الأحد، 19 أكتوبر 2008

زوجة واحدة تكفي غصب عنك

بقلب في قنوات التلفزيون بزهق و فأجه لقيت واحدة اسمها داكتورة فوزية

كتير مش بيحبوا يشوفوها فقلت اما اشوف ليه مش بيحبوا يتابعوها

وفعلا تابعت شوية من احدى الحلقات بتاعتها

البرنامج اللي بتقدمه زي برنامج اسامة منير عن المشاكل العاطفية

اسلوبها استفزني جدا بتتكلم عنجليزي في شوية من كلامها قولت ما علينا

ما الناس كلها دلوقتي بقو خريجين مدارس وجامعات لغات اشمعنى هي يعني

المهم زوجة اتصلت بيها علشان جوزها نفسه يجرب يبقى عنده زوجة تانيه

اصل دماغه فاضية وعنده فلوس كتير وبعدين اللي عايز يتجوزها مغربيه

ما هو دلوقتي في فيضان بنات مغربيات والطلب عليهم كزوجات زايد في مصر والامارات تحديدا

وفي معظم البلاد العربية علشانهم ستات بيت شاطرين وكمان علشانهم نغشين وحلوين

الداكتورة فوزية ردت و قالت للزوجة ارفضي واوعي تقبلي وده طبيعي انها تقول كده

لكن اللي مش طبيعي ان في وسط كلامها قالت للزوجة شوفي حقيقة علمية ان الرجل بيحب يعيش في دور هارون الرشيد وفلانتينو و و و الخ وبيحب انه يكون مع اكثر من امرأه لحد هنا وانا اتفقعت مرارتي

والله ؟؟؟؟؟؟!!!!!! بجد الراجل العيون الزايغة اصيلة فيه وكمان حقيقة علمية

يعني الواحدة من بنات حواء تخلص وتحب وتهتم بجوزها حبيبها وترتب وتبني حياتها على حياته وتبقى عايشه علشانه

وفي الاخر يقولها شكرا انا عيني زايغة او هتجوز عليكي ومش فارقة كتير ما هو في الحالتين خيانة

وبعدين لو الموضوع كده ودي سيكولوجية الرجل

محدش فكر ليه ربنا سبحانه وتعالى خلق حواء واحدة بس لسيدنا ادم ومخلقلوش 4

ويبقى كده ايه فايدة الحب بقى بدام اخرته خيانة وعذاب

انا متخيلة الاحساس ده ومجرد ما تخيلته عذبني اومال لو في واحدة في الوضع ده تعمل ايه

يا رجال العالم اتقوا الله في القوارير لأنهم ممكن ينكسروا في اي لحظة

ولو هو ده الحب فبلاش منه احسن

ولو هو ده الحب ف أنا مش عايزاه

هناك 17 تعليقًا:

هانى زينهم يقول...

هههههههههههههههه
الموضوع ده الناس بتتكلم فيه من ايام ادم عليه السلام .ومع ذلك ولا واحد اقتنع سواء رجالة او ستات برأى التانى لان كل واحد له وجهة نظر مختلفة حسب فطرته وطبيعة تكوينه . وعشان النوضوع عايز توضيح فانا ليا عودة . سلام مؤقت

Unknown يقول...

جميلتى الرقيقة ..

الثائرة بكل الصور على تكهنات واخلاق آدم اللعوب :)

حقا ما سردتى من كلمات
كيف يكون الحب وانا اشتهى اخرى
كيف لى ان اكون بين ميادين الحب الفارس وانا اقاتل من اجل ان تكون غنيمتى اخرى
ما هو المسمى الحقيقى للحب اذن اذا درت هنا وهناك منقبا الارض بكل ما تحمله جوارحى لاقتل اخرى ..

