الأحد، 12 يوليو، 2009

هوامش



اييييييه دونيا فين ايام الانطحانات لما كنت بكتب في المدونة كل شوية لكن دلوقتي مش عارفه برغم ان عندي زحمة افكار الا اني مش عايزة اكتب لكن بكتب لمجرد اني اغير مود البوست اللي فات وان يبقى في حاجه جاديدة في هذه المدونة الماثلة امامكم يا حضارات السادة المششارين

اولا : اللي في الصورة بنوتة توم كروز واياكم ثم اياكم حد يقولي مين الواد المكلبظ ده لأن التعليق دا اتقال على الصورة دي اكتر من مرة ومن كذا حد ومن كذا سبت برضه نياهاهاهاها

ثانيا : الاحاسيس السلبيه اللي كنت بمر بيها وكنت بحاول الاقيلها اسباب الفترة اللي فاتت اتضح ان في الوقت دا جدو كان في العناية المركزة وانا معرفش ومش عارفه اسمي دا ايه يا ترى صدفة ولا زي ما بيقولو في التنمية البشرية طاقة ولا ايه مش عارفه لكن كل اللي عرفته ان في الوقت اللي جدو كان فيه في العناية المركزة وانا بعيد عنه ب5000 كيلو كنت حاسه ان في حاجه مش طبيعية مسببالي كل الطاقة السلبية اللي مريت بيها ومازلت مستمرة بس مش اوي زي الاول

ثالثا : من المفارقات الغريبة اني اجيب جيد جدا في الشعر الرومانسي وطبعا المادة بالانجليزي وانا اصلا مذاكرتش الا قبل الامتحان بساعة والوقت مكنش مكفي لأني في الامتحانات مكنتش طايقة الشعر ولا الشعرا كنت حاسة انهم كذابيـــــن وبيعملو من البحر طحينة لكن فوجئت وانا طالعه من الامتحان وبراجع مع زميلاتي اني حليت كل الاسئلة صح ومغلطتش غير في اسم الشاعر بس ولذالك جبت جيد جدا وربنا يخليك لينا يا دكتور زكي

وزكي يا زكي يا زكي زكي يا زكي بجد انا بحب احضر محاضرات الدكتور ده لأسباب كتير منها ان محاضرته بتبقى الساعة 11 وانا 12 بالثانية بكون في المحاضرة وبيوافق اني ادخل المحاضرة

انه طيب القلب والطيبين قليلو وكمان لان بيعجبني اصراره لأنه بيجي من القاهرة وكمان كفيف ف تخيلو مدى المعاناة اللي بيعانيها وال8 ساعات سفر رايح جاي لكليتنا ربنا يكرمه ويجزيه خير يارب

رابعا : نسيــــــــــــــــت انا نسيـــــــــــــت عااااااااااااااااااا وبما اني نسيت فهقووووووول الحمد لله يعتبر بقيت في الليسانس بس مش عارفه خااااااااااااااايفة اوي ومش فرحانه ليه الله اعلم

خامسا : كنت لسه بكلم ماما على ان غريبة بابا بقى له 16 يوم متعصبش عليا ومذهوووولة هو الحمد لله بابا طيب جدا وحنين كمان جدا جدا ولما بأعجب بإنسان مذكر سالم ببقى شايفه فيه بابايا لكن طيبة بابا مقترنة بعصبية سريعة الانفجار وانا مع الاسف اخدت الموضوع ده منه فتخيلو اتنين عصبيين في نفس البيت حتى ماما اللي مكنتش عصبيه خليناها تتعصب معانا ولسه مكملتش كلامي وفعلا لقيت بابايا جه واتعصب عليا وعوض ال16 يوم اه يااااااااني يا مُرك يا مهجه ويا مُرك كمان مرة لما يشوف الكلام دا عاااااااااااا

سادسا : خير اللهم اجعله خير الحمد لله بدأت اكتب في الكتاب واعلي الجواب :) بس كل شوية اقول ايه اللي انا بكتبه ده وامسح اللي كتبته
ف بالطريقة دي شكلي مش هخلص الكتاب الا بعد عشرتاشر سنة ولذلك اسمحولي ارخم عليكو واخد من وقتكو السمين اللي بيعمل ريجيم :) علشان تقولولي اختار أي مواضيع وانشرها في كتابي من ضمن المواضيع اللي بكتبها وامسحها هع هع هع هع
والمواضيع هتلاقوها في الارشيف من بداية المدونة

