السبت، 21 فبراير 2009

بحلم هو الحلم حرام؟؟

نمت الساعه 2 صباحا استعدادا للكلية النهارده وحلمت بس الحقيقة الحلم مكنش حلو خالص
في الحلم كان كل الناس بتزعقلي على حاجة انا مش فاهماها حتى ماما اشتركت معاهم في الزعيق ليا ولقيتني بقول لماما بعيني في الحلم كل الناس تزعقلي مش ههتم لكن انتي يا ماما صعب مقدرش استحمل وتكملة الحلم او نقدر نقول الكابوس اني رحت حفلة التوقيع بتاعت كتابي اللي لسه في علم الغيب ومحدش حضرلي واللي جه, جه اتريق على الكتاب ومشي حتى قبل ما يقرأه



لقيتني وحيدة جدا وصحيت من النوم ولقيت دمعة نزلت من عيني وكأنها كانت البداية بس
الدمعة دي ندهت لأخواتها قالتلهم تعالو بسرعه ولقيت الدمعة الوحيدة بقت بكاء صامت حسيت بضعف وان البطانيه خنقاني شلت البطانية وبصيت في كل انحاء الاوضة بدور على ملجأ ليا حاجة تخفف دموعي لقيت صورة بابا واتسمرت عينيا على الصورة وفضلت اقول كلام كتير واشتكي له

ياااااااه يا بابا وحشتني ووحشني حضنك نفسي ارجع طفلة صغيرة تاني علشان تحضني زي الطفلة الصغيرة دي اللي كل ما بشوفها في مدونة كيكي بقولها يا بختك

قمت من النوم الفجر ولسه برضه مش قادرة امسك دموعي رحت فتحت التلفزيون على قناة المنهل للقرأن الكريم و وانا رايحة على القناة كان في حوار على قناة المجد سمعت جزء منه وانا بقلب في القنوات الشيخ كان بيقول لو حد فقد جزء مما فقده الانبياء لفقد عقله من شدة الحزن سبحان الله وانا اللي زعلانه على توقيع كتاب فقدته في الحلم رحت اتوضيت وضربت طبق مهلبية بالفواكه والمكسرات من اللي ماما عملاهم وصليت الفجر حسيت بروح فوق روحي حسيت اني لاقيت الحضن اللي نفسي فيه حسيت اني مش هتخلى عن حلمي والحلم ده بالذات مش هسيبه ولو طول معايا لسنين ولو فشلت فيه برضه هحققه ان شاء الله

ياريت تبصو بصه عالبوست ده في مدونتي التانيه

http://sun-east.blogspot.com/2009/02/blog-post.html

هناك 12 تعليقًا:

احساس طفلة محبة للرومانسية بس واقعية يقول...

طفلة
من حقك تحلمى طبعا وكمان حلمك جميل جدا
وبجد جميل اصرارك على تحقيقة
ومن رأيي ان الكابوس بيجسد افكارك اللى فى عقلك الباطن
وخوفك من فشل الكتاب
بس ان معتقدش ان دا ممكن يحصل
لان اصرارك لتحقيق حلمك لازم هيخليكى تنجحى
ويارب تنجحى وتعملى احلى كتاب فى الدنيا بس من غير دموع
:)

تقبلى مرورى

بنوتة يقول...

بصراحة انتى ضحكتينى وزعلتينى
على فكرة يا ليدى الاحلام هى حديث نفسى مش كلها رؤى
يعنى الحاجة ايللي بنام واحنا بنفكر فيها او الحاجة ايللي خايفين منها او شاغلة تفكيرنا بفرح او حزن
هي ايللي بنشوفها
مش بيقولو ايللي يخاف من عفريت يطلعله
احلى حاجة اصرارك
الارادة تعمل كل حجة
تحياتى ليكى

mohamed ghalia يقول...

