الجمعة، 20 فبراير 2009

انا عربيـــــــــــــــــــة


انا عارفة اني بقيت بكتب كتير اوي في المدونة بس بجد انا محتاجة اتكلم عايزة افضفض نفسي اعرف وبجد لو حد مضايق من كتاباتي انه بعفيه من انه يضيع وقه ويقرأ الشخابيط اللي بكتبها


من شوية كنت بقرأ كتاب فقه السيرة للشيخ محمد الغزالي وكنت سعيدة وانا بقرأ الكتاب جدا غير ان بعض مفردات اللغة العربية وقفت في وشي تطلعلي لسانها وتتحداني وتقولي مش هتفهميييييييييييني هاهاهاها - الكلمات بتضحك عليا-

ولقيتني بقف مع نفسي وبقول انا مين انا فين انا ليه ما خلاص طه انتهىىىىىىىىى لا بجد لقتني بقول لنفسي انتي عربية صح ؟؟ مش عربية بمعنى سيارة لكن عربية بمعنى ان لغتي عربية وهويتي عربية وملامحي عربية وعايشه في مجتمع عربي طب ليه اللغة العربيه معصلجه معايا ده انا كنت ايام المدرسة بجيب الدرجات النوهائية في اللغة العربية طب ايه اللي اتغير ايه الي حصل

ايه الغربة اللي حصلت بيني وبين اللغة العربية دي ؟ هل انا اللي قصرت في اللغة العربية مع اني بقرأ كل حاجة بره كتب الدراسة باللغة العربية ولا الكتب الدينية اصلا اسلوبها صعب ومحتاجة قاموس


قرأت في مجلة ان اللغة الانجليزية مصيرها هيبقى زي اللغة اللاتينية وانها بدأت في الانقراض

طب ايه اللي انا شايفاه ده ان كل الناس بتتفزلك وبتتكلم انجليزي ولو شافو حد انجليزي مش هيعرفو يتكلمو كلمتين على بعض انجليزي

يا ترى انا غلطت لما فكرت ادرس اللغة الانجليزية ؟؟

لسه انا وزميلتي في الكلية بنتكلم عن الموضوع ده واننا هنتخرج من الكلية لغويا زي ما دخلنا الكلية ولا كأننا درسنا انجليزي - يا خسارة-


تعرفو ان الانجليزي بيخوف الناس مني بجد انا نفسي مش مصدقه واحدة جارتنا قالتلي كان لازم تدرسي انجليزي يعني ؟؟

بيخوف الناس مني على اعتبار ان اللي بيدرس اداب اللغة الانجليزية بيبقى مثقف زيادة عن اللزوم وبيتكلم عنجليزي عمال على بطال ومستوى التفكير بيكون عالي - هع هع هع ده المفروض-

يا ترى لو كنت درست عربي كنت هبقى مرتاحة وفرحانة معتقدش كنت هبقى طول الوقت ندمانة اني فوتت دراسة اللغة الانجليزية عليا


الحمد لله على كل حال انا مش هفكر كتير

هناك 20 تعليقًا:

عاشقه الرومانسيه يقول...

وااااااااااااااااااو
اول تعليق
احجز وارجع

عاشقه الرومانسيه يقول...

وادى التااااااااانى

معلش بقى ياقمر وقع منى بوست ليكى سامحينى
هتتعوض ان شاء الله
وعموما ياحبيبتى المدونه مدونتنا واحنا نتكلم براحتنا
خدى راحتك يااختى يعنى لو ما اتكلمتيش فى مدونتك هتتكلمى فين
انا معاكى
اما بالنوسبه لموضوع الانجليزى ده
فانا عن نفسى مش بحب اى لغه غير العربى
ومش معنى كده انى ضليعه فيه يعنى بس فيه كلمات كتير بتقف معايا وكلمات اكتر بافهمها

والكتب الدينيه اسلوبها بيختلف من كاتب لكاتب
يعنى انا عندى كتاب دينى 600صفحه خلصته فى اسبوع من كتر ماهو مشوق واسلوبه سهل
وعندى كتاب دينى ما يتعداش 50 صفحه والله ما خلصت ربعه حتى وبقاله عندى اكتر من 7 سنين
تخيلى؟
بس تفتكرى ان اللغه العربيه هيجى عليها يوم وتنقرض هى كمان؟

Lady E يقول...

