الجمعة، 1 يناير 2010

فرح ...

اولا : بعتذر اني مش عارفة ارد عالتعليقات بتاعت البوست اللي فات بس بجد شكرا على تعليقاتكم جميعا


برغم ان الكعب العالي بهدل البنوتات جميعا بلا استثناء وانا اولهم وفي اخر الفرح وبعد الزفة مكناش عارفين نمشي اساسا :) وبرغم اننا لبسنا فساتين السهرة في عز البرد عاااااااااا وبرغم حاجات تانيه كتير بس الفرح كان تحفففففففففه كان فرح خيالي وكنت حاسة اني أميرة من أميرات ديزني

محضرتش كتير للفرح لأني مش فاضية اساسا ومفيش وقت اني انزل اجيب فستان سهرة جديد وبالتالي عملنا نيولوك لفستاني اللي بيصوت بقاله كتير في الدولاب وبيقول اغثيوني حد يلبسني بقىىىىىىىىى طلعوني م الركنة اللي انا فيها

المهم رحت امبارح الكلية الصبح وتوالت المفاجأت اخر محاضرة وباقي المنهج مقرر علينا ده غير اللي منه لله اللي حط جدول الامتحانات
الاسبوع الجاي كله امتحانات شفوي وتسليم الشيتات ومناقشتها واللي بعده الامتحانات التحريري ويوم ورا يوم حبيبي :(all English all the time


نقلت الجدول وكل ما اقابل حد من زميلاتي مرسوم على ملامحنا ملامح الصدمة ورحت لماما قولتلها : مصدومة بجد ومش بنطق ومش عايزة ارد وكل اللي كنت عايزاه اني اعيط وقفلت اكتر ما انا مقفولة من الفرح


مكنش وقت افراح اطلااااااقا دلوقتي ورددت كلمتي المشهورة مش عايزة اروووووووح الفرح
كالعادة سافرنا وحسيت بهبوط في الطريق وبعدين وصلنا نمت شوية واتغدينا ولبسنا وجدة بنت خالتي دعتلي كام دعواية كتير وقالتلي اني زي القمر :) علشان عيونها حلوين بس


ووصلنا مع وصول العريس والعروسة لباب القاعة من بره ، لقيت كل الناس بتبصلي وانا داخلة كنت محرجة جدا وقعدت اقول في سري يا جماعه والله مش انا العروسة محدش يبصلي بقىىىىىىى

المهم ابن خالي عمل لفتة حلوة اوي وهو داخل القاعة ومندمج مع العروسة بصلي وابتسم وقاللي عقبالك وطول الفرح كان مهتم بيا وسلم عليا ولما رحت اسلم عليه في الكوشة ساب ايد عروسته وسلم عليا
برغم انه عارف اد ايه مراته بتغييييييييير مني كان في حد هنا في المدونة تقريبا شلاطة كان بيقوللي استمتعي بغيرتها وهو ده كان احساسي في الفرح كنت مستمتعة جدا جدا انها غيرانة مني :) نياهاهاهاها
وكمان رسالتها وصلتني واللي بتقول فيها يعني انا عاملة الفرح في عز امتحاناتك وبرضه جيتي
في بداية الفرح جت مروة بنت خالي وسلمت عليا وما شاء الله بقت خليفتي في الملاعب :) عاملة نفس الميك اب بتاعي برغم ان بقالنا كتير مشوفناش بعض بس حتى الوان فساتيننا كانت شبه بعض


ومرضيتش ترقص زيي مع انها اخت العريس ، المهم في اخر الفرح عملنا دايرة للبنوتات وخليتها ترقص وبعدما سلمت على مروة طنط مامة العريس قالتلنا نقف جنب الكوشة (على فكرة وانا بكتب عن مروة دلوقتي رنت عليا :)
وطول الفرح بسلم على طنطاتي المعزومين وبيقولولي عقبالك من غير شدي حيلك :) وجالي عريسين ماماتهم كلموا مامتي قدامي:) طول عمري بسمع ان الافراح بتجيب افراح بس اول مرة تحصل معايا


