الأربعاء، 4 فبراير 2009

حديث الصباح والمساء حياة وموت




بداية انا لسه في فترة الأجازة بس وحشتووووووووني جدا
وحشتووووني الشوية الصغنونين دول
فأخدت أجازة عارضة من الأجازة وجيت تاني وأجلنا السفر كمان يومين
انتو متعرفوش؟؟
مش البت بنت خالتي هتتخبط يووووه قصدي هتتخطب

حد من اصديقائي المدونين اللي متابعين مدونتي هيقولولي هو انتي مش قولتي ان بنت خالتك دي اتخطبت قبل كده
هقولهم مبسووووطه انكم اخدتوا بالكوا من ام لاواحظ دي
(الملحوظة )
مهاميهو لما قولتلكو انها اتخبطت يوووووه قصدي اتخطبت كان زي كده ما بيقولو هنية ل ياسين
وياسين مش هياخد غير هنيه وبعدين قرأوا الفاتحة ونزلوا اشتروا الدبل وخاتم وشوية حاجات علشان الخطوبة
(واوعوا حد يفكر ان الدبل والحاجات التانيه دي محسوبة من الشبكة لا سمح الله)
ومهاميهو
كان نفسها تلبس الدبلة والهدايا بتاعت تيمو لكن عمو باباها قال لها خلصي الترم والخطوبة هتبقى رسمي نظمي شافكي
( اصل البت دي في سنة 3 زي حلاتي بس هي كلية نجارة يووووه قصدي تجارة بس ربنا استجاب دعواتي ليها
واتخبطت قصدي اتخطبت كنت دايما بقولها يا رب تتخطبي قبلي يا مهموها )

وبعدين الحجة مهاميهو خلصت الانطحانات والواد تيمو خد اجازة من الشغل وهيفرسونا أأقصد هيتعسونا يوووه أأقصد هيسعدونا بخطوبتهم وهنقيم الأفراح وليالي الملاح وهسافر علشان احضر خطوبة مهاميهو ربنا يسعدها يا رب مع انها اخدت فكرتي عن الخطوبة وبتنفذها مثلا قولتلها على لون فستان خطوبتي ( فيما سيكون بعد عمر طويل ان شاء الله ) فالحلوة مكدبتش خبر وراحت جابت نفس اللون (لسه مشوفتش الفستان) لو كمان نفس التفصيلة يبقى مش هتتخطب هولع فيها وفي الفستان :) وفي العريس بالمرة
طيبة انا صح ؟؟ بصراحة اتنرفزت شوية لما قالتلي على لون الفستان بس لقيت ا لحياة مش مستاهلة هو انا يعني خطوبتي بكره محدش ضامن عمره وعالعمووووم قولت يعني اسيب المدونة كده من غير بوست قبل ما اسافر وقرقرت احط شعر عامي من تتر النهاية بتاع مسلسل حديث الصباح والمساء

ايوة هو المسلسل الكئيب ده اللي كان بيجي في رمضان وانا كنت بتفرج عليه ومبهورة وبسهر مخصوص في عز البرد اتفرج عليه وكان لااااازم كل حلقة حد يموت وكمان لازم في نفس ذات الحلقة حد يتجوز او حد يتولد
سبحان الله هي الدنيا كده حياة وموت وعلى فكرة بجد انا بحب فلسفة المسلسل ده جدا وناوية اقرأ الرواية ان شاء الله بعد ما اخلص الكتب اللي معايا حاليا
( دون جوان ؛ احدب نوتردام) هما بيقولو ان الرواية دي لكاتب نوبل نجيب محفوظ
اسيبكم مع كلمات تتر النهاية واللي بتغنيه انغام (بس طبعا مش هسمعكوا الاغنية ) (وش بيطلع لسااااانو) انا بجد بحس بإحساس غريب لما بسمع التتر فعلا هي دي الحياه

الصبح طفل برئ ومساه يبان تجاعيد

وفوق طريق الايام تجرى الحياه مشاوير

ونشوف ملامح الزمن متعاده فى المواليد

واحنا البشر كلنا اعمار ورق بيطير


دايره تدور بالبشر وياّ الزمان بتفوت

دمعه على اللى مضى و دمعة فرح للجاى

يا حىّ طول مانت حىّ مسيره ييجى الدور

دى حكايه متكرّره من يوم ولادة الضىّ


ياللىّ انت عايش حياه بص لها تلقاها
سبحة هنا و تنفرط بالعمر مانشوفهاش
ولا شئ يعطّر حياتنا يمد فى مداها
غير سيره عاشت هنا اكتر صاحبها ما عاش



هناك 15 تعليقًا:

moustapha achraf يقول...

حلوة الأغنية ...بس بجد هى الهدايا الى مع الشبكة مش بتحسبوها ولا اية ؟؟؟

ستيتة يقول...

الهدايا اللي مع الشبكة مبتتحسب ياسنايبر في دولة منوفيا العظمى التعسفية
وده يذكرني بأن بعض الباباهات في منوفيا لو العريس جاب شبكة بعشرة هو يجيب للبت بكمان عشرة علشان يقولوا شبكتها تقل الفيل ابو زلومة
ايوه يااوختي وكتاب الله المجيد حصلت قدام عيني مور زان وان تايم "فشخرة منوفيا العظمى"

انتي مش قلتي انا رايحة منوفيا؟ مروحتيش ليه؟ وبعدين يوم خطوبتك ها نتصرف ها نجيب الوان لسه محدش شافها علشان نوري الواد ليدي سينيما مش ها تعرف تبربش

تحياتي ياقمر

ستيتة يقول...

