الثلاثاء، 17 فبراير 2009

خطوبة مع دردشة الجزء التاني+ تحديث

صورة من كليتي الكئيبة لالالا متفهمونيش صح أقصد الحبيبة ودي عربية ابن المحظوظة ضاكتور من الدكاترة اللي عندنا (ربنا يوسع عليه) بحس انه دكتور طيب جدا وفي نفس ذات الوقت عايز يبان شرير وع العموم هو شرير الى ان يثبت العكس

رحنا الكلية يوم الاحد اللي فات واتطردنا منها - اي وعهد الله اتطردنا من الكلية- طبعا مش مصدقين ان ممكن الطلبة تتطرد من الكلية لان ذنبهم الوحيد انهم عايزين ياخدوا محاضرات
ولاد التيت طردونا من الكلية وقالولنا مفيش دكاترة هتدي محاضرات الاسبوع ده انتو ايه اللي جايبكو ؟؟ اه صحيح ايه اللي جابنا اما احنا وحشين صحيح

---

بابا عايز يسحب مني الكتكوتة عاااااااااااا يا غولبي ياني يا مرارك يا ليدي الا الكتكوتة حبي الوحيد متفرقش بين قلبين محبين يا بابا عاااااااااا

---

لقيت مادة حلوة اوي لكتابي والفكرة وضحت قدامي الحمد لله بس لسه برضه عايزة اللي مصوتش على السؤال اللي في اول المدونة على ايدكو الشمال يصوت يالهووووووووووووي

------------------------

اكملكو موضوع الخطوبة بقى اكيد متشوقين والله انا بكتبه علشان خاطركو بقى يلا اعمل خير وارميه البحر - تصدقو النور قطع وانا بكتب وفضلت اغني الضلمة متخوفش يا سمكة ملونة الضلمه حلوة خالص واحنا مع بعضنا , النور غمض عنيه غمض عنيه غمض عنيه واللمبة نايمه ننه نايمة ننه نايمه ننه - وجيت اكمل البوست تاني بعد لما النور جه-اي خدعه-







عمو والد مها جهز كل حاجة وظبط الكوشة زي ما انتو شايفين - دي صورة للكوشة بالنهار ملحقتش اصورها بالليل وعلى فكرة دي كانت قراءة فاتحه وخطوبة في نفس ذات الوقت وعندهم في جمهورية منوفيا مفيش حفلات تانيه الا في الفرح لكن عندنا (سنو بلدنا) ان قراءة الفاتحة ليها حفلة والخطوبة حفله وكتب الكتاب حفلة والفرح حفلة يعني اهل العريس والعروسة بيبعوا الحديده م الاخر