اول طنط منهم سلمت عليا وبصت في ايديا الاتنين وقالتلي اوعي تكوني مخطوبة قولتلها لأ يا طنط لسه بدري
قالتلي عريسك عندي دكتور وزي القمر واتكلمت كتير مع طنط وضحكنا سوى وقولتلها اني مش عايزة اتجوز في المنوفيه :) قالتلي محدش عارف نصيبه فين


وطنط تانيه زي القمر شبه كيكي صبحتي قالتلي ان شاء الله نحضر فرحك عن قريب قولتلها عن بعيد قالتلي لأ قريب ، يا طنط عن بعيد وطنط تقول عن قريب طب اقنعها انه عن بعيد ازاي :) مش عارفه

ابن خالي كان زي القمر في بدلة العريس والعروسة كمان كانت عسولة اوي برغم انها مش طايقاني بس بجد كانت أمورة
بجد فرحتله من كل قلبي اخيرا الباشمهندس هيستقر وهيكون أسرة وبيت وهشيل البيبي بتاعه
فرحت لفرحته وفرحت اني ضغطت الوقت وجيت حضرت الفرح لأن بجد الفرح امبارح عمل لي ري فريش كنت فرحانة اوي وطايرة اوي
ربنا يكتر افراحنا وافراح المسلمين يارب وعقبالنا كلنا

ع الهامش : عارف يا حبيبي في رقصة السلو وأغنية جنات اسمع كلامي وأغنية We're in heaven كنت حاسة انك معايا ومرضيتش أرقص سلو مع حد علشان مش هرقص سلو مع غيرك مش هطير غير معاك ومش هحب غيرك
وعارف كمان في أغنية بغيرعليها لتامر كنت حاسة انك بتغنيهالي ، ان شاء الله فرحنا يبقى أحلى فرح وقصة حبنا اللي هتتولد في النور تكمل قصص الحب الجميلة اللي أكيد ناقصها قصة


هناك 50 تعليقًا:

أسماء أحمد فى حفلة تنكرية يقول...

الفرح الفرح احنا الفررررررررررررررررح
وسعععععععععععععععععععععع ل ليدى
اكيد اكيد ذى ماقولتلك كنتى اجمل بنوته فى الفرح
ربنا يهنيكى يا رب
ونركز شوية بأه فى الامتحانات
happy new year my best friend......

VÖltaa يقول...

مممممممممممم
عقبالك :)

لجين أبو الدهب يقول...

ايه ده ؟؟
هى المذاكرة بتعمل شغل جامد كده
وتسكب الرومانسية سكبا على القلوب

حلوة سكبا دى D:

ياثريرة
بقى فرحانة ان البونية غيرانة منك
هاتفرحى يعينى لما تقوم تقتلك D:

عقبال فرحك ياربكده ياجميل
ونسمع اخبار حلوة قريبا كده من اثار الفرح ده

وكويس انك عملتى رفرش
كفاية لعب بقى ..

يالا اووام روووووحى على مذاكرتك D:

ربنا ينجحك حبيبتى
دمتِ بخير..

R-H-S يقول...

ههههههههههههههههه
يعنى انتي عارفه انها بتغيير ومستمتعه
ميصحش علي فكره

وعقبالك ياباشمهندسه
:)

الشعب لابد له من حكومه تشكمه يقول...

عقبااااااااااالك ياجميييييييييييل ,مش هتشددددددددددى حيلك باه ونفرح بيكى:))

على فكره مش هيقولوا شدى حيلك دلوقتى لسسسسسسه شويه:))
لبستى بربرق ,:))

بسمة انور يقول...

عقبلك يا قمرايه

وحشااااانى كتير

MaNoO يقول...

بجد انتى طيرتينى معاكى وانتى بتحكى احساس حلو جدا ونادا لما بييجى لحد فى اى وقت عشان كدا هقولك يابختك وعقبالك يارب ان شاءالله مع اللى تحبيه فى الوقت اللى انتى عايزاه

Cute Kitty **sookra يقول...

