الخميس، 18 يونيو 2009

كوكتيل أفكاري

سؤالات

انا مين ؟؟ رايحة فين ؟؟ احلامي ايه ؟؟ حققت ايه منها ؟؟ طب ايه المهم ؟؟ ايه اهم حاجه نفسي اوصل ليها في حياتي ؟؟

100 سؤال ماسكين ايد بعض وبيطلعولي لسانهم وبيلعبو جوة دماغي والاجابة الوحيدة ليهم
لسه محققتش اي حلم حقيقي من احلامي غير حلمين منهم اني عملت مدونة بكتب فيها وكمان مش راضية اوي عنها
يا ترى انا بس اللي بفكر كده ولا في ناس بتفكر كده برضه بعد الشر عليهم من الهسهس


الارادة الحرة :-

في فيلم من الافلام الاجنبيه كان في ملاك اسمه ثيس نفسه يبقى بشر علشان حاجات كتير منها الارادة الحرة
يعني لما يحب يعمل حاجه يعملها لأن عنده ارادة حرة ولما اتحول من ملاك لبشر ومتسألونيش ازاي لأن ده فيلم وطبيعي مش انا اللي مألفاه يعني ثيس جرب حياة البشر وكنت فرحانه فيه بعد ما اتحول لبشر وعمالة اقوله شوفت حياة البشر تستاهل وفي الاخر الارادة الحرة اللي كان بيدور عليها معملتلوش حاجه وحبيبتة ماجي ماتت

انا اللي جبت ده كله لنفسي :-

كلمه بقولها كتير اليومين دول , اختياراتي ولازم استحملها

كلام الناس :-

عمري ما اهتميت اوي بكلام الناس طالما اني صح وطالما الشخصية اللي اعرفها مشوفتش منها حاجه مش كويسة يبقى مش مهم اهتم بكلام الناس عليها وده عملته مع شخصيتين قابلتهم وتجاهلت كلام الناس عليهم
منهم زميلتي في الكلية والشخصيتين طعنوني بخنجر مسموم نفذ سمه الى قلبي وعقلي
المرة دي روح شكسبير هي اللي حضرت مش اوفيليا وبرضه مش هصدق كلام الناس عن حد !!

دعاء :-

اللهم ياجامع الناس ليوم لا ريب فيه انك لا تخلف الميعاد ..اجمع شملى وشمل من جعلت فى قلبى محبته..آمين

برغم اعجابي بفكرة الدعاء ده بس مرتاحتلوش ومعتقدش اني ممكن ادعي بيه في يوم من الأيام
لأن الحب اعمى وانا اضمن منين ان اللي بعد الشر احبه ممكن اعيش معاه في سعادة وحب
وممكن اوي واحد يحب واحدة محبتوش او العكس يبقى حب اتجاه واحد اللي يروح ميرجعش
وغير الحب ممكن حاجه تكون نفسنا فيها تتحقق وبعدين نلاقي انها لو مكانتش اتحققت كان يبقى احسن


اغنية :-

بغض النظر عن الكليب المستفز للاغنية دي بس الكلمات بتقول

مبتقفش الدنيا ابدا ع اللي راح , ناس تروح في ثانية تيجي مكانها ناس
يعني زي ما كنت من غيرك بعيش مش هسيبك تاني تتعبني وخلاص

وبغض النظر عن باقي الاغنية كل ما بشوف او بسمع الكوبلية ده بالتحديد بقول ياريت الموضوع بالسهولة دي


اغنية كمان :(

احمد سعد
معروف بالاغاني الدراما بتاعته وانا ساعات بحب اسمعها لكن لما شوفت اخر كليب ليه واغنيته يا خسارة عينيا دمعت ونزلت الاغنيه من عالنت وسمعتها تاني برضه عينيا دمعت
ليه النكد ده يا احمد عااااااااااا

جنات وحب امتلاك
الاغنية دي محصراني بطريقة غريبة افتح التلفزيون اسمعها ادخل سوبر ماركت او محل الاقيهم مشغلينها
امشي في الشارع اسمعها لدرجة اني خايفة افتح الحنفية الاقي حب امتلاك طالعه بتقولي بخ
وبالمناسبة دي بقترح ان العرايس والعرسان يرقصو سلو على انغام اغنية حب امتلاك ما هو ده اللي ناقص

دعوة للتغيير :

كتاب عجبني وبدأت في قرائته واسمه ذكريات سمين سابق حبيت اضيف اللينك عندي يمكن حد يحب يقرأ الكتاب ده ويغير حياته

http://www.4shared.com/file/21081004/3a096601/___online.html

ونط في دماغي اخر مرة كنت في المطار اننا مسلمين والمفروض اننا بنمثل ديننا ادام الدنيا كلها وديننا بيقولنا اننا نحافظ على صحتنا فالمفروض نبقى قدوة للغير مسلمين مش العكس وألمني جدا فكرة ان حد يقول شوفو المسلمين مش مهتمين بصحتهم ولا برشاقتهم وهو ده اللي مخليني مستمرة في الدايت
وعلى راي الشوام كرمال الله ما حدا يفكر اني كتير ناصحه
ومش هترجم على فكرة :)
الامتحانات :

اخيرا خلصت امتحانات ودخلت على موقع الجامعة من شوية قولت يمكن بعد الشر اعوذ بالله النتيجة ظهرت
والموقع بطييييييييء وسامعه دقات قلبي بتخبط عالجيران وفأجه لقيت المفاجعة كلية الأداب قسم لغة انجليزية
سنة تالتة النتيجة بتاعتها ظهرت طبعا كنت هعيط من هول المفاجعه وببص ع التاريخ بتاع النتيجه لقيت ايييه؟؟
خير اللهم اجعله خيييييير ؟؟؟ التاريخ 22/3 يعني دي نتيجة الترم الاول الحمد لله ارتحت مؤقتا
يارب كل الدكاترة يجيلهم تجمد مفاجئ في الحر اللي احنا فيه ده ودكتور واحد بس اللي هو الدكتور السكرة حبيب الملايين هو اللي يصحح كل الامتحانات امييييين




هناك 40 تعليقًا:

الشعب لابد له من حكومه تشكمه يقول...

طاايب فيرست كومنت ولى مجيت اعلق نسيت كنت هكتب اييه والبوست عن ايه؟ هههههههههههه معلش الزهايمر اعذرينى هروح الف البوست لفه جديده واجيلك تانى ادعيلى منساش:)) او اتوه فى السكه

الشعب لابد له من حكومه تشكمه يقول...

انا جيت ها اتأخرت عليكى:
بالنسبه للتساؤلات ميرسى جدا على الجزء ده مش هقولك غير ربنا يسامحك ههههههههه قلبتى عليا المواجع بس عموما انا حققت كتير كفايه البص للسقف وشغلى اللى سبته ودراستى اللى حاسه انى مستفدتش منها اى حاجه دا غير انى لسه عزبته ههههههههه قلبى خالى يعنى..:))
الدعاء:نصيحه اوعى تدعيه,,قولى يارب اقسملى اللى فيه خيرى وقربنى منه,,وملا قلبى بحبك وحدك:))

ايه تانى الزهايمر شغال:
اه الاغانى بقالى فتره طويله جدااااا مش بسمع اغانى فمش عارفه الاغنيه بتاعة الفيديو كليب دى بتاعت مين فكرينى .
جنات اغنيه كئيبه ومعناها صعب ..
وبعدين نيجى للامتحانات انا اتخضيت قلت ايه الناس المكوكيه دى تخلص امبارح النتيجه تظهر انهاردا ليه ان شاء الله كانوا مجهزينها قبل متمتحنوا:)))
مبروك عليكى الاجازه ...تصدقى انا مليش اخوات بنات بس كان نفسى تكون ليا اخت زيك :(( اصل الموضوع ده عاملى عقده نفساويه

Lady E يقول...

الشعب لابد له من حكومه تشكمه : ههههههههههههههههه معلش اصله كوكتيل

على فكرة انا كمان حصل معايا كده في البوست بتاعك من شوية وقرأته تاني قبل ما ارد :)

الحمد لله متأخرتيش في اللفة وكمان متوهتيش ايه الهنا ده

Lady E يقول...

