهب يقول...

والله ياليدى فعلا

سبحان الله كل حاجة تحلى ايام الامتحانات

تبقى نشيطة جدا ومركزة ومصحصحة

اول ما تدخل ايام الامتحانات تلاقى النوم والكسل والوخم وكل حاجة تصيبك كده وتبقى هاتموتى من نفسك

كان فى الكتب منوم مثلا

مش عارفة اقولك ايه لانى كنت بمر فى كل الامتحانات بنفس الحالة D:

بس سيبها على الله ومعلش ركزى واهى هانت ان شاء الله

رربنا ينجحك ياجميل وكل طلابة المسلمين ..

دمتِ بخير ..

الشعب لابد له من حكومه تشكمه يقول...

ايه ده ايه ده,,ال اليسا وحش ال.
تعالى نتخانق هنا,شوفتى مصدومه؟؟
طب بيستحى اللى مش عجباكى دى عجبانى جدااااااااااااااااااااا..
تحسيه هيجبلها شلل او هارت اتاك:))

بصراحه عجبنى اليسا.

وفعلا كل حاجه بتحلو ايام الامتحانات الااااااااااا المذاكره:))

اباه قوليلى عملتى ايه فى الاورال يابطه.

محمد فؤاد (صاحب عمود النور) يقول...

ايه الكلام العالى دا
بوست حلو قوووى وعجابنى قوووى تحليلك لشريط اليسا واضح انك ليكى فى المزيكا او بتلعبى مزيكا انا بخمن وبقول كدا من ان اليسا مغنية استديو ودا فعلا انا بحسها كدا اصل انا مزكاتى قديم هههههههه

شدى حيلك فى الامتحانات ويارب تعدى على خير

ممكن طلب؟؟
عايز اعرف ازاى اعمل موضوع ممنوع النقل دا عشان مافيش حد ياخد حاجه من المدونة ممكن؟

Unknown يقول...

بدايةً كيفك وكيف امورك ان شاء الله تمام
اشتقتلكم كتير بعد هذا الانقطاع الغير قصير , اتمنى ان لا تكونوا قد نسيتموني وان اكون صديقاً عزيزاً لديكم تفتقدموه وقت غيابة
صراحة تحمر وجنتي خجلاً بهذا الانقطاع عن مدوناتكم وحروفكم التي كنت اموت شوقاً لرؤيتها , ولكن للأسف الشديد ابى مرضي الا ان يبعدني عنكم طوال هذه الفترة

عدت عليكم من جديد , احمل اليكم مجموعه من الافكار والمقترحات
فأنتظركم ليطيب بكم اللقاء

مع اطيب امنياتي
اخوكم
حازم

ميرام يقول...

أنا جاية أسلم
(:

Lady E يقول...

بوسبوس : ههههههه على رأيك مع اليسا لازمن ولابندق يستحي :)

نورتي المحكمة :) صحيخ العلم نورن يا بوسبوس

Lady E يقول...

dramaqueen : امين يارب

وربنا يوفقك في شغلك وحياتك يا باشمهندستنا :)

وأكيد شفت كليب مش هوه وعجبني ان مامتها معاها في الكليب

مع اني قولت في البوستات اللي قبل كده بس هقولك تاني روفي بنت عمي

سلام يا كوين يا قمرايا
منوراني دايما

Lady E يقول...

اقصوصه : فعلا بتبقى ايام طوارئ

ربنا معانا ويوفقنا

روفي بنت عمي يا اقصوصه