كوكتيل أفكاري

سؤالات

انا مين ؟؟ رايحة فين ؟؟ احلامي ايه ؟؟ حققت ايه منها ؟؟ طب ايه المهم ؟؟ ايه اهم حاجه نفسي اوصل ليها في حياتي ؟؟

100 سؤال ماسكين ايد بعض وبيطلعولي لسانهم وبيلعبو جوة دماغي والاجابة الوحيدة ليهم
لسه محققتش اي حلم حقيقي من احلامي غير حلمين منهم اني عملت مدونة بكتب فيها وكمان مش راضية اوي عنها
يا ترى انا بس اللي بفكر كده ولا في ناس بتفكر كده برضه بعد الشر عليهم من الهسهس


الارادة الحرة :-

في فيلم من الافلام الاجنبيه كان في ملاك اسمه ثيس نفسه يبقى بشر علشان حاجات كتير منها الارادة الحرة
يعني لما يحب يعمل حاجه يعملها لأن عنده ارادة حرة ولما اتحول من ملاك لبشر ومتسألونيش ازاي لأن ده فيلم وطبيعي مش انا اللي مألفاه يعني ثيس جرب حياة البشر وكنت فرحانه فيه بعد ما اتحول لبشر وعمالة اقوله شوفت حياة البشر تستاهل وفي الاخر الارادة الحرة اللي كان بيدور عليها معملتلوش حاجه وحبيبتة ماجي ماتت

انا اللي جبت ده كله لنفسي :-

كلمه بقولها كتير اليومين دول , اختياراتي ولازم استحملها

كلام الناس :-

عمري ما اهتميت اوي بكلام الناس طالما اني صح وطالما الشخصية اللي اعرفها مشوفتش منها حاجه مش كويسة يبقى مش مهم اهتم بكلام الناس عليها وده عملته مع شخصيتين قابلتهم وتجاهلت كلام الناس عليهم
منهم زميلتي في الكلية والشخصيتين طعنوني بخنجر مسموم نفذ سمه الى قلبي وعقلي المرة دي روح شكسبير هي اللي حضرت مش اوفيليا وبرضه مش هصدق كلام الناس عن حد !!

دعاء :-

اللهم ياجامع الناس ليوم لا ريب فيه انك لا تخلف الميعاد ..اجمع شملى وشمل من جعلت فى قلبى محبته..آمين

برغم اعجابي بفكرة الدعاء ده بس مرتاحتلوش ومعتقدش اني ممكن ادعي بيه في يوم من الأيام
لأن الحب اعمى وانا اضمن منين ان اللي بعد الشر احبه ممكن اعيش معاه في سعادة وحب
وممكن اوي واحد يحب واحدة محبتوش او العكس يبقى حب اتجاه واحد اللي يروح ميرجعش
وغير الحب ممكن حاجه تكون نفسنا فيها تتحقق وبعدين نلاقي انها لو مكانتش اتحققت كان يبقى احسن


اغنية :-

بغض النظر عن الكليب المستفز للاغنية دي بس الكلمات بتقول

مبتقفش الدنيا ابدا ع اللي راح , ناس تروح في ثانية تيجي مكانها ناس
يعني زي ما كنت من غيرك بعيش مش هسيبك تاني تتعبني وخلاص
وبغض النظر عن باقي الاغنية كل ما بشوف او بسمع الكوبلية ده بالتحديد بقول ياريت الموضوع بالسهولة دي


اغنية كمان :(

احمد سعد
معروف بالاغاني الدراما بتاعته وانا ساعات بحب اسمعها لكن لما شوفت اخر كليب ليه واغنيته يا خسارة عينيا دمعت ونزلت الاغنيه من عالنت وسمعتها تاني برضه عينيا دمعت
ليه النكد ده يا احمد عااااااااااا

جنات وحب امتلاك
الاغنية دي محصراني بطريقة غريبة افتح التلفزيون اسمعها ادخل سوبر ماركت او محل الاقيهم مشغلينها
امشي في الشارع اسمعها لدرجة اني خايفة افتح الحنفية الاقي حب امتلاك طالعه بتقولي بخ
وبالمناسبة دي بقترح ان العرايس والعرسان يرقصو سلو على انغام اغنية حب امتلاك ما هو ده اللي ناقص

دعوة للتغيير :

كتاب عجبني وبدأت في قرائته واسمه ذكريات سمين سابق حبيت اضيف اللينك عندي يمكن حد يحب يقرأ الكتاب ده ويغير حياته

http://www.4shared.com/file/21081004/3a096601/___online.html

ونط في دماغي اخر مرة كنت في المطار اننا مسلمين والمفروض اننا بنمثل ديننا ادام الدنيا كلها وديننا بيقولنا اننا نحافظ على صحتنا فالمفروض نبقى قدوة للغير مسلمين مش العكس وألمني جدا فكرة ان حد يقول شوفو المسلمين مش مهتمين بصحتهم ولا برشاقتهم وهو ده اللي مخليني مستمرة في الدايت
وعلى راي الشوام كرمال الله ما حدا يفكر اني كتير ناصحه
ومش هترجم على فكرة :)
الامتحانات :

اخيرا خلصت امتحانات ودخلت على موقع الجامعة من شوية قولت يمكن بعد الشر اعوذ بالله النتيجة ظهرت
والموقع بطييييييييء وسامعه دقات قلبي بتخبط عالجيران وفأجه لقيت المفاجعة كلية الأداب قسم لغة انجليزية
سنة تالتة النتيجة بتاعتها ظهرت طبعا كنت هعيط من هول المفاجعه وببص ع التاريخ بتاع النتيجه لقيت ايييه؟؟
خير اللهم اجعله خيييييير ؟؟؟ التاريخ 22/3 يعني دي نتيجة الترم الاول الحمد لله ارتحت مؤقتا
يارب كل الدكاترة يجيلهم تجمد مفاجئ في الحر اللي احنا فيه ده ودكتور واحد بس اللي هو الدكتور السكرة حبيب الملايين هو اللي يصحح كل الامتحانات امييييين