الشعب لابد له من حكومه تشكمه : لا متاخرتيش يا شيمو جيتي في معادك

وبالنوسبة للتساؤلات ف سوري على تقليب المواجع بس انتي عالاقل اتخرجتي واشتغلتي يا شيمو انا لسه مش عارفة اتخرج ولا اشتغل وبرضه حاسه اني مستفدتش حاجه من دراستي عاااااا
وبعدين مالو القلب الخالي حد طايل ان قلبو يبقى خالي

بالنوسبة للدعاء انا مرتحتلوش اشاسا
وحلو اوي الدعاء اللي قولتي عليه ده

اما الاغاني فكويس انك مش بتسمعيها علشان اغلبيتها بتفقع المرارة والكليب بتاع احمد سعد

انا كمان اتخضيت اصل الترم الاول النتيجة ظهرت بعد اسبوعين من الاجازة ولذا معظم الدفعه شايلين مواد + التقدير الفزيع المريع مقبول

الله يبارك فيكي

وتصدقي كدا ازعل منك لأن احنا الاتنين اخوات اصلا خدي عندك
اخوات في الانسانية
اخوات في المنطقة الجغرافية انتي من المنصورة وانا من دمياط يعني كلها 64 كيلو بس :)
اخوات في الاسلام
اخوات في التدوين
اي خدعه :)

منوراني دايما يا احلى اخت :)

صمت المشاعر يقول...

اه ياقلبي خضتيني نتيجه ايه دلوقت

قضي الاجازه اول وبعدين فكري فيها

ربنا يوفقك يارب


في البدايه اول سؤال

انا مين ؟؟ رايحة فين ؟؟ احلامي ايه ؟؟ حققت ايه منها ؟؟ طب ايه المهم ؟؟ ايه اهم حاجه نفسي اوصل ليها في حياتي ؟؟

اجابته بتبقي مؤلمه كتير وصعبه لاننا اوقات بنبقي مش عارفين احنا مين اصلا

ومتهتميش بكلام الناس لانه فعلا لا بيقدم ولا بياخر طول ما انتي شايفه نفسك صح متسمعيش ليهم


تعرفي اجمل دعاء ان الانسان يدعي بالخير ان ربنا يقدر له الخير اينما كان
لانه الحب فعلا اعمي وياعالم الانسان هيبقي سعيد مع اللي بيحبه والا لا

اما اغنيه حب امتلاك فاحتلت كل مكان فعلالاني بسمعها كتير اووووي بالصدفه

ربنا يارب يوفقك للخير

د. ياسر عمر عبد الفتاح يقول...

كل الأسئلة دي طبيعية وعادية .. مفيش حاجة خطيرة يعني
بالنسبة للأغاني ,, فمليش فيها
ومعرفش ولا أغنية من الأغاني دي :)
بالنسبة لإمتحانات اللي خلصت
مش هتكلم لأني ممكن أحسد حسد رهيب دلوقت ,, من أكثر من شهرين بمتحن ولسه مخلصتش
بالنسبة للنتيجة ,, صدقيني
ظهور النتيجة ولا انتظارها

♥نبع الغرام♥♪≈ يقول...

حبيبتى نونا

السلام عليكم

هونى على نفسك كلامك جميل قووى وكله هسهس
هههههههههه

بصراحة مش عارفه اقولك ايه

ربنا معاكى يارب ويكرمك خير ويحقق ليكى كل ما تتمنى يارب

وبصراحة انتظار النتيجة ده اصعب مرحلة بعد الامتحانات
ربنا معاكى ويهديكى لطريق الخير يارب

وطول ما انتى صح ما يهمكيش كلام الناس اعملى كل حاجه صح ولا يهمك لو بصينا لكلام الناس مش هنروح ولا هنيجى

ربنا يقويكى يارب
دمتى بالف حب وخير
عاااااااااااا

عاااااااااااااا

عاااااااااااااا

ودول منى ليكى عشان اغرقلك المدونه

ههههههههههههه

بحبك قوى
انوسه

Unknown يقول...

