يوم كميل في الكلية

هو ده الاعلان اللي اتكلمت عليه البوست اللي فات

النهارده صحيت من الساعة 6 ونص صباحا وانا مش واخده على الشقا ده , وليه صاحية بدري كده كفا الله الشر؟؟ علشان عندي محاضرة الساعة 8 ومش عارفة ليه كنت كل شوية بغني كله الا عفيفي ودي تبقى دنيا الا ويا عفيفــــــــي انا ليا مين في الدنيا بعد عفيفي - مين عفيفي ده؟؟-

ونزلت من البيت 8 وشوية :) ولقيت جارة لينا انا معرفش هي مين اساسا معدية فقولتلها السلام عليكم لقيتها عارفاني ياااااادي الكثوووف وانا مش عارفاها وبتقوللي انتي من دور احفادي مع انه ميبانش عليها خالص اني من دور احفادها لأنها ما شاء الله عسولة جدا وكأنها في العشرين من عمرها وسالتني شوية اسئلة جاوبتها على الطريقة الستيتية _ اي بتاعت دكتر ستيتة _ سوقت الهبل في الجبل واللي عايزة اجاوب عليه جاوبته واللي مش عايزة اجاوبه مجاوبتوش وعلى فكرة يا دكتر حبيت الطريقة دي اوي وبقيت اطبقها كتير لأن المتطفلين كتييييير نياهاهاهاهاها

طبعا وانا نازلة الكلية الكميلة كان وقت مدارس واجاركم الله لما تسوقو في وقت مدارس بتبقى خيبة بعيد عنكو الشوارع بدل ما بتبقى سودا بتبقى زرقا وحمرا .

وصلت طنط جارتنا اللي اتحرجت اسألها عن اسمها لشغلها ورحت ع الكلية ولقيتني ببيع لبن مفيش حد في الكلية غيري يادي الخيشة انا ايه اللي جابني

5 دقايق ولقيت زميلة تانيه لينا جت وبعدها زميلة تالتة قعدنا اتكلمنا في حاجات كتير وسلينا بعض وقعدنا نص ساعة لغاية لما باقي زميلاتنا جم _ اتوا الى الكلية :)

وشوية بشوية لقينا الدكتورة جت بعد 3/4 ساعة انتظار وكانت محاضرة لذيذة بتتكلم عن الميثولوجي او علم الاساطير بس الرخم فيها انها بتتكلم عن صراع الانسان مع الألهة زي هركيوليز وزينا كده على ما انا فاكرة ان الالهة كانو مضطهدينهم واخدنا مثال على كده حرب طروادة _ طبعا الكلام ده هبل اصلا_

سبحان الله الواحد القهار

بعد المحاضرة عرفنا ان علينا عربي جاهلي وزغرطي ياللي منتيش غرمانة خلصنا المحاضرة الساعة 11 والمفروض نستنى المحاضرة للساعة واحدة وشايلة عيل واستنينا المحاضرة للساعة 2

وفي الفترة دي رحت اوضة الدكاترة بتاعة اللغة العربية اسلم على قريبتي وقالتلي اقعدي معايا شوية

المهم في الاوضة دي الدكتور بتاع العربي اللي بيدرسلنا عربي جاهلي السنة دي ودرسلنا قبل كده في سنة اولى فأنا كنت محرجة بطريقة بشعة اني أأقعد في اوضة الدكاترة _ والله وبقيتي دكتورة يا ليدي لولولولولي_

المهم كنت بكلم قريبتي على النتايج وان في دكتور عندنا سكرة احسن دكتور في الكلية كلها بيحددلنا المنهج وبيديلنا تقديرات

_ مكونتش اعرف ان الدكتور قاطع ودانه وراميها معانا وعرفت انه سمع كلامنا لأنه اتكلم عنه في المحاضرة_ توبة مش هقعد في اوضة الدكاترة تاني

شوية وطلعت لزميلاتي وقفت معاهم ساعتين كاملين مفيش مكان نقعد فيه اصلا وفضلنا نتكلم ونضحك ونهزر احنا المعذبين في الكلية ولفت نظري اعلان تاني هههههههههه

احلى حاجة انهم عرفونا الملخصات بتتباع فين لاني مش ناوية اخد كورس السنة دي :)

واخدين بالكو من المساءلة القانونية والجنائية هيسجنونا بتهمة شراء الملخصات وقتل الكتب نياهاهاها

صورنا مناظر كتير للكلية ولقيت الدكتور بتاع العربي اللي في الكلية بشكل وعلى قناة دينية بشكل تاني وقولت لزميلاتي عايزة اصور الدكتور ده طبعا هما مش عارفين ليه وميعرفوش حاجة عن البلوج اصلا فقالولي اوعي انتي كده هتبقي صورتي دكتور في اثناء تأدية وظيفته

وبعدين مر علينا واحد المفروض انه طالب يعني وشكله كده كان راجع من مكان مليان سجاير والجو من حوالينا بقى ريحته سجاير وكنا هنفطس ولقيت ايمو زميلتي بتقول على فكرة دي مش ريحة سجاير بس دي ريحة سجاير محشية