الا اتذكر ان تلك الاخرى هى من شاركتنى ذكرياتى يوما .. ابتسامتى .. همى وبكائى
اجاء الوقت الان لادق ابواب اخرى
دعينا نتكلم بعقلية اوسع
لما يبحث الوزج عن زوجة اخرى
ان تحدثثنا سيطول المسير .. وكلنا نعلم الاسباب
ولكن نسال دائما ما السبب الواهن خلف الابواب المغقله .. انها الرغبة الاثمه ام انها الطبيعه الرجولية
كلها اسباب
ولكن فى حد ما علمت وتعلمت .. اذا اراد رجلا تغيير امراة لغيرها من اجل ان تكون سلامه حتى رحلة الذهاب

فانا لا اعترف بزوجة اخرى .. طالما ان قلبى يملك احداهن
فلا اعترف بظلم الاحاسيس .. فانه ليس فى عالمى

جميل ما كتيتى جميلتى .. وشكرا د . فوزية فانتى وبحق زو عقل يحتاج لتقويم ادمى مع شدة احترامى

من بعيد .. بكتبلك

Mona Shereif يقول...

"محدش فكر ليه ربنا سبحانه وتعالى خلق حواء واحدة بس لسيدنا ادم ومخلقلوش 4 "

جميييييييييييله
سبحان الله

عارفه وانا يمكن فى ثانوى قلت عادى لو جوزى يتجوز عليا انا شايفه ان مفيهاش مشكلة خالص.. ده حقه
بس لما كبرت حسيت انها ممكن تجرح اوى
يبقى اهم حاجه الواحده و عقلها.. هى اللى تقدر تحافظ عليه
كتير سمعنا ان الزوح بيحب الصديقه والحبيبه والزوجه و حاجه كمان مش فاكراها.. اهم حاجه انهم اربعة
لو عرفت الزوجه تعمل ده يبقى كويس
اهم حاجه نتقى ربنا وان شاء الله مش هيخذلنا وربنا يستر بقى
هههههههههههههههههههههههههه
كده هتخوفينى يا ليدى
شوفى انا بقول كلام يمكن بصبر نفسى بيه
يارب نقدر نحافظ عليهم

عقبال ما اشوف عريسك وابقى قوليلى هتعملى ايه وهتقوليله ايه اول تتكلموا مثلا فى الموضوع ده؟
سلام يا قمر

Lady E يقول...

هاني زينهم : رديت على تعليق حضرتك 3 مرات يا مستر وفي كل مره يحصل حاجة وميظهرش الرد عاااااا لذلك انا هنتظر عودة حضرتك ومش هكتب الرد لرابع مرة

Lady E يقول...

البحث عن أنا شىء جنونى : أهلا بحضرتك

مين جميلتي الرقيقة دي حضرتك بدأت كلامك بصفة من صفات ادم ولا ايه المعاكسات ممنوع والزعل مرفوع

كويس ان حد من ابناء ادم شهد الشهادة دي ان الرجل لعوب

بالنسبة لباقي كلام حضرتك فبجد الكلام جميل جدا واحلى بكتير من البوست نفسه

وياريت كل ادم ميبقاش اناني و لا يعترف بظلم الاحسايس زي حضرتك ما بتقول
وقتها اكيد هتتغير مفاهيم كتير سلبية عنده

واحب اوجه عناية حضرتك لحاجة بالنسبة لجميلتي دي اتكررت مرتين ولو اتكررت المرة التالتة هيبقى عليها غرامة والتالتة ثابتة وقد اعذر من انذر

وبعيدا عن جميلتي فبجد شكرا على تعليقك الجميل وانك كتبته من بعيد
وان شاء الله متكونش الزيارة الاولى والاخيرة

Lady E يقول...

Sometimes : ههههههه ده كان نفس تفكيري لفترة قريبة جدا يا قمرايا لأ وكمان كنت بلاقي للرجل حجة واقول مش احسن من انه يرتكب ذنب انه يتجوز تاني وبعدين في عنوسة كمان ولما فكرت في الموضوع كتير واخدت اراء ناس كتير موثوق فيهم وبعضهم اتعرضت لتجربة ان جوزها اتجوز عليها واد ايه هي اتعذبت وزوجها اهملها بعد الزواج التاني وجهة نظري اتغيرت تماما لأني كنت طيبة جدا لما فكرت ان الزوجة التانيه ممكن تكون صديقة للزوجة الاولى العكس تماما هو اللي بيحصل

ربنا يعينك على الزواج ويجعلك احلى واحب نساء ا لعالم في عيون زوجك

وبعدين ملقيتيش موضوع تاني تقوليلي فيه عريسك الا ده يا منوش هههههههه يعني اهون عليكي كده
متقلقيش انا لسه مرتاحة من موضوع العرسان ده سنتين تلاتة قدام ان شاء الله

نورتيني يا منوش وسعيدة جدا بتعليقك

هانى زينهم يقول...