ايه ده كله ايه ده كله
........ خلاص مش هقول حاجة الكلام رفض يطلع عشان في تار قديم هههههههههههه
انت مش بتيجي عندي ليه مش بعرف أكتب ولا زوقي مش على مزاجك ولا بطول في الكتابة ولا مش غاوية عربي فصيح ولا ايه

ربنا يعينك وتحققي أحلامك ويبسطك ويسعد أيامك يارب
خالص تحياتي

blue-wave يقول...

ان شاء الله نتيجة السنادى هتكون احسن من كل السنين اللى فاتت
وبعد الشر عليكى من الخنجر المسموم
ان شالله هما وانتى لأ
تحياتى

غير معرف يقول...

يا بنوتة دا إنتي ست البنانيت كلهم؛؛؛
والله أحسبك كذلك، علي فكرة أنا أكبر منك بحوالي 12سنة ، لكن حاسة إنك سابئه سنك ، وعلي رأي إاللي بيقول :الواد ده حلو سابق سنه !!! لما بقرألك بلاقي كلام كبير وليه مضمون، وبحس إن الجيل الجديد فيه كل الخير .بتمناللك النجاح إن شاء الله.
ديدي

غير معرف يقول...

هههههههههههههههههههه
فعلا يارب كل الدكاترة يجلهم تجمد مفاجىء أو الكلية كلها تولع بالورق اللى فيها ...عادى


اللينك بتاع الكتاب مش عايز يفتح مش فاهمة ليه

و هونى على نفسك مش كل حد نقابله لازم يطلع زى ما كنا عايزين

و فعلا خليكى على موقفك و اوعى تصدقى كلام الناس على حد..لأن كل واحد ليه وجهة نظر و أتعرض لمواقف غيرنا...فا خلى حكمك على الشخص بعد ما تتعاملى معاه

عاشقه الرومانسيه يقول...

على رأى مونى الشريف
هيس هيس تبقى كويس

انا هاعلق على جزئيه واحده بس
هى كلام الناس
لان مش دايما الكلام بيكون اشاعات مغرضه
ومش دايما بيكون حقيقه
وانا شخصيا احب احرص ومااخونش
اصلى اتلدعت كتييييير
واحيانا كونك تصدقى ان الشخصيه دى وحشه بيكون شئ صحى جدااااا


قوليلى بقى
انتى مختفيه فين ؟
من زمااااااان مش شفتك على الميل
اهى الامتحانات خلصت
اظهر وبان عليك الامان
(:

هاتى بوسه بقى
امووووووووووه

blue-wave يقول...

انا عايز اتكلم معاكى

mohamed ghalia يقول...

الحمد لله انك خلصتى إمتحانات على خير
وبالتوفيق فى النتيجة

e_emy يقول...

انا نسيت ايه الى مكتوب ف اول البوست d:

المهم بقى

كلام الناس فعلا ميهمش طالما مشوفتيش حاجه وحشه منهم

ومعلش لو كنتى اختارتى غلط ومسمعتيش كلام حد .. المهم انك المرة الى جايه هتختارى صح ان شاء الله

والف مبروك انك خلصتى امتحانات
ومتفكريش ف النتيجة دلوقتى
هى مابتظهرش غير لما تنسى
فجاه تلاقى تليفونات والنتيجة ظهرت وان شاء الله تبقى مفاجأه حلوة

انا نزلت الكتاب وان شاء الله اقرأه
يمكن يعمل حاجه :)


تحياتى

Maryama Qandil يقول...

يا نهاار كل ده دفين جواكي
كولكشة عجيبة بس كويس انك طلعتيها وافكارها حلوة

بالنسبة لاغنية جنااات انا بجد هطق خلاص محصراني انا كمااان والمهم من وجهة نظري مش حلوة خاالص ....مستفزة اووي

بالنسبة لكلام الناااس
ايحانا حكم الناس بيكون ليه صحة مش معنى ان احنا مبنستلمش لكلام النااس يبقى هو غلط نادرا ما بيبقى صح
بس برده اقتنعي ان متحكميش على حد غير لما تتعاملي معاه واديكي اطعنتي واتعلمتي...:)

مبرووك على الاجازة وان شاء الله تكون سعيدة عليكي وتتمتعي بيها
:)
والنتيجة تطلع حلوة ان شاء الله

ياسر سليم يقول...