سابعا : هرخم عليكو لتاني مرة واسألكو والسؤال دا اجباري مع او ضد اننا كمدونين هههههههههههههه يا نهار ابيض كنت كاتباها مديونين ما علينا انا بقيت بهييس

المهم يعني مع او ضد اننا نتعرف على بعضينا ونعمل تجمعات مدونين وكدا ؟ اصل انا وانتيختي كنا بنتكلم في الموضوع دا امبارح وعايزة اعرف رأيكو

هناك 49 تعليقًا:

عاشقه الرومانسيه يقول...

اول تعليق
لعاشقه الرومانسيه
فووووووو

عاشقه الرومانسيه يقول...

انا حضرت اجتماع مدونين وحيييييييد
وكنت مبسوطه بيه جدااااااا

بس مش هاخبى عليكى ان فى ناس لما شفتها اتصدمت لانى كنت راسمه لهم صوره فى خيالى تانيه خاااااااااالص
وفى ناس زى ما تخيلتها بالظبط لقيتها
واكيد نفس الصدمه دى حصلت لغيرى لما شافنى
لانى بطبيعتى شقيه ومرحه وباحب اهزر كتير واتكلم كتير
عكس المدونه بحب يكون كلامى فيها مختصر

عموما
انا مع اللقاءات لانها بتقرب الناس من بعض اكتر
مواااااااااافقه

فليسيتى يقول...

هو انتى غيرتى قالب المدونه ولا ايه؟؟؟؟؟؟
اصلى مجتش هنا من زمان
المهم انى شايفه ان فكره اجتماع المدونين ده حلو وشغال بس مش اى حد يجتمع يعنى لازم يكون فيه حسن اختيار يعنى للناس المدعوه علشان الناس تتعرف على بعضها اكتر.
ومبروك الليسانس ياستى وعقبال التخرج

تحياتى
فليسيتى

الشعب لابد له من حكومه تشكمه يقول...

استنى بس اول حاجه اقولهالك بوستك ظهر عندى فى المدونه افرحىىىىىىىىىىى:)
ندخل اولا مبروووووووك على الجيد جدا انتى نجحتى؟ النتيجه ظهرت يعنى ولا ايه؟ طمنينى :)
بعد الشر على جدو وانشاء الله يقوم بالسلامه.

ندخل باه على العصبيه انتى عارفه انى بعتبرك اختى الصغيره وهارياك كلام عن عصاره تجاربى هههههههه لكن اقولك حاجه انا كنت حد عصبى جدااااااا لحد اولى جامعه لما روحت عيشت فى سكن المغتربات اتعلمت ان اعصابى تباه فى تلاجه وفعلا بقيت فى تلاجه وديب فريزر كمان ,يعنى دى حاجه مكتسبه ممكن تمرنى نفسك عليها وتباى هاديه:)

ندخل باه على التجمعات مممممممممم شوفى مش اى حد ومش اى تجمع.بمعنى انى لازم اكون عارفه الموجودين كلهم واكون شويه بستريح لطباعهم وافكارهم اللى بتظهر فى البلوج بتاعهم.
يعنى لو حضرتك كنتى فى مصر وانا فى راس البر كنت اكيد هشوفك هناك:(..

عاشقة الأحزان يقول...

السلام عليكم ورحمة الله وبركاته

كلامك جميل وعين العقل يانونا
بجد فى ناس بالتدوين تحس انهم ملاك وهما اصلا ولا حاجه ومش طايقهم قوووى

وفكره جميله قوووى
انا موووووووووووووووووووووافقه
بحبك قووى يا قمر
انوسه

عاشقة الأحزان يقول...

السلام عليكم ورحمة الله وبركاته

كلامك جميل وعين العقل يانونا
بجد فى ناس بالتدوين تحس انهم ملاك وهما اصلا ولا حاجه ومش طايقهم قوووى

وفكره جميله قوووى
انا موووووووووووووووووووووافقه
بحبك قووى يا قمر
انوسه

عاشقة الأحزان يقول...