بصى يا ستى صلى ع النبى وطولى بالك عليا شوية .
اولا لازم نفرق بين الواقعية والمثالية وبين المفروض واللى حاصل .
ربنا هو اللى خالقنا وعالم باحتياج كل واحد وعارف ان الست من شرفها وعفتها انها تكتفى بزوجها لانها فى النهاية تركيبتها النفسية والجسدية والانسانية تقبل بده .
اما الراااااجل فالوضع بالنسبة له مختلف كتيييييييييييييييييييييير .
اولا الشرع حلل ده وبلاش نغفل النقطة دى وبلاش نقول يعنى انتو اتبعتوا الشرع فى كل حاجة وفاضل دى لانها فى النهاية حاجة حلال ومش من التقدم ولا التمدين اننا نحرم الحلال . وثانيا الراجل لو ربنا مديله ومعاه فلوس كتير وشباب ايه اللى يمنع انه يتجوز ؟؟
بدل ما يصرف نفس الفلوس فى طريق غلط وانتى عارفة الامثلة كويس .
اه طبعا فى عشرة وحب وست ممكن تكون ضحت بعمرها معاه بس الراجل ما بيقدرش ده قوى زى الست ما بتقدره ليه ما اعرفش ؟؟
والرجالة كدة من غير لف ولا دوران الا ما رحم ربى ودول قليلين جدا . وصدقينى اول فكرة بتيجى على دماغ الراجل لما يبقى معاه فلوس كتير انه يتجوز . يمكن لان الراجل بيحس انه محتاج لواحدة متفرغة ليه باستمرار ومراته اكيد من العيال للطبيخ للمسيح وده بيستنزف طاقتها وانا عارف ان ده ظلم ليها انما من امتى الدنيا مليانة عدل !!
كلامى مش دعوة للزوجة التانية ولا الاولى وحياتك !! بس دى وجهة نظر الرجالة اللى انا منهم وشخصيا انا مراتى وبنتى عندى بالدنيا حتى لو كان معايا مال قارون .ولا بلاش مال قارون دى واسعة شوية ولا اقولك ادعيلى يبقى معايا مال قارون وبعدين ساعنها افكررررر !! سلااااام

كيكى عوووووو يقول...

نونتى وحشانى اووووووووووووووووى
بعد السلام والتحية سبينى بقى اشمر دراعى علشان سخنت اوى اوى على موضوعك الجامد دة
...................
المشكلة يا حبيبتى هى فى شخصية البنى ادم نفسةالى اتربى عليها فى بيئتة ونشأتة وبم ان احنا فى مجتمع ذكورى تسود افكار معينة فغالبا ان الفكرة الى طارحها فى البوست متعجبهمش اساسا الى يقولك الشرع مدينا الحق دة وان الست ليها طبيعة مختلفة غير الراجل بيكملوا عليها على انها نوع ثانى ملهاش احساس ومشاعر ملهاش كيان لوحدها
بصى من الاخر الموضوع دة حلوا شئ واحد ان مجتمعنا العسل يغير نظرتة تجاة المراة ويعاملها على انها انسان بجد مش درجة تانية
اخر حاجة*
تفتكرى يا نونتى لو الموضوع بالعكس؟
يعنى الست هى الى من حقها
تفتكرى وجهة نظرهم هتبقى اية!!1
سوال يطرح نفسة؟
وردى على اخر سوال ليكى
الى بيحب بجد بجد بجد
عمرة مايتنزل عن حبيبة ابداااااااا
ويشوفوا غيرة احلى واجمل ومايقلش الجملة المعتادة دى كانت مجرد نزوة
يالهووووووووووووووووووى
شوفتنى ساخنتينى ازاى هااااااااااا
بوست فى الجون تسلمى بجد
واللوك هايل...
والصورة القديمة مكنش وحشة ودى حلوة برضة
اة صحيح انا علقت على البوست الى فات
لانى مقدرش افوت حاجة من بوستاتك
اموااااااااااااااااااااااااااااة
اشربى البن بقى ونامى
وياريت تغيرى الكول تون علشان بيخضينى
وبوسيلى اوى قريبتك الى بتخدك زى
هههههههههههههههههههههههه
عووووووووووووووووووووووووو

كيكى عوووووو يقول...

