الثلاثاء، 23 يونيو 2009

مبسوطة يا مصر اني راحلة بقى






حقوق النشل محفوظة للمبدع البيج بوص :)



مين اللي قال اني هرتاح بعد الامتحانات بعد الشر بعد الشر طبعا مفيش راحة في الدنيا
من بعد ما خلصت امتحانات وخالتو بتاعة مامتي تعبانة وكل يووووم نروح معاها عند الضاكتور خريج كلية الزراعة لأنه واضح انه مبيفهمش حاجه في الطب اساسا وطنط حالتها بتسوء يوم بعد يوم
وبعدين بدأنا نحضر نفسياتنا للسفر والتحضير للسفر بجد بيكون مرهق اوي تحضير الشنط وبنشتري حاجات وبنوضب البيت وبنعمل مشواير في عز الحر علشان نلحق وقتنا عاااااااااااا
الحقيقة السنة دي كانت سنة كبيسة بجد كانت صعبه بكل المقاييس وكان فيها حاجتين اتنين حلوين بس ومش هقول عليهم بس برضه الحلو مبيكملشي عااااااااا
المهم طبعا مش عارفة اناااام خاااالص اليومين دول وخصوصا خصوصا امبارح منمتش الا ساعه واحدة
خرجنا الصبح بدري والحمد لله كان يوم عسل عسل عسل روحنا نخلص شوية ورق في مصالحنا الحكومية الكميلة وطالعين نازلين نازلين طالعين وفوت علينا بكرة يا سيد وسمعني احلى سلام وتحية للروتين
طبعا مفيش اي حاجه من اللي كنا ناويين نعملها اتعملت والحمد لله فقولنا نطلع على راس البر
وقال ايه خير اللهم اجعله خير لقيت صف كبيييييير قبل بوابة راس البر ليييييه؟؟ طلعت اوشاعه انهم مش فاتحين الا باب واحد من ابواب البوابة ليييييييييه برضه؟؟
عرفت انا ليه بعد كده طلع في ف البوابة ولأول مرة كمين
وجه عمين شرطة قاللي الرخصة واخد الرخصة بتاعتي وقاللي اركني و تعالي جيبي رخصة العربية استغربت اوي لان المفروض العمين بيشوف الرخصتين مع بعض لكن جديد موضوع اني اركن على جنب واروح انا بنفسي اودي رخصة العربية وبعدين ركنت وروحت لقيت واحدة واقفة هناك بصتلي وابتسمت وانا مش فاهمه في ايه
وشوفت واحد معلق 3 نجوم على كتفه اليمين و3 على كتفه الشمال فاكر نفسه سما تقريبا مش عارفه هو ظابط ولا رائد ولا ايه وعايش الدور اوي وحاسس انه عم الوسيم وقاللي اني لازم ادفع مخالفة علشان مش لابسه الحزام
وبعد كلام كتير اتكلمته حنان اللي كانت واقفة قبلي وانا واقفة ساكته اما اشوف وبعدين؟؟ اخدنا الرخص ومشينا بعدما سيادته تأمل شوية في الرخصتين
واتضحلي حاجتين من الموقف ده
اول حاجه : ان الكمين مكنش بيوقف غير البنوتات مع ان في رجالة وستات كتير مكانوش رابطين الحزام ومحدش وقفهم اظاهر كده سيادته كان بيدور على عروسة وبعدين المفروض القانون يتطبق علينا كلنا مش يطبق على ناس وناس بس للاسف مش ده اللي حصل
تاني حاجه : حاميها حراميها الشخص اللي المفروض يحمينا من المعاكسه هو نفسه اللي كان بيعاكسنا وعلى رأي شيمو فاكرني هدوخ وهحبه علشان البدلة الميري اللي لابسها
وبعدين دخلنا راس البر ومعظم المحلات كانو قافلين الصبح
صورة من جوه مطار السيب الدولي بعدستي بس الصورة من اخر رحلة وانا راجعه مصر