دي رزمة خواطر مرة واحدة

ربنا يزود خواطرك ويوفقك فى الامتحانات

بنجاواتى يقول...

ايه الدوخة دى؟؟؟

عموما الحمد لله انك خلصتى امتحانات

الارداة الحرة=city of angels !!!!!!!!!!!
ما علينا

عموما مهما يكون اللى بيحصل نتيجة اختياراتنا...كفاية الاحساس بان دى اختياراتنا وبالتالى هنستحملها ومش هنفضل عايشين فى دور المظلومين ونقول فلان ده ضيعنى وفلان ده سبب شقائى

وربنا يسعدك دايما
سلام

MaNoOoSh يقول...

موضوع الحلم ده فعلا
الواحد مبقاش يحط امل كبير على احلامة ولا يزعل لو متحققتش
لان ساعات الاحلام مبتسعدناش فى الاخر

كمان مش كل حد بنحبه بيسعدنا
بس بردو.. لو حد بيحبني فعلا انا هقول الدعاء اللي مكتوب ده

Ahmed يقول...

ياستي ربنا يرزقك بنتيجه حلوه احلى من اللي انتي بتتمنيها
اطلبي اللي انتي عايزاه بس من اللي عنده كل اللي تتمنيه


احلامنا كتيره, كل لما يتحقق حلم او حتى ميتحققش بندور على حلم جديد, هيا ديه سنة الحياه وعلى فكره ديه نعمه كبيره

بس ياريت نحول احلامنا اهداف لحياتنا واللي يتحقق نفرح بيه واللي ميتحققش نعرف ان الخير مكانش فيه ابدا

لما ندعي ربنا بأي شئ بنستميت في الدعاء (وكان الانسان عجولا) ومبنعرفش ان ده ممكن ميكونش فيه خير

انا عن نفسي كتير دعيت ربنا بحاجات كنت فاكرها خير ولما متحققتش زعلت جدا واكتأبت لكن بعد كده ندمت أشد الندم لما اتأكدت ان مكنش فيها ذرة خير ليا

كلامك صحى حاجات كتير عندي

انا بحب ازور مدونتك بشده

ديالا يقول...

حبيبتي

لا متقلقيش الهسهس ده عند ناس كتير

وساعات بقول لنفسي انا فاشله ولسه مش حققت اي حلم من احلامي والكلام الفاضي ده

ده انا نفسي قربت تزهق من نفسي

وايه الاغاني الجامده دي

وفيه اغنيه لاحمد سعد تحفه غير ياخساره ابقي اسمعيها

بتقول:سألت نفسي كتير مرستش يوم علي بر انا الي فيا الخير ولا الي فيا ده شر

ولا انا جوايا الاتنين في بعض و500 حاجه وملهمش دعوه ببعض

ايه ده انا برغي كتير كده ليه

علي العموم بجد البوست ده حلو اوي

ويااااااااااااااااارب تنجحي وتجيبي امتياز كمان

مع حبي

Lady E يقول...

صمت المشاعر : هههههه هي فعلا خضة ربنا يستر والنتيجة تطلع حلوة ان شاء الله

وبالنوسبة لسؤال انا مين فمش قصدي اني فقدت الذاكرة مثلا :) لكن لما بقرأ او بشوف بنوتات او شباب في نفس عمرنا وحققو حاجات كتير في حياتهم بقول طب انا مين من الناس دي ليه مكونش زيهم عارفة بحس بالغيرة بس دي غيرة حميده

وكلام الناس ملامة وغيرة مش اكتر

وعارفة انا دايما بدعي بالدعاء ده
ان ربنا سبحانه وتعالى يقدرلي الخير انا وكل اللي يعرفوني سواء صداقة او زمالة او حتى عيلتي

ربنا يكرمك على الدعوة الجميلة دي وان شاء الله ليكي مثلها

سعيدة بالكومنت بتاعتك يا زومل

Lady E يقول...

