السبت، 8 نوفمبر 2008

حريييييقة بس الحمد لله قدر ولطف

ملحوظة : كنت ناوية اني مكتبش في المدونة تاني ابدا لكن الكلام اللي قالوه كل المدونين اللي بحبهم وبثق في كلامهم يدوب الحجر ده غير انه حصل حاجة النهاردة مكنتش اتخييل انها ممكن تحصللي في حياتي برغم اني كنت حاسة انها ممكن تحصل اذا كان مجلس الشورى اتحرق يبقى اي حاجة ممكن تحصل وخفت عليكم جدا فقولت احكيها يمكن حد يستفيد منها

الموبايل : تيرا را تا تيرا را تن تن تن تن (بيرن بمقطوعة موسيقية اسمها دمي ودموعي وابتسامتي)
وكانت اللي بتطلبني كيكي ومكنتش قادرة ارد عالموبايل وبعد اصرار كيكي واتصالاتها الكتير رديت عليها
كيكي : ايه يا بنتي مبتروديش ليه
انا : مش عايزة اخسرك رصيد
كيكي : تخسريني ايه وبتاع ايه انا عايزة اتطمن عليكي
انا : عايزة تطمني عليا علشان الحادثة صح اومال لو عرفتي اللي حصل النهاردة
كيكي : ايوة يا بنتي ايه ده ايه اللي حصل النهاردة؟؟؟ قولي
انا : مفيش كان في حريقة عندنا بس
كيكي : (صوت مفزوع) ايه ايه اللي حصل ده وازاي حصل
حكيت لكيكي الموضوع بالتفصيل وهي مكانتش راضية تقفل الا لما اتطمنت ان مفيش حد حصلله حاجة الحمد لله
وياعيني خلصت رصيدها وقالتلي انتو محسودين جدا مش طبيعي اللي بيحصل معاكو ده ربنا يستر من المكالمة الجاية كل لما اكلمك يا بنتي الاقي حاجة حصلتلك كويس انك مموتيش ده انتي كده عجزتي مش بقيتي نوننة (ربنا يكرمك ويحميكي ويرضى عليكي يا كيكي والله بتعبك معايا
انتي القلب الكابير والاخت والصديقة اللي احسبها على خير ولا ازكي على الله احدا )

بإختصار موضوع الحريق ده كان عبارة عن يوم القيامة بس مصغر ومهما اتكلمت فيه مش هقدر اوصل الصورة كاملة

الموضوع بدأ بإني لقيت ماما بتجري ع الشباك وبتقولي اقفلي اللي ف ايدك ده اصلي كنت فاتحة الموبايل بصوت عالي وبسمع اغنية فيروز اديش كان في ناس واول لما قفلت الموبايل سمعت صوييييت صوييييت والله اصوات مرعبة فتحت الشباك ولقيت نار الله الموقدة تحت في الجنينة الصغنونة لأن فيها كشك خشبي كبيييير حد رمى عليه حاجة مولعة فولعت في الكشك

انا شوفت منظر النار وجه على بالي الجيران اللي الحريق تحت شقتهم على طول عمي ومراته وبنته مريم وبلا شعور جريت من غير حتى ما البس الحجاب ( ياااارب سامحني انا مكونتش في وعيي ) ولقيت النار وصلت شقة عمي وطالعه من الشباك ومرات عمي بتصرخ وبتنده عمي بصريخ
وانا واقفة مذهولة ومش قادرة اتصرف جريت بمريم على بره الشقة وفضلت واقفة ع السلم انا ومرات عمي كإني في دنيا تانيه لو كبيت ميه ع الشباك هتزيد النار اكتر احنا اخدنا كده في الفيزيا