طلعنا من راس البر على دمياط واخيرا حجزنا تذاكر الطيران ان شاء الله هنسافر الاسبوع ده لحبيبتي وبلدي التانيه سلطنة عمان وتحديدا ل صلالة وطبعا مش هقول المعاد علشان محدش يتعب نفسه ويجي يودعني في المطار ده على اساس اني متخيله ان حد هيعبرني ويجيلي المطار اساسا نياهاهاهاهاهاها
بجد الفراق والوداع صعبين كنت بكلم انتيختي النهاردة ولقيت صوتها اتخنق ولقيتني انا كمان هعيط قولتلها ايه هنعيط ولا ايه قالتلي لا نعيط ليه هنضحك قولتلها طيب سلام بقى علشان انا اللي هعيط علشان كده مبحبش الوداع

ويا عيني على الزيارات العائلية اللي بتبقى قبل السفر كلهم زعلانين اننا مسافرين ولازم الزيارة تبدأ وتنتهي بالسلام وبما انه سلام فمينفعش يبقى سلام اجانب لا ازاي ده احنا مصريين
طنط 1,2,3,4,5 : ازيك يا ليدي يا حبيبتي اموااااااااااة اموووووااااة اموووووووواة امووووواة
انا : هما لازم يبقو 4 بوسات ولا ايه
كل الطنطات : طبعا هو في سلام من غير بوس
انا : افتكرت الاعلان اللي كنت بقرأه في الكلية كل يوم وانا داخلة لجنة الامتحان سلام باليد خير من قبلة بالعدوة
بس مين محدش بيهتم بالموضوع ده وربنا يستر بقى من كوكتيل الفيروسات اللي عايش ومتعايش حدانا ومتربص بكل الناس

بجد هتوحشوني اووووووي اووووووي اوووووي واكتر حاجه مضيقاني ان النت هناك مش زي النت في مصر
النت هناك نظامين نظام الكروت والنظام ده هو والنت من الموبايل مضيعين كل مدخراتي الشخصية والحمد لله ونظام الفواتير والحقيقة علشان انا مفترية في النت فبستخبى من بابا لما بيروح يدفع فاتورة النت وبحس اني شوريرة اووووي عااااااااااااااا
اكتر حاجه مش هفتقدها في مصر الكلية طبعا

وزي ما بقول قبل كل سفر ياريت اي حد زعلته يسامحني لاني مش ضامنة عمري

باي باي يا اودتي في حد في الدنيا يبقى اسم الاوضه بتاعتو فلانتينو ههههههه

باي باي يا كتكوتة هتوحشييييييني اوي اوي اوي وبرغم كل الحوادث اللي عملتها وكنت هعملها بيكي بس بجد هتوحشيني يا انتيمتي ورفيقة دربي بعد المرحومة فوفو

باي باي يا خالتو هفتقد الرغي معاكي في التليفون كل يوم بالليل وهفتقد ضحكنا واغانينا سوى والنصائح اللي بتقوليهالي كل 5 ثواني مع اني بتخنق منها بس متحرمش منك يا خالتو

باي باي يا نيل هيوحشني منظرك وخلودك واللي لما ببصلك بفتكر ان كل حاجه في الدنيا بتعدي بحلوها ومرها زي امواجك الهادية

باي باي يا مكتبة مبارك هتوحشيني بكل كتبك ومحاضراتك وصحباتي امينات المكتبة وكورساتك كان نفسي اكمل باقي كورسات التنمية البشرية بس ما باليد حيلة

باي باي يا هوا بلدي ياللي دايب فيك عطر حبايبي

اشوفكم بخير ان شاء الله واستودعكم الله الذي لا تضيع ودائعه

هناك 42 تعليقًا:

moustapha achraf يقول...

أنشاء الله تروحى و ترجعى بالسلامة ....وعلى رأيك مش لذيذ موضوع لحظة الوداع بس على الأقل انتى مسافرة مع حد تعرفية ويا شتى اهو تغير...ومش عارف انا اية حكاية عمان انا لسة يو السبت باليل اخويا رجع عمان (مسقط)واصلا الفترة الى فاتت دية كل كلامنا كان بالأميل بيقولى مفيش ماسنجر و ياهو زفيسبوك ز كدة علشان شركة الأتصالات الوحيدة الى هناك تكسب....عموما ترجعى بالسلامة.