السلام عليكم ورحمة الله وبركاته

كلامك جميل وعين العقل يانونا
بجد فى ناس بالتدوين تحس انهم ملاك وهما اصلا ولا حاجه ومش طايقهم قوووى

وفكره جميله قوووى
انا موووووووووووووووووووووافقه
بحبك قووى يا قمر
انوسه

Lady E يقول...

عاشقه الرومانسيه : منورة اول تعليق يا قمرايا

بس ايه موضوع فوووو دي محسساني انك ماشية بسرعه

وعلى رأي عبود عالحدود ايوه الحية ام جلاجل اللي بتقول فو فو فوووووووووو هههههههههه كركركر بهزر معاكي طبعا

Lady E يقول...

عاشقه الرومانسيه : جميل انك اتبسطتي في اجتماع المدونين يا رومانسية

عارفة نقطة التخييل دي اللي قلقاني
كذا بنوتة من صحباتي كانو متخيلين شكلي وكل واحدة فيهم كان متخيلاني بشكل علشان كدا مش بحب حد يتخيلني او يشوف صورتي عالنت
وبعدين اومال انا مبتخيلش حد من المدونين خالص لييييييه بتخييل الروح بس مش الشكل عااااااااا ولاني عارفه ان التخييل غير الواقع

شكرا على رأيك الجميل يا قمرايا وبما انها مواااااااااااافقه يبقى تم اعتماد القانون الجديد نياهاهاها ده على اساس اننا في مجلش الشعب المرجانيه :)

Lady E يقول...

انا تقريبا مش شايفة قدامي حاليا ولذالك هرد على باقي التعليقات لما ادخل عالنت تاني ان شاء الله

وبالنوسبة لشيما رد عالسريع قبل ما اروح انام بتغيظييييييييني بتغيظيني بجد يعني ماااااشي ماشي وانا هروح فين يعني مسيري هرجع مصر وان شاء الله نتقابل واطلعلك في الاحلام واخوفك نياهاهاهاهاها كان معكي موجز للتعليق والتعليق المفصل لما اجي تاني ان شاء الله

احساس طفلة محبة للرومانسية بس واقعية يقول...

عايزة اقولك ان الكومنت بتاعى اللى على البوست اللى فات فعلا مودى مكنش تمام وغالبا ساعتها بقول لنفسى الكلمتين دول فقلت اقولهوملك انتى كمان بما اننا اطفال زى بعض :)
وكنت كمان ساعتها على الفيس بوك ولقيت الكل فرحان ومتفائل قلتلهم بما ان الكل كدا فانا متشائمة النهاردة اصل انا عكس الناس عادة :)

اتكلمت كتير فى غير البوست اصلا
بصى الشعور السلبى اللى حستية تقدرى تقولى علية شعور الغربة
اصل انا استنتجت ان الغربة بتضاعف من مشاعرنا سواء السلبية او الايجابية فلو احنا فى بلدنا ممكن نقول قلقانين او متوترين مش عارف لية وتقومى تتصلى بالناس تشوفى اخبارهم
فوانتى بعيد نفس الاحساس بيكون عندك بس اضربية فى تعشروميت مرة ومش بيتكونى عارفة السبب وخايفة كمان تدورى علية بس بتدورى فى حاجات تانية بسيطة وتقنعى نفسك بيها

بالنسبة للشعر الانجليزى فانا مش بفضلة بس عندهم احيانا كلمات وتعبيرات بتعجبنى رغم انها لو اتقالت بالعربى تحسى انها مش حلوة وبيضيع معناها

طيب انتى لقيتى باباك مش متعصب
تروحى تفكرى فى انه يتعصب متزعليش بقى ساعتها هاهاهاهاهاهاها
وتلاقى بعدها تضحكوا مع بعض عادى الانسان اللى بيتعصب بسرعة بيهداء بسرعة ودائما عصبيتة هى اللى بتخرج غضبة فتلاقية دائما صفة كويسة فى نواحى كتير بس مشكلتها فى لحظتها :)