عاشقه الرومانسيه : هيييييييييييه عاشقة الرومانسية اول تعليق
عارفة بجد بحب مدونتك جدا وبرتاح فيها جدا جدا وبحب الموسيقى الرومانسية اللي فيها بس مش عارفه ليه مش بعلق ؟؟؟؟؟؟ يا ترى ليه موش عارفه وبعدين احنا لسه فيها البوست اللي سقط سهوا ممكن تعلقي فيه عاااااادي

Lady E يقول...

عاشقه الرومانسيه : طبعا اللغة العربية هي لغتنا الأم وانا زيك بحب اللغة العربية جدا بس في نفس ذات الوقت بحب الانجليزي ولغات كتير ما عدا الفرنساوي بكرهه جدا يا اوختشي وباخده في الكليه ومخنووووقة منه بعيد عنك
وقوليلي اسم الكتاب الديني المشوق ده علشان ادور عليه وأقرأه انا كمان وتبقي كسبتي ثواب قرأتي ليه يا قمرايا
وبالنوسبة للغة العربية فهي محفوظة بالقرأن الكريم فلو كان العرب فرطو في لغتهم ففي غيرهم بيحبها وربنا يوعدك يارب وتروحي الحرم هتلاقي ناس من كل مكان في العالم بيتكلموا لغات كتير لكن بيقرأوا القرأن بالعربي ده غير ان في اقبال كبير على تعلم اللغة العربية في البلاد الاجنبية
وبجد منوراااني يا احلى رومانسية

احساس طفلة محبة للرومانسية بس واقعية يقول...

بصراحة مش شايفة سبب يخليكى تقولى انك بتكتبى كتير اسلوبك حلو ومدونتك جميلة
واذا مكنتيش تفضفضى فى مدونتك تفضفى فين يعنى :)

بالنسبة لاى كتب مش كتب الدين بس
فيها انواع السهل والصعب حسب السلوب الكاتب وطبعا مش هنقدر نعرف ونجمع معنى كل الكلمات العربية والا اصبحنا كلنا مبدعين

بالنسبة للانجليزى احيانا كتير بنجتاجة خاصة لو اتغربنا
و ساعات بينفع
وجميل انك تعرف لغات عشان تعرف توصل صوتك لكل الناس وتتعامل معاهم
بس مش لازم نتكلم لغة تانية غير لغتنا كدا من غير سبب

تقبلى مرورى

Lady E يقول...

احساس طفلة محبة للرومانسية بس واقعية : اهلا بالمدونة التي لا تخشى الزلازل :)
بجد اسلوبي حلو ؟؟ وحياة ربنا؟؟ اخجلتم تواضعنا بجد انتي اللي عيونك حلوين فبتشوفي مدونتي حلوة يا قمرايا

وبالنسبة للكتب فعلا في كتب اسلوبها سهل وكتب اسلوبها صعب بس الفكرة اني وانا بقرأ الكتاب حسيت بغربة بيني وبين اللغة العربية

وللأسف ساعات بتكلم انجليزي مش منظرة لكن علشان ايام الدراسة ببقى على طول مع الانجليزي في الكلية والكورس فبنسى اسامي بعض الكلمات وبضطر اقولها بالانجليزي وكمان المفروض استخدم اللغة اللي بدرسها والا هتموت لأن اللغة كائن حي اذا اهملتيه بيموت

بجد منوراني دايما يا اجمل احساس طفلة

عاشقه الرومانسيه يقول...

انتى بقى عوضتى عدم الرد على المدونه وحطيتي لى 4 تعليقات مره واحده
ههههههههههه

مبسوطه طبعا انك بترتاحى فى مدونتى وبتعجبك بس ياترى ليه مش بتعلقى؟؟!!!!!!!!

هاستعمل كلمتك اللى فوق دى وهقولك

يعني لو قرأت البوست ليه متعلقش عليه
ليه ليه ليـــــــه؟؟؟؟؟؟؟!!!!!!

الكتاب ياقمر مشهور قوى واسمه لا تحزن للاستاذ عائض القرنى

والبوست اللى سقط منى هحط له تعليق حالا ياقمر انتى تأمري

عايش علي الهامش يقول...