دعاء يقول...

حبيبتى يا رب تروحى بخير وترجعى بألف خير.
وما تبقيش تنسى دعاء السفر.وتدعى باللى نفسك فيه كمان عشان المسافر دعوته مقبولة إن شاء الله.
لا إله إلا الله

ستيتة يقول...

تروحي وترجعي بالسلامة
بلا مفتقدة هواها بلا مفتقدة نيلها
كده كده بعون ربنا وكسؤال اجباري ها ترجعي لها
وسمعني سلام ياابو الشريط اللي مش عارفة لونه ايه يا واخد رخصي
مع الف سلامة

ديالا يقول...

تروحي وترجعي بالف سلامه ياقمرايه

طبعا ماهما ظباط دمياط طيبين كده وبيحبوا يتوصوا بالبنات انت هتقوليلي

وبعدين بقي حاولي تتواصلي معانا من هناك

هنستناكي اوكي


في رعايه الله ياقمر

♥نبع الغرام♥♪≈ يقول...

السلام عليكم

حبيبتى الغاليه نونا

ترجعلنا بالف سلامه ان شاء الله ومنتظرينك وهتوحشينىىىىىىىىىىىىى

مووووووووووووووت

عاااااااااااااااااا


عاااااااااااااااا
انا كمان مسافره

عاااااااااااااااا

سلام حبيبتى
لا اله الا الله

حلم بيعافر يقول...

متبقيش تبجحى مع ظباط شرطة
فيه قانون طوارىء ياشابة

بنجاواتى يقول...

ربنا يرجعك لينا بالسلامة

ويارب تكون ايامك كلها سعادة وسلامة من غير امناء شرطة

تحياتى

شلاطة يقول...

فكرتيني بالذي مضى
بس خلاص
خلصت الكلية ومعدتش برجع مصر
جيت هنا نوهائي

عالعموم تروحي وترجعي بالسلامة يا جميل
وخلي بالك على نفساويتك

غير معرف يقول...

تروحى و ترجعى بالسلامة يا قمر

و أكيد كلنا حنفتقدك


بس ربنا بوفقك لكل خير و يبعد عنك بتوع الميرى


هههههههههههههه


مع السلامة يا جميل

Ahmed يقول...

ايه ده ياليدي
يعني انتي هتسافري كده على طول ولا ايه؟
هترجعي امتى والسفر ده طبيعي كده

ايوه بس مينفعش موضوع النت ده؟ احنا فعلا هنفتقدك جدا
لازم تشوفي حل وتفضلي متواصله معانا

تروحي وترجعي بألف سلامه ان شاء الله
وياريت تبعتيلنا صور من هناك بعدستك

منــار فايد يقول...

تروحي وترجعي بالف سلامه
لازم تدخلي نت هناك عشان نعرف اخبارك
انا كمان مسافره السعوديه بس كمان شهرين لغايه مااخلص امتحانات
هتدخلي ان شاء الله مدونتك هتلاقي الكل بسال ويسلم عليكي


في امان الله

MǿиY El-Shreef يقول...

ايييييييييييه ده عاااااااااااا

انتي هتسافري ليه كده

وكمان عمان مش السعوديه كنت جيتلك :D

هتوحشينااااااااااا ياليدي والله خالص مالص ااااااد الدونياااا

:(

هعيط بقى انا

توصلي بالسلامه وابقيادخلي طمنينا عليكي ماشي ماشي

انا ماما يقول...

تروحي وترجعي بالسلامة يا جميل
لازم تطمنينا عليكي

عاشقه الرومانسيه يقول...

بت ياليدى
انا جسمى قشعر
يخرب عقلك
واي كمية السلامات دى كلها
باي باي يا اودتي
باي باي يا كتكوتة
باي باي يا خالتو
باي باي يا نيل
باي باي يا مكتبة
باي باي يا هوا بلدي
ايه يابنتى
انتى هتغيبى قد ايه لده كله
دى لو هجره يابنتى مش هتكون بالشكل ده

بجد بجد
هتوحشينا تروحى وترجعى بالسلامه
اوعى تغيبى كتير عننا

إيمان يقول...