انا بقول حكم فى الكومنت دا
وعمالة ارغى كدا حد يقولى اسكتى

اوكى همشى بس بعد ما اقولك سمعت كتير عن لقاء المدونين ونفسى احضر واحد بس دا من تمنتاشر المستحيلات الا لو قررتم تعملوا القاء بعد سنة ونصف من دلوقتى او تيجوا اليابان ساعتها ممكن ويكون فرق بينك وبين مصر 15 ساعة طيران معرفش كام كيلوا بقى احسبيها :)

ربنا يتم شفاء جدك ويقوم بالسلامة
تقبلى مرورى

مهندس / على درويش يقول...

الورقه والقلم احيانا تعجز عن وصف الانسان فكثير ما نجمل الكلام ببعض العطف والحنان ونخفي قسوة قلب أو خفقان قلب ولهان وأحيانا نكذب وأحيانا نصدق لذالك الواقع اصعب بكثير من الورق والقلم ___اما بالنسبه للقاء فانا اخشاه.... ولكن لا أرفضه_____تحياتي

شلاطة يقول...

مودك النهارده تمام والحمد لله
الف سلامة على جدو وان شاء الله يكون قام بالسلامة
ومبروك عالجيد جدا بتاع الشعر
ومبروك عالليسانس وان شاء الله تعديه على خير
بس اللي غريب حكايه انك مش مبسوطة انك بقيتي في ليسانس
نا لما كنت بقيت في بكالوريوس كنت فرحان اوي لدرجة انها كانت اول سنه اعدي فيها من غير ولا مادة
عامة جايز عشان حاجهه جديدة وجايز عشان مرحلة الكليه بالنسبالك كويسه وعملتي فيها صداقات وحسيتي انكوا مش هتشوفوا بعض تاني

وطبعا مع ان المدونين تعمل تجمعات وتتعرف على بعض
و
و
و
و
و
سلام

دعاء يقول...

ايه المود الحلو ده ,حاسة كدة بالصلاتو على النبي بشوية تفاؤل,نمسك الخشب.
ربنا يحلي ايامك دايماً
وبعدين يا بنتي السنة الأخيرة دي بتكون أحلى سنة.آه سؤال عبيط شوية بس عشان مش متابعاكي من زمان هو انتي في كلية ايه؟

بالنسبة للاجتماعات انا معاها برده مع حسن الاختيار للأشخاص.

ألف سلامة على جدو.
و ربنا يديم الروقان

Blind Sniper يقول...

انا عايز اعرف يعنى اول تعليق و اية الميزة ان حد يكتب اول تعليق ؟

ديالا يقول...

ليدي حبيبيتي

اولا الف سلامه علي جدو

ثانيا مش تزعلي مني عشان مردتش علي البوست الي عندي

اصلي كنت بموتمن التعب ولسه مازلت والله بس اول ماشفت بوستك قلت لازم ادخل اقراه


ثالثا بقي ربنا يخلي لينا دكتور زكي

نسيت اسالك هو اسم دكتور الفرنساوي ايه(حامد_لمياء_عطيه)؟


وبجد استغلي كل دقيقه في الليسانس عشان هما 8 شهور وهتلاقي نفسك في البيت بتقشري ثوم

فاستغلي كل ثانيه


وياريت فعلا موضوع اجتماعات المدونين ده هتبقي حاجه حلوه جدا

وتقبلي مروري ياقمر دمياط

Somaya Kamal El Din يقول...

ههههههههههه

حلوة اووووى

اانا انضميت جديد للمدونين واتمنى ابقى اتبعكم
و فكرة احتماع للمدونين فكرة حلوة اووى ونفسى لو احضر اجتماع

انتوا عملتوا قبل كده اجتماع مدونين ؟

عاشقة الأحزان يقول...

السلام عليكم

نونا بجد التهيس شغال
وذكى يا ذكى

هو فيه ايه اه طب نقول مبروك على الناجح

الف مليون مبروك
وطبعآ فكره حلوه موضوع لقاء المدونين ده
ربنا معانا يارب ونلاقى اشكال كويسه مش ناس لابسه اقنعه

تحياتى ليكى

بحبك قووى
انووووووسه

غير معرف يقول...

