الاثنين، 20 أكتوبر 2008

دموع مختنقة

ترى هل هذا قدرها

هل قدرها ان تبقى وحيدة في بحر الحياة الثائر

تحاول العوم في امواج تأبى أن تتركها تعيش

تنظر يمينا ويسارا فلا تجد الا البحر الغاضب

تستلم للغرق في يأسها تارة وتحاول النجاة تارة أخرى

ولكنها بين تلك المحاولة والأخرى تشعر بالوحدة

هل كتب الله عليها ان تظل وحيدة لا يشعر بها احد

فهي تبكي وحدها وتتألم وحدها وتصرخ من اعماق قلبها وحدها

وحتى في لحظات الفرح القليلة تفرح وحدها

يتملك منها شعور غريب ان هناك من يحبها ويفكر في اسعادها

ولكن حتى هذا الأمل بدأ يخبو في قلبها

وبدأ يختنق بصيص النور في جو الحياة المظلمة

فقط تتمنى لو ان كل ذلك كابوس رمادي

ولكنها ابدا لم تستيقظ منه !!

----------------------------

انا متشكرة جدا جدا لاخواتي المدونين الرائعين
البحث عن انا شيء جنوني و مستر هاني زينهم

بجد مش قادرة اوصف شعوري لما قرأت التعليقات بتاعتكم خففت عني جدا
ربنا يكرمكم ويرضى عليكم

واحب اشكر كمان اختي الجميلة كيارا لأنها اتصلت بيا الصبح بدري اول لما قرأت البوست وكان باين على صوتها انها قلقانة جدا عليا
وكمان كلمتني ع الايميل واول مرة احس بمعنى دموع الفرح
الحمد لله ان في انسانة جميلة كده في حياتي

-------------------------
ملحوظة صغنونة : ممكن اكون حاسة فعلا كلام البوست جدا حاليا ولما كنت بكتبه بس انا كاتباه بصيغة اني بتكلم على حد مش موجود
فبجد متقلقوش عليا وانا متشكرة جدا لكل الكلام الجميل اللي أثر فيا بجد وحسيت اني مش لوحدي


هناك 18 تعليقًا:

Unknown يقول...

اااااااااه

ايتها الرقيقة جدا الحزينه بشدة الى اقصى حدود الشمس
كلماتك والله ازرفت الدمع من عينى .. فقد ذكرتينى بوقت مضى من حياتى التى شعرت فيها اننى لن اكون للحظة قادمة .. لن اكون هنا لاثور لحق نفسى

ايتها الرقيقة .. تظلم الحياة معظم الوقت .. تقتل بكل ما تملك من مخالب
لا ترحم .. انا معك .. لكن دائما ما اقول لن تهزمينى ان اقع ودائما ما كنت اقف مبتسما رغم الدموع .. ساولد من جديد ساقطع شهادة ميلادى واكتب اخرى
لن يرهقنى الملل بحثا عنى وعن ما اريد ان اكون
سيجىء يوما من يشاركنى البكاء يومها سيتحول بكائى لفرح

بالله عليك ابتسمى .. فاعلمى ان القدير الجميل .. سياتيك بفرح جميل

( ربنا جميل وكل اللى بيجيبه جميل ) بصى كده فى السما وانتى تعرفى :)

اخوكى من بعيد .. بيكتبلك

هانى زينهم يقول...

ليه كدة ؟؟
هو انا بالذات مش مفروض يسأل السؤال ده لان حالة الحزن دى غالبا بتسيطر عليا كتير انما انا عشان عشت اكتر ومريت بتجارب لازم تخلينى كدة انما انتى ليه ؟؟ يمكن عشان بداية الشتا بتعمل كدة ؟؟
صدقينى الوحدة دى احنا بنفرضها على نفسنا بكتر التفكير فى بكرة والانشغال بالنفس اوى .انما لو شوية قرب من ربنا وشوية اختلاط وارتباط بالاهل اكيد هتساعد فى التقليل من الحالة دى.والحاجة التانية ان اكيد فى حد بيحبك او هيحبك وهيعوضك عن كل الوحدة دى بس يا رب لما يعمل كدة ما توحشكيش وحدتك دى تانى !!
لو حسيتى بده تانى اتوضى وصلى ركعتين وققولى " اللهم اصرف عنى الهم والحزن والضيق والكسل واجعل من امامى نورا ومن خلفى نورا وعن يمينى نورا ومن خلفى نورا " جربى وما تكسليش وانت هتدعيلى .

e_emy يقول...

يااااااااااه عنوان البوست صعب اوووى
اوووووى

الوحدة احنا الى بنعملها
بس جميلة مش وحشه كل حاجه ليها وقت ف حياتنا لازم نجرب كل حاجه ونعشها

متزعليــــــش حاولى النجاة مرة واتنين وعشرة وان شاء الله تتغلبى عليها

واكيد فى ناس بتحبك بس يمكن انتى مش عارفه ... كل حاجه وليها وقتها

ربنا يكرمك يااارب
وتبقى مبسوطه وسعيدة دايما *-:

mohamed ghalia يقول...