تروحى وترجعى بألف سلامه

ربنا يوفقك ديما ويسهلك النت فى عمان

وبعدين حد يزعل لما الحكومه تعاكسه

يا جمييييييييييل

بسسسسسسسس

الشعب لابد له من حكومه تشكمه يقول...

اولا تعالى هنا هفضل اعلم فيكى لحد امتى 3 نجوم يعنى نكييب.اسألينى انا مدوباهم كتييييييير.
ثانيا ودا الاهم:هتسيبنى لوحدى يادودو اخصصصصصصص عليكى,خليكى حدانا والبلد دى احسن من غيرها(مع انى من انصار لازم نشوف غيرها علشان نتأكد:))
شوفيلك حل فى موضوع النت ده وهتغيبى اد ايه:((
هتوحشينى جداااااا بجد وابأه طمنينى عليكى.

MaNoOoSh يقول...

هتوحشينا قوي يا قمر
بس ربنا معاكي ويوفقك ان شاء الله

يارب تكون سفرية سعيدة
بس عبيلنا معاكس شوية هوا نضيف فى برطمان الله يخليكي
ههههههههههههههههههه


مصر محتاجالك يا رأفت
هههههههههههههه


لا بجد بقى
هتوحشينا والله وابقى حاولى من وقت للتاني تدخلى ترغى معانا شوية فى المدونة

سلام يا قمر
مممممممممممممممممممممواه

The illusionist يقول...

والله مش لذيذ خالص فعلا
والله تلاته هتحشينا وبوستاتك كمان هنفتقدها
وفعلا
مفيش ابلغ من عباره
عااااااااااااااااااااااااااا
والله تلاته
عااااااااااااااااااااااااااا
بس متنسيش تنزلينى من على باب المدونه
عشان انا قربت اجيب جاز
انا متعلق من ساعه موضوع من زمان
وكده بجد مش تبع حقوق الحشرات حىت
يا رب تروحى وترجعى بالسلامه

غير معرف يقول...

تروحي وترجعي بالسلامه يا ليدي

ابقي طمنينا عليكي بقي :)

hasona يقول...

السلام عليكم

ربنا يوفقك
وتروحي وترجعي بالسلامة
ويشفي كل مريض
ويعينك علي ما أنت فيه

وتكون أجازتك سعيدة و ذات بهجة

وبلاش النظرة الشريرة دي
وخلي بالك من بابا

blue-wave يقول...

ايه دا؟؟
انتى ماشيه فعلا؟؟؟؟

لجين أبو الدهب يقول...

انا جاية وانتى ماشية
ياسلام على توقيتاتى
تروحى وترجعى بالسلامة ياجميل
وفكرتينى والله بالسفر والشلل اللى الواحد بيشوفه

ما تنسيش الدعاء خلال السفر فهو مستجاب ..
وفى انتظارك دائما ياحبيبة ..

صمت المشاعر يقول...

تروحي وترجعي بالف سلامه ياليدي

هتوحشينا اوووي

ربنا معاكي يارب

مع سلامة الله

قلب ارهقته الاحلام يقول...

تروحي وترجعي بالسلامة ياقمرر

ربنا معاكي :)


وخلي بالك من الرخص ^^

ابقي طمنينا عليكي

ومسامحينك طبعا علي كل ال عملتيه فينا هههه

احساس طفلة محبة للرومانسية بس واقعية يقول...

تروحي وترجعي بالسلامة

انا معرفش حكاية السفر دى
طيب هترجعى بالسلامة امتى
والنت دا معناه انك مش هتتواجدى كتير

الوداع صعب اكيد :(
بس برضو بصى للجانب الايجابى
اهو هترتاحى شوية من الكمين وغلاستة
اوعى تقوليلى فى فسلطنة عمان كمان كمين زى كدا :)

هتوحشينى يا قمر ربنا يوفقك وتروحى وترجعى بالسلامة

تقبلى مرورى

بـسـمـــة صـــــلاح يقول...

