الاثنين، 24 نوفمبر 2008

تهييس وفضفضة في نفس الوقت



(قلبي يا طير مروح يا مروح في الغروب يا غريب عن الصحاب وغريب عن الدروب
عطشااااااان الميه في ايديا
حيراااااااااان مش لاقي مراسيه)
الكلمات دي من اغنية من البوم في عشق البنات لمنير ومامتي قالتلي انها كانت اغنية لتتر مسلسل بس واحد غير منير اللي كان بيغنيها
ما علينا المهم انا حاسة بالكوبليه ده من الاغنية اوي وخصوصا ان لما الدنيا بتضيق بيا اوي بحب اسافر فقلبي زي الطير المروح ومعظم حياتي قضيتها وبقضيها مسافرة
وانا اخدت بنصيحة دكتر عمرو اللي قالهالي البوست اللي فات ((تتوضى وتصلى ركعتين لله وتجرى لحضن اهلك واصحابك الللى بجد تحياتي)) وفعلا سافرت عند خالتو من اخر بوست ليا وكانت معنوياتي مرتفعه جدا
واخيرا لسه راجعين من السفر امبارح ورجعت للكلية النهارده وطبعا كل زميلاتي زعقولي على اني مجيتش الكلية كل ده حتى في الكورس المستر قاللي انتي موتتي ولا ايه؟؟!
ماما صحتني من النوم وكنت بهييس بتقوللي اصحي يا نونة بقولها هو اللحن بقى كده اصلا اليومين دول واي كلمات بتتركب على لحن جاهز وخلاص ماما
بتقوللي لحن ايه ؟؟ انا في دماغي البوم حد معين بس مش عارفه ليه قولت لماما لحن الموبايل معدش عندهم ذوق في الموسيقى ( علما بإن رنة السنبه في الموبايل رنة من رنات نوكيا)
ماما : موبايل ؟؟ طب قومي قومي علشان متتأخريش
انا في الوقت ده صحيت وبعدها بشوية قعدت اضحك انا وماما عالموقف ده
المهم العربية استندلت كالعاده ومرضيتش تدور النهارده ورجعت لشحورة المواصلات (شحورة يعني شحططة او بهدلة)
وما شاء الله لقيت في اسبوع واحد غياب عن الكلية والكورس اتراكم عليا 3 شيتات ده غير الاسينمنت (الله المستعان)
ونزلت انا وزميلاتي المكتبة علشان نشتري الكتب الباقيه والشيتات ووقفنا في زحمه وطوابير ولا طابور العيش
وبعدين رحنا مدرسة اسراء اخت ايمو زميلتي في الكلية علشان نطمن عليها لانها لسه طفله صغنونة وعندها حساسيه ودايما تعبانه
دخلنا المدرسة شكلها جميل وواسعة لكن دوشة جدا واطفال اولى وتانيه ابتدائي في الدور الرابع (تخيلوا لما اطفال يطلعوا سلم كبير زي ده كذا مره في اليوم)
وبرغم جمال المدرسة الا انها خنقه ومكتومة حسيت ان مفيش فيها اكسجين ويا عيني عالمدرسين اللي شوفتهم بلاش انم بقى عليهم
لكن بجد كان شكلهم اي حاجة تانيه غير مدرسين ازاي ممكن الاطفال يحترموا مدرس مبهدل ومنكوش والشوز بتاعه مقطع والمفروض انه بياخد مرتب
ايوه صحيح مش بيكفي حاجة لكن ده مش مبرر كافي لان المدرس يمشي مبهدل
ده غير الفصل اللي لما شوفته حسيت ان النهاية الطبيعية ان الاطفال دول يجيلهم تخلف عقلي او يدخلوا كلياتنا اللي برضه هتجيب لهم تخلف عقلي
الله يكون في عونك يا اسراء وعون ملايين الاطفال زيك
-------------------------------------------
نيجي بقى لموضوع تطعيم الحصبة كل البنوتات اللي اعرفهم ملهومش سيرة غير التطعيم واللي اخدت التطعيم واللي لسه زي حلاتي مأخدتوش ومش ناويه تاخده بس كل الدنيا بتقوللي بدام انتي قبل العشرين لازم تاخدي التطعيم
بس انا مش هاخده واللي يحصل يحصل
-------------------------------------------
ناس كتير متعلمين مش عارفين يعني ايه فوبيا ف ان شاء الله هكتب بوست عن فوبيا مش معروفة اوي اسمها فوبيا الدم
-------------------------------------------
عاجبني جدا البوم اصالة كله والبوم تامر عاشور والبوم حماقي ماعدا اغنية ناويها بكرهــــــــــــــــــها جداااااااااااا



هناك 9 تعليقات:

mohamed ghalia يقول...