ياليديييييي،ماذا أكتب وماذا أقول وقلمي حائر بين السطور؟؟؟ عذرا إستعرت الحتة دي منك !!!!رغم إني النهارده كانت هتروح عليه نومة ؛ وكملت لبسي في الأسانسير !!!لكن تعليقك فوقني وأبكاني وحياة ربنا
*أولا: أنا مستاهلش الكلام الكبير ده كله؛وكمان مفيش داعي لكلمة حضرتك دي علشان بتحسسسني إني عجوزة؛؛ديدي- النيك نايم بتاعي وإللي بابا سماني (غادة) علشان بنت زميلته كان إسمها كده وبيدلعوها ديدي فحب إسم الدلع ده؛ وبعدين أنا معنديش غير أخ وحيد ومسافرفلذلك إنتي زي أختي الصغننة تمام .
*ثانيا: كفاية إن أبويا نصايحه وكلامه بيأثر فيك ؛ وتعرفي حاجة ده أنا لو فكرت إني أعمل مدونة هيكون بس علشان أوصل حاجات إتعلمتها من أبويا وده يكون (علم ينتفع به)والله أعلم.
لإن أبويا كان قاريء جيد وأورثني مكتبة عظيمة وكان كل كتاب يقرأه يسجل نوتس بخط إيده؛ كمان كان خطيب مفوه حتي إني كنت بقوله (ما تيجي نفتحلك زاوية)!!؟؟
كان نفسي يكون عايش علشان يقرأ تعليقك ده ويشوف ولادي إللي لسه في علم الغيب ويعلمهم إللي علمهوني .تعرفي أنا إكتشفت إن كل حاجة حلوة إتعلمتها من أبويا حبيبي .
المهم ؛؛ماعليكي من كل الكلام ده أنا بس عاوزه أقولك :
*ألف مليون مبروكككككككككك علي الجيد جدا شطوووورة يا ليدي.
*ألف مليون سلامة لجدوووووو .أنا عارفه الخضة وخصوصا لماتكوني في بلد تانية.
*يا رب كتابك يشوف النور قريب جدا،وتديني نسخة بتوقيعك .
*وأخيرا:أتمني ليكي كل الخير ودمتي بكل حب وموووود جميل زيك وقبلاتيييييييييي؛؛
ديدي

معتز شاهين - باحث تربوي يقول...

الهوامش المرة دي كتيرة قوي ومتداخلة
بس والله يهمك فضفضي والطاقة السلبية حتغور بإذن الله

ويبقى التواصل

THE illusionist يقول...

موساء الخير
كويس انك غيرتى مود البوست
بقاله كتير كما هو
وبنوته توم كروز تختخت قوى كده
الا صحيح
مين الواد المكلبظ اللى فى الموضوع ده
وفعلا التنميه البشريه طاقه
اه اعتقد يعنى
الدكتور بتاعنا قالنا كده
بس غالبا
لو حد بتحبيه
بتبقى متصله معاه شعوريا
مش لازم صوتيا ولا سمعيا
فقط قلب الواحد بيبقى حاسس بيه

وبالنسبه



المهم يعني مع او ضد اننا نتعرف على بعضينا ونعمل تجمعات مدونين وكدا ؟

اه انا معاكم
وابصم بالعشره كمان
حدش بيتعرف على ناس بالساهل
بس بما انى جديد فى التعليقات
المفروض مجاوبش على السؤال ده باين
يلا ما علينا
اقول سلامو عليكم عشان انا هستأذن بقى
ورايا معاد مع ناس معرفهاش
ولا اعرف المعاد
سلامنجه

blue-wave يقول...

الله على هوامشك يا ام هوامش:))
ربنا يرجعك بالسلامه يارب

أحمـــــــــــــد أبو العلا يقول...

زكي يازكي يازكي
هههههههههههههه

لا جامده ديه

حمدلله على السلامه بالبوست ده من أول توم كروز لحد تعارف المدونين

وألف مبروك على الشعر الفرنسي, المره اللي جايه هبقى ادور على شعر فرنسي واجي اخبط بيه هنا


انا عمري ماحضرت اجتماع مدونين, بس يعني ده لو شئ جميل والناس بتنبسط فيه, يكون جميل, وايه المشكله

شباك موارب يقول...