هو السفر دا اجازة مثلا ولا ايه الحكايه
انا متطفله وعايزة اعرف
يعني مثلا باباكي بيشتغل هناك زي حالاتنا هنا في السعوديه
انا بقى عايزة ارجع مصر وحشاني جدا
وقرفت من الغربه
مع اني بحب السعوديه
الا ان حبي لمصر اكتر

تروحي وترجعي بالسلامه يارب
وربنا يعين على لحظة الوداع

ربنا معاكي

تقبلي مروري
تحيـــ بسومةــاتي(:

أمل حمدي يقول...

تروحي وترجعي بالسلامة

ربنا معاك

لا اله الا الله

صمت الحنين يقول...

السلام عليكم ورحمة الله

توصلى بالسلامه ان شاء الله ياليدى
ونشوفك تانى على خير وتنورى المدونه من تانى وتقضى وقت ممتع

دمتى بكل خير وسعاده

غير معرف يقول...

السلام عليكم
اختي طفلة مش عايزة تكبر
مدونتك رائعة وبريئة وومتعة
اعجبني التصفح فيها كتير
حبيت اقول لك رأيي
واقول لك كمان تروحي وترجعي بالسلامة
وعقبال ما ازور مصر ان شاء الله
اختك/ شيـــري

Unknown يقول...

تروحي وترجعي بالسلامة

أنا أسمع أن صلالة دي مصيف في عمان عشان جوها معتدل

بالتوفيق

ويبقى التواصل

Lady E يقول...

Bhind Sniper: ربنا يكرمك

والنت موجود في عمان يعني في ياهو وماسنجر وفيس بوك بس مفيش شات فويس علشان شركات الاتصال فعلا :(

Lady E يقول...

دعاء : دودو حبيبتي بجد فكراكي طول السفر وقلت دعاء السفر ودعيتلك كتير ربنا يتقبل يارب

تسلميلي يا بنت بلدي

Lady E يقول...

ستيته حسب الله الحمش : تسلميلي يا دكتر وطبعا مهما سافرنا ف اكيد مصر بلدنا وكسؤال اجباري ان شاء الله نرجع لها :)

كل سنة وحضرتك بكل خير وصحة وسعادة

Lady E يقول...

ديالا : تسلميلي يا قمر

وعلشان هما ظباط فبيحبو يظبطو اومال هيبقو ظباط ازاي نياهاهاها بس على مين ده بنوتات دمياط اجدع بنوتات

واديني بتواصل من هناك اهو اي خدعه :)

Lady E يقول...

عاشقة الأحزان : وعليكم السلام ورحمة الله وبركاته

ترجعيلنا بالسلامة يا انوس ورحلة سعيدة ان شاء الله يا حبيبتي

محمد رسول الله

Lady E يقول...

حلم بيعافر : تبجحي ؟؟!!!

Lady E يقول...

بنجاواتي : تسلم يا د . بنجا

واللهم امين ربنا يبعد عن الجميع رزالة عمين الشرطة وعمين في الزمخشري معناها شخص اعمى القلب :)

Lady E يقول...

شلاطة : عقبال ما اخلص كلية انا كمان يااااارب

وطبعا حد يسيب المدينة المنورة ويرجع مصر بس موضوع نوهائي ده صعب شوية مهما كان الواحد بيشتاق لبلده

تسلم من كل شر

Lady E يقول...

انا ودماغي : تسلميلي يا ميرو

امين :) ربنا يبعدهم عننا كلنا يا قمرايا

Lady E يقول...

أحمـــــــــــــد أبو العلا : تسلم يا انجينير

Lady E يقول...

شباك موارب : الله يسلمك من كل شر يا قمرايا

ربنا يوفقك في امتحاناتك وتروحي وترجعي بالسلامه

تسلميلي ومتنسيش تدعي كتير وانتي مسافرة لان دعاء المسافر مستجاب

غير معرف يقول...

اكيد هتوحشينا اوي زي ما كل الحاجات اللي بره دي هتوحشك :)

تروحي وترجعي بالسلامه ..