المهم جوز رشا اخت مها اتصل بالعريس وقاله انه جاي الساعه 7 ونص فأنا أجلت اللبس لغاية الساعه 7 وربع هههههههه هلبس من بدري ليه يعني , ماما كوتلي لبسي كان تايير لونه بني في نحاسي وبعدين اخت مها ال ....... قالت لماما انتي بتكوي ل ليدي هدومها ليه هي طفله
-هو انتي متعرفيش طفلة وست الطفلات كمان - امي بتدلعني مالك انتي يا غتييييييييييييتية يا سئيلة يا بقدونس بصراحه اتحرق دمي وخصوصا انها قالت الكلام ده لماما من ورايا وعرفت الكلام ده بالصدفة المهم العشا أذنت وبعدها شغلوا الدي جي على اغاني غريبة طول ما انا سامعاها كنت بقول مين ولاد التيت اللي مشغلين الاغاني دي في الدي جي يعني مثلا مشغلين اغنية اشتروني لوردة ومشغلين اغنية تسلم بتاعت تامر عاشور - الاغنية دي بحب اسمعها لما اكون مضايقة او مخنوقة يعني الموود بتاعها بيبقى مود عادي مش مود فرح يعني
وبعدها مها وصحباتها اخدو بعضيهم وراحو بيت اخوها علشان تلبس هناك انا كنت عارفه انها هتروح هناك بس من باب الذوق حتى انها كانت تعرض عليا اني اروح معاهم طبعا اضايقت جدا وقولت ياريتني ما حضرت الخطوبة الزفت دي يعني انا مسافره مخصوص علشان احضر خطوبتها وقضيت وقت كبير ادور على هدية مناسبة ليها لغاية لما جبتلها هدية اعتقد انها حلوة وسيادتها مقدرتش اي حاجة عالعموم اعمل خير وارميه البحر برضه و بقيت كل ما اتضايق من حاجة افتح شوكولاتايه واكلها :) بهدي اعصابي
بعدها كملت لبسي ونزلت رحت عند مها وصحباتها كل البنوتات كانو هناك ومها برضه كانت عايزة تنزل تقعد في الكوشة وبتقول هسيب المعازيم قاعدين لواحدهم عايزة انزل اقعد معاهم وكلنا قولنالها يا بنتي هتنزلي ازاي قبل ما تامر يجي ياخدك بطلي هبـــــــــــل المهم تامر مجاش في معاده وجه الساعه 8 ونص و طلع لمها وكان رقيق جدا جاب لها بوكيه ورد ابيض وفيه ورده حمرا في نص البوكيه وهي كانت متوترة جدا وقلقانه من رد فعل تامر لما يشوفها
وبعدين تامر راح لمها واخدها من اديها وقالها انتي زي القمر وادالها بوكيه الورد ونزلو قعدو في الكوشه ومها واصحابها واخواتها نزلو رقص اما انا فمكنش ليا نفس ارقص - مفيش مشكله في الرقص لأن مكنش في شوباب شايفيننا - ومها فضلت تقول في الاول تعبانه ومش قادره ارقص وبعدها فضلت ترقص حتى بعدما الناس مشييت فضلت ترقص مع تامر لنص الليل
وبعدين جه وقت انهم يلبسو بعضيهم الدبل ويا دبلة الخطوبة عقبالنا كلنا مها لبست تامر دبلته وتامر لبس مها الهدايا الدهب اللي جابهالها واللي باباها جابهالها ولبسها الدبله وباسها في ايديها وقالها بحبك
شوية كده وحاولت اندمج في مود الخطوبة بس معرفتش افرح للاسف اللي متابعين مدونتي هيعرفوا اني كنت مضايقة من قبل الخطوبة وكمان الحاجات اللي حصلت قبل الخطوبة ضايقتني اكتر وبعدين وصلت لنص الخطوبة ولقيتني ميته من التعب والارهاق قولت لخالتو وطلعنا البيت وشوفنا العروسة والعريس من البلكونة وبعدها اتسامرت انا وماما وكنا بنضحك وكنت فرحانه جدا لأن ماما كانت بتخفف عني الكأبه اللي كنت فيها قبل السفر واللي حتى فرح مها معرفش يخفف عني حدتها
والجميل في الموضوع ان فستان مها صحيح نفس ذات اللون اللي كنت بتمناه في فستان خطوبتي واللي اخدت فكرته مني لكن موديل الفستان كان وحش بمعنى الكلمه وكل الناس قالولها كده حتى هي قالت كده قبل الخطوبة مع ان الفستان اختيارها بس من حفر حفرة لأخيه وقع فيها


-----------------------------------------------

كلاكيت تالت مرة التحديث ده طلع عيني

انا اسفة يا كياااااااااااراااااااااا

مبروووووووووووك عالنجاح يا ميرووووووووووو

ممكن تبصو بصه عالبوست ده
http://sun-east.blogspot.com/2009/02/blog-post.html












هناك 18 تعليقًا:

عاشقه الرومانسيه يقول...

عقبالك ياقمر يااارب
وافرح فيكى قريب
مهما كان السبب حاولى تخرجى نفسك من المود الوحش وتعدلى نفسيتك بايدك

عاشقه الرومانسيه يقول...

لولولولولولىىىىىىىىىى
لا دى مش زغروته علشان فرح مها
دى زغروته علشان انا اول تعليق

عاشقه الرومانسيه يقول...

ايه ده؟؟؟؟؟
هو مفيش حد هنا يعلق غيرى ولا ايه؟
وادى تالت تعليق

عاشقه الرومانسيه يقول...