اة صحيح نسيت اقول
ايووووووووووووووووة
زوجة واحدة تكفى غصب عنك وعن نين عينك كمان
ههههههههههههههههههههههههه
عووووووووووووووووووووووووووو

blue-wave يقول...

لا طبعا دا مش الحب ولا له اى علاقه بيه
الحب علاقه اسمى من كدا
ما جعل الله لرجل من قلبين فى جوفه
صدق الله العظيم

romansy يقول...

الزاوج طبعا ميبقاش من واحده واتنين وتلاته
غير فعلا لما يكون الزوج مش مرتاح فى بيته
بس فى الحقيقه دا ظلم للزوجه
الحب هو اللى باقى

e_emy يقول...

ممممممممممم

سيبك من حكاية الحب وانه لو بيحب زوجته ومرتاح معاها مش هيفكر يتجوز عليها

فى حاجه اسمها عشره وموده
اكيد لو حد كويس لازم يحاول يحافظ عليها

بوست تحفة بجد
تسلمى يا جميل

Lady E يقول...

عليه أفضل الصلاة والسلام
شكرا لعودتك مرة تانية يا مستر
وبجد وانا بقرأ التعليق كنت مبتسمة لأني متخيلة ان ملك بتقرأ التعليق ده
ومبدأيا لو اتقدم حد لبنت حضرتك وكان متجوز انا متأكده ان رد فعلك معاه هيكون عنيف
ومش ممكن تقبل مع ان حضرتك متقبل فكرة التعدد طالما هي بعيد عن بنتك
اولا : انا مستحيل طبعا انكر ان الشرع حلل 4 زوجات بس بشروط ان الزوجة الاولى تكون مريضة
مثلا او تكون مقصرة في حق الرجل في اي ناحية من نواحي حياته (ده على حد علمي)
وكمان التعدد مقيد بشروط اهمها العدل بين الزوجات وده غالبا مش بيحصل
ومش عارفة ليه غالبا محدش بياخد باله من تكملة الأية اللي ربنا سبحانه وتعالى حلل فيها تعدد الزوجات
وفي أيات تانية في سورة النساء بتقول ((وَعَاشِرُوهُنَّ بِالْمَعْرُوفِ فَإِن كَرِهْتُمُوهُنَّ فَعَسَى أَن تَكْرَهُواْ شَيْئًا وَيَجْعَلَ اللّهُ فِيهِ خَيْرًا كَثِيرًا))الأية 19
َ((ولَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ فَلاَ تَمِيلُواْ كُلَّ الْمَيْلِ فَتَذَرُوهَا كَالْمُعَلَّقَةِ وَإِن تُصْلِحُواْ وَتَتَّقُواْ فَإِنَّ اللّهَ كَانَ غَفُورًا رَّحِيمًا )) الأية 129
مفيش اصدق من كلام ربنا سبحانه وتعالى وهو اللي عارف نفسية عباده وبيقول ان الرجال مش هيقدروا يعدلوا
وفي أية أخرى بتقول
((ولن تعدلوا))
**الراجل ما بيقدرش ده قوى زى الست ما بتقدره ليه ما اعرفش ؟**
اقولك ليه يا مستر لأن الراجل متعود على ان الانثى اللي في حياته تضحي علشانه سواء مامته او اخته
فلما بيتجوز بيبقى طبيعي ان زوجته تضحي علشانه مش بيشوف التضحية دي انها من حسن الخلق والمودة والحب
بيشوفها من المسلمات وكمان لأن اللي بياخد دايما غير اللي بيحترق علشان يسعد غيره
والظلم الانسان اللي بيصنعه ويقول من امتى الدنيا كانت مليانة عدل
في بوست انا كنت كاتباه اسمه يا عمي انا جاي اطلب اني امرمط وابهدل بنتك
قلت فيه ان الزوجة مش مطلوب منها لا كنس ولا مسح بل بالعكس الشرع في الأربع مذاهب أمر للزوجة بخادمة وفي مذهب امر لها بخادمتين يعني لما بتعمل شغل البيت بيبقى بدافع الثواب من عند ربنا سبحانه وتعالى وبدافع الحب للزوج وللأطفال وفي الأخر برضه كأنها مش بتعمل حاجة والزوج بيبقى عايز واحدة متفرغة
طب ما لو جبتلها خادمة م الاول مكنش ده هيبقى حالها سبحان الله

