الخميس، 3 سبتمبر 2009

اتكلم من الكيبورد

فشلت كل الجهود الحثيثة والمش حثيثة علشان أكتب بوست وبسم الله ما شاء الله لقيت كلام كنت عايزة أقوله بالحرف على مدونات تانيه (توارد الأفكار عامل عمايله )


وبإختصار كتير مننا كارهين بوجي وطمطم الجديد وفطوطة الجديد وانا مش حابه كمان تتر بوجي وطمطم اللي شيرين بتقول فيه بكل رقه ودلع _ تمتوته يا تمتم يا تماتم يا تمتاميه _
ومفيش أي حاجه من الحاجات اللي شوفناها في طفولتنا عملوها تاني وطلعت حلوة بالعكس عملوا صورة باهته ومشوهه منها

ثانيا من غير أولا : أكتر حاجه عاجباني من كل السلطه اللي بتيجي عالتلفزيون تترات مسلسل الأدهم الكلمات بجد جميله جدا للشاعر ابراهيم عبد الفتاح وكمان الأغاني جوه المسلسل للشاعر بهاء جاهين وكمان أداء لؤي جميل جدا وموصل احساس الكلمات واللحن يمشي برضه مفيش مشكله ولو مكنش في توزيع كويس اللحن مكنش هيبقى ليه لازمه وخصوصا انهم مستخدمين الكمنجات يظهر انهم عارفين اني بحبها :) ومن ضمن الكلمات اللي فاكراها وبحبها من مقدمة التتر الأول من المسلسل :

مبقولش أه م الغريب مهما يجرح
ولا يوجع الا قريب ف عذابي يفرح ............

يا دنيا ليه الأحبه نسيو الدفا والمحبه
الناس طمعها عماها حاسس ما بينهم بغربة
وليالي فوق احتمالي عالطيبين تقسى ......

وطبعا المسلسل قصته جميله واحمد عز ونهال عنبر الاتنين متميزين في أدائهم وكمان المسلسل بيناقش قضايا مهمة زي ظلم الأقارب والهجرة غير شرعيه
وكمان عجبني تتر النهايه من مسلسل اسماعيل ياسين والمسلسل ككل جميل جدا وبيبين اد ايه حياة الانسان المبدع واللي عنده هدف نفسه يحققه بتبقى صعبة وبيقوم من نقرة يقع في دوحديرة والدنيا بتلطش فيه لغاية ما بينجح وبيحقق هدفه ووقتها فرحته بتحقيق حلمه وانتصاره على الدنيا بينسيه تعبه والمه ومعاناته
كمان عجبني كلمات الشاعر ايمن بهجت قمر في تتر مسلسل ابن الأرندلي تتر النهاية مع انه كاتب كذا تتر وفيهم شبه من بعض
واحنا مفيش عندنا مشكله في الشعرا زي ما أيمن بهجت قمر قال في حواره مع الخنيق شوبير
وانا بأييد كلامه لأن الكلامنجيه كتير لكن قليل أوي اللي كلامهم بيبقى سهل وممتنع وبيدخل القلب زي اشعاره وان في ازمة ملحنين مش ازمة شعراء
شوية من كلمات تتر النهايه اللي دايما بتيجي على بالي من مسلسل ابن الارندلي :
ولا حد واخد حاجه معاه بلا هم
وكلنا
وكلنا ركاب سفينة نوح
وخبي مهما تخبي رايح فين وخبي مهما تخبي رايح فين
وقت الحساب تلقى الكتاب مفتوح
وطبعا مش ممكن انسى مسلسل ليلي مراد اللي كان جميل جدا طول ما كان بيمثل شخصية ليلى طفلة اول ما ليلى كبرت ومثلت شخصيتها مطربة سوريه باظ المسلسل ومبقيتش بشوفه عالسريع حتى زي باقي المسلسلات لأن المطربة السوريه مش عارفه تتكلم مصري كويس ده غير انها في كل مشهد بتغير صوتها وفي كتير من المشاهد بحس انها بتمثل فيلم كارتون مش مسلسل عن مطربة كلنا عارفينها وبنحبها الله يرحمها
واخيرا هل تعلم : ؟
ان محدش عارف الدراسه هتبدأ امتى ولا انا ولا زميلاتي ولا جروب كليتنا ع الفيس بوك ولا موقع كليتنا الموقرة وتقريبا ده سر من الأسرار الحوربيه وتقريبا كمان هيعملولنا مفاجعة سنة الليسانس ويجيبولنا الامتحانات قبل الدراسه ما انا خلاص بقيت متوقعه اي حاجه من كليتنا الحلوة
ان ايجيبت وحشتني جدا جدا وكمان الكتكوتة وحشااااااااني
وكيكي بتغيظني جدا وان أي حاجه بيعملها المدونين بتروح وانا لأ عااااااااا ليكي يوم يا كيكي وعلى فكرة انسي التلاته جنيه
ان تترات المسلسلات والحانها الفقيرة صحت جوايا حلمي القديم اني ادرس موسيقى دراسات حره ومش هأجل تحقيق الحلم ده ثانيه بعد ما اخلص الكليه المفتريه ان شاء الله
قبل ما ادخل الكليه قالولي موسيقى ايه بس ده علم لا ينفع وحرام عليكي تضيعي 4 سنين من عمرك في دراسه حاجه مش هتنفعك وبابايا ومامتي قالولي خلصي كليه وادرسي اللي انتي عايزاه دراسات حره وواضح ان بابايا مازال مش موافق مع ان وعد الحر دين عليه
واخيرا انا كتبت كل الكلام الغريب اللي فوق ده علشان صبحاتي اللي زعلانين اني مش بكتب في المدونة وقلقانين عليا وانا يا جماعه الحمد لله حية أرزق لا تقلقوا اطلاقا

