الثلاثاء، 11 نوفمبر 2008

مش هنطبل مش هنهييس وأكيد هنسافر


جه في بالي اغنية منير المفضلة عندي (( أشكي لمين واحكي لمين دنيا بتلعب بينا توهنا سنين ولا عارفين بكرة جايب ايه ليــــنـــا )) النهاردة كنت بكتب بوست على مشكلة كل يوم اصعب شعور ان الانسان
يصحى من النوم الصبح غصب عنه لكن استفزني حاجة تانية فقولت هكتب عنها
نزلت من البيت انا وماما الساعة 4 علشان نروح نصلح العربية ونروح للدكتور
وبعدين لقيت كائن اقل ما يقال عنه انه غبي راكن عربيته بالعرض ورى عربيتنا ومكنش في مكان ااقدر اطلع منه وفضلنا ساعة ندور على صاحب العربية علشان يشيل عربيته وبعد ساعة جه يتمخطر ورجع بعربيته ومقالش حتى كلمة أسف كان نفسي جدا حد يضرب الكائن ده بالبوكس في مناخيره
وطبعا الساعة بقت 5 والدنيا زحمة يا دنيا زحمة ندور على مكان نوقف فيه الكتكوتة مفييييش

طب بلاش الميكانيكي خلينا نروح للدكتور الأول طب فين المكان اللي هنركن فيه ؟؟؟

ساعتين بلف في شارع الميكانيكي وعند العيادة بتاعت الدكتور ومش لاقيه مكان للوقوف فيه وخلاص مبقتش قادرة اسوق لأني اصلا تعبانة ده غير ما شاء الله الشوارع المكسرة والعجل والموتوسيكلات اللي فاكرين الطريق بتاعهم وبيمشوا يتمخطروا قدامك وكمان التكاتك والعربيات الكارو وغيرهم اللي بيمشوا عكس اتجاه الطريق والمشاة الحلوين اللي بيمشوا في نص الشارع وبعضهم لما بيعدي الطريق بيشاورلك علشان تقف له اصل جناب الوزير هيعدي الشارع وياريتهم بيبقوا ناس كبار في السن دول بيبقوا في سن الشباب

واللي زاد وغطى عربية كانت هتخبطني فاضطريت اقف صف تاني ثواني على ما اتفادى العربية التانية

وجه الباش أمين شرطة ربنا ياخده وكتبلي مخالفة اني واقفه صف تاني قولتله انا مش واقفه واللي حصل كذا كذا

قاللي خلاص انا كتبت المخالفة وهتدفع يعني هتدفع بس وحياة اللي خلق الكون لهقدم فيه شكوى بكرة ان شاء الله في المرور بعد كل ده وانا على اعصابي وماما كل شوية تقوللي يا بنتي بطلي عصبيتك دي انا خايفة تعملي حادثة و انا بجد تعبت ورفعت الراية البيضا وعلى رأي عمنا جاهين

مرغم عليك يا صُبح مغصوب يا ليل

لادخلتها برِجْليَّا ولا كانلي ميل

شايلنِّي شيل دخلت انا في الحياة

وبكره ح اخرج منها شايلِّني شيل

عجبي !!

1-وفي النهاية احب اقول مش مهم يبقى عندك عربية المهم تلاقي مكان تركنها فيه

2- كلمة قالها كاتب صحفي وانا موافقة جدا على رأييه

احنا مجتمعنا مجتمع الزحام وعايش بأخلاق الزحام خد واخطف والغايب مالوش نايب

3- بدل ما تروح للدكتور او الميكانيكي اطلب الشفا من عند ربنا ليك ولعربيتك انتا هتكفر ولا ايه :)

وقال ايه بيقولو مش هنبطل مش هنسيب مش هنسافر

قصدهم مش هنبطل نحرق في دمنا

مش هنسيب مكاننا في العباسية فاضي

واكيد مش هنسافر لأن بعد كل الضغط العصبي ده هيجيلنا شلل اطفال

يلا كل حد يحكيلي عن يومه وبيصحى ازاي من النوم في الصباح الباكر

وايه المواقف الطريفة او الخنيقة اللي بتتعرضوا ليها
وادينا بندردش ورانا ايه ورانا ايه

هناك 13 تعليقًا:

romansy يقول...

يعجبنى فى اسلوبك الحاجات اللى انتى بتستنجيها فى الاخر
دى بتبقى الخلاصه
ومن الاخر
بس ليه نتعب نفسنا ونلف وندور على الدكاتره
وعلى الميكانيكيه
كل واحد يبقى له دكتور خصوصى وميكانيكى خصوصى

وبعدين انا بحب اغنيه محمد منير قوى قوى

romansy يقول...