وبالنسبة لمال قارون لو دعيتلك بيه يبقى بدعي عليك يا مستر لأن كتر المال وحش جدا وهتتحاسب عليه اصعب حساب يوم القيامة وقارون بالذات اتبهدل بفلوسه
ربنا يريح بالك ويغنيك من فضله ويجعل بنتك وزوجتك قرة عينك
شكرا لرأيك يا مستر

Lady E يقول...

كيكي : حبيبتي حبيبتي
ايه الكلام الجامد ده كل يوم بكتشف في شخصيتك حاجة مكنتش عارفها
وبكتشف اد ايه ان شخصياتنا قريبة جدا من بعض وانك بتقوللي الكلام اللي عايزة اقوله بالظبط
احنا فعلا في مجتمع ذكوري بس الذكور مش معترفين بده وحاسين انه مهضوم حقهم يا عيني
عارفة فكرة التعدد بتحسسني ان البنت زي الوردة كلنا بنحب مظهرها والزوج بياخدها وهي جميلة
وندية واول لما تبدأ بالذبول يبقى عايز يغيرها ويجيب وردة غيرها ومبيبصش لنفسه ان هو كمان
بدأ بالذبول زيها !!
سؤال يطرح نفسه بجد انا مش عارفة اجاوب عليه
لو عندك اجابة قوليلي عليها يا كتكوتة
وبعدين بطلي كسل بقى عايزة اشوفلك بوست جديد وحشتني البوستات بتاعتك يا بنتي
ومن عنتيني هسلملك على مريومة
وبالنسبة للكول تون انسي يا بنتي مش هغيره ده دعاء ايه اللي يخض فيه بس انا مش عارفة
متخليش ركبك تخبط عالجيران وانتي بتسمعيه هههههههههه عووووووووو

وابقي قولي لخطيبك ان شاء الله لما ييجي زوجة واحدة غصب عنك وشوفيه هيعمل ايه
لو مش عايزة تخسريه قوليله الكلام ده اوكي بس بأسلوب تاني لأن عنوان البوست طوبة ممكن تيجي في عينه ولا حاجة وبعدين هتدعي عليا ههههههه

Lady E يقول...

blue-wave : اكيد مش هو ده الحب
بس المفروض ان الجواز ليه نفس قدسية الحب
ولما ينهار في نظرنا الجواز يبقى برضه بينهار في نظرنا الحب
والحب بيقولوا عليه معاهدة الشقاء بدليل فرح وماجد
وغيرهم كتير وبرضه الجواز بالطريقة دي يبقى شقاء
طب ليه الحب والجواز بقى
انا لسه منسيتش الغرامة يا دكتر الكومنت الجاي جيبها معاك

Lady E يقول...

romansy : مش شرط يا رومانسي
يعني حالة زي اللي انا ذكرتها في البوست
الزوج مرتاح في بيته بس حب واحدة تانيه فعايز يتجوزها
وحالات تانيه كتير الزوج بيتجوز فيها من غير ما يكون مش مرتاح في بيته
وعندك حق الحب لو كان حب بصدق هو اللي باقي
ولو الزوج بص لزوجته بنظرة المودة والرحمة
عمره ما هيقدر يخونها
شكرا لمتابعتك الدائمة للمدونة يا رومانسي

Lady E يقول...

e_emy : ايون ايون هو كده فعلا
لأن الحب ممكن يروح او يفتر مش دايما بيكون في نفس قوته
لكن العشرة والمودة هي اللي بتبقى
والله كومنتاتك هي اللي دايما تحفة
تسلميلي يا قمرايا