وتبحتر الحطاء غير معمعم وتداخل البعبيط بين تخبرا وتناهوا بين السماميك تحضرا

(يعني ازيك بالفصحي) نياهههها

لا يستي انا اقولك بقي اللغله لعربيه زي ي لغه في العالم مع الوقت في مصطلحات بتخرج ومصطلحات بتدخل علشان تناسب العصر ولان احنا جيلنا نفسه جيل السرعه فهتكتشفي اننا وقعنا كل كلمه طويله واستعضنا عنها بكلمه انجليزيه او كلمه دلع من تاليفنا
احنا عرب ولساننا عربي بس ربنا يسامحه البحطيط (تنفع هنا برده ) زي الانجليزي لو انت قرات النص الاصلي لقصة تشارلز ديكنز او شكسبير هتكتشفي وجود مصطلحات انجليزيه صعبه جدا ومش موجوده في النسخ الجديده من القاموس الانجليزي يعني انقراض اللغه ساير لي كل اللغات بس مش انقراض بالمعني ده لا انقراض الاصول علشان كده هتلاحظي ان القران مكتوب بمصطلحات خفيفه رغم وجود البديل لها مصطلحات هتعيش ومش هنقدر نستغني عنها مهما عملنا كلمات بسيطه جدا هي الغريبه عننا

وبعدين عادي انك تدرسي انجليزي بس المهم فعلا متسبيش نفسك تدخلي زي ما تطلعي حاولي تنمي اللغه دي اكثر من كده

وختاما المتحممون تنبطرا متدعدعون
يعني اكيد اشوفك علي خير

شكرا لك

بنوتة يقول...

السلام عليكم
لا أنا صدقينى ده صح
لان الرسول صلى الله عليه وسلم قال
"تعلموا لغات الشعوب حتى تأمنوا مكرهم "
لازم المسلمين بالذات يتعلموا لغات الاخر
عشان مثلا لما يسيئوا ليه نعرف نرد
وعشان نعرف ننشر الاسلام ازاى حتقنعنى حد او تتناقشى معاه ولا انتى فاهماه ولا هو فاهمك
تحياتى ليكى

Unknown يقول...

أقولك الصراحة وأحكيلك حكاية لطيفة..
أنا من صغري مش بحب الإنجليزي أبدا مش برتاحله ومكانش عندي إقبال اني أذاكره أو أفهمه إطلاقا حتى من شدة شقائي معاه شيلت الترجمة في سنة أولى إعلام السنة الي فاتت يعني كنت محروق جدا مش عشان هيا ترجمة أنا عارف نفسي لأ بس لإني عمرها ما حصلت معايا اني أشيل حاجة إطلاقا والترم التاني كان عندنا لغة ونجحت فيها بقدرة ربنا وجيد جدا كمان شكله الراجل ابن الإيه ده كان حاططني في دماغه المهم خير وأنا في ثانوية عامة بأه كنت بمارس هوايتي المحبة الي هيا الإعلام مع الكتابة في طابور الصبح أكتب الكلمة من دول وأقولها في الإذاعة الصباحية كتبت مرة كلمة عن العربية والإنجليزية وما قيل عن الإنجليزية من كونها لغة عرجاء يكتب فيها ملا ينطق وينطق ما ليس له وجود وكده يعني وحبةأحاديث اننا أمة عربية وآيات قرآنية وبعدين راضيت الناس بحديث من تعلم لغة قوم أمن مكرهم أنا خلصت من هنا ومدرس الإنجليزي طلع من شنطته ورقا طويلة عريضه وسحب واحد زميلي من الطابور وطلعه يرطم بيها على ان الناس تفهم وأتحرج أنا بأه بس للأسف الظاهر إن الكل كان غبي ولا مؤاخذه حتى المدير ذات نفسه اتكلم بعدها وقال نشكر الطالب الي هو أنا على الكلمة العظيمة دي وماجابش سيرة الغنجليزية الي اترطمت دي هههههههههههههه
شفتي بأه
بس طبعا انا بحترم تفكيرك وكلامك ومدونتك وشخصك كمان يعني مش عشان مش بحب الإنجليزي يعني ههج من هنا لا أنا بس كنت بدردش معاكي شوية لو تئذنيلي وطبعا رغيت كتييييييييييييير جدا ورخمت قوي
معلش بجد آسف
مودتي

ستيتة يقول...

تعاليلي يا بطة

اولا من عرف لغة قوم امن مكرهم وشرهم

ثانيا جميع البحوث العلمية باللغة العنجليزية طيب نعمل ايه طالما تخلفنا وبقى العلم في بلاد بره

ثالثا ولو قرأتي الأدب الأنجليزي يبقى عيب؟ وهو الثقافة عربية بس؟

رابعا لغتنا العربية عسر "من جهلنا" لا يسر "من تخلف المدرسين" ونحن لا نملكها "مش في ايدنا تمنها" كما كان القدماء يملكونها " كان المدرسين مش بيدوا دروس خصوصية" .. غواص في بحر الندم

بس العجيب بقى ياليدي ان الشيخ محمد الغزالي عليه رحمة الله اسلوبه مش صعب خالص ولا كلماته مجعلصة اطلاقا

SHAPE YOUR LIFE (ABOALI) يقول...