هناك 28 تعليقًا:

KEBLAWYAT يقول...

"ومفيش أي حاجه من الحاجات اللي شوفناها في طفولتنا عملوها تاني وطلعت حلوة بالعكس عملوا صورة باهته ومشوهه منها"

ده حقيقى فعلا

حتى ميكى وكابتن ماجد بقوا سخفا أوى


الدراسه أعتقد 26/9

غير إذا كان عندكوا مواعيد تانيه

youssuf يقول...

بوجي و طمطم سخييييييييييف اوي فعلا ...

الله يرحمك يا يونس شلبي ...

انا لسة لحد دلقوتي حاطط علي موبيلي نغمة لاغنية بوجي اه اه يا بطني ...

حرمت يا بوجي ...
حرمت ...

كانت ايام ...

انا عاجبني جدا تتر هالة و المستخبي بالذات تتر النهاية ...

و نفسي اعمل زيك موضوع الدراسات الحرة بعد الدراسة بس في الأخراج السينمائي ... ربنا يوفقنا كلنا و نعرف نحقق مواهبنا او علي الأقل نفهم فيها شوية بدل ماهي بتتقتل غصبا عننا كدة ...

مرحبا بعودتك ...

كل سنة وانتي طيبة
تحياتي

------ يقول...

السلام عليكم

كل سنة وانت طيبة

جميلة اوى المدونة وانا سعيدة بزياتى ليها

واكون اسعد لو نورتينى

غير معرف يقول...

تتر وراي تتر ومسلسل وراه التاني وحبه كلمات وحبه تانيه اغاني وحبه هلوسه وحبه تانيه محيراني

يمكن الم او ندم او حسره أو شئ مجهوول في زمن فيه العقوول تتباع او تنداس او تتهان او تكون عقول رافضه تكون وتقلد حد تاني

قصه جميله وتانيه سخيفه وراها واحده كمان محيراني تنداس فيها كل الأماني

يارب ارحمني وارحم عبادك
دا كل ساعه فيها مسلسل وكمان ساعه فيه واحد تاني
ربنا يرحمنا ويسترها معانا من المعاصي


تحياتي

mohamed ghalia يقول...

كل سنة وانتى طيبة
اا عامل مقاطعة للتليفزيون الشهر ده
مش فاضيين له بقى
ربنا يسعدك دايما

لا تـــشـــتــــاق يقول...

طفله شكلك فعلا مش ناويه تكبري
بس عارفه ليه
لانك حاسه بجمال ومتعه الوقت الى انتى عايشاه ده
سيبك بقي من بوجى وطمطم والكلام ده بصفع عامه كل ماهو جديد اصبح مفتقد الروح والجمال وده منعكس من الى قاموا بفعل الشئ
والظاهر الناس كلها افتقد الاحساس بالشئ وجماله
وكل سنه وانتى طيبه

♥نبع الغرام♥♪≈ يقول...