جميل قوى الإحساس ده
ربنا يسعدك دايما
وإن شاء الله مفيش حزن تانى
تحياتى
دمتى بود

blue-wave يقول...

ياااااااااااااااة
انتى اصلا ماتعرفيش غلاوتك عندنا
والبوست رائع ومعبر وملئ بالأحاسيس

romansy يقول...

دموعك غاليه علينا
ياريت تطمنينا عليكى
والف سلامه
وياريت كل المشاكل والهموم تبعد عنك
بس خلى عندك امل
اكيد كل شئ هيتحقق

د/ رامي شهاب الدين يقول...

هى جملة خرجت بها من خلاصة تجاربى

تقول : بدون لحظات من الألم والصمود لن نخطو أبدا إلى الأمام


أتمنى لكى الخير والسعادة ، ولامزيد من الأحزان إن شاء الله

دمتى بكل الود .. تحياتى الغالية

☼♫♪ عمــاد الدين يــوسف ☼♫♪ يقول...

اختي الكريمه
مفيش حاجه تستاهل كم الحزن الهائل ده كلو زائل باذن الله
ربنا يفك ضيقتك وتكوني كويسه
تحياتي

Mona Shereif يقول...

بصى يا جميل اسلوبك خراااااااااافه بجد
وعاجبنى اوى ما شاء الله

الحمد لله انك بخير
بس يا حبيبتى اوعلى تسيببى نفسك للكلام ده
والله ربنا عاين لنا حاجات كتير جميله ومحدش يعرف الخير فين
ربنا يرزقك باللى يفرح قلبك ويملى وحدتك

بس تعالى هنا امال احنا فييييييييييين؟
ازاى تحسى بوحده واحنا معاكى

يارب دايما اشوفك بخير

Lady E يقول...

البحث عن أنا شىء جنونى : انا اسفة جدا بجد ان كلماتي المتواضعة اثرت فيك لدرجة انك اذرفت الدمع

ربنا يكرمك بجد كلامك أثر فيا جدا وطلعني من حالة الحزن اللي كنت فيها

انا سعيدة جدا انك مهتم بكتاباتي المتواضعة وانتا بعيد
ربنا يرجعك من بعيد بالسلامة
وبجد انا متشكرة جدا جدا على زياراتك الجميلة للمدونة وكلماتك الرقيقة دائما

Lady E يقول...

هانى زينهم : يا مستر ما انا كمان هكمل 20 سنة قريب ان شاء الله يعني برضه عشت كتير وبعدين الحزن سمة من سمات الحياة ولو معيشناش الحزن مش هنحس بطعم الفرح
والحمد لله على كل شيء
وبجد جزاك الله خيرا على النصيحة انا عملت بيها ودعيتلك فعلا يا مستر

Lady E يقول...

e_emy: معلش يا قمرايا اصل انا وقتها كانت دموعي مخنوقة

انا معاكي ان الوحدة احيانا بتكون جميلة
بس لما تكون وحدة بسبب ان حد بتحبيه تعبان وبعيد عنك بتبقى وحدة قاسية جدا جدا جدا

وكفاية عليا حبكم ليا ووقوفكم جنبي يا احلى ايمي

ربنا يرضى عليكي يا حبيبتي
وانا بكون مبسوطة ومزقططة لما بشوف تعليقاتك الجميلة

Lady E يقول...

mohamed ghalia: ربنا يكرمك يا رب ويستجيب دعائك

بجد سعيدة جدا بتعليقاتك الجميلة دائما

Lady E يقول...

blue-wave: يااااه معلش بقى سامحني يا دكتر ظلمتك بصراحة توقعت تعليق تاني خالص ليك بتقول فيه ايه النكد ده
بس بجد انا سعيدة ان البوست برغم انه حزين بس عجبك

Lady E يقول...

romansy: متشكرة جدا على شعورك الجميل ده يا رومانسي
انا الحمد لله تمام
الله يسلمك من كل شر
شكرا ليك

Lady E يقول...

د/ رامي شهاب الدين : جملة جميلة جدا
يا دكتر
متشكرة جدا على كلماتك الجميلة وبجد هفتكر الجملة دي كل لما تضيق بيا الحياة

Lady E يقول...

☼♫♪ عمــاد الدين يــوسف ☼♫♪ : اكيد كلامك صح بس ساعات لحظات الحزن بتغلبنا ومش بنقدر نقاوم
ربنا يكرمك وبجد متشكرة جدا على دعواتك الجميلة ومرورك الجميل عالمدونة

Lady E يقول...

Sometimes: اخلجتم تواضعنا يا منوش ده بعض ما عندكم يا قمرايا

((بس يا حبيبتى اوعلى تسيببى نفسك للكلام ده)) انا وقفت عند السطر ده وقعدت اضحك
ليه سايبه نفسي كده المفروض اتعالج هههههههههه والله انتي عسولة يا منوش
متخافيش مش سايبه نفسي للحزن بس اهي فضفضة بتخفف عني ونتج عنها كلام الحمد لله عجبك
وعندك حق فعلا ربنا عاين لنا حاجات كتيرة حلوة ومحدش عارف الخير فين

انا فرحانة اوي انك جيتي يا منوش متتأخريش تاني بقى