وعلشان انا مش اول تعليق عااااااااا
قررت اكتب لي تعليقين تلاتة
مبروك للبنت بنت خالتك وعقبال يارب ما امشي في فرحك واجيب معاكي الفستان اللي مش ها تتنازلي عنه ابدا مهما يكووووووووووووون مهما يكون

romansy يقول...

مبروك مبروك
عقبال الباقى

وعقبال كليه النجاره كلها

e_emy يقول...

الف مبرووووووووووك
وربنا يتمم بخير يارب

وعقبالك تتخطفى يوووووووه قصدى تتخبطى يوووووووووه قصدى تتخطبى P:

د/ رامي شهاب الدين يقول...

ألف مبروك لمهاميهو وعقبالك .. وعقبالى أنا كمان بالمرة بقى


لما قرأت عنوان البوست إفتكرت فى لحظتها المسلسل إللى كنت بسميه ياعزيزى كلنا أموات

على فكرة المسلسل مأخوذ من رواية للأديب نجيب محفوظ ..وموضوع الأموات الكتير ده كان بيستفزنى جدا جدا لدرجة إنى كنت بتذكر عادل إمام لما كان بيقول فى مسرحية الواد سيد الشغال : ثم مات الممثلون فالمخرج ثم المنتج ، وعندما عرض على المشاهدين مات المشاهدون جميعا

يلا .. ماعلينا ، وحدووووة ، وماباقى إلا وجه الكريم

دمتى بكل الود .. تحياتى

dramaqueen يقول...

مبروك ليها وعقبالك وعقبالى يا قمر
وبالمرة
عقبال كل البنات والولاد

بنوتة يقول...

السلام عليكم
ألف مبروك وعقبالك
وكلمات الاغنية جميلة وأنا كمان كنت بحب المسلسل ده جدا
تحياتى ليكى

ادم المصرى يقول...

الف الف الف مبروك وعقبال فرحك بأذن الله تعالى الاغنيه جميله جدا

Lady E يقول...

Blind Sniper : زي ما قالت ستيتة بالضبط يا سنايبر والد بنت خالتو منوفي وهناك مش بيحسبو الهدايا اللي مع الدبل (الشبكه حاجه تانيه) :)

اما بالنسبالي فلسه مش عارفه الهدايا هتتحسب ولا لأ بس لما اتخطب بعد عمر طويل ان شاء الله هقولك

Lady E يقول...

ستيته حسب الله الحمش : شوفتي يا ستيتة يا حبيبتي اللي البت بنت خالتو عملتو فيا ها نجيب الوان جاديدة منين بقى يلا معلش

وأجلنا السفر لمنوفيا الشكيكة علشان مامتي عندها دور انفلونزا جامد اوي وهنروح يوم الخطوبة ان شاء الله علشان ابقى مع البت المجنونة بنت خالتو من الصبح

وبعدين اكتبي في التعليقات كلها وانا اطول يا قمرايا وعارفه امشي في فرحك دي حسيتها حاجه تانيه نياهاهاها تيمنا بالقول المأثور امشي في ج ومتمشيش في ج
ان شاء الله هتقعدي في فرحي مش هتمشي في فرحي :)
نورتيني يا احلى ستيته
ربنا يحفظك

Lady E يقول...

romansy : الله يبارك فيك

وعلى فكرة شكل بنات كلية النجارة محظوظين نصهم مخطوبين عاااا

عقبالك يا رومانسي لو مكنتش خاطب

Lady E يقول...

e_emy : الله يبارك فيكي يا قمرايا

وبعدين مش انا قولتلك متشربيش كابوتشينو علشان تعرفي تجمعي و تكتبي :)

منه لله الكابتشينو اللي بيعمل كده

عقبااااال خطوبتك يا قمرا

Lady E يقول...

د/ رامي شهاب الدين : ههههه يا دبلة الخطوبة عقبال كل الناس :)

الله يبارك فيك يا دكتر

وعلى فكرة انا كمان كنت مسميه المسلسل يا عزيزي كلنا اموات وكنت بردد المقولة بتاعت عادل امام طول فترة عرض المسلسل وكنت فاكرة انهم هيموتو المشاهدين في اخر حلقه
بس بالرغم من ده كنت متابعة جيدة للمسلسل واكتر حاجة كنت بحبها التتر
ولما اتعاد المسلسل شوفته تاني لأن فلسفته عجبتني الانسان عايش ما بين حياة وموت
وشكرا على تأكيد المعلومة ان الرواية بتاعت الكاتب نجيب محفوظ لأني كنت كاتبه في البوست انها روايته بس مكنتش متأكده

ELMASRYA - MOSLEMA LELLAH يقول...

آنسة ليدي

أولا مبروك خطوبة مهاميهو وعقبالك يا جميلة

ومايهمكيش علشان مهاميهو أخدت فكرة الفستان منك

بإذن الله هتلاقي موديل تاني جميل زي فستان مها ربنا يهنيك يا حبيبتي ويسعدكم كلكم

بالنسبة بقى للمسلسل عندك حق

المسلسل ده كان رهيب رهيب رهيب ورائع

فعلا كلمات التتر متوافقة جدا مع الأحداث وبتمس القلب

أنا بعتبره من أفضل المسلسلات الواقعية اللي قدمتها الشاشة الصغيرة

إختيار موفق يا ليدي

وانا هنقل الكلمات بتاعة التتر أحتفظ بيها لأنها فعلا جميلة وتستحق التأمل

تسافري وترجعي بألف سلامة هتوحشيني

خالص مودتي

و...تــحــيــاتـــي