السبت، 21 فبراير 2009

كابوس وراح الحمد لله + تحديث

يمكن كتير استغربو اني كتبت بوستين في يوم واحد وده البوست التالت بس انا كنت بحاول اخفف عن نفسي القلق والخوف اللي كنت فيه
وكنت شبه متأكده ان في حاجة صعبة هتحصل النهارده بعد ما قمت من النوم وانا بعيط
كنت خارجة مع ماما بالكتكوتة للأسف وكان في حادثة موتوسيكل وعربية
وبعد 300 متر تقريبا كان في تقاطع - شارع جانبي- وانا ماشية قلبت النور على اساس اني أقول للي طالع من التقاطع خد بالك في عربية جاية
وفوجئت ان في ميكروباص مجنون طالع من التقاطع بسرعة كبيرة جدا وكان ممكن اعدي من قدامه وبسرعته دي كنا هنتفرم وسرعة الميكروباص هتحدفنا على الطريق التاني ومنه للنيل يعني كانت هتبقى كذا حادثة كان لازم اتصرف في ثواني هديت السرعة ووقفت قبل التقاطع على اخر لحظة والعربية اللي كانت ورايا جت بسرعة وطاااااااخ خبطت فينا طلعت من نص الطريق مكان الحادثة علشان منعملش حوادث تانيه وركنت على جنب
ونزلت انا وماما نشوف ايه اللي حصل للعربية والكتكوتة بقت موديل جديد الشنطة شكلها اتغير وبعدين اللي خبط فينا جه بعربيته ونزل وعنيه زي ما بيقولو بتطق شرار ولسان حاله بيقول عايز اولع روما بحالها فقولت لو هيتشاكل هتشاكل بس اضايقت لما شوفت ان هو كمان عربيته اتبهدلت زي عربيتنا المهم قولتله ع اللي حصل من الميكروباص وانه مكنش ممكن بأي حال من الأحوال اني اعدي والا كنا هنتكسر احنا والعربية فالراجل فهم الموقف وبدأ يغير كلامه وقال لنا لازم اصلح العربية - مروريا هو الغلطان- لكن انا وماما مرضيناش خالص وقولناله كفاية ان عربيتك اتبهدلت ربنا يعينك على تصليحها والحمد لله حصل خير فقال الحمد لله انها مجتش في الارواح واخدنا الكتكوتة ومشينا
المشكلة مش في الخبطة لواحدها
المشكلة في الخضة اللي كنا فيها واللي على أثرها ماما تعبت وضغطها علي وانا ضغطي انخفض _ المفروض كنا نقلب الضغطين مع بعض علشان ضغطنا احنا الاتنين يتظبط_

كله من الميكروباص حسبنا الله ونعم الوكيل فيه طبعا سواق الميكروباص اللي كان السبب في الحادثة جري ولأن احنا بالليل فمحدش لمح نمرتة بس انا فوضت امري لله وربنا ينتقم منه
اما انا فمش هركب الكتكوتة تاني الا لما اعصابي تهدى
وقررت اسميها الفشفوشة بدلا من الكتكوتة لان كلها خبطات فيها حوالي 5 خبطات من كل ناحية
وحسبنا الله ونعم الوكيل وبيتهيألي كده ممكن اغير اسم الكتاب واخليه حوادث ليدي بالفوفو والكتكوتة نياهاهاها
--------------------------------------------------------
رحت الكلية النهاردة متأخرة نص ساعة مع اني منمتش من امبارح بالليل لغاية معاد الكلية غير ساعتين وكل شوية احس اني في العربية والعربية بتتخبط يعني كانت ليلة ما يعلم بيها الا ربنا
وفضلت اقول لماما مش هركب الفشفوشة _ مجنونة بكون يا حبيبي غلطانة اكيد يا حبيبي لو جيت اليوم بعد اللي في صار عيد اللي كااااان _ لا لا للفشفوشة الميكروباز اهون مش عايزة اتحمل المسؤلية دي تاني
المهم ماما اقنعتني وقالتلي لو كل واحد عمل حادثة عمل زيك كده مكنتيش هتلاقي عربيات ماشية
انا:يا ماما اعصابي تعبانه ومنمتش امبارح
ماما :يلا بس اتشجعي وربنا يحفظك وانا هنزل معاكي
وماما نزلت معايا واستجمعت قوتي وانا من جوايا مرعوووبة والحمد لله ان بكرة معنديش محاضرات مش هضطر اخرج
وبعدين اخيرا اخدنا محاضرة لولولولولي فاكرين الدكتور اللي وريتكم عربيته هو اللي جه النهارده وكمان نزل الكتاب
وقالنا خدو بالكو الامتحان بعد 9 اسابيع ذاكرو ومتفوتوش يوم البويتري صعب البويتري يعني الشعر بعيد عنكو
والعيال زميلاتي كانو متعشمين اني اوصلهم فحكيتلهم على الحادثة وقعدوا يضحكوا بس هما ضحكوا علشان انا حكيتلهم بسخرية اصلا بقولهم كنت بفادي حادثة فعملت التانية وطبعا صرفوا نظر عن اني اوصلهم