الف سلامه جدا لجدك
اللي بتمري بيه مرحله عاديه جدا دخل فيها تاثيرات لحاجات كتيره...


جيد جدا شعر رومانسي الف مبروك

حكايه بقى التجمعات التدوينيه
فمش عارفه زيك هي ليها فايده من الاساس ولا لا
ساعات بقول وماله نبقى اصدقاء اكتر وكل حد يعرف التاني بجد بعيد عن عالم التدوين والكتابه..

شكرا ليكي وتقبليني

منـــــــــــار

mohamed ghalia يقول...

حلوة فكرة الهوامش
بالنسية للكتاب بصى هقولك نصيحة اخوية ابعدى عنى الذاتية وبعد كده هتلاقى كل حاجة مناسبة
يعنى بمعنى تانى ابعدى عن البوستات الى فى نواحى شخصية أوى وركزى مع البوستات التانية

بالنسبة للقاءات التدوينية أدام حاجة هتم بكامل الأدب والإحترام ليه لا
أنا حضرت اللقاء الى فات وكان لقاء روعة بجد واستمتعت بيه جداااااااااااا
ربنا يكرمك وبالتوفيق دايما

MǿиY El-Shreef يقول...

اولا انا عامله زيك مش قادره اكتب اي حاجه ..... وهموت مدفونه بالخمول

ثانيا الف حمدلله ع سلامه جدووو

ثالثا انا بكره الاطفال :D حتى لو ابن توم كروز :D:D

رابعا انا بحب الانجليزي وناويه ادخل اداب انجليزي هي حلوه ولا خنيقه

خامسا انا مع لقاء المدونين جداااااااا وناويه ان شاء الله لما انزل مصر لازم يكون في واحد عشان اشوفكم :)

بحبك اووووووي

Lady E يقول...

فليستي : يااااااااااه غيرته كتييير يا قمرايا
عودا حميدا بجد ووالله ليكي وحشة

وشكرا على الاجابة على السؤال بس عارفه موضوع حسن الاختيار دا مش بإيدينا لأننا ممكن نجرح حد يعني مثلا لو عملنا اجتماع مدونين وكان حد غير مرغوب فيه جاي اجتماع المدونين هنقولو لأ بليز لو سمحت متجيش علشان انتا خنيق ؟ ولا ايه

الله يبارك فيكي يا قمرايا تسلميلي

نورتيني

جحا المصرى يقول...

بالنسبة للتوبيكات مش هقدر أحكم لإنى جديد فى عالم التدوين
وبالنسبة للقاءات المدونين ياريت فعلا تستمر

Lady E يقول...

الشعب لابد له من حكومه تشكمه : هيييييييه يا رب دايما البوستات تظهر عندك يا قمرايا لولولولولولي

اولا : الله يبارك فيكي يا شيما الحمد لله نجحت والنتيجة ظهرت بس خدي بالك التقدير دا في الرومانتيك بويتري مش في كل المواد :)

يارب يا شيما ربنا يستجيب منك

تبعا تبعا اختي الكابيرة ويارب نفضل كدا على طول وبعدين دي حاجه جميلة لما تقوليلي عصارة تجاربك
بالنوسبة للعصبية ف أكيد هي مكتسبه ولو تلاحظي ان لو انسان عصبي غالبا اكتر حاجه بيتعصب ع القريبين منه :((

اما عن التجمعات فصعب تكوني عارفة كل الموجودين لو التجمع حفلة توقيع مثلا يعني معنى كدا انك موافقة على تجمعات المدونين بس في حدود

وبعدين ما انا كنت في مصر ماشي يا شيمو مااااااشي ان شاء الله اشوفك لما انزل مصر وبعدين ايه رايك تجيلي صلالة :) اهو تغييري جو برضه هههههه المسافة مش بعيده كلها 5 ساعات وشوية بالطيارة

Lady E يقول...