ووحشتنى قوووووووووووووى قووى حبيبتى اخبارك ايه يارب تكونى بخير
انا بسعد قووى لما بلاقى ليكى بوست بيطمنى عليك قووى حبيبتى

ربنا يسعدك ويهنيك

ورمضان كريم

شوكولاتة يقول...

أنا مقدرش أحكم على بوجي وطمطم السنة دي لأني مش متابعاه خالص ومش فاكرة اصلا القديم كان عامل إزاي بس أنا عندي مبدأ إن كل حاجة قديمة الناس كانت بتحبها اول مايتعملها نسخة حديثة الناس تكرهها

وربنا يوفقك ياكتكوتة

Atef Shahin يقول...

كل سنة وانتي طيبة

المشكلة ليست في الكم الهائل من المسلسلات
المشكلة في الكم القاتل من العلانات

زهرة الحب يقول...

السلام عليكم كل سنه وانتى طيبه

كلامك كله صح انا بقى عجبنى مسلسل علشلن ماليش غيرك وكمان كلمات الاغنيه جميله ومسلسل الرحايا

blue-wave يقول...

مين حية ازرق دى؟:))
عموما انتى بالذات مينفعش تبقى حيه خالص:)))
كل سنه وانتى طيبه ومستنين الزيارة

عاشقه الرومانسيه يقول...

يارب ترجعى مصر بالسلامه وتشوفى الكتكوته وتزهقى من الكليه
ايه اخبار رمضان عندكم؟
مش مصر احسن؟
ولا انتى ايه رايك؟

الشعب لابد له من حكومه تشكمه يقول...

انا موقفى واااضح من بوجى وطمطم ومن قل متفرج عليه من وقت مشوفت صوت يونس شلبى اتغير:((
وانتى عامله ايه دلوقت..

غير معرف يقول...

صباح أو مساء الفل علي حسب الوقت إللي هاتشوفي فيه الكومنت ؛؛
إزيك يا ليدي والصيام عامل إيه معاكي في الحر !؟ ربنا يقوينا كلنا ويقبل مننا ؛ أنا روحت جامع حلو عندي في المقطم جارتي عرفتني عليه ، أصلنا كنا بنصلي في مسجد صغير جمب البيت ؛ كل سنة بس السنه دي ؛ يعني مبقاش أد كدهمش عارفة ليه ....
نفسي ربنا يقدرني وأفتح جامع وأتولي خدمته بنفسي وعايا بنات حلوين يكون قلبهم علي المكان إللي هوه بيت ربنا ؛ بس نفسي اللأمهات إللي بيجيبوا عيالهم معاهم يعرفوهم آداب المسجد عشان متحصلش الهرجلة إللي بتحصل أو يكون في الجامع مكان مخصص للأطفال وحد يشرف عليهم .
أنا أكتر تتر بحبه إللي بصوت الدلوعة " نانسي - إبن الأرندلي " تحسي كده الكلام لايق عليها البنت دي ...وكمان " جنات - هالة والمستخبي ".
يارب ترجعي مصر بالسلامة إنتي والأسرة وتبقي سنة بيضا عليكي السنادي وتخدي اليسانس بتفوق إن شاء الله ؛
ديدي

Lady E يقول...

قبلاوي : انا كنت بستنى يوم الأربعاء بفارغ الصبر علشان مجلة ماجد كنت متابعاها وبحبها جدا وفضلت اتابعها لغاية ثانويه عاميه :) بس هي سخفت فعلا من وانا في اعدادي ومبقتش المجلة اللي كنت بحبها اما ميكي فكنت بقرأها احيانا

ليه يا د. قبلاوي قولتلي الحقيقة المرة دي يعني لسه أقل من عشرين يوم ع الدراسه :(
اكيد مفيش مواعيد تانيه لكليتنا الموقرة

Lady E يقول...

youssif : الله يرحم يونس شلبي أكيد مفيش بوجي من غيره ومفيش طمطم من غير هالة فاخر

تتر هالة والمستخبي جميل فعلا من ناحية الكلمات وانا مسمعتوش غير مرة او مرتين بسرعه فمقدرش احكم عليه كويس

ربنا يوفقك وتبقى مخرج سينمائي اد الدنيا

كل سنة وانتا بخير وصحة وسعادة

Lady E يقول...

دموع القمر : وعليكم السلام ورحمة الله وبركاته

وانتي طيبة وبخير يا قمرايا

المدونة جميلة بوجودك فيها وان شاء الله هزور مدونتك في اقرب فرصة

نورتيني

Lady E يقول...