هناك 21 تعليقًا:

إيمان يقول...

يا حبيبتى يا فشفوشه
قلبتى عليه المواجع موجع موجع
حمدلله على سلامتك إنتى وماما يا ليدى كله فداكم
بس بجد اوعى تخلى الموضوع ياثر عليكى إنتى إتصرفتى صح برافو عليكى
وكل الناس بتعمل حوادث
بس إحنا الستات مظلومين
أول ما تحصل حادثه يتوجه إلينا
صوبع الإتهام فورا
ولا يهمك ... أجدع منك وعربيته متخرشمه
إذكرى الله .. وقل لن يصيبنا إلا ما كتب الله لنا
وإركبيها ولا يهمك كله بيعدى
ألف سلامه عليكى

إيمان يقول...

تا تى تا تى تاربا تاتاتى
أول تعليق
يا بونأدمين

غير معرف يقول...

اهم حاجه ان انتي بخير..
في دهيه الكتكوته بس المهم انتي ربنا سترها عليكي..

انا عارفه ان هي صدمه وانتي اكيد اعصابك تعبانه لاني مجربه الحوادث.. بس حاولي تهدي اعصابك كدا وروقي وان شاء الله هتبقي بخير قريب..

مسدس صغير يقول...

الحمد لله ان ربنا ستر..

الغريب اللى انا عايز افهمه ازاى ماما مطاوعاكى كده وبتروح معاكى هنا وهنا .. وبتركب معاكى الكتكوته حاجه غريبة .
ههههههه

الحمد لله ان ربنا ستر والحمد لله انها جت فى الفشفوشة ومجتش فى حاجة تانية..

mohamed ghalia يقول...

المهم إنك بخير ياليدى
ربنا يحفظك دايما
دمتى بكل الود

هانى زينهم يقول...

ايه حكاية الحوادث والسواقة معاكى ؟؟
خلى بالك ودايما اعملى حساب غلط الغير . انا باكلمك كدة ولسة مرايا العربية مكسورة منى النهاردة وحسبى الله ونعم الوكيل فى الغبى اللى كسرها .

e_emy يقول...

حمدالله على سلامتك وسلامة مامتك

والحمد لله انكم بخير

وان شاء الله الكتكوته هتبقى كويسة عمر الشقى بقى وهى ماشاء الله استحملتك كتير p: اصبرى عليها بقى ومتغيريش اسمها احسن تزعل (:

خلى بالك بعد كده قدر الله وماشاء فعل

لجين أبو الدهب يقول...

الحمد لله رب العالمين على سلامتكم ..

انا عارفة ان الواحد بيزعل على الحاجة غصب عنه .. بس الحمد لله انها ما جتش فيكم ..

وان شاء الله تتصلح وترجع احسن من الاول ..

ما تزعليش نفسك ياليدى .. وحمد لله على سلامتكم انتى وماما ..

Ahmed يقول...

الشنطه بتاعت الفشفوشه؟ لأ الشنطه لأ
اهئ اهئ

على العموم اطمني, خمس خبطات يعني وضعك أحسن من وضع مديح قبل ما أبيعها
ههههه

ربنا يعينك عليها

اللي يجي في الحديد يتعوض المهم البني ادم

Unknown يقول...