انا اول تعليق


كماااااااااااااااان


بس انا زعلان منك

مفيش كل سنه وانا طيب

عيد ميلادى كان امبارح

يلا مش هنعصبك تانى
ومتخفيش هتلاقى مكان تركنى فيه
علشان المعازيم جيين مشى

mohamed ghalia يقول...

ههههههههههههه
اه فعلا ورانا ايه
إنتى يابنتى بقيتى متعهده حوادث
سيبك من العربية دى والله وهترتاحى دى بهدلة المواصلات أحسن هههههههههههههه
ربنا يسعدك دايما وبالتوفيق
موضوع بقى بقضى يوم إزاى من البيت للكلية مفيش غير المواصلات ومفيهاش مشاكل عشان بينى وبين الكلية 10 دقايق واهى سنة وتعدى
سلام

كـــيــــــــارا يقول...

هههههههههههههههههههههههه

انتي تحفه

ال ورانا ايه ال

سيبك من العربيه ده المكانيكي مواله موال

عاااااااااااااااااااااااااا

غير معرف يقول...

ههههههههههههههههههههههه
و الله انتى ملكيش حل
مالها المواصلات زى الفل و ألسطة
يا حبيتى يا مواصلات و الله كنت ظلماها
عشان كدة أنا مش عايزة اجيب عربية

Lady E يقول...

romansy : كل سنة وانتا طيب يا رومانسي

واوعى تكون بتقرأ الاستنتجات وبس

وتصدق فكرة حلوة دكتور وميكانيكي لكل مواطن زي ما في دلوقتي مغني لكل مواطن

وبجد معظم اغاني منير تحفة

شكرا لأول تعليق يا رومانسي ومتزعلش بقى

وبعدين ليه مجاوبتش على اخر سؤال في البوست عليك غرامة ربع جنيه

Lady E يقول...

mohamed ghalia : ايون للأسف انا بقيت متعهدة حوادث فعلا واخر حادثة كنت هعملها النهاردة وماما قالتلي حاسبي حاسبي حااااااااسبي
كان زماني رحت في الباي باي واصلا من كتر الحوادث اخدت مناعة

وبعدين المواصلات كلها بهدلة انا لو عليا مش هخرج من بيتنا اساسا

وعارف بقى انا بحقد عليك :) بينك وبين الكلية 10 دقائق وكمان اخر سنة يا بختييييك وعلى فكرة كلامك شجعني انزل الكلية النهاردة

ربنا يكرمك ويرضى عليك

Lady E يقول...

كـــيــــــــارا : اه والله يا كيارا انا فعلا فكتني من تصليح العربية بس ماما يا عيني اللي اتدبست في تصليحها طول النهار

وبعدين ورانا ايه دي من اغنية ادينا بندردش بتاعت داليدا وبرضه نسيتي تحكي موقف من حياتك يا حجة

Lady E يقول...

انا ودماغي : ايون ايون انا من هذا الموقع بقولك اوعي اوعي اوعي حتى تتعلمي القيادة المواصلات بتكون كميلة وخصوصا مع صبحاتك

بجد وحشتيني جدا وربنا يوفقك في امتحاناتك يا قمرايا

وهسامحك المرة دي علشان محكيتيش موقف حصلك او بتقضي يومك ازاي لاني عارفة ان مش عندك وقت

e_emy يقول...

سلام عليكم ورحمة الله وبركاته

اولا الف الف سلامة عليكى .. ويارب تكونى بخير ...

بس ايه البوست الجميل ده (: كلامك حلو وانتى عصبية ;) .. وحلوة الاستنتاجات الى ف الاخر دى D:

انا بقه ياستى بصحى من النوم بالعافية بس هعمل ايه بقه ): وبعدين بركب المواصلات للكلية
والطريق بيبقه زحمة جدااا وبروح متأخر احيانا ..
دا غير انى بقضى تلت تربع اليوم ف الكلية "حسبيا الله ونعم الوكيل ف الى عامل الجدول " وبروح متأخر على 7 ولا8 بقعد شويه وانام .. تقريبا مبذاكرش غير ف المناسبات هههههههههههه

ربنا يستر .. ادعيلى ):

MaNoO يقول...

انا برشح والله تسيبك من العربية عارفة ليه اصل انتى كده كده هتتفرسى ويطلع عينك بس فى المواصلات بقى هعرفى ناس جديدة وتتعرفى على اخبار جديد كأنك فى الشات لا خالتى ام ابراهيم خرجت من السجن ولا ام مصطفى اتمسكت فى مخدرات بس هنعمل ايه بقى وظلموكى يابلدى على راى اللى قالوا

الجواز و سنينه يقول...

ههههههههههههه
و الله يابنتى انتى عثل و ثكر
(عسل و سكر)
فعلا المهم انك يبقى عندك مكان تركن فيه
و الاحسن الشفا من عند لله لكن ده كتير على الناس كلها

كيكى عوووووو يقول...

وش زعلان
عووووووووووووووووووووووو