وفجأه لقيت ماما شدتني ع البيت وقالتلي خدي البسي الاسدال (اسدال الصلاة) يا ليدي وكأني انتبهت وقولتلها هه اااه صحيح انا ازاي خرجت كده من غير حجاب وندمت جدا وفضلت استغفر ربنا سبحانه وتعالى وشيلت مريم وهديت مامتها بس هيهات مهديتش وفضلنا نقول يا رب الطف بينا , لا حول ولا قوة الا بالله , إنا لله وإنا اليه راجعون
و في نفس الوقت ماما بتملا مية هي ومرات عمي وبيودوها للناس وبيطفوا الحريق وانا شايلة مريم اللي كانت ماسكة فيا جدا ومرعوبة وبتعيط (مريم عندها سنة وشهرين) وبحاول اخليها متعيطش واطلع بيها من جو الحريق الخانق لان الدخان كان في كل مكان وكان ممكن نموت مخنوقين
وفضلت ادعي ربنا سبحانه وتعالى وهديت مريم وانا اللي عيطت

وشوية والاطفاء والاسعاف والبوليس جه والحمد لله فات ساعة ونص والحريق خلص على خير بس بعد ما خلص على اعصابنا وكلنا لا شعوريا عيطنا وقولنا الحمد لله قدر ولطف الحمد لله ولقينا رجلينا مش شايلانا

في خسائر مادية كتير لكن مفيش خسائر بشرية الحمد لله الا حروق بسيطة في ايد عمي
سبحان الله شوفت شظايا النار بتدخل من شباك بيتنا وبمجرد ما بتدخل النار بتنطفي لواحدها الحمد لله

وبجد لازم اقول حاجات مهمة جد ا :

1- لازم كل بيت ميخلاش من طفاية حريق هي ب120 جنيه تقريبا يعني حتى لو مفيش حد في مقدوره انه يجيبها يحوش لغاية لما يجيبها بجد الطفاية مهمة جدا وبتنقذ ارواح كتير وحاجات كتير لأن النار بتتحرك بسرعة في اقل من ثواني بتكون اكلت كل شيء

2- لازم نقرأ ونتعلم ازاي نواجه مواقف زي الحريق او الزلازل او اي نائبة من نوائب الدهر لان ثقافة ادارة الازمات عندنا مفقودة ومحدش يقول الكلام ده بعيد عني ومش ممكن يحصللي حتى لو حصل واحنا في الدراسة او الشغل او اي مكان نتعلم نعرف نتصرف ازاي وربنا يبعد اي حاجة وحشة عنكم وعننا

3- الاهتمام بالأطفال مهم جدا في وقت الأزمات لأنهم بيبقوا منهارين والازمة دي بتأثر في نفسيتهم طول العمر

4- حسن الظن بربنا سبحانه وتعالى والثقة انه مش ممكن يضيعنا

5- اكتشفت اني مبعرفش اصوت واصرخ

6- متقولوش اني نحس بقى لأن اختبارات ربنا سبحانه وتعالى نازلة ترف عليا
الحمد لله على كل حال ونعوذ بالله من حال اهل النار

ملحوظة : هرد على التعليقات بتاعت البوست اللي فات ان شاء الله


هناك 28 تعليقًا:

blue-wave يقول...

يااااااااااااااة
بجد الحمد لله
الف حمد والف شكر ليك يارب
والف حمدالله على سلامتكم كلكم
الحمد لله قدر ولطف

kochia يقول...

الحمد لله انها جت علي كدة
وحمد الله علي السلامة

جت سليمة الحمد لله

mohamed ghalia يقول...

أختى العزيزة
ألف حمدا لله على السلامة
والحمد لله انها عدت على خير
ربنا يحفظك دايما إنتى وكل اسرتك
دمتى فى حفظ الله وفى سعادة وود

غير معرف يقول...

قدر و لطف

الحمدلله

جت سليمه الحمدلله

ربنا يحفظك و يحفظنا

كـــيــــــــارا يقول...

ياربي

الحمد لله يبنتي انك بخير

ربنا بيختبرك بس

romansy يقول...

الحمد لله حصل خير
دى كلها فعلا اختبارات من ربنا علشان كده خليكى قد الاختبارات دى
يارب يخليكى لكيكى
ويخليكوا لبعض
صعب جدا ان الانسان يلاقى صديق مخلص فى الزمن دا

☼♫♪ عمــاد الدين يــوسف ☼♫♪ يقول...

الحمد لله على سلامة الجميع
ان شاء الله آخر الاحزان

هانى زينهم يقول...

هو كدة فى حاجة مش طبيعية واكيد الحسد موجود فى القران وشكلك كدة يا ليدى جامدة وبتتحسدى كمان !! ده مش حسد والله !!
الحمد لله جت سليمة بس بقه ادبحوا حاجة او فرقوا حاجة لوجه الله وشغلى قران كتير فى البيت .
الحمد لله تانى قدر ولطف .

موناليزا يقول...

الحمدلله ياحبيبتى على سلامتكم
وربنا يبعد عنكم كل حاجة وحشة
وربنا يكرمك يارب انك خدتى بالك من مريم

Mona Shereif يقول...

حمد الله على سلامتكم يا ليدى
الحمد لله رب العالمين
هو فعلا اختبار من ربنا

عارفه حكاية طفاية الحريق دى
كان فيه كورس اسعافات اولية كنت اخدته وقال ان المفروض كل عروسه بتجهز تجيب طفاية حريق فى جهازها

ربنا يعافينا وينجينا يارب
حمد الله على سلامتك يا حبيبتى

عايش علي الهامش يقول...

اسني البس النظاره الشمس واعلق الطبنجه زي الافلام
هل تشكين في احد ما ؟؟
متي كان اخر تعامل لك مع المخابرات الروسيه ؟؟
هل كان الطفله مريم تنظر لكي في رعب مرعوبه منك انت ولا من النار ؟
كل هذا واكثر تقراه علي صفحات قصة رجل المستحيل .....طبعا انا لا اقصد الاهانه حاشي لله انا بس بلطف الجو

قدر الله وماشاء فعل والف سلامه ان كلكم طلعتوا بخير الحمد لله

اه وبعدين ممكن طالما مش بتعرفي تصوتي استعيني بصفاره

شكرا لك

Lady E يقول...

blue_wave : الله يسلمك من كل شر يا دكتر
الحمد لله ربنا رحمته كبيرة
شكرا على المشاعر الجميلة اللي في الكومنت دي يا دكتر
وربنا يحميك ويحمي كل المسلمين

Lady E يقول...

Kochia : الله يسلمك من كل شر
الحمد لله على كل حال وانها جت على كده
ده نفس الكلام اللي حاسين بيه وبنقوله
ربنا يحميكي ويحمي المسلمين كلهم

Lady E يقول...

Mohamed ghalia : اخي الكريم
الله يسلمك من كل شر
الحمد لله قدر ولطف
ياارب ربنا يستجيب دعواتك الجميلة دائما
وربنا يحميك ويحمي المسلمين

Lady E يقول...

MaGn0liA… : الحمد لله يا حبيبتي
اللهم أمين ربنا يحميكي ويحمي المسلمين من كل شر

Lady E يقول...

كيارا : ربنا ميحرمنيش منك يا قمرايا
انتي فعلا اختي الكابيرة
اللي تعبني بجد دموعك لما كلمتيني
لأنها غالية عليا جدا هتخليني معرفش اكتب حاجة تاني في المدونة :)
ربنا يحميكي ويحمي المسلمين

Lady E يقول...

romansy : الحمد لله على كل حال
و يا رب ده يبقى أخر اختبار
والحمد لله اساس صداقتنا انا وكيكي الحب في الله فالحمد لله في بركة في صداقتنا
ويا رب ربنا ميحرمنيش منها
ربنا يحميك ويحمي المسلمين وشكرا ليك يا رومانسي

Lady E يقول...

عماد الدين يوسف : الحمد لله
يا رب فعلا تبقى أخر الأحزان
شكرا ليك وربنا يحميك من كل شر

Lady E يقول...

هاني زينهم : ما هو تعريف جامدة في قاموس الزمخشري؟؟؟؟؟!
وانا اخدت بنصيحتك يا مستر اللي هي نفس نصيحة بابا
جزاك الله خيرا على النصيحة مش على جامده اوكي
ربنا يحميك من كل شر يا مستر
وهفوت موضوع جامدة ده المرة دي
لكن المرة الجاية هقول لملك

Lady E يقول...