ألف سلامة عليكي وعلى ماما وفداكي الكتكوتة يلا الحمد لله انها جت على قد كده هما السواقين بيبقوا تقريبا شاربين ولا ايه بتوع الميكروباصات يعني وحالتهم زباله وكإن الواحد فيهم مش شايف قدامه
خير حمد لله على سلامتك
أقولك حاجة وحياتك تتغطي كويس بأه عشان متحلميش تاني عشان كفاية عليكي الخضة دي قوي ياعالم المرة الجاية هيكون ايه..ربنا يستر
ههههههه
مودتي

ELMASRYA - MOSLEMA LELLAH يقول...

حمدا لله على سلامتكم انتي وماما يا ليدي

الموضوع ماكانش بسيط لكن ربنا ألهمك تتصرفي بالشكل الصحيح

والله أنا مش عارفه سواقين الميكروباسات دول امتى ربنا هيهديهم

بيبقوا متعاطيين مخدرات وبيقولوا عايزين نقلب يعني يخلصوا توصيل الناس وياخدوا غيرهم علشان السببين دول بيسوقوا بشكل جنوني

ربنا يحمينا ويحفظنا وياريت تتصدقوا يا ليدي انتي وماما علشان ربنا حفظكم ونجاكم

خالص مودتي وتحياتي

blue-wave يقول...

هههههههههههههه
المهم حمدالله على سلامتك
ومعلش بقى يا فشفوشه:))

Heba Sayed يقول...

اممممممممم

متزعليش ياقمر ومتخلييش نفسيتك تتاثر

ربنا معاكى فى كل خطوة تخطتيها

لا تنزعجى

دمتى بخير يارب

dramaqueen يقول...

اهم حاجة انك بخير يا ليدى
فداكى مليون كتكوتة

ستيتة يقول...

بعد الشر عنك وعن مامتك
الحمد لله اللي يجي في الريش بقشيش

وبعدين سوقي الكتكوتة عادي جدا
اوعي تخافي .. ده شيء قدري ولازمن ولابد تقوي نفسك كده

الميكروباصات والأتوبيسات واللواري سبب كوارث كتييييييييييييير في البلد
ربنا يفاديكي انتي وكل المسلمين

ومعلش قوي قلبك كده وصلحي كتكوتة واديها سواقة
لأن العيشة في المواصلات صعبة وينتفي بها غرض الستر والحشمة للأسف والواحده بتقرف في الميكروباصات والأتوبيسات

ربنا يسعد ايامك

احساس طفلة محبة للرومانسية بس واقعية يقول...

المهم ان انتى بخير يا ليدى
والحمد لله انها جت على قد كدا
وزى ما ماما قالتلك متستسلميش
واركبي العربية تانى بأسرع وقت
عشان تواجهى خوفك من الحادثة
وربنا يحفظكم دئما

تقبلى مرورى

عاشقه وغلبانه يقول...

مش انتي وماما كويسين
قولي الحمد لله
قدر الله وماشاء فعل
اللي بيجي في اي حاجه غير البني ادمين بيتعوض

Lady E يقول...

إيمان : بعد الشر عليكي من المواجع موجع موجع يا قمرايا
الله يسلمك من كل شر يا حبيبتي
و سلامة عربيتكم الف سلامة
الحمد لله ركبت الكتكوتة امبارح وانا رايحة للكلية وفعلا على رأيك كله بيعدي
تسلميلي يا حبيبتي وربنا ميحرمنيش منك وربنا يحميكي من كل شر

Lady E يقول...

إيمان : وعندك احلى سلام وتحية وضرب نار لأول تعليق

Lady E يقول...

hager za3bal : ربنا يحميكي من الحوادث يا حبيبتي
والحمد لله فعلا كان زماني انا وماما دلوقتي بقينا في خبر كان
ربنا يبعد عنك اي شر يا قمرايا

KEBLAWYAT يقول...

هو إحنا بتوع الإتحاد عندنا أوفر برضه ( بس مش لدرجة أمراء و أميرات يعنى )

بس موضوع الحفلة ده - بغض النظر إذا كان صح ولا غلط - يحسسك برضه إنك فى كلية

أنا شخصيا حاسس إنى فى مدرسة إبتدائى مشتركة