عاشقة الأحزان : وعليكم السلام ورحمة الله وبركاته

فعلا مش كل انسان نقدر نفهمه ونعرف اخلاقه من مجرد كلمات بيكتبها في مدونته يا انوسة

وانا كمان بحبك اوي اوي

Lady E يقول...

احساس طفلة محبة للرومانسية بس واقعية : وانا كمان حسيت ان مودك مش حلو بما اننا طفلات زي بعضينا :)

وفعلا الغربة بتضاعف من مشاعرنا

والشعر الانجليزي مش كله حلو عمرك شوفتي واحد بيتكلم عن شعره طول القصيدة بيكلم شعره هبل هبل يعني بس في شوية مفردات وكلام بجد رائع جدا في قصائد تانيه كتير


والفكرة مش اني بفكر ان بابا اتعصب الفكرة انك لما بتفكري في حاجه بتسلطي الضوء عليها فتكبر وبتتحقق وهو دا اللي حصل وأدى لان بابا يتعصب عليا

واكيد عندك حق الانسان العصبي غالبا بيتعصب وقتها بس وبعدها بيصفى بسرعة وفعلا بنضحك مع بعض بعدها بس لو مكنش بابا اتنرفز عليا جدا يعني :)

وبسيطة يا احساس طفلة نجيلك اليابان بس بيني وبينك خماشر ساعه طيران كتير اوي دا الرحلة بتاعتنا بتبقى 5 ساعات او 4 ونص وانا ببقى مستتكتراهم
ان شاء الله ترجعوا مصر بالسلامة ونشوفك على خير

ويارب ربنا ربنا يستجيب منك ويتمم شفاء جدو

ولا يهمك اتكلمي براحتك :)

Lady E يقول...

مهندس / على درويش : اكيد عندك حق

بس ليه مدونتك مقفولة ومفتوحة للقراء المدعوين فقط؟؟

Lady E يقول...

شلاطة : الحمد لله

للأسف جدو طلع من العناية المركزة بس لسه مخرجش من المستشفى

الله يبارك فيك

انا خايفة من الليسانس علشان اسباب كتير يمكن علشان خلاص كدا هبقى خلصت تعليم قضيت فيه تلت ارباع عمري يمكن علشان مش هيبقى في حجه المذاكرة اللي بهرب بيها من حاجات كتير الله اعلم

وبعدين ايه كل الواوات دي :)

سلام

Lady E يقول...

دعاء : تسلميلي يا دودو

انا في كلية الأداب قسم لغة انجليزية

الله يسلمك من كل شر يا قمرايا

اللهم امين

Lady E يقول...

Blind Sniper : اول تعليق بيبقى متميز لأن من وجهة نظري الواحد لما بيكتب البوست بيبقى منتظر اول رد فعل عليه

وبعدين دايما اول كل حاجه في حياة الانسان بتبقى مميزة

Lady E يقول...

ديالا : دودو حبيبتي

ولا يهمك يا قمرايا شفاكي الله وعافاكي يارب وبعد الشر عليكي

الله يسلمك من كل شر يارب

ثالثا : انا قولتلك اسمه في كومنت قبل كدا يا دودو بس لزيادة التوكيد هو اسمه حاقد الفار وعلى فكرة نسيتي هاني كمان :)

وان شاء الله لما اخلص كلية مقشرش توم لأني هدخل في كورسات على طول بإذن الله بس ربنا ييسر واخد الليسانس الاول ان شاء الله

نورتيني يا احلى ديالا في مصر كلها مش بس في دمياط :)
والف سلامة عليكي

Lady E يقول...

Somaya Kamal El Din : اهلا بيكي يا قمرايا ومبروك على انك بقيتي معانا في التدوين

وان شاء الله تحضري اجتماعات المدونين

وايوة كان في كذا اجتماع للمدونين قبل كدا بس انا لسه محضرتش ولا واحد منهم :)

Lady E يقول...

عاشقة الأحزان : وعليكم السلام ورحمة الله وبركاته

الله يبارك فيكي يا قمرايا

وربنا يشفي اللي لابسين اقنعة

Lady E يقول...