لبستى سواريه
ههههههههههههه
انا فرحانه انك اتبسطتى وانا فرحانه انك استمتعى بغيرتها
لانى بصراحه بعمل كدا كتير
عشان بتبقى بنات دماغها فاضى
المهم عقبالك وكل سنه وانتى طيبه
والامتحانات هتبقى جميله انشاءالله وهندعيلك

ستيتة يقول...

البوست ده يا ليدي بيقول انك طفلة عفريتة ومش ناوية تكبر :)
عقبالك ومبروك للعرايس

هناء محمود يقول...

آه يا وحشين يا شريرين يا ليدى انتى وسكرة بقى بتتسلوا على الناس وتستمتعى بغيرتها دانا لو مكانها كنت سيبت الفرح يتقلب وانقضيت عليكى قدام الناس ربنا مايوريكم شر الغيرة وعمايلها دى بتخرب بيوت

بلييييز يا جميل هدى اللعب شوية ... لأن اللعب فى المنطقة دى خطر بجد وانتى نفسك إللى ممكن تنضرى منه ومتنسيش إنه قريبك يعنى هتتقابلوا كتير وهتزوروا بعض وبلاش تعملى مشاكل معاها ماشى يا شقية إنتى

.. ومتفتكريش إن عقلها صغير ... نووووووووو... الحب كدة يا حبيبتى .. ولو كنتى فى مكانها هتعملى أكتر من كدة بجد .. وبصراحة أى واحدة فى الدنيا تشوف عريسها مهتم بحد تانى يوم فرحها حتى لو كانت ست العاقلين لازم تضايق ... وبكرة نفرح فيكى ونشوف ست العاقلين إللى مش بتغير

SHAPE YOUR LIFE (ABOALI) يقول...

يلا يا ليدى الف مبروك مقدما
بس مقولتيش اخترتى اى عريس من الاتنين حاجه تحير يا بنتى بقى ده وقت عرسان برضوا هتلاحقيها من شيتات ولا من عرسان.بس هتعملى ايه بقى اكيد كنتى الاميره فى الفرح .
بس عجبنى اسلوبك وتلقائيتك فى كتابه البوست وجميل انك عملتى كده لنفسك رى فرش قبل الامتحانات .

كل سنه وانتى طيبه يا ليدى وان شاء الله السنه دى تكون اجمل من اللى فات بكتييييييييير .

Lady E يقول...

أسماء أحمد فى حفلة تنكرية : ههههههههه كنا بنقول كده انا وبنت خالتي امبارح كنتي معانا ولا ايه

اومال لأ نياهاهاهاها لأ بجد كلنا كنا زي القمر

ادعيلي يا سومة الامتحانات السنة دي دمااااار

happy new year قولتهالك امبارح :)

Lady E يقول...

Mo7ammed : تسلم يا محمد

ربنا يكرمك

أسماء أحمد فى حفلة تنكرية يقول...

هقولك ع حاجه يا امورتى
انا بحس بكل حاجه بتحصل من غيري
نيااااااااااااااهاااااااا
واكيد اكيد بدعيلك والله و بدعى لنفسى كمان
انا خايفه جدا من الامتحانات
يلا ربنا يوفقنا ياااااااااارب

Lady E يقول...

لجين أبو الدهب : والله يا لوجي نفسي اذاكر بجد

يلا خير

اه حلوة سكبا دي بجد جبتيها منين :)

هاتيلي شوية معااااااكي :)

اعمل لها ايه يعني ما انا مش عارفة افهمها ان غيرتها مفيش ليها سبب

قولت بدل ما انكد على نفسي احول الشعور ده لحاجة ايجابيه

وان شاء الله تسمعي اخبار حلوة عن نجاحي :) سيبك من أثار الفرح

امين يارب

تسلميلي يا لوجي

Lady E يقول...