غير معرف : يارب ارحمني وارحم عبادك
دا كل ساعه فيها مسلسل وكمان ساعه فيه واحد تاني
ربنا يرحمنا ويسترها معانا من المعاصي

امين يارب

Lady E يقول...

mohamed ghalia : وكل سنة وانتا طيب وبخير يا محمد

امين يارب

ربنا يعينك

Lady E يقول...

لا تـــشـــتــــاق : على فكرة انا غيرت اسم البلوج وبقى روح طفلة مش طفلة

"لانك حاسه بجمال ومتعه الوقت الى انتى عايشاه ده"

مين اللي قال كده ؟؟ انا بحاول اوصل للإحساس ده واتمنى فعلا احس بجمال ومتعة الوقت اللي عايشاه

وكل سنة وانتا طيب وبخير

Lady E يقول...

عاشقة الأحزان : تسلميلي يا انوسه

انتي وحشتيني اكتر يا قمرايا

امين يارب وليكي مثل دعائك وربنا يكرمك

Lady E يقول...

شوكولاتة : مش شرط اي حاجه قديمة لما بيتعملها نسخة حديثة مش بتعجب الناس يا شوكولاته


وايه حكاية كتكوتة :)
كتكوتة رفيقة دربي وطريقي لكن مش انا

نورتيني

Lady E يقول...

Atef Shahin: وحضرتك طيب وبخير

هي فعلا علانات لأنها تعل
والمشكلة ان معظم الاعلانات قايمة على الابتزاز العاطفي مثلا اشتروا بريل علشان هنتبرع بمش عارفة ايه يعني ياريتها اعلانات وبس

Lady E يقول...

زهرة الحب : وعليكم السلام ورحمة الله وبركاته وانتي طيبة وبخير يا قمرايا

علشان مليش غيرك مسلسل الهام شاهين تقريبا لكن الرحايا مسمعتش عنه خالص :)

نورتيني

Lady E يقول...

blue-wave : ومين هيقول ازرق غير حضرتك

شكرا على المجامله
وتمت الزيارة

Lady E يقول...

عاشقه الرومانسيه : هههههههه امين في اول الدعاء بس انما ازهق من الكلية دي مضمونة يا اوختشي فمش مستاهلة الدعاء

Lady E يقول...

الشعب لابد له من حكومه تشكمه : بصي بقى دخلت عالبلوج بتاعك خماشر مرة عشان اقولك happy birtday to u وكل مرة النت كان بيفصل
فأنا بنتهز الفرصة وبقولك كل سنة وانتي طيبة وربنا يحقق احلامك ويسعدك

بحبك اوي

Lady E يقول...

ديدي : انا شوفت الكومنت صباحا ومساءا يا ديدي نياهاهاها والله ليكي وحشه

ربنا يخليلنا التكييف والانفلونزا اللي جايبهالي عااااااا فموضوع الحر مش مأثر اوي معايا والحمد الله

اللهم أمين وعلى فكرة عندكو في المقطم في مسجد اسمه الصفا بيحاضر فيه أ.د مبروك عطيه مش عارفه تعرفي المسجد ده وا.د مبروك ولا لأ بس هو كلامه جميل

امين يارب ربنا يحقق حلمك وتبني مسجد
عارفة انا كمان كان نفسي ابني مسجد واشرف عليه بس لقيت الحلم ده بعيد شوية ولقيت في ناس محتاجين مساعدة وعمل تطوعي اكتر من اني ابني مسجد لان المساجد كتير وممكن لو في استطاعتك تهتمي بالمسجد اللي بتصلي فيه يعني مثلا تجيبي فيه عطر الفراش وتعطري بيه السجادة اللي بتصلي عليها وفي افكار تانيه كتير ممكن نعملها طالما مش قادرين نفتح مسجد حاليا وربنا يقدرنا ونفتح مسجد

انا المسجد اللي كنت بصلي فيه حسيت فيه بغربه واني مش عارفه حد ف للأسف مبقيتش اروح :((


يارب ترجعي مصر بالسلامة إنتي والأسرة وتبقي سنة بيضا عليكي السنادي وتخدي اليسانس بتفوق إن شاء الله ؛

امين امين امين
تسلميلي يا ديدي
ربنا يكرمك يا حبيبتي