غربة اللغة جاءت من عدم قرءاتها واستخدامها وتطبيقها

دة اولا

اتجاه الاباء والامهات الى ذهاب اطفالهم الى مدراس خاصة بها اللغات الاخرى
ده ثانيا

انتشار اللهجة العاميه ودخول اضافات
عليها ومحاولات كل مجموعة عمل لغة خاصة به مثل لغة الروشنة وخلافه

ده ثالثا

ضعف الانتماء والاحساس بالغربه داخل الوطن والياءس من تقدمه

ده رابعا

عدم وجود مجمع لغوى قوى وفعال لتنقية اللغة ومحاولة تبسيطها وادخال مداخلات جديدة

ده خامسا

التعالى والرغبه فى اظهار حالة من التحضر بالكلام باللغة اخرى

ده سادسا

اهل القدوة فى المحافل التى تعقد فى مصر يستخدمون لغة اخرى غير العربيه

مثلما تكلمت حرم الرئيس فى مرور 90 سنه على انشاء الجامعة الامريكية باللغة الانجليزيه

ده سابعا


عزوف الدعاه وضعف مستواهم المالى والعلمى على تبسيط اللغة

ده ثامنا


وجود القراءن داخل البيوت للديكور
وفى السيارات للبركة فقط دون العمل به والحفاظ على تفسيره ومعرفه معانيه

ده تاسعا

غياب الاهداف القومية واننا خبر امة انزلت للناس

ده عاشرا



تحياتى

يااااااااا عربيه


عربيه يعنى سيارة

لجين أبو الدهب يقول...

اللغة العربية أكثر من ممتعة ..

فى بداية دارستى كانت واحدة صاحبتى انتمتى يعينى دخلت قسم انجليزى .. وبعد ما خلصنا كلية قالت لى ياريتنى كنت دخلت عربى ..

دراسة اللغة العربية لها متعة جميلة جدا .. خاصة وانها مليان مفردات وصور وتشبيهات ..

وفى الزمن اللى احنا فيه دلوقتى للاسف اصبحت اللغة الانجليزية هى اللى مسيطرة ..

لو عايزة تقرأى مراجع بجد وموثوق فيها بالانجليزى .. عايزة معلومة مهمة بالانجليزى ..

فدارسة الانجليزى مهمة دلوقتى جدا ..ولكن من وجهة نظرى مقدم عليها اللغة العربية ..

وكنت قرأت فى كتاب ان اللى يتقن اللغة العربية سهل جدا انه يتقن اى لغة تانية لانها اصعب لغة بدليل لو واحد عربى اتعلم انجليزى ممكن ينطقه لبلب وكانه اصله اجنبى انما تعالى على الاجنبى وخليه ينطق عربى اكيد فى حروف هاتقع منه وتكتشف على طول انه مش عربى ..

عامة انتى ممكن تخلصى على خير وتبتدى انتى تقوى نفسك فى اللغة ..

عندى واحدة صاحبتى خريجة تربية فرنساوى ومن صغرها فى مدارس الفرنساوى بعد ما خلصت قعدت تنمى نفسها فى اللغة العربية .. ما شاء الله أصبحت متقنها ..

ودرست علوم شرعية ودلوقتى بتعمل على دعوة الاجانب للاسلام باللغات اللى عندها ..

اتمنى انى اكون افدتك ..

ربنا يوفقك وينجحك ..

دُمتِ بخير ..

Ahmed يقول...

موضوعك في غاية الأهميه

الفرنسيين والألمان بيرفضوا يتكلموا لغة غير لغتهم
السائح اللي مبيعرفش لغتهم بيتعب أوي لغاية ميلاقي حد يتفاهم معاه

الفرنسيين بيستخدموا حق الفيتو في مجلس الأمن لو المرشح لمنصب سكرتير عام مجلس الأمن معهوش شهاده فرنسيه!!!

احنا هنا بقى مصيبتنا العكس

احنا بنبص للشخص اللي بيتكلم عربي على أنه شخص أصابه الجمود والتحجر من سنين وبنشك في قدراته العقليه وبنشك انه يكون مواكب للتكنولوجيا

وكل لما الشخص يتكلم انجليزي اكتر وعربي اقل, مقامه يكبر بين الناس والناس تعتبره فاهم وعارف

الأسباب كتيره
احنا بنستورد التكنولوجيا من بره زي ما هيا بدون من غيرها للغتنا
اتحولنا وبقانا بنكره لغتنا وبنعتبرها لغة الناس الجهله واللي مش فاهمين

طب قولي كده أي جمله وأطلبي اعرابها
كلنا وأنا أولكم مش هعرف

الحاجه اللي الواحد لسا بيحافظ عليها في لغتنا هي القرآن فقط لا غير

موضوعك مهم جدا

mohamed ghalia يقول...

أقواك على حاجة ياليدى
بعيدا عن إنى دراستك وتخصصك إنجليزى
أنا فى تجارة وبحاول اعلى من الإنجليزى عندى على قد مقدر
لأنى اللغة بقت مطلوبة جدا فى أى شغل
لكن برده من ناحية اللغة العربية هى بس عملية تعود مش أكتر أنا خدت من زمان إنى بقرأ كتب فيها مصطلحات كبيرة ومكلكعة ونع الوقت بقى الموضوع عادى
اصبرى انتى بس واهتمى بالقراءة أوى فى العربى ومش هتحسى بمشكلة
دمتى بكل الود أختى العزيزة

dramaqueen يقول...

بصى
ساعات فعلا باحس ان الكتب الدينية فيها بعض الكلمات الصعبة مع انها عربى
دة على حسب اسلوب الكاتب
بعدين مالها دراسة الانجليزى
انا اصلا كان نفسى ادرسه
بس عموما اغلب الكتب والمراجع بقت انجليزى دلوقتى
وكمان بعض الكليات دراستها انجليزى

فالانجليزى مش وحش
واحنا مش بنتكلم عربى مكسر بالعكس
انتى قادرة تكتبى بالعربى وتتكلمى بيه
بدليل ان مواضيعك عربى
بعدين مدونتك زى العسل وتتكلمى فيها براحتك

طولت عليكى
سلاموز بقى

Kiara يقول...

يالهووووووووووووووووي جيتي علي الجرح

العامل كل يوم بيكلمني نص عربي ونص انجليزى

كان يقولي ايه انا عاوز سليب

وبيقولي مسيو اي نيد انام

ههههههههههههههه

خليت الشغل كله يموت من الضحك
قلتله عاوز تتكلم فرنساوي يبقي مش تقولي مسيو شيفني راجل قولي مودموزييييييل

عاوز تتكلم فرنساوي يبقي كله فرنساوي

اما لو عاوز انجليزي انام يعني سليب

نيد بالعربي يعني عاوز محتاج كدا يعني

نقي لغه واحد مش في الجمله تقولي ميت لغه

فاكر انه هيبقي استايلش ومودرن لما يحط لغات غير العربي في النص

هانى زينهم يقول...

... تدفق في البطحاء بعد تبهطلِ *** وقعقع في البيداء غير مزركلِ
.... وسار بأركان العقيش مقرنصاً *** وهام بكل القارطات بشنكلِ .
... يقول وما بال البحاط مقرطماً *** ويسعى دواماً بين هك وهنكلِ ....
إذا أقبل البعراط طاح بهمةٍ *** وإن أقرط المحطوش ناء بكلكلِ
.... يكاد على فرط الحطيف يبقبق *** ويضرب ما بين الهماط وكندلِ..
.. فيا أيها البغقوش لست بقاعدٍ *** ولا أنت في كل البحيص بطنبلِ .



ده العربى اللى قصدك عليه ؟؟ لو هو ده يبقى عندك حق فى البوست ده اما لو كان غير كدة يبقى انتى اللى قصرتى فى فهم العربى ودراسة الانجليزى ظلمت اللغة معاكى . العربى لغة القران يعنى عمرها ما هتكون صعبة على اى دارس او متحدث او حتى مهتم بدراستها . ما تزعلنيش منك بقى !!

مسدس صغير يقول...

انتى عربية ومش عارفة فى اللغة العربية ..

يقول علينا ايه سيبويه لما يقرا البوست ده وللا ابو الاسود الدؤلى وللا المتنبى .

يقولو على مدرس العربى بتاعك ابن تيييييييييييييييت معرفش يعلم؟؟

يللا خليكى فى الانجليزى وأمرك لله
لو انى اشك انك بتعرفى عنجليزى.

ده انجليزى ده يا مرسى؟؟؟

Lady E يقول...

عاشقه الرومانسيه : هههههههههه عارفة ليه لأني ببقى طايرة في سماء الرومانسية وكتاب لا تحزن ده جوه قلبي بجد كتاب بحبه جدا جدا

والامر لله يا جميلة

بجد بجد انا بحبك في الله