ثمانية وثمانية وكمان ثمانية :)

مساء الفل على حسب التوقيت المحلي للمدونة السنة دي احداثها كتيرة اوي والوقت فيها بيفوت هوا والوقت في رمضان بيفوت أسرع من أي وقت النهاردة 8/8 بحب الأيام اللي زي النهاردة اليوم والشهر شبه بعض ومش بس كده ده كمان الشهر الهجري النهاردة 8 رمضان :)

لسه لغاية دلوقتي مش مصدقة اننا دخلنا في شهر 8 ولسه كام شهر و2012 تيجي

الجو حاليا ومن اول شهر 7 معتدل وبيمطر على خفيف مطر بيسموه هنا رذاذ والجو ده بيساعد ان أي حد يجيله برد :) ماما بدأت الأول وانا بعدها بساعات واحنا الاتنين حاليا عندنا برد مش عايز يروح اللي انا مستغرباه ازاي ميج رايان في فيلم you've got mail وهي عندها برد كانت زي القمر كده ومتغيرتيش كتير يعني مثلا عينيها مبقتش عاملة زي البلونة ومكنتش شبه الكائنات الخيالية :) الصورة اللي فوق دي اخدتها النهاردة قبل أذان المغرب بدقائق بالكاميرا من البلكونة بتاعتنا :)

والصورة دي اخدتها في يوم تاني قبل كده لكن هو ده شكل الشارع من أول يوم رمضان الشارع على طول بيلمع ومتغطي بطبقة رقيقة من المية المختلطة بالطين والجو ضباب ورذاذ زي الندى في ساعات الصباح الباكر :)

*الصيام بيحسسنا بالناس اللي مش لاقيين قوت يومهم وبيعانوا من الفقر والجوع وبيخلينا شبه الملائكة وعبادة ثوابها كبير لكن لما تصوم وانت مريض فبتحس أكتر بالمرضى اللي مش لاقيين دوا ولا عناية طبية عالأقل احنا عارفين امتى هنفطر وناكل ونشرب وناخد الدوا لكن الفقير والمريض مبيعرفش هيصوم غصب عنه لغاية امتى

*المركز الطبي العالمي اللي دخله مبارك المركز ده في طريقي وانا رايحة مطار القاهرة ووانا راجعه من مطار القاهرة ومكنتش عارفه هو اسمه عالمي ليه؟ لكن والد صحبتي قاللي ان المركز الطبي العالمي ده واحد صاحبه عمل حادثه عالطريق ده ودخل المركز ده وقعد فيه ساعتين ف لقى الفاتورة كام؟ 10 الاف دولار يعني المركز عالمي علشان الحساب فيه بالدولار العناية الطبية فيه بيقولو كويسه لكن للي معاه فلوس وصاحب ابو صحبتي ده طبعا باع اللي وراه واللي قدامه علشان يدفع فاتورة المركز الطبي ومرة تانيه وانا ماشيه على الطريق ده كان في حادثة وسواق الميكروباص كان متبهدل وطبعا الطريق كان مقفول بسبب الحادثة ودخلوا المركز الطبي العالمي ده ومش فاكرة طلعوا بسواق الميكروباص ده تاني ولا لأ بس اللي فاكراه اني اشفقت عليه وكل لما بشوف المركز ده كنت بتوجس خيفة لكن عمري ما تخيلت ان المخلوع يتعالج فيه وشهداء الثورة ميلاقوش أي رعاية.

*متابعة مسلسل رجل من هذا الزمان دكتور علي مصطفى مشرفة وكنت منتظرة جدا اني اشوفه

من زمان وبابا وماما بيكلموني عن مشرفة لأنه عالم دمياطي وليه تمثال ومدرسة بإسمه في دمياط لكن لما شوفت المسلسل اتعرفت عليه اكتر وعجبتني شخصيته جدا عالم وموسيقي بيعزف وبيغني هما دول الدمايطة بالرغم ان المسلسل فيه اخطاء كتير في التسلسل التاريخي وكمان اللغة ساعات بيقلبوا على اميريكن انجليش ومش بس كده كمان فرانكو يبقوا بيتكلموا انجليش وفجأه تلاقي كلمة عربي نطت في النص او كلمتين ودي حركة بتضايقني جدا ده غير كام شخصية ملهومش في الانجليزي اصلا بيخرفوا كتير في النطق زي ام ليز والسكرتيرة بتاعة كلية الأداب في انجلترا كانت في الطراوة برضه ده انا بضحك ضوحك عالناس دي يعني ابسط حاجه مش عارفين تنطقوا روحوا خدو كورس عالسريع قبل المسلسل او حتى المنتج ممكن يجيب اجانب بحق وحقيقي علشان جودة المسلسل لأن المفروض انه مسلسل تاريخي مش بس دراما يعني شوفت لقطة في مسلسل اسمه انا القدس وكانوا الممثلين بريطانيين طبعا فرق شاسع بينهم وبين الممثلين في مسلسل مشرفه اما البطل فأدى دور مشرفه ببراعه لدرجة انه بيقنعني ان هو د. علي مصطفى مشرفه فعلا وكمان نطقه بالانجليش والعربي هايل

اللي لاحظته ان مشرفه طلع ودرس على حسابه علشان ياخد الدكتوراه التانيه دكتوراه العلوم :) ده ايام الملك

اما دلوقتي فأنا لغاية دلوقتي مش عارفة اروح انجلترا زيارة مش دراسه :)

*مصر انضمت ل اللستة اللي بيدعوا ليها في صلاة التراويح

اول يوم في صلاة التراويح اول يوم رمضان اتفاجئت ان الامام بيدعي لحقن دماء المسلمين في ليبيا وتونس ومصر وسوريا والعراق وفلسطين وهي دي العروبة والوحدة العربية :) طبعا انا بكتب الكلام ده عادي لكن يوميها اضايقت جدااااااااا وفضلت مضايقة كام يوم خصوصا لما سلمت على اللي كانت بتصلي جنبي وقالتلي انتي مصرية؟ قولتلها ايوة وفي سري : ايوة من البلد اللي كانوا بيدعولها من شوية اللي يراجع تاريخ مصر هيعرف ان عمرها ما استقرت وارتاحت

* بالرغم اني مش بحب كوكا كولا لكن اعلاناتهم بجد افكارها خطيرة

* ربنا مبيحرمنيش من حاجة في معرض كتاب في مصر وبرضه في معرض كتب ومراجع أجنبية هنا :)

المشكلة دلوقتي هرجع بكل الكتب دي مصر ازاي؟ سؤال يطرح نفسه

بحلم على أدي

*إذاعة سلطنة عمان من القاهرة هكذا أتوقع ان اسمعها كل مرة يقولها المذيع في الراديو ومرتين قال اذاعة سلطنة عمان من القاهرة بجد :)

*" من غربتك في ديار أهلك وغربتك في بلاد الله" امتى الزمان يبدل الغربة؟

• رمضان ذكريات لن يأتي مثلها وأحلام لم تتحقق بعد ولن أمل منها أبدا .

• يا هناه يا هناه اللي يتعلم عندنا في كلية الأداب جامعة المنصورة فرع دمياط 2010

• ان لم تخطط للغد فلن تصعد للسماء التاسعة من السعادة عندما تحقق أحلامك وتذكر أن هناك دائما خطط بديلة لتحقيق الأحلام العظيمة

• الكرامