الأحد، 26 يوليو 2009

حاجه غريبة !!!

كلام على جنب :
في البداية انا اسفة يا ديدي علشان مقولتلكيش الف سلامة عليكي من الحادثة يا حبيبتي والحمد لله انك بخير انتي ومامتك وربنا يعوضك خير في الكتكوتة بتاعتك ومعلش ان شاء الله تكون اتصلحت وبقت كويسة
انا قلقانه عليكي جدا ومش راضيه اشيل الغير معرف علشانك وبدعي من كل قلبي انك تكوني بخير وفي احسن حال ربنا يكفيكي شر طريقك ويارب تطمنيني عليكي قريب


--------------------------------------
عمالة بكتب في موضوع بقالي ساعتين وكنت ناوية انشره عالمدونة وفي أخر لحظه غيرت رأيي مع انه موضوع كله امل وتفاؤل بس طويل شوية فقولت احتفظ بيه لنفسي وخصوصا كمان ان ما شاء الله ما شاء الله كلامي بيتفهم غلط اليومين دول وعالعموم مفيش مشكلة المهم انا نيتي ايه وعلى فكرة انا مش بخاف ولو أقصد حد هقوله في وشه أنا اقصدك يا فلان او يا فلانه
ولأخر مره هقول : يا قووووووووم يا أهل بلوجر الكرام الكلام اللي بقوله في المدونة مش شرط يكون عني اتفقنا بطلوا تعملوا الاسقاطات دي ربنا يكرمكوا يارب قولوا امين
ثانيا ومفيش اولا اصلا بس ما علينا ثانيا على طول
كنت بكلم كيكي صبحتي واخده بالك يا حجه كنت بكلم مين؟؟ اسمك طلع في المدونة عندي اي خدعه وش بيطلع لسانو المهم كنا بندردش في موضوع حلمي مش احمد حلمي طبعا لكن حلمي في ان يكون ليا كتاب وقالتلي على شوية بوستات عاجبينها منهم بوست كان عبارة عن قصة واسمه تأملات وانا كان رأيي ان البوست نكد نكد يعني مش اي حاجه فكنت عايزة اعرف ايه رأيكو في القصه تاني
وعلشان البوست اللي فات كان مرير اوي وكان صعب حتى عليا وانا بكتبه فكل واحد ياخد شوكولاته من اللي فوق دي اي خدعه علشان متقولوش حرماكو من حاجه نياهاهاهاها
ملحوظة : الصورة بعدستي
ملحوظة كمان : مدونتي بتهييس وجالها انفلونزا التدوين فالريدر عندكو واي حاجه تانيه ليها علاقه بالمدونة اكيد متلخبطه
فاصل ونواصل :)

هناك 33 تعليقًا:

Somaya Kamal El Din يقول...

الف سلامة للمدونة ولديدى

ويلا كل تهيس وانتى طيبة
واللى انتى عاوزة تنزليه نزليه ولايهمك واللى عجبه يقرا واللى مش عجبه برده هيقرا

انا شكلى هيست زيك ولا ايه هههههههههههههههههههه

Lady E يقول...

Somaya Kamal El Din والف سلامة ل ليدي بالمره يا سومه نياهاهاها بس انا مرضتش اقول في البوست اني تعبانه

وبعدين اللي عاجبه هيقرأ اوكي لكن اللي مش عاجبه هيقرأ ليه بس ههههههههه

والله انتي عسولة وشكل انفلونزا التدوين اتنقلتلك من المدونة

سومة بحبك اوي وهييسي براحتك

Lady E يقول...

Somaya Kamal El Din : شوفتي بقى نسيت اقولك رأيك ايه في القصة اللي كتبت اللينك بتاعها في البوست ؟؟

ومقولتيليش اخدتي الشوكولاته بتاعتك ولا لأ :)

The illusionist يقول...

ليييييييييييييييييييييييه

يعنى تفاؤل ومش عارف ايه
وميتنشرش
هو احنا مكتوب علينا النكد وخلاص
بقولك ايه
انشريه باى طريقه
لازم يتنشر
ملياش دعوه
لو جيت موضوع لقيت فيه خناجر
ودم وخيانه
هضرب المدونه بصواريخ اسكود
انتى فاكرانى ناسى التعليقه اياها ولا ايه
اكتبيه لابنا يكرمك

MaNoOoSh يقول...

حمدا لله على سلامة صاحبتك ومامتها


وبعدين بقى انا كمان بطالب بنشر الموضوع المتفائل ده حتى لو كان طويل شوية

غير معرف يقول...

والله يا حبيبتي وشي منك في الأرض إسمي نزل صفحة أولي وش !!!!وفي صفحة الحوادث كمان؛ يا بركة دوعاكي ياأمي !!!بقيت نجمة صحافة المدونات يا جدعان !!!
شوية جد بأه :الله يسلم عمرك يا غالية إنتي و" سمية كمال الدين "الحمد لله كنا هنروح في داهية لكن ربنا ستر !!!المهم إني مصدمتش بني آدم ؛ كان زماني هكون في التخشيبة ويجبولي عيش وحلاوة!!! والله مش هتصدقي إللي خبطه قصدي يعني إللي خبطت التاكسي بتاعه هو إللي وداني عند سمكري فنان رجعلي الكبوت الأمامي زي ما كان وهو كمان إللي ودالي العربية للفرن والدوكو والرش وكمان هو إللي وصلنا للبيت أنا وماما وهو روح بمواصلات علشان التاكسي بتاعه كان خلصت ورديته وكمان كان بيتصلح.....تصدقي إنه في كده يا ليدي !!؟؟ الحمد والشكر لله طبعا إنه وقفلي ولاد الحلال ؛ حتي الناس إللي إتلموا في الشارع ساعة الحادثة كانوا بيقولولي "ربنا يعوض عليكي يا بنتي فداكي ، المهم إن إنتوا بخير .
تعرفي يا ليدي : الموقف ده أول مة يحصلي في حياتي ؛ يعني أتصرف لوحدي ، أبويا عند ربنا وإللي كان هيكون معايا في موقف زي ده ؛ وأخويا الوحيد عايش في إيطاليا بينزل زيارات خطف خلاص إتجوز وإستقر هناك ؛ مسكت التليفون معرفتش أكلم مين ينجدني .... لكن ربنا إللي أحسن من الكل مخيبش ظني زي كل مرة؛؛
ربنا يكفيكم شر الطريق كلكم .آمين
علي فكرة أنا أخدت بتاع علبتين شكولاتة وهبعتللك الفاتورة علشان تحاسبي !!!ربنا يخليكي يا ليدي وأشوفك دايما في أحسن الأحوال ؛؛؛
ديدي

dramaqueen يقول...

الف سلامة على ديدى ومامتها
والف سلامة عليكى من الانفلونزا

هيسى براحتك يا بنتى وحدش واخد منها حاجة
وبعدين براحتيكى اكتبى اللى انتى عاوزاه وانا اوعدك مش هافهم غلط

هاقرا بوست تأملات واقولك رايى
بلاباى دلوقتى

dramaqueen يقول...

قريت وجيت

بثى
البوست مش كئيب اوى ولا حاجة
بس هو انتى حكيتى حالى بتحصل
وصفتيها حلو اوى
بس ربنا مقدر كل حاجة وكاتب لكل واحد نصيبه
واللى ملقتوش فى الدنيا ربنا يكرمها بيه فى الاخرة

البوست جميل ونزليه فى الكتاب

غير معرف يقول...

بشكر " دراما كوين " ،" مانووش "؛ تسلموا يا رب من كل شر . والله النهارده إنتوا أسعدوتني جدا ؛ وشوفوا بأه ثوابكم لما أسعدتم يتيمة وحيدة زيي ؛ جزاكم الله عني كل خير . دمتم لي أخواتي في الله ؛أحبكم في الله .
ديدي

just dream يقول...

اول زيارة ليا وان شاء الله لن تكون الاخيره
مدونتك لذيذه بجد وواضح ان كل موضوعاتك جميله ودمها خفيف
واحنا منتظرينك بعد الفاصل هنتفرج على space toon على ماترجعيلنا هههههه

أميرة علي كوكب مهجور يقول...

الشوكلاته وصلت علبة جواهر من الحجم العائلي يا سلام عليكي يا ليدي يا مدلعنا :)ولازم تنشري الموضوع انا عن نفسي محتاجة مش شوية لا ده كتير اوي اوي من التفاؤل ده

اســ الغربه ـــير يقول...

اميييييييييييين هههههه دمك ظريف اوى اوى ويارب ماتكبرى يارب شوفتى بدعيلك ازاى

اســ الغربه ـــير يقول...

اه على فكره دى اول زياره ليا عندك هنا ومدونتك ميله اوى اهنيكى بجد تحياتى اخوكى اسير الغربه

بسمة انور يقول...

بصى ياليدى انا مش فاهمة حاجه غير انك عايشة فى حالة هيسان رهيبه
كان الله فى العون يا ضنايا

بس احلى حاجه فى البوست ده بقى الشوكلاتات التحفه دى اللى هيا حبى

تحيـ عاشقه الشكولاه ـاتى
بــسـمـة

عاشقه الرومانسيه يقول...

الف سلامه على ديدى صاحبتك
وربنا يسلمها ويسلمك من كل سوء يارب
بصى ياليدى ياحبيبتى
انتى اكتبى اللى جواكى
واللى عاجبه اهلا وسهلا وينورنا
واللى مش عاجبه يفارقنا ياستى
طول ماانتى مقتنعه انك مش بتعملى حاجه غلط وبتعاملى ربنا خلاص مش يهمك رأى اى حد
انا عن نفسى باعمل كده

خراب يادنيا عمار يادماغى
(;

بنجاواتى يقول...

وسعوا يا جماعة اما اعمل شوية اسقاطات

ادى رمية ثلاثية
وكمان رميةثلاثية
ايه الثلاثيات الكتير دى يا عم ..؟؟ الظاهر انك بتحبى السلة وما تقوليش لا لان العصفورة قالتلى

هقرا بقى النكد وارجع تانى
بس هاخد شوية شوكولاته اتسلى فيهم على اما اقرا ...ولا هو نكد والسلام؟؟؟

بنجاواتى يقول...

رجعت تانى :)

مش نكد اوى يا ليدى
عادى يعنى

اصعب حاجة ان الانسان يعيش حياته مستنى ان حلمه يتحقق ويفضل مستنى ومستنى لحد ما ينسى حلمه او يموت قبل ما يتحقق

انا بقى نفسى اخلص السنة دى ويبقى حلمى اتحقق وبعد كده اموت بقى وربنا يرحمنى :(

تحياتى (واخدة بالك من تحياتى دى ؟؟؟ فيها اسقاط بثلاثية لوحده ) هههههههه

Ahmed يقول...

انا عشت شويه كده مع تأملاتك
وفكرت شويه
ياترى ملقتش فعلا اللي يحقق ليها حلمها ولا هيا استغرقت في حلمها لغاية مانسيت واقعها ومشفتوش

ممكن الواحد يتوه في أحلاه ويخلق لنفسه عالم يخطفه من حياته الواقعيه

البوست كان جميل فعلا

Lady E يقول...

THE illusionist : هههههههه تستاهل التعليقه اياها بصراحه وبعدين عايز تضرب المدونة متقدرش اصلا انا مبتهددش :)

ان شاء الله هنشر البوست بس مش بعد البوست ده

Lady E يقول...

MaNoOoSh : الله يسلمك من كل شر يا حبيبتي

ومن عنتيني الاتنين

Lady E يقول...

ديدي : اخييييرا الحمد لله على السلامه وبعدين مش أقل منها يعني تستاهلي الصفحه الاولى لكن مش صفحة الحوادث :)

وموضوع صدمة البني ادم ده بدعي ربنا سبحانه وتعالى ان محدش يتعرضله لأن اللي بييجي في الحديد يتعوض لكن المهم الأرواح

وبجد لما بنتعرض لمواقف زي دي الحمد لله اننا بنلاقي ربنا سبحانه وتعالى وقفلنا ولاد الحلال وبنحس برحمة ربنا ولطفه بينا

والحمد لله ان ربنا مخيبش ظنك ويارب دايما واكيد في الموقف ده حسيتي ان ربنا احسن من أي حد وربنا يباركلك في مامتك وميحرمكيش منها

وبالنوسبة للشوكولاته الفاتورة وصلت وحاسبت عليها :)

اللهم امين وليكي مثل دعائك يا قمرايا

Lady E يقول...

dramaqueen : الله يسلمك من كل شر يا حبيبتي

وانا الحمد لله مش عندي انفلونزا انا كان عندي وعكه صحيه يعني ما شاء الله كوكتيل مش بس انفلونزا

ومتأكده انك مش هتفهميني غلط

Lady E يقول...

dramaqueen : متشكرة على رأيك القيم يا كوين

وان شاء الله هنزل البوست في الكتاب

Lady E يقول...

ديدي : ربنا يسعدك دايما يا حبيبتي وحاسه اوي بشعورك انك مفتقدة والدك الله يرحمه بس اللي يصبرك شوية انه الله يرحمه كان حنين عليكي وعلمك حاجات كتير استفدتي منها وانه ان شاء الله دلوقتي في مكان احسن من مكاننا بكتيييييييييير
وبعدين متقوليش وحيده اومال انا هنا بعمل ايه :)

احبك الله الذي احببتينا فيه وانا كمان بحبك في الله

Lady E يقول...

وكيلة نيابه مع ايقاف التنفيذ : اهلا بيكي يا قمرايا وتنوريني في اي وقت المدونة مدونتك :)

تسلميلي بس خدي بالك مش كل مواضيعي دمها خفيف :) في مواضيع مش بتشرب ميه كتير نياهاهاهاها

وهييييييييييه انا جايه اتفرج معاكي على space toon

Lady E يقول...

أميرة علي كوكب مهجور : علشان بس متقولوش حرماكو من حاجه :)

وهحجزلك شوية تفاؤل من السوبر ماركت اللي جنبنا :) ان شاء الله اكتب البوست بطريقة احسن وانشره كرمال عيونك

Lady E يقول...

اســ الغربه ـــي : تسلم يا اسير الغربه

ومدونتي ميله ولا جميله اصلها تفرق :)

Lady E يقول...

بـــــسمة انـــــــــور : هههههههههه انا برضه ولا اللي طالعين من الثانويه العاميه هما اللي مهيسين يا ضنايا يا بنتي

واي خدعه اتفضلي الشوكولاتات بالهنا والشفا :)

Lady E يقول...

ولنا عودة بعد الفاصل ان شاء الله

Lady E يقول...

عاشقه الرومانسيه : الله يسلمك من كل شر يا حبيبتي

وحلوة نصيحتك وهاخد بيها تسلميلي يا رب

Lady E يقول...

بنجاواتى : كل دي اسقاطات ماشي يا بنجا مش هقولك ربنا يشفي (وش بيطلع لسانو)

والعصفورة دي هخنقها ان شاء الله انا مش بس بحب كرة السلة انا كنت في فريق كرة السلة وانا في اعدادي بس اعتزلت بدري :)

واتفضل كل الشوكولاته انتا الجاني على نفسك سنانك هتسوس :)

Lady E يقول...

بنجاواتى : الحمد لله على السلامه وعودا احمدا ومحمودا وابراهيما بالمره :)

والمشكله الحقيقه ان مع الحلم مش بيبقى في يقين قوي بيبقى في شك وخوف من الفشل

ربنا يحقق حلمك ومتموتش بعدها ولا حاجه يعني لما خلاص هتبدأ تخفف الم الناس تقول لا مش لاعب انا هروح اموت يا جماعه يبقى مكنلوش لازمه تعب ال7 سنين ولا ايه ؟؟

Lady E يقول...

أحمـــــــــــــد أبو العلا : تقدر تقول السببين يا انجينير

وكده يبقى موااااااافقة زي مجلس الشعب المرجانيه ان شاء الله البوست هينزل في الكتاب