موناليزا : الله يسلمك من كل شر يا قمرايا
ربنا يبعد عن كل المسلمين اي حاجة وحشة
وبجد انا حاسة اني كنت مقصرة لأني انشغلت بمريم
عن باقي الأطفال اللي مكنش عندهم حريق
بس أكيد كانوا مرعوبين
ربنا يحميكي من كل شر

Lady E يقول...

Sometimes : الله يسلمك من كل شر يا حبيبتي
وبجد انا سعيدة جدا انك اخدتي كورس اسعافات أولية
ممكن تكوني سبب في انقاذ حد من الخطر
ربنا يحميكي من كل شر

Lady E يقول...

عايش على الهامش : بقى كده الله يسامحك :)
بجد متشكرة جدا وربنا يكرمك على تعليقك الجميل
انا من يوم الحادثة والحريق مضحكتش من قلبي كده
والحمد لله على كل حال
وبالنسبة للصفارة مش هتنفع لأني مش بلعب ماتش كوره
انا ممكن اجيب صواتة بالكهربا
وان شاء الله محتجش الصواتة والصفارة
ربنا يحميك من كل شر وشكرا ليك

كيكى عوووووو يقول...

انتى كنتى مسجلة المكالمة ولا اية؟
ههههههههههههههههههههههه
يا حبيبة قلبى على الى حصلك دة والله مش لقية كلام علشان كل جسمى قشعر دلوقتى
يا حبيبتى ربنا ستر بيكم علشان انتوا كويسين وناس تعرف ربنا الف حمد الله على السلاامة
...............
واسمعى كلامى وادهنوا البيت ازرق
هههههههههههههههههههههه
تسلميلى يا غالية
امواااااااااة
عوووووووووووووووووووووو

هانى زينهم يقول...

انا ما قصدتش جامدة بالمعنى الدارج انا قصدت انه عندك اللى تتحسدى عليه وده هزار واسف لو ضايقك .
وبعدين هو الزمخشرى عمل قاموس من ورايا ؟؟

Lady E يقول...

كيكى : ههههههههه لا اطمني البرنامج اللي بيسجل المكالمات ع الموبايل القديم الموبايل الجديد لسه محطتش البرنامج عليه :))

وبعدين كلامك وصلني من يوميها لما كلمتيني بجد خففتي عني جدا ربنا يكرمك ويخليكي ليا

والحمد لله ربنا سبحانه وتعالى قدر ولطف
الله يسلمك من كل شر يا حبيبتي
وكده مش هندهن بس البيت ازرق ده كده كمان هلبس ازرق كل يوم وهجيب عين زرقا وحدوة حصان وكف ازرق هههههههه
سيبك من كل الكلام ده ربنا هو الحافظ ا لحمد لله
ربنا يحميكي يا قمرايتي

Lady E يقول...

هانى زينهم : ويعني انا اللي بتكلم جد يا مستر هو حضرتك سمعت ان الزمخشري عمل قاموس ولا حاجة؟؟
وبعدين لا داعي للأعتذار يا مستر انا بعتبر حضرتك اخويا الكبير وفاهمه كلام حضرتك لكن ممكن حد يفهم الكلام غلط بس فحبيت حضرتك توضحه

دمت بخير دائما

e_emy يقول...

يــــــــــاه

حمدلله على سلامتك وسلامة اهلك
والحمدلله انكم بخير .. قدرالله وماشاء فعل

وان شاء الله كل حاجه تبقه تمام وترجع زى الاول واحسن باذن الله

واسفه بجد ع التأخير ده )):
سامحينى ):

ربنا معاكى ويكرمك يارب

Lady E يقول...

e_emy: الله يسلمك من كل شر يا حبيبتي
وحشتييييني جدا جدا جدا بجد متغيبيش تاني كده قلقتيني عليكي
ربنا يحمكيكي ويحفظك يا احلى ايمي