عاوز اصحي : ايون استمتعت انها بتغير لأن مش شايفة سبب لغيرتها وحاولت كتير ارضيها علشان هتبقى قريبتنا بالنسب بس لا حياة لمن تنادي خلاص يبقى الحل اني مضايقش نفسي :)

تسلم وربنا يكرمك

انا مشمهندسة مش باشمهندسة

يعني تقدر تقول اديبة نسبة لكلية الأداب

Lady E يقول...

الشعب لابد له من شيما تشكمه :

ههههههههههه لأ مش عايزة اشده

بستهيألي شدي حيلك هتبدأ بعد ما اخلص كلية :)

أيون لبست بربرق والميك اب بربرق وكله كان بربرق في بربرق :)

Lady E يقول...

بـــــسمة انـــــــــور : وعقبالك انتي كمان يا قمرايا

هفوت من عندكو بكرة ان شاء الله واحنا راجعين دمياط كان نفسي اشوفك

mohamed ghalia يقول...

مالك يابنتى ومال المنايفة
ههههههههههههه
عقبالك وربنا يسعدك دايما
يلا بقى روحى ذاكرى

بسمه عبدالباسط يقول...

عقبالك يا جميل

وبجد موتينى من الضحك

:))))))))

Unknown يقول...

ههههههه
يلا عقبالك يااااارب
بصراحه اشتقنالك زمان ما شفناكي :)
موفقة يارب

blue-wave يقول...

هوا انا وحش لدرجة انك ماينفعش تسامحينى؟

هناء محمود يقول...

دعوة لمدونتى الجديدة

http://awraktanbod.blogspot.com/2010/01/blog-post.html

(Joudy) يقول...

مالها بقى المنوفية مزعلاكى فى ايه طيب على الأقل كنتى هتبقى عندنا

ماشى يا ستى عقبالك كده لما نفرح بيكى يارب ونشوفك عروسة

دمتى بكل الخير والسعادة

Nostor Azzuro يقول...

مبروك وعقبالك

وشدى حيلك فى الامتحانات


happy new year

اقصوصه يقول...

عيشتيني فجو الاعراس

وذكرتيني بعقد قران صديقتي

اللي حضرته من اقل من سنه تقريبا

في الفيوم:) كان جدا جميل

عقبالك يا رب :)

يوميات شاب منوفى يقول...

اعرف بقى مالها المنوفية كوخة ولا كوخة دى حتى شبابها رجاله اوووى على العموم الف مبروك لابن خالك وعقبالك ويارب يكون عريس منوفى

P A S H A يقول...

ربنا يا رب يكتر أفراحكم ويجعل أيامكم كلها خير وسعادة :))

تحياتي
سلام

Ana keda يقول...

يا جزوفى

جاية متاخر المرة دى بجد وحقك عليا

بس لقيت حجات حلوة عمالة اضحك ايون ايون كده يبنتى ويا رب يعينك فى الامتحانات
بجد بجد عاجبانى الحتة الاخيرة دى اوى يا رب يسعدك دايما
خدى بالك منك بقى

ريمان يقول...

السلام عليكم


ربنا يسعدك دايما يا رب


وعقبالك ان شاء الله


اكيد كان فرح لذيذ

بس بلاش الكعب العالى ده متعب ومقرف جدااااا

هههههههههههه

على فكره انا رديت على سؤالك عندى فى مدونتى

دار الايواء دى موجوده فى دمياط فى مستشفى قسم اول اللى فى شارع الشرباصى الدور التانى

Lady E يقول...

MaNoO : سعيدة انك حسيت بالإحساس الجميل ده من كلامي

ربنا يكرمك

اللهم أمين

same to you

Lady E يقول...

sookra :أيون وفستاني كان لونه ذهبي والحجاب بني في ذهبي

مش كده برضه بنات هبله

تسلمي يا سكرة وانتي طيبة يا جميله

يارب ياااااارب الامتحانات تبقى جميلة

ربنا يستجيب دعواتك

Lady E يقول...