دى انتى خدتى حقك فى الفضفضة على الأخر
سيبينك تقولى كل الى نفسك فيه ههههههههه
حمدا لله على السلامة
خدى بالك من دراستك
تحياتى أختى العزيزة
دمتى بكل الود

Lady E يقول...

mohamed ghalia: اومال ايه مش بلوجي ده ولا بلوج الجيران اوعى تقوللي انهم عملوا ضرايب على الكلام كمان عااااااااا

الله يسلمك من كل شر
وانتا كمان ربنا يعينك على دراستك
دمت بخير دائما

Mona Shereif يقول...

ههههههههههههههههههههههههه
حلو تهييس ده بس هو فين
احتمال وانتى بتكلمى مامتك برضه جايز

ربنا يعينك على الشيتات
انا بعرض مساعدتى
ها
هتخلينى اساعدك؟؟؟


وماله لما تاخدى التطعيم
اخواتى اخدوها
هييييه انا عديت السن ده
والله النهارده افتكرت تطعيم ابتدائى
هههههههههههههههههههههههههه وكنت اقعد اعيط اعيط
يلا الحمد لله

منتظرة موضوع فوبيا الدم

وحشتينى يا ليدى اووووووووووووووى

funckydoctor يقول...

الف سمدالله على الحلامة :D
وذاكرى علشان الإمتحانات
والتطعيم ان شاء الله مش مضر
ومستنشن الفوبيا

أُكتب بالرصاص يقول...

عاجباني روح الطفولة والمرح اللي في البلوج ،
فكروني بايام زماااان

:)
تحياتي

Lady E يقول...

Sometimes: عديها يا منوش بقى ومشيها فضفضة وسيبك م التهييس

بالنوسبة للشيتات انا عيناهم في فايل وكل شوية ببصلهم واقول حسبي الله ونعم الوكيل وارجعهم الفايل تاني :)
متحرمش منك يا قمر شيالاكي للفاينل
ان شاء الله تساعديني فيه


انا يعتبر عديت برضه مليش دعوة لسه شهرين وابقى عشرين ان شاء الله
وبعدين انا كمان بخاف م الحقن ولسه فاكره التطعيمات اللي اخدناها من ابتدائي لثانوي وكنت بهزر مع زميلاتي واقولهم انا حاسة انهم هيدونا تطعيم في الكلية عاااااااااا وقد كان مستقصديننا

وبجد انتي كمان وحشتيني وكنت في المنصورة من كام يوم وكنتي في بالي وكل شوية بدخل البلوج عندك

دمتي في حفظ الرحمان

kh يقول...

السلام عليكم ورحمه الله
أيه يا أختى الصغيره أطعمتى ولا لسه

على فكره أنا ما أطعمتش بس مش علشان التطعيم فاسد ده علشان انا ما بيأثرش فيا التطعيم

أصلى أنا الطعم

طبعا كلام بيقول انى تقريبا عبيط او بستعبط لكن لا هذا ولا ذاك انا فقط اخدت راحتى شويه فى الكلام زيك تمام والسلاام

يمكن مراسلتى على مدونتى العاقله

http://al-roban.blogspot.com/

e_emy يقول...

يااااااااه كل ده جواكى

ازيك (:

يارب تكونى بخير

وحشتينى بجد " مش مجامله "

ربنا يوفقك ف دراستك يارب

Lady E يقول...

funckydoctor: الله يسلمك من كل شر يا دكتر

وانتا كمان ذاكر يا دكتر ربنا يعيننا ويعينك

وبالنسبة للتطعيم فأنا مش عايزة اخده

وان شاء الله هكتب بوست الفوبيا قريبا