ديدي : كويس ان تعليقي فوقك اي خدعه اهو احسن من النيسكافيه والقهوة نياهاهاها بس كويس انه يفوقك لكن مش كويس انه يبكيكي لان دموعك غالية عندي ومحبش اني اكون السبب في دموعك

اولا : عاشت الاسامي يا اختي الكبيرة ويا احلى ديدي بجد اسمك حلو اوي

ثانيا : الله عليكي بجد نية جميلة اوي لعمل مدونة ويارب اشوف مدونتك قريب

ثالثا : ربنا يكرمك يارب انا سعيدة جدا بكلامك عن والدك ربنا يرحمه ويجعل مثواه جنة الفردوس

الف مليون الله يبارك فيكي يا ديدي

والف مليون تسلمي من كل شر

ودا وعد منك ان لما ان شاء الله كتابي يشوف النور هتحضري حفلة التوقيع

تسلميلي يا ديدي واتمنى ليكي كل الخير والسعادة

مع حبي

Lady E يقول...

معتز شاهين - باحث تربوي : بجد الهوامش كتيرة ؟ اومال المواضيع اللي بكتبها 5 صفحات ع الكمبيوتر عندي ايه بقى :)

ويارب الطاقة السلبية تغور عننا كلنا يارب

Lady E يقول...

THE illusionist : موساء النور

وبعدين شكلك محرمتش من المرة اللي فاتت اشتقت انك تروح على باب المدونة صح نياهاهاهاهاها

وايه دا يا بختكو انتو بتاخدو في الكلية تنمية بشرية ولا ايه؟؟

وبعدين ليه المفروض متجاوبش على السؤال دا اجباري :)

وياااااه بجد اتأخرت اوي ع المعاد اللي متعرفوش مع ناس متعرفهاش :))

Lady E يقول...

blue-wave : انا ام هوامش ؟!!

ماشي يا ابو علميني (وش بيطلع لسانو) نياهاهاهاها

Lady E يقول...

أحمـــــــــــــد أبو العلا : الله يبارك فيك بس الشعر كان انجليش romantic poetry مش اعوذ بالله فرنسي

وخد بالك لو جبت اي حاجه ليها علاقة بالفرنسي في كومنتاتك هدعي عليك ان جولفدان تعطل منك وانتا لسه مكملتش اقساطها نياهاهاهاها

Lady E يقول...

شباك موارب : الله يسلمك ويبارك فيكي يا قمريا

نورتيني

Lady E يقول...

mohamed ghalia : طب اقولك حاجه مع ان البوستات اللي كتبتها مش شخصية اوي ! او ع الاقل انا مش معتبراها كدا
بس في كتاب بضم الكاف نجحوا في انهم يكتبوا عن حياتهم الشخصية اوي زي الكاتب عمر طاهر والكاتب عبد الوهاب مطاوع والكاتب انيس منصور طبعا انا مش زي الكتاب الرائعين دول بس دي امثلة يعني

وانا فعلا كده هحسدك بقى :) علشان كان نفسي احضر اللقاء دا بس كان عندي دور برد عااااااااا

Lady E يقول...

MǿиY El-Shreef : اولا : مش عارفه ليه موضوع الخمول في الكتابة دا

ثانيا : الله يسلمك من كل شر

ثالثا : بتكرهي الاطفال !! اومال هتتعاملي مع ولادك ازاي مستقبلا ان شاء الله ؟

رابعا : على حسب هتدخلي جامعة ايه ومين الدكاترة اللي هيشرحولك انا بس بنبههك لموضوع الفرنساوي انك هتتفاجئي بيه بس عامة انجليش مش وحش يعني شغال

خامسا : ان شاء الله

وانا كمان :)

Lady E يقول...

جحا المصرى : بالنسبة للتوبيكات تقدر تجيبها من الأرشيف يا جحا

دمت بخير

موناليزا يقول...

الف مبروك على النجاح وعقبال السنة الجاية ويكون بتقدير محترم كمان:)

عن رأيى فى التجمعات مابحبش الاختلاط يعنى لو فيه تجمع يبقى بنات بس او ولاد بس

Lady E يقول...

موناليزا : الله يبارك فيكي يا حبيبتي

تسلميلي وحلو رأيك في تجمعات المدونين

نورتيني بجد