د. ياسر عمر عبد الفتاح : الحمد لله ان الحالة مطلعتش خطيرة :)

واحلى حاجه انك مش بتسمع اغاني هما اللي سمعوها عملو بيها ايه يعني

وبالنسبة للامتحانات ربنا يوفقك ويعينك يارب وبلاش تحسد حسد رهيب قلبك ابيض :)

لااااااا نتيجة مين اللي تظهر لا ما انا مش هفضل مضايقة 4 شهور لغاية السنة الجايه وبعدين مين اللي منتظر النتيجه انا عن نفسي مش منتظراها وياريت متطلعش خالص يكون احسن

Lady E يقول...

عاشقة الأحزان : انوس حبيبتي

وعليكم السلام ورحمة الله وبركاته

اللهم امين انا وانتي وكل المسلمين يارب

وعااااااااا كمان عشان نغرق المدونة سوى حد طايل المدونة يبقى فيها بيسين في الحر اللي احنا فيه ده :)

ربنا يسعدك دايما يا قمرايا

بحبك اوي

Lady E يقول...

كاتب مصري : تار ؟؟ طب انده مسرور السياف ولا ايه

وايه السؤال ده طب مفيش اجابة بتقول كل ما سبق :)

لا بجد بقى اسلوبك في الكتابة جميل يا كاتب لكن انا للاسف مش بقدر ازور كل المدونات حاليا

اللهم امين

Lady E يقول...

blue-wave : ياريت كان في حاجه واحدة بس تأكد كلامك ده :(

بعد الشر عليهم ربنا يحفظهم من كل شر حتى لو كانو طعنوني بخنجر مسموم في اكتر وقت كنت محتاجه ليهم فيه فمش ممكن اتمنى ابدا انهم يجربو الم الخنجر المسموم لكن برضه مش ممكن اسامحهم وانسى

Lady E يقول...

ديدي : يا خبر الكلام ده كله عني ؟

ربنا يكرمك ويبارك في عمرك ويا رب اكون اد المسؤلية الكبيرة دي ويارب اكون عند حسن ظن حضرتك

بجد مش عارفة اقول ايه
دلوقتي بقى في 3 بيدلعوني مامتي وخالتو المصرية وحضرتك اعتقد كده ان انا محظوظة بوجودكم في حياتي

يارب الزيارة الجميلة دي تتكرر

Lady E يقول...

انا ودماغي : امين

انا مش عارفة الماس الكهربائي اللي ماشي في البلد تايه فين عن الكلية :)

وليه اللينك مش عايز يفتح معاكي انا جربته كذا مرة وبيفتح معايا بس يمكن بياخد وقت شوية لغاية لما يفتح
حاولي تاني بجد الكتاب يستاهل ولو مفتحش معاكي اعملي سيرش على جوجل الكتاب اسمه ذكريات سمين سابق وموجود عالنت

وفعلا انا باخد كل ده في اعتباري لما بتعامل مع حد لان ممكن كلام الناس يكون نتيجة غيرة او موقف معين

نورتيني يا اختي الصغنونة

Lady E يقول...

عاشقه الرومانسيه : انتي شايفه ان ده تهييس يا رومانسية مااااشي هو هسهس اكتر منه تهييس :(

ومتزعليش يا قمرايا انا مش بفتح الايميل اليومين دول وان شاء الله نتكلم قريب

امووووة

Lady E يقول...

blue-wave : ماذا تقول بعد كل ما قيل وقال
واي قول يقال في قول قد قيل من قبل ان يقال :)

انتا كده بتتكلم معايا فعلا يا دكتر
دي مدونتي !

Lady E يقول...

mohamed ghalia : وبالتوفيق ليك يا محمد في النتيجة

Lady E يقول...

e_emy : هههههههههههه يا عيني الزهايمر بهدلنا كلنا والحمد لله :)

وبيني وبينك انا قلقانه جدا جدا من النتيجة يارب تكون خير
وهي فعلا مش بتظهر الا لما ننسى ان في نتيجة هتظهر :)

وياااااارب تقرري تعملي دايت ع الاقل الاقي حد يشجعني اني استمر وابعد عن حبيبتي الشوكولاته عاااا

منوراني دايما يا ايمي

Lady E يقول...