ستيته حسب الله الحمش : أيون :)

الله يخليكي ويبارك فيكي يا خالتو

عقبال مانوسة وعفروتو

Lady E يقول...

أم .. بوبه : احنا برضه اللي شريرين يا امبوبه ولا اللي هتنقض على اللي بتغير منها في الفرح :)

اهدي اللعب !!!!!!!!!!!!!! مش فاهماكي مين قالك اصلا اني بحاول اخليها تغير ؟ هي اللي غيرانة مع نفسوياتها وكمان افترضتي اني بعمل مشاكل معاها !

وعلى فكرة انا مش مفكرة اطلاقا ان عقلها صغير دي حاجة انا متأكده منها وبعدين لازم العريس والعروسة يبقوا مهتمين بالمدعوين والا مش مهم يعملوا فرح اصلا

وبيقولوا احيانا ان الغيرة دليل الحب بس لما مبيقاش ليها سبب يبقى نوع من الهطل من اللي بتغير
يعني واحد فضلك من بين ملايين البنات ولو كان عايز يتجوز ويعيش مع غيرك مكنش خطبك اصلا مش اتجوزك وعايز يكمل عمره معاكي وتغيري برضه !

Lady E يقول...

ABOALI : الله يبارك فيك يا ابوعلي

مش كده برضه قولهم مش وقت عرسان اطلااااااقا :)

وحضرتك طيب وبخير وصحة وسعادة

اللهم امين

same to you

momken يقول...

مبروك

عقبالك عن قريب


نياهههههههههههههها

تحياتى

Lady E يقول...

أسماء أحمد فى حفلة تنكرية : يا احساساتك يا سومة :)

امين يارب ان شاء الله خير لا تقلقي اطلاقا

Lady E يقول...

mohamed ghalia : ههههه خلاص يا محمد عرفت انك منوفي :)

امين يارب

same to you

Lady E يقول...

bos bos بسمه عبدالباسط : تسلميلي يا قمرايا

عقبالك وربنا يسعدك

سعيدة ان الموضوع ضحكك وان شاء الله دايما تكوني سعيدة وبتضحكي

Lady E يقول...

Mr.Hazem : امين يارب

same to you

تسلم يا مستر حازم هي بس الامتحانات ملخبطالي وقتي وان شاء الله هزور مدونتك في اقرب وقت

Lady E يقول...

blue-wave : ربنا يسامحك

Lady E يقول...

أم .. بوبه : مبروك المدونة الجديدة وان شاء الله هزورها في اقرب وقت

Lady E يقول...

(Joudy) : المنوفيه جميلة طبعا مقولتش حاجة

بس لما اكون من دمياط واتجوز في المنوفية بعيييييد

تسلميلي يا جوجو

same to you

Lady E يقول...

Nostor Azzuro : الله يبارك فيك

Happy new year

Lady E يقول...

اقصوصه : سعيدة ان كلامي عيشك في جو الأفراح

ربنا يكتر افراحنا وافراحك وافراح المسلمين جميعا

Lady E يقول...

يوميات شاب منوفى : حد قال انها كوخة !

تسلم والله يبارك فيك

والله اعلم النصيب فين

Lady E يقول...

P A S H A : أمين يارب

same to you

Lady E يقول...

Ana keda : لاااا مينفعش كده لازم غرامة تأخير :)

بجد افتقدتك

ربنا يسعدك دايما

امين يارب same to you

ويارب الحتة الأخيرة تتحقق وتبقى حقيقة

Lady E يقول...

ريمان : وعليكم السلام ورحمة الله وبركاته

امين يارب وانتي وكل المسلمين

ههههههههه الكعب العالي ده مشكلة بس فرح بقى

جزاكي الله خيرا

اول مرة اعرف ان في في قسم اول دار ايواء وان شاء الله اروح في اقرب فرصة

ربنا يكرمك ويبارك في حياتك

Lady E يقول...

momken : الله يبارك فيك

عن بعيد :)