انا هفضل اعلق لحد المعازيم
قصدى زباين المدونه ما يجوا
هههههههه
ولا اقولك كفايا كده
علشان اسيب مكان لغيرى

احساس طفلة محبة للرومانسية بس واقعية يقول...

ماشى يا عاشقة
كمان كنتى عايزة تكملى
:)

طفلة
انتى زعلانة انهم قالولكوا مفيش دكاترة هتدى محاضرات الاسبوع دا
انا لو مكانك افرح اهو اسبوع اجازة دا فى ناس بتقضى الاجازة فى مشاريع وكورسااااات

بالنسبة للخطوبة مبروووك لمها
والمرة دى هقولك عقبال ما تخرجى من المود اللى انتى فية وتكونى احسن

ومش تضايقى من اللى سألت مامتك هى بتكويلك لية
هى بس كانت متضايقة لانها هى اللى بتضطر تكوى لنفسها
انما انتى مرتاحة ومامتك مدلعاكى
طبعا من حقك تفرحى ان العلاقة بينك وبين مامتك جميلة وبأنها بتدلعك وكمان بتحاول تغير من موودك وعيزاكى افضل

بالتوفيق
وتقبلى مرورى

لجين أبو الدهب يقول...

مبروك لمها ..

وعقبال ما نبارلكلك على خطوبتك وتبقى اجمل وبالفستان اللى انتى حابه ..

وشدى حيلك للترم التانى ..

ربنا ينجحك ويوفقك ..

دُمتِ بخير ..

إيمان يقول...

أولا : وأنا بقرأ البوست النور إتقطع
واضح إن المشكله فى البوست مش فى النور
ثانيا : كله إلا الكتوته ( الكتوته التمام أو الميكروباس السوخام)
إوعى تتنازلى عن موقفك من حيث الكتكوته
وإلا هتدفعى تمن تنازلك للتاكسيات
ثالثا : ماما بتكويلك ..يا غيظى يافأعتى يا مرارتى ... ده أنا كويت للناس يوم فرحى .. خافى على نفسك يا بنتى من أمثالى
رابعا وده الأهم ...يا رب أفرح بيكى عروسه ننوسه ..علشان أشوف هتعملى إيه فى شغل البيت يا قطه .. وأشفى غليلى
شيدى حيلك فى الكتاب .. علشان مستنيه أول نسخه موقعه تبقى ليه ولا تنازل ولا إستسلام
بحبك جدا .. ومتبعاكى جدا .. لما نشوف أخرتها

Ahmed يقول...

هو فيه ايه في البوست ده؟
كل لما افتحه واحاول اقراه اللاب توب بيعمل restart

لا لا واضح ان فيه مشكله عندي (انا مش بقول المشكله عندك لا سمح الله)

انا يادوبك قرات أوله بس لغايه عربية الدكتور الله يكرمه

بس اكيد هرجع تاني لما اشوف الحركه النص كم ديه بتاعة الجهاز

ستيتة يقول...

اولا ربنا يخلي الضاكتور وعربيته ويخلي الكلية علشان تتخرجي ويابختك باسبوع اجازة "اشمعنى انتي عااااااااااااااااااا"

ثانيا وصف الخطوبة كأني معاكم وكويس انك اجلتي اللبس اهو العريس جه بعد ساعة من الميعاد

ثالثا لما كان حد يحاول يقوم ماما عليه علشان انا مدلعة كان رد فعلي زيك بالضبط ولذلك ضحكتيني وفكرتيني
ربنا يخلي مامتي ومامتك .. بس همسة في ودنك "انا تعبت قوي قوي اول الجواز علشان الدلع ده .. ولولا راجل ابن حلال كان بيصبر من عشرة صباحا علشان يتغدى المغرب كنت زماني في محكمة الأسرة .. ناهيكي عن فشلي مكوجيا وتدبيريا للمصروف وكل اللي تقولي عليه.. حاولي بس تنقنقي على خفيف في التعليم المنزلي علشان صحتك ها تروح لو كنتي مدلعة زي دلوقتي"

بابا ياخد الكتكوته؟؟؟؟؟؟؟؟؟؟؟ظ
نو نو ها نعمل مظاهرات واحتجاجات وشجب وتنديد "بس قولي ياشقية انتي عاوز يسحبها منك لييييييييييييييه؟"

مبروك لمها وعقبال ست البنات لما تكبر كده ونعملها فرح تدويني بزفه بقى وايه مقوليكيش

كيكى عوووووو يقول...

اييييييييييييية ياست انتى هو انا كل ما أجى اعلق على بوست معين
الاقى بوستان بعديه!!!1
**************
يلا ماعلينا...مالك كنتى على اخرك كدة لية فى الفرح هااااااا؟؟
مش انتوا وانتو رايحين ركبتوا العربية..تعرفى انا لمة ابقى مضايقة ورايحة مكان اقعد ابص من الشباك واسرح وافك...لية مش حاولتى تفكى شوية
***وشكلك كان مضايق من الكل**
*************************
بابا عايزة الكتكوتة أحسسسسسسن
هيييييييييييييييييييييييييييية
وكل ما كنتى مضايقة تاكلى شيكولاتة
طب قضطة اوى انا كمان اتضيقت
ابعتىىىىىىىىىىىىى بقى
عووووووووووووووووو

بسمة انور يقول...

عقباااااااااالك يا عثل

انا كمان بضايق اوى لما ابقى فى فرح او خطوبه ومحدش مركز معايا كدة
بحس انى مليشلزمة وبقول ايه اللى جابنى
بس برجع واقول اكيد كل واحد مشغول ف حاجه فى اليوم اللى بيبقى سلطة دة ......وبعديها



عقباااااااااااااااااالك يا قمر

بسمة انور يقول...

ونسيت اقولك انا بممممووووووووووووت فى الشيكولاته
محدش معاه حته
حته يا ناس دماغى بتاكولنى

هههههههههه

Kiara يقول...

اممممممممممم مش عارفه انا كمان مودي غريب عامه ربنا يبارك لمها وتكون خير ليها ويتمم لهم بخير

*********

انتي كنتي فهماني غلط وزعلت من كدا :)

بنوتة يقول...

السلام عليكم
واضح انك مضايقة منها وكمان انتى صحيح قولتلنا انك هتقولى انتى كنتى زعلانة ليه
المهم يا ستى كبرى دماغك
وبكرة فستانك يبقى أحلى فستان في مصر وأحلى خطوبة كمان
وبعدين انتى بقالك ده كله زعلانة
روقي بقى
سلام يا قمر
على فكرة انتى عليكى واجب
ادخلى مدونتى وانتى تعرفي

فتــافيت (رحاب الخضري) يقول...

يلا عقبالك يا قمر ونفرح فيكي .. اقصدي بيكي كلنا

سلاااااموز

Lady E يقول...

عاشقه الرومانسيه : وانا بقول المدونة منورة من بعيد ليييييه؟؟؟؟؟؟

اتاري عاشقة الرومانسية هنا ومش تعليق واحد لأ دول 4 :)

انا فعلا كنت بحاول اخرج نفسي من المود بس كنت حاسة اني في دايرة مش عارفه اخلص منها لكن خلاص الحمد لله انا نفسويا دلوقتي تمام

وبعدين علقي براحتك يا قمرايا البلوج بلوجك

نورتيني يا جميلة

Lady E يقول...

احساس طفلة محبة للرومانسية بس واقعية : لا طبعا انا مش زعلانه انهم قالو الاسبوع ده اجازة بس زعلانة من الطريقة اللي قالولنا بيها طردووونا يا احساس طفلة طردونا من الكلية وبعدين كتير بيكونو بيكدبو والدكاترة بتيجي وبتدي محاضرات

وانا الحمد لله خرجت من المود تسلمي يا قمرايا

وبعدين اعتبر كلامك عن ماما أر ولا ايه نياهاهاهاهاها

نورتيني يا قمر

Rannon يقول...

عقبالك يا جميل

وربنا يخليكي لينا وتعزمينلا في كل حفلاتكم كدة :)