Rooma Qandil : كل ده دفين وفي لسه افكار تانيه دفينة يا روما

وكويس ان حب امتلاك مش محصراني انا بس لكن دي محصرانا كلنا :)

وفعلا انا اتعلمت من الطعنات

امين يارب تسلميلي يا قمرايا

نورتيني

Lady E يقول...

ياسر سليم : اهلا بيك

وايه الدعوة دي بلااااااش ربنا يزود خواطرك دي لانها لو زادت اعتقد ان دماغي هتنفجر انا نفسي ابطل تفكير يوم واحد

راسبوتين يقول...

الانسان ابن التجربة مهما كانت التجربة قاسية لكن هى أكتر حاجة بتعلمنا .
والشاطر هو اللى يفهم الدرس كويس وما يوقعش فى نفس الغلطة تانى
أما بخصوص النتيجة وموقع الكلية فإن شاء ناجحة وبتقدير وعلى فكرة كل المواقع الحكومية كده تقيلة وعمرها ما اتحدثت ....شكرا
أرجو قبول مرورى

Lady E يقول...

بنجاواتى : مين بالظبط اللي دايخ؟؟

الارداة الحرة=city of angels !!!!!!!!!!! كل دي علامات تعجب !!!!!

بقى عرفت الفيلم من الارادة الحرة ومعرفتوش من ثيس وماجي :)

عموما مهما يكون اللى بيحصل نتيجة اختياراتنا...كفاية الاحساس بان دى اختياراتنا وبالتالى هنستحملها ومش هنفضل عايشين فى دور المظلومين ونقول فلان ده ضيعنى وفلان ده سبب شقائى

كلام سليم ما هي دي المشكلة بتقول ياريتني سمعت كلام اللي اكبر مني عااااااااا ولو كنت سمعت كلامهم برضه كنت هتلوم نفسك :)

ربنا يسعدنا كلنا

امين

Lady E يقول...

MaNoOoSh : يمكن لانها مش بتبقى احلام كبيرة تسعدنا وتسعد اللي بنحبهم ويمكن علشان مش بنحلم احلامنا ونفسنا انها تتحقق يعني على راي حماقي واهي جت يا مجتش بقى عارفة مفيش اصرار

وشوفتي قولتي ايه ؟؟ لو حد بيحبني فعلا انا هقول الدعاء اللي مكتوب ده
لو حد بيحبك مش لو حد بتحبيه ومش عارفه اذا كان هو بيحبك ولا لأ

نورتيني يا منوش واوعي تبطلي تحلمي
دي مش دعوة لالغاء الاحلام لكن دعوة لاننا نفكر ايه الاحلام اللي اذا حصلت هتسعدنا بجد دنيا واخرة واللي تستحق اننا نحلمها فعلا

Lady E يقول...

أحمـــــــــــــد أبو العلا : امين

تسلم يا انجينير وانا كمان بحب اشوف تعليقاتك لأني دايما بستفيد منها

شكرا ليك

Lady E يقول...

ديالا : الحمد لله مش انا لوحدي اللي عندي هسهس :)

اعتقد اننا نكلم نفسنا ونعاتبها كده عالاقل خطوة للنجاح لان الفاشل بجد مش بيحاسب نفسه


مليان عيوب ولا
خالي من الذنوب ولا
مليان عيوب ولا
خالي من الذنوب ولا
ولا أيه !!!!!
ولا أنا جوايا و مش داري الاثنين في بعض
وخمسمائة حاجه و مالهمش دعوة ببعض
أنا مين و فين أنا أيه
مفروش طريقي بورد
ولا الزمان ده أنا فيه
أضعف واحد على الأرض
ولا أنا جوايا و مش داري الاثنين في بعض
وخمسمائة حاجه و مالهمش دعوة ببعض

كلمات ايمن بهجت قمر من فيلم الشبح :)

ومرغيتيش كتير ولا حاجه

ربنا يستجيب دعائك ياااارب

نورتيني

Lady E يقول...

راسبوتين : اهلا بحضرتك

كلام سليم

شكرا ليك