كابوس وراح الحمد لله + تحديث

يمكن كتير استغربو اني كتبت بوستين في يوم واحد وده البوست التالت بس انا كنت بحاول اخفف عن نفسي القلق والخوف اللي كنت فيه
وكنت شبه متأكده ان في حاجة صعبة هتحصل النهارده بعد ما قمت من النوم وانا بعيط
كنت خارجة مع ماما بالكتكوتة للأسف وكان في حادثة موتوسيكل وعربية
وبعد 300 متر تقريبا كان في تقاطع - شارع جانبي- وانا ماشية قلبت النور على اساس اني أقول للي طالع من التقاطع خد بالك في عربية جاية
وفوجئت ان في ميكروباص مجنون طالع من التقاطع بسرعة كبيرة جدا وكان ممكن اعدي من قدامه وبسرعته دي كنا هنتفرم وسرعة الميكروباص هتحدفنا على الطريق التاني ومنه للنيل يعني كانت هتبقى كذا حادثة كان لازم اتصرف في ثواني هديت السرعة ووقفت قبل التقاطع على اخر لحظة والعربية اللي كانت ورايا جت بسرعة وطاااااااخ خبطت فينا طلعت من نص الطريق مكان الحادثة علشان منعملش حوادث تانيه وركنت على جنب
ونزلت انا وماما نشوف ايه اللي حصل للعربية والكتكوتة بقت موديل جديد الشنطة شكلها اتغير وبعدين اللي خبط فينا جه بعربيته ونزل وعنيه زي ما بيقولو بتطق شرار ولسان حاله بيقول عايز اولع روما بحالها فقولت لو هيتشاكل هتشاكل بس اضايقت لما شوفت ان هو كمان عربيته اتبهدلت زي عربيتنا المهم قولتله ع اللي حصل من الميكروباص وانه مكنش ممكن بأي حال من الأحوال اني اعدي والا كنا هنتكسر احنا والعربية فالراجل فهم الموقف وبدأ يغير كلامه وقال لنا لازم اصلح العربية - مروريا هو الغلطان- لكن انا وماما مرضيناش خالص وقولناله كفاية ان عربيتك اتبهدلت ربنا يعينك على تصليحها والحمد لله حصل خير فقال الحمد لله انها مجتش في الارواح واخدنا الكتكوتة ومشينا
المشكلة مش في الخبطة لواحدها
المشكلة في الخضة اللي كنا فيها واللي على أثرها ماما تعبت وضغطها علي وانا ضغطي انخفض _ المفروض كنا نقلب الضغطين مع بعض علشان ضغطنا احنا الاتنين يتظبط_

كله من الميكروباص حسبنا الله ونعم الوكيل فيه طبعا سواق الميكروباص اللي كان السبب في الحادثة جري ولأن احنا بالليل فمحدش لمح نمرتة بس انا فوضت امري لله وربنا ينتقم منه
اما انا فمش هركب الكتكوتة تاني الا لما اعصابي تهدى
وقررت اسميها الفشفوشة بدلا من الكتكوتة لان كلها خبطات فيها حوالي 5 خبطات من كل ناحية
وحسبنا الله ونعم الوكيل وبيتهيألي كده ممكن اغير اسم الكتاب واخليه حوادث ليدي بالفوفو والكتكوتة نياهاهاها
--------------------------------------------------------
رحت الكلية النهاردة متأخرة نص ساعة مع اني منمتش من امبارح بالليل لغاية معاد الكلية غير ساعتين وكل شوية احس اني في العربية والعربية بتتخبط يعني كانت ليلة ما يعلم بيها الا ربنا
وفضلت اقول لماما مش هركب الفشفوشة _ مجنونة بكون يا حبيبي غلطانة اكيد يا حبيبي لو جيت اليوم بعد اللي في صار عيد اللي كااااان _ لا لا للفشفوشة الميكروباز اهون مش عايزة اتحمل المسؤلية دي تاني
المهم ماما اقنعتني وقالتلي لو كل واحد عمل حادثة عمل زيك كده مكنتيش هتلاقي عربيات ماشية
انا:يا ماما اعصابي تعبانه ومنمتش امبارح
ماما :يلا بس اتشجعي وربنا يحفظك وانا هنزل معاكي
وماما نزلت معايا واستجمعت قوتي وانا من جوايا مرعوووبة والحمد لله ان بكرة معنديش محاضرات مش هضطر اخرج
وبعدين اخيرا اخدنا محاضرة لولولولولي فاكرين الدكتور اللي وريتكم عربيته هو اللي جه النهارده وكمان نزل الكتاب
وقالنا خدو بالكو الامتحان بعد 9 اسابيع ذاكرو ومتفوتوش يوم البويتري صعب البويتري يعني الشعر بعيد عنكو
والعيال زميلاتي كانو متعشمين اني اوصلهم فحكيتلهم على الحادثة وقعدوا يضحكوا بس هما ضحكوا علشان انا حكيتلهم بسخرية اصلا بقولهم كنت بفادي حادثة فعملت التانية وطبعا صرفوا نظر عن اني اوصلهم