ليدى
ده مجرد حلم
وبعدين انتى لسه فى طريقك للكتاب لسه هتكتبى وتستعدى ليه
خليكى متفاءله كده ههههههههه
دمتى بكل الود أختى

Unknown يقول...

gh الحلم مش حرام هيتحقق بإذن الله وهتعملي كتاب وهتعزميني على حفل التوقيع ومحدش هيزعقلك أبدا لا ماما ولا غيرها هو حد يقدر يزعق لطفلة بريئة زيك
أنا بس عاوز أسألك انتي بتلحقي تحطي الوستات الجديدة ورا بعض دي امتى نمت وقمكت لقيت اتنين جداد مرة وحدة ماشاء الله بس كده مش بلحق أتابع كله
ع العموم ربنا يكرمك ويوفقك
أنا سعيد جدا والله بمتابعتي لمدونتك اللذيذة جدا دي
مودتي أختي الكريمة

غير معرف يقول...

أنا خايفة اروح مدونتى امشى بأسمى الاقى بوست جديد نزل!!!
الاحق من دلوقتى أحسن
*******************
هو احنا امبارح مش كنا بنكلم فى الموضوع دة وانتى كنتى فرحانة اوى..لية بس عقلك ***المبطن*** دة وحش..هو الحشو مش قطن ولا اية؟؟
بجد بقى لمة شوفت البوست كنت هعيط على احساسك دة..ينفع كدة على الصبح
هقولك كلمة اخيرة
*****************
نونتى
أحلممممممممممممممممممممممممممى
أحلمممممممممممممممممممممممى
أحلمىىىىىىىىىىىىىىىىىىىىىىىىى
عوووووووووووووووووووووووو

Ahmed يقول...

عجبني أوي روح التصميم ديه
وا شاء الله ربنا يوفقك لتحقيق الحلم

ستيتة يقول...

كل الحدوتة يا ليدي العسولة انك نفسك في شيء .. الا وهو كتاب بفكرك وقلمك .. ونفسك تنجحي
قوم ايه الهواجس النفسية اللي عندنا كلنا اننا نفشل تيجي لينا في الاحلام
قوم ايه ربنا يبعت ليكي برنامج فيه ذكر الله يهدي نفسك ويثبتك ويخليكي تقولي
"ناجحون بلا حدود بعون ربنا المعبود" بس وترجعي تحاولي تاني ومن طلب دار الحكمة يركب اتوبيس 42 .. ودمتم

لجين أبو الدهب يقول...

أحيانا بنقوم من النوم مخنوقين لوحدنا كده .. أز بسبب حلم ..

وأحسن شئ عملتيه إنك صلتى ةحاولتى تغيرى المود شوية لان ده فعلا الشئ المفروض اللى يتعمل عند الخنقة ..

وان شاء الله لو كنت موجودة فى حفلة الكتاب هافضل وراكى لغاية ما تمضيلى :D

دُمتِ بخير ..

نعكشة يقول...

:)

ربنا يرزقك يا رب الطمئنينة دايماً

و ان شاء الله لما تعملي كتاب
كل الناس ( لأمش كل عشان الحسد و عشان نبقى بنتكلم في حلم مشروع) معظم الناس يعجبهم كتابك
و تبقى احسن حقلة توقيع

واحسن نشر لكتاب

سلام عليكِ
وربنا يبعدعنك شر الكوابيس

سيبك انتي
مش كنتي تجيبي حبة من طبق المهلبية بالمكسرات

بالهنا و الشفا

KEBLAWYAT يقول...

المشكلة إنى مش بلاقى مهلبيه بعد ما بشوف كوابيس

مش عارف .. الحاجه مبتحبهاش باين

رائع كالعاده .. أكيد هيبقى كتاب رائع

Kiara يقول...

عااااااااااااااااااا

مالك ياصثبحتي بس

dr_samarmar يقول...

ماشاء الله كلامك جميل أوى أوى

مافيش أحلى من احساسك ان ربنا جنبك :)
بتحسى بيه انك مالكةا لدنيا و اللى فيها :)