دودو ردت عليها وقالتلها محشية كوسة ولا بتنجان هههههههههههه

في الوقت ده زميلة ليا منتقبة قصدتني اني اجيبلها النتيجة من قريبتي اللي في الكلية وطبعا مقولكوش على السخافة اللي قابلتها من امن الكلية واحنا داخلين الكلية بس انا رديت عليهم وقولتلهم على فكرة احنا جايين الكلية من قبلكو وانتو مكنتوش موجودين _ ايه الرزالة دي_ المهم للأسف جبت النتيجة لزميلتي هي اتجوزت الترم الأول وحامل دلوقتي وحماتها جابت بيبي في وقت امتحانات زميلتي ف للأسف معرفتش تذاكر عرفت من قريبتي ان زميلتي شالت 3 مواد وحاولت امهد لها وهي قالتلي انها حلت وحش في 3 مواد عشان ملحقتش تذاكرهم وقلبي كان بيتقطع وانا بقولها اخر اليوم على النتيجة حسيت انها داخت للحظة ومع اني قولتلها النتيجة بيني وبينها حفظا على شعورها الا انها قالت لزميلاتنا عن نتيجتها بجد قلبي موجوع عليها اوي

شوية ورحنا المدرج نستنى الدكتور اخدت موبايل واحدة زميلتي وعندها مقاطع صوتية تفطس من الضحك منها مقطع اسمه الحقيقة اب بيكلم ابنه بيقوله خد يا واد يا بؤلة

وبتتوالى الاحداث لغاية لما الاب بيقول لابنه لازم اقولك عالحقيقة المرة

الابن بيقول : لأأأأأأاأأأأأأأأأأأأأأأأأأأأأأأأأأأأأأأأأأأأأ - انا مش فاهم حاجة يا بابا _

الاب : اومال بتصوت ليه يا ابن العبيطة ...... الخ بس بجد مقطع ضحكني جدا

وشوية روحت اسأل على الدكتور انا وزميلتي لقينا مراته الدكتورة بتقولنا ده بيديكو المحاضرة من نص ساعة _ نعم يختي احنا مستنينه كل ده وبعدين تقوليلنا بيدي المحاضرة من نص ساعة_ قولنا للدفعة الكلام ده وزي التائهون في الارض فضلنا ندور على الدكتور فين ولقيناه في مدرج في الركن البعيد الهادي ولسه مبتداش ولا حاجة وبداية الكلام كانت على رأي عايش على الهامش

وتبحتر الحطاء غير معمعم وتداخل البعبيط بين تخبرا وتناهوا بين السماميك تحضرا(يعني ازيك بالفصحي) نياهههها

وباقي المحاضرة على رأي مستر هاني زينهم :

... تدفق في البطحاء بعد تبهطلِ *** وقعقع في البيداء غير مزركلِ .... وسار بأركان العقيش مقرنصاً *** وهام بكل القارطات بشنكلِ .... يقول وما بال البحاط مقرطماً *** ويسعى دواماً بين هك وهنكلِ ....إذا أقبل البعراط طاح بهمةٍ *** وإن أقرط المحطوش ناء بكلكلِ .... يكاد على فرط الحطيف يبقبق *** ويضرب ما بين الهماط وكندلِ.... فيا أيها البغقوش لست بقاعدٍ *** ولا أنت في كل البحيص بطنبلِ .

الحمد لله يا رب اني بدرس انجليزي هههههههههههه وربنا يعينني على العربي

وبعد يوم شاق ومتعب كنت فرحانة بجد اني صحيت بدري ورحت الكلية وعلى عكس السنتين ونص اللي فاتو مكنتش بحضر او كنت بحط سماعات الموبايل في وداني وانعزل عن العالم الخارجي النهارده كان يوم جميل بجد والحمد لله ان معايا عربية حسيت بقيمتها بجد النهارده حتى لو بعمل بيها حوادث بس الحمد لله ربنا بيستر واول اغنية سمعتها كانت لتامر عاشور بتقول _ لحد كده كتر خيري بصراحة ريحت ضميري_

فعلا انا ريحت ضميري لما حضرت المحاضرات انا كنت في يوم من الأيام نسيت اني بدرس اصلا وكل ده بسبب الكورس اللي كنت معتمدة عليه بس ان شاء الله الترم ده مش هاخد كورس لو حصل ايه

وعلى فكرة طردونا برضه من الكلية النهارده علشان كنا اخر دفعة وعايزين يقفلو الكلية بس المرة دي مسكتش وقلت لزميلتي وعارفة ان العسكري سامع ياااشي الفشايح شكلنا بقى زبالة وسط الكليات كل ما نيجي الكلية يطردونا فلقيت العسكري بيرد وبيسبل عينيه - يادي النيلة- لأ طبعا مش بنطردكو بس عايزين نقفل الكلية قولتله اقفلو الكلية براحتكو بس مش بالطريقة دي مش بإنكم تطردونا

بالنوسبة للردود اللي على البوستات اللي قبل كده ان شاء الله هرد عليها يوم الاجازة بتاعت الكلية

BEST WISHES