الخميس، 12 فبراير 2009

ورجعت من السفر

أنا جييييييييييت تااااااااني لسه راجعين من عند خالتو حاااااااالا (ده لما كنت بكتب البوست)
وأكيد مش شايفه قدااااااامي بس انتو وحشتووووووووووني ووحشتني مدونتيييي فقولت احكيلكم عن الرحلة بتاعت النهارده وأأجل موضوع خطوبة البت مها كمان كام يوم مش عارفه نفسي مسدودة عن كتابة البوست بتاع خطوبتها ده ليه ما علينا

النهاردة صحيت بدري عاااااا (للأسف ) علشان نسافر الحقيقة انا عايزة اسافر وارجع بيتنا من تاني يوم في خطوبة مها ولو كنت اقدر ارجع يوميها كنت رجعت بس كان الوقت اتأخر وكل يوم كنت بتعطل ومش بعرف اسافر يوم ماما تعبانة جدا وحاجزة عند الدكتور والدكتور كان عنده مؤتمر طبي فأجل كل الكشوفات
ويوم تاني ضاع في الشوبينج وعند الدكتور اللي ربنا يكتر من عيانينه برضه حاجزين ومدخلناش غير بعد ساعتين وعلى فكرة قالنا شوية تعليمات عن العمود الفقري والحقن هبقى اكتبها ان شاء الله
ويوم خالتو تعبانه وبتودع ويوم العروسة (مها) عايزة تعمل شوبينج ونتفسح معانا واخيرا امبارح خلاص صحينا بدري وماشيين وهووب الكتكوتة عطلت فروحنا نصلح الكتكوتة واخدت وقت كبير ومعرفناش نسافر واخيرا النهارده ماصدقت اني اسااااااافر وقولت لماما عايزين نخلي السفر فسحة ورحلة ومامتي حبيبتي وافقت
وروحنا المطعم المفضل بتاعنا فطرت (الظهر) هناك وبعدين اخدنا الغدى ديلفري لأننا لما بن
روح بنكون مرهقيين جدا من السفر وبعدين مشينا على الطريق السريع وبعدين حسيت ان ضغطي انخفض كالعاده وماما جابتلي بمبوناية كالعاده برضه وشوية وحسيت ان ضغطي بقى طبيعي الحمد لله بس والوقت كان بيعدي في ثواااااني مكناش حاسين بيه وقولنا هنعدي على جمهورية المنصورة الشقيقة علشان اشتري كتب المدونين
والطريق كان زحمـــــــــــــــــة جداااااااااااا ودخلنا المنصورة فعلا وماما ال tourist guide
بتاعتي ومش راضية اننا نسأل حد فين المشاية لغاية لما مشينا كتير وضللنا الطريق فعلا يعني ولقيت تاكسي
قدامنا واخيرا ماما وافقت اني اسأل على الطريق
وسألنا سواق تاكسي ابن حلال ربنا يكرمه ويبارك فيه ويكفيه شر طريقه قاللي هدلك على المشاية وفعلا مشينا كتير جدا ورى التاكسي ولما كنت ببعد عن التاكسي كان بيستناني وكان بيديلي اشارة انه هيحود علشان استعد اني احود او ادخل تقاطع لغاية لما وصلنا المشاية وقاللي دي المشاية ومشي على طول مستناش حتى كلمة شكر (لسه فيكي رجاله يا مصر) ورحنا المشاية وهناك غالبا الدنيا بتبقى زحمة جدااااااا بس لاقيت مكان اركن فيه الكتكوتة (الحمد لله) وفضلنا ماشيين وقولت لماما هنفضل
ماشيين برضه ومنسألش؟؟ دي جزيرة الورد واحنا في المشاية فين المكتبة ؟؟؟
المهم رحت سألت واحده في محل ايشاربات واكسسورات محل روش يعني وقولتلها مكتبة books and beans فين لو سمحتي
قالتلي : هاه ؟؟ مين؟؟ قولتلها مكتبة اسمها books and beans
قالتلي : لا معرفش حاجة بالاسم ده (الصدق منجه وفراوله كمان)
قلت اسأل حد ممكن يفهم اكتر
رحت اسال على المكتبة في الصيدلية سألت الدكتورالصيدلي اللي كان هناك
وقاللي : مكتبة؟؟ اه ممكن تكون هناك في شارع ثانوي في حودة كده على الشمال
وروحنا الحودة اللي على الشمال ولسه ماشيين ماما قالتلي المكتبة اهي ولولا مامتي مكنتش عرفت ان في مكتبة هنا اشاسا



الصورة دي انا اللي صورتها دي صورة المكتبة من بره واتحرجت اصور جوه المكتبة

بصراحة المكتبة من جوه تحفــــــــــه , راقيه جدا وفيها كل حاجة كتب عربي وانجليش وسي ديز بتاعت موسيقى ورسومات بصراحة مكتبه تجنن وتستاهل المشوار والزحمة اللي مشيت فيها

اول لما دخلت كان في بنوتة قولتلها : اخيرا لقيت المكتبة عايزة كتب المدونين (وانا كلي حماس وتفاؤل)

قالتلي : مين المدونين؟؟ (اتاري كتب المدونين كتير ما شاء الله)

قولتلها : اتنين مخطوبين (ليه معرفش الكتاب ده جه على بالي مع اني معرفش مين الكاتبه بتاعته اصلا)

قالتلي : خلص بس هيجيلي الاسبوع الجاي

فقولتلها : طيب عايزة كتاب مبسوطة يا مصر (الكاتب أشرف توفيق مدونته اسمها اخف دم)

دورت عليه ولقيته فقولتلها وكمان كتاب مذكرات فتاة في الغربة (الكاتبة ريم جهاد مدونتها مذكرات فتاة في الغربة وكان في مدونة تانيه بس حذفتها)

وفضلت تدور وتدور في المكتبة على كتاب مذكرات فتاة في الغربة المهم في هذه الاثناء ماما كانت بتشوف الكتب معايا

وبعدين قالت للبنوتة اللي هناك مفيش هنا مصلى؟؟

البنوتة قالت لماما : لأ بس لو عايزة تصلي هفرش السجاده وتصلي في المكتبة من جوه

وماما قالتلي هروح اصلي يمكن تلاقي الكتاب اللي بتدوري عليه وفعلا اول لما ماما خلصت صلاة الشاب اللي بيشتغل في المكتبة مع البنوتة لقى الكتاب وريم كاتبه في مدونتها ان الكتاب ب5 جنيه لكن المكتبة بتبيعه ب8 (طب ازاي صاحبة الكتاب مش عارفه سعره؟؟)



دي صورة الكتابين ومعاهم الكارت بتاع المكتبة انا طبعا اللي مصورة الصورة دي

بصراحة تخيلت نفسي كاتبة بقى وبعمل توقيع لكتابي في المكتبة الرائعة دي ومعايا كل المدونين والمدونات اللي بحبهم اوي اوي اوي

وخصوصا كيكي وكيارا ودكتر ستيتة وبنت الغربة لو كانت في مصر وايمي واسماء وميرو (انا ودماغي)

(ياااااااااارب الحلم ده يتحقق) واعمل كتاب والناس تحبه وتقرأه ويتعمل منه كذا طبعه كمان (خياليه شوية بس مفيش حاجة بعيد على ربنا)

نفسي احلامي تتحول لحقيقة وعلشان كده صوتوا معايا (يالهووووووووووووووووي) على السؤال اللي في اول المدونة عاليمين

سلاموز

هناك 38 تعليقًا:

غير معرف يقول...

ألف حمد لله على سلامتك

والله فرحت أوى بجد






بصى أنا مش قريت البوست

أنا حدخل أنام لأنى بجد تعبانة و بكرة إن شاء الله لينا قاعدة يا جميلة




أنا بس حبيت أقولك نورتينا تانى و الله كنتى وحشانى بجد

Lady E يقول...

انا ودماغي : هييييييييييه ميرو اول تعليق

الله يسلمك من كل شر يا حبيبتي

بعد الشر عليكي من التعب يا قمرايا

وهستنياكي من دلوقتي لغاية بكرة ان شاء الله

وبجد انتي اللي نورتيني وكنتي واحشاااااني بجد

إيمان يقول...

طفله
بجد معرفش ليه حسيت انى حسيتك اوى رغم ان كلامك كله هزار .. بس بجد انت انسانه جميله ومع مرور الايام هتبقى اجمل
وصدقينى طول مانت ورا حلمك وملازمه الدعاء والعمل ...هتوصلى هتوصلى
انا اول مره ازور مدونتك ومش هتبقى الاخيره ابدا ان شاء الله
على فكره انا صوت معاكى .. يا لهوووووووى

غير معرف يقول...

الف حمد الله عالسلامه يا ليدي

نورتي مدونتك من جديد..:)

وكويس انكغيرتي جو

mohamed ghalia يقول...

حمدا لله على السلامة
وحاضر هنصوووووووووووووووووووت
دمتى بكل الود

بنوتة يقول...

السلام عليكم
حمدلله على السلامة
وان شاء الله تحققي ايللي عايزاه وتعملى 100 كتاب
تحياتى ليكى

ELMASRYA - MRS WRITER يقول...

حمد الله على السلامة

وياريت تعملي كتاب انتي كمان

أنا أول مرة أعرف إن موضوع طباعة كتب للمدونين منتشرة كده

يللا يا ليدي مين عارف يمكن تبقي واحده منهم

أنا اشتركت في التصويت اللي انتي عاملاه واخترت طفله مش عايزة تكبر

وعايزة اعرف حطيتي التصويت ده ازاي

ياريت تبعتيلي الكود مع بعض التوضيح

تــحـيــاتــي

ستيتة يقول...

حلوة الرحلة ياحلولي
فطرتي في برج المنوفيه؟ ولا في عز؟ اعترفي علشان النق يبقى صح

والمكتبة اللي انتي مصورها اصلا صورتها من بره تفتح النفس

تعرفي ان انا وولادي اسعد لحظات حياتنا لما تحطينا في مكتبة ؟ ومش بنتخانق في البيت غير على الادوات المكتبية .. لأني بحب اروش نفسي وهم يفتحوا مقلمتي ويسرقوا حاجتي غصم وائتدار واااااااااااااااااء

رحلة نميسة ومستنية بوست مها الخاص

SHAPE YOUR LIFE (ABOALI) يقول...

ورجعت من السفر
تايه وسط الزحام
عاوزه اشترى كتب
وماما تقول
ربنا يجعله اخر الاحزان
وسئلت على المكتبة
قالوا انى اخر جنان
ولما وصلت عرفت طريقى
وانه حقيقة مش اوهام
وحلمت واتمنيت
اكون شمعة والشموع الوان
نفسى انور واقول
كل اللى فى نفسى و زيادة كمان
اصلى انا طفلة ومش عاوزة تكبر كمان


يااااااااااااااااااااالهوووووووووووووووووووووووووووووووووووى

طفلة مش عايزة تكبر

فتــافيت (رحاب الخضري) يقول...

يا ستي علقت اه والله العظيم علقت

حمدلله على السلامة وعقبالك زي مها كده ان شاء الله

انا بموت في المنصورة بجد حلوة اوي وكتير بنزل اتغدى هناك وارجع.. بس بصراحة معرفش المكتبة ديه.. بس مؤكد هاروح ازورها قريب جدا.. واخد جولة في كتب المدونين
وتصدقي بالله انا اول مرة اعرف ان فيه مدونات بقت كتب .. معلش اصلي في التدوين من قريب اوي.
ويارب يا ستي تشوفي مدونتك كتاب جااااااامد جدا وتزلي منه عشرتاشر نسخة وتبقى مشهووووووووورة

بس لما يحصل ده ابقى افتكري الشيخة فتافيت هي اللي دعتلك

اتمنى نبقى على تواصل
سلام يا قمر

غير معرف يقول...

حبيبتى


سلامة ماما الف سلامة

و مستنين تحكيلنا عن خطوبة مها اللى خنقاكى دى

أنا مش مصدقة أنك كتبتينى فى الناس اللى بتحبيهم أوى

و أنا كمان و الله بمووووووووووووووت فيكى

إن شاء الله تحققى حلمك و المدونة تتعمل كتاب و الله حيبقى جامد

لأن المدونة تحفة بجد...كفاية إن أتكتب عنها فى الجرنال :)

متعرفيش عملت إيه لما شوفتها و أنا بقرأ ده عملت فرح فى البيت D:

Lady E يقول...

إيمان : يا أحلى اسم في الحياه
مش عشان اسمي لأ هو مش اسمي بس اسم انتيمتي

شكرا على كلامك الرائع وبجد انا كمان حسيت انك انسانة جميلة جدا

وهستنى زياراتك للمدونة على طول المدونة مدونتك

نورتيني يا قمر

e_emy يقول...

حمدالله ع سلامتك

بس كده مش تقولى كنت جيت وريتك المشايه وشوفتك كمان (:

نورتى المنصورة

ويارب تحققى كل الى بتتمنيه يارب

Kiara يقول...

هههههههههههههههههههههه

طبعا انا مش بضحك الا علي كلمة صوتوا اصل انا نزلت وقرتها اول واحده
وقلت البت عاوزنا نصوت

ليه البت اتجننت من الاوجازه يالهووووووووووووي

قلت اما اقرا بقي وجيت برد للاخر ولاقيت كلمه صوتوا وادور علي السوال جننتيني اكتر منا مجنونه خلقه

Ahmed يقول...

حمدلله على السلامه
نصوت؟
لو مكنش عيب والجيران مش حاطين ودانهم على الباب كنا صوتنا لما قلنا ياااااااااااابس

EveryHasha يقول...

حمد الله على السلامة
وربنا يحققلك أمنيتك وتعملي الكتاب اللى نفسك فيه

الفقيرة إلى الله أم البنات يقول...

حمد الله على السلامه
انا رحت المنصورة مرتين أو تلاته بس لان اخو زوجى كان عايش هناك بس هو نقل هنا
وبلد جميله ونظيفه تحبيبها بجد

رحلتك كتبتيها بشكل خلانى اتفرج عليها
وده معناه انك عندك قدرة تصورى الحدث وتمتعى اللى بيقرأ فيستمر فى القرأة دون ملل
وعقبال فرحك انت كمان وكل البنات المدونيني وغير المدونين
ربنا يسعدكم
وربنا يخلى لك ماما يارب

Lady E يقول...

hager za3bal : الله يسلمك من كل شر يا قمرايا

والمدونة منورة بيكم

Lady E يقول...

mohamed ghalia : الله يسلمك من كل شر يا محمد

صوتت ولا لسه؟؟

دمت بخير وفي حفظ الله

Lady E يقول...

بنوتة : وعليكم السلام ورحمة الله وبركاته
الله يسلمك من كل شر يا بنوتة
وبعدين 100 كتاب بس قولي 1000 ولا حاجه ههههههه ربنا ييسر

صوتتي ولا لسه؟؟

Lady E يقول...

MRS WRITER : الله يسلمك من كل شر يا قمرايا

ولما اعمل كتاب اعتبر ده وعد انك هتجيبيه وتقرأيه؟؟

وبالنوسبة لكتب المدونين انا كنت عارفة ان في كتب نزلت للمدونين بس مكنتش اعرف انها كتير كده

وموضوع التصويت مش صعب دي خاصية موجوده في كل بلوج يعني من غير كود انا عندي اللغة عربية فهقولك انا عملت ايه بالعربي
اول حاجة روحي تخصيص هتلاقيها على ايدك الشمال في اول البلوج افتحيها
وبعدين هتلاقي في الصفحة موجود كلمة اسمها اضافة اداة اضغطي عليها هتفتح لك قائمة اختاري منها استطلاع الرأي واي خدعة واي استفسار تاني اتصلي على 0099999999999999

نورتيني يا قمر

كيكى عوووووو يقول...

يالهوووووووووووووووووووووى
يالهوووووووووووووووووووووووووى
يالهوووووووووووووووووووووووووى
يالهووووووووووووووووووووووووووووووى
يالهووووووووووووووووووووووووووووى
كان صغير ياختى..اتخطف لسة معادش 99 ونص ياختى اهى اهى
احم احم
***********************
مال موضوع الخطوبة..بتاع مها مش عايزة تحكى عنة ليا تلاقى حد نق عليكى..ياترى ميييييييين؟؟
ماعلينا
روحتى المنصورة حضرتك هااااا؟؟
ماشى براحتك يعنى
وكمان اشتريتى كتب واكلتى كمان**وش بيحسد بالجامد**
والله العظيم سرحت كدة وانتى بتوقعى كتابك واقول اختى ياناس ونونتى كبرت وبقى عندها كتاب وبتخيل انى بتخانق مع ماما بسبب حضرتك لو عملتى الحفلة عندك هقول لماما هروح يعنى هروح..
يااااااااااااااااارب
يااااااااااااااااااااارب
والله هيبقى ان شاء الله قريب وان افكرك يااااااااارب
الصراحة انا محتارة اصوت فى التصويت لانهم احلى بعض..بس انا هستبعد الرعب والرومانسية مش عشان حاجة بس بحبك انا فى الاستيل الساخر على طفلة مش عايزة تكبر على كدة يعنى
**فاهمنى**
ياااااااااة كل دة تعليق**
مفيش طيب حاجة اكلها!!
عووووووووووووووووو

Lady E يقول...

ستيته حسب الله الحمش : نو نو نو ابسلوتلي اتعشينا في الطيبات وفطرنا في ميكس جريل اما بالنوسبة لبرج المنوفية بكلم ماما عليه دلوقتي قالتلي احلى ايامي واحلى ذكرياتي كانت هناك وورتني فيديو كانت مصوراه قريب للبرج راحو من غييري عاا بجد تحفففففففه المرة الجايه ان شاء الله نروحه
وبالنوسبة لعز ففي ذكريات صعبة علينا بنت خالو اتخبطت هناك على الطريق السريع واتوفت بعدها فمش بنروحه خاااالص

وفعلا المكتبة جميلة جدا كمان من جوه ان شاء الله لما ربنا ييسر واعمل كتابي هتكوني اول المدعوين في المكتبة دي يا دكتر

وبجد انا وماما كده في موضوع الادوات المكتبيه

ربنا يحفظك ويحفظ ولادك يا دكتر

دمتي بخير ودايما روشة

انا بفكر احول من اداب لعلوم بجد
ياريت كل دكاترتنا عسولين زيك كده

بحبك اوي

Lady E يقول...

ABOALI : فعلا ماما كانت بتقول ربنا يجعله اخر الاحزان بس مش من الكتب

وشكرا على الزجل الجميل ده والتصويت يا ابوعلي بس خليك فاكر انك صوتت
لما ينزل الكتاب بعد عمر طويل ان شاء الله ابقى اقرأه

مسدس صغير يقول...

حمد الله ع السلامة ..
انتى عارفة احسن حاجه فى البوست سواق التاكسى.. المفروض ياخد منك 3 جنية اشمعنا يعنى لما بقوله ودينى المشاية يقوللى 3 جنيه يا استاااااااااذ..
بجد حاجه جميلة ان انتى تعطلى نفسك وماما عشان تشترى كتب للمدونين من المنصورة.
انا على فكرة من المنصورة. وبقولك نورتى المنصورة انتى وماما طبعا والكتكوتة بتاعتك(العربية يعنى)..هههههههه

Lady E يقول...

فتافيت : اخيرا علقتي لولولولي

الله يسلمك من كل شر يا قمرايا

والمنصورة بجد جميلة انا كمان برتاح فيها جدا بس مشكلتها الزحمة
واي خدعه قولتلك عن كتب المدونين
وان شاء الله لما ربنا يستجيب دعوتك هستناكي تيجي في حفلة التوقيع :)
نورتيني

Lady E يقول...

انا ودماغي : الله يسلمك يا حبيبتي

وبعدين القلوب عند بعضيها انا حاسة انك اختي الصغنونة

وتسلميلي بجد انا فرحانه بكلامك جدا جدا

والمدونة جميلة بيكم ولولاكم مكنش حد عرفها اصلا

دايما منوراني

Lady E يقول...

e_emy : الله يسلمك يا قمرايا

وبعدين لو كنت اعرف انك من المنصورة كنت قولتلك وكنت هبقى سعيدة جدا لو شوفتك وان شاء الله المرة الجايه لما انزل المنصورة نتقابل وكمان لما حلمي يتحقق ان شاء الله هتكوني من اول المدعوين لحفلة التوقيع

نورتيني يا قمرايا والمنصورة جميلة ومنورة باهلها

Lady E يقول...

كيــــــــــــارا : في حد يقرأ البوست من اخره يا نونا؟؟

وبعدين مصوتيش معايا ليه يالهوووووووي

السؤال على ايدك اليمين في اول المدونة

وهستنى تصويتك لأن رأيك يهمني

Lady E يقول...

Eng. Ahmed Abo El-Ella : الله يسلمك من كل شر يا انجينير

وربنا يبعد عنكم الصويت ويملا بيتكم زغاريط

ولااازم تصوت وسيبك من الجيران

Lady E يقول...

gogo : الله يسلمك من كل شر يا قمرايا

تسلميلي يا قمر

نورتيني وربنا يستجيب دعائك

غير معرف يقول...

ليدي ..
يا بنتي المغتربين بينسوا اسمهم، ما بالك اسعار كتبهم ؟؟ :):):):)
بجد ماتتصوريش قد ايه انبسطت لما قريت كلامك ..
حسيت اني معاكي في الرحلة و عشت معاكي كل حاجة ..
و عيني كانت هتدمع و انت بتحكي انهم لقوا الكتاب بعد ما والدتك صلت..
يا رب يكون الكتاب عجبك .. هستنى رأيك ع المدونة في اي وقت ..
و على فكرة انا مش مدونة بطبيعتي.. اجنا لسه صغيرين خالص :)
مبسوطة قوي
و متشكرة جداً يا ليدي ..

غير معرف يقول...

اولا شرفقتي المنصوره

ثانيا المكتبه نورت بيكي و بماما

ثالثا احنا اعتبرنا نفسنا في المكتبه اخدنا وعد بحفله توقيع يعني متنسيش المكتبه اما الكتاب ينزل


و علي فكره كتاب مذكرات فتاة في الغربة
سعره كده من الدار و الله مش مننا
و علي العموم كويس انك نبهتينا نخلي بلنا من موضوع السعر ده

و متزعلش مردوده ان شاء الله


و خلينا نشوفك كل ما تيجي المنصوره

محمد الجوهري
مسئول الدعم الفني في المكتبه

Lady E يقول...

الفقيرة إلى الله أم البنات : فعلا المنصورة بلد جميلة جدا ونظيفة بس مشكلتها الوحيدة الزحمة

شكرا على زيارتك للمدونة يا ام البنات بجد نورتيني

Lady E يقول...

كيكى : ههههههههه يارب يا اوختشي يارب وبعدين انا عارفة عينك باردة مش بتعرفي تحسدي ومتقلقيش لما ربنا يريد ان شاء الله واعمل كتابي وكمان اعمل حفلة التوقيع هبقى اكلم طنط مامتك لأن حفلة التوقيع مش هتنفع من غير اختي حبيبتي وربنا يحقق احلامنا ياااارب
بحبك يا كتكوتي

Lady E يقول...

مسدس صغير :المنصورة منورة بأهلها يا مسدس وبعدين هو بيبقى توفيق من عند ربنا الحمد لله بقابل ناس طيبين مش شوريرين وبعدين انا متعطلش ولا حاجة بالعكس فرحت جدا اني رحت المنصورة والمكتبة بجد جميلة جدا وكتب المدونين كمان رائعة عقبال كتابي ياااارب

Lady E يقول...

ريم : ولا يهمك يا قمر انا مجربة شعور المغتريبين ربنا يهون غربتكم يارب

بجد سعيدة جدا انك نورتي المدونة وسعيدة اني لقيت كتابك الرائع ده وبجد ده كلام قليل اوي عليكي يا كاتبتنا الكبيرة
ربنا يوفقك دايما

Lady E يقول...

أ- محمد الجوهري : بجد انا سعيدة جدا بتعليقك وبكلامك الجميل وتشريفك للمدونة يا استاذ محمد والمنصورة منورة بأهلها

وبجد دي حاجة افتخر بيها اني اعمل حفلة التوقيع ان شاء الله في المكتبة اللي استضافت كتاب رائعين
حفلة التوقيع في المكتبة بالنسبة لي حلم جميل بحاول تحقيقه وان شاء الله يتحقق

متشكرة جدا مرة تانيه وانا اشتركت في جروب المكتبة عالفيس بوك وبالتوفيق دايما يارب وان شاء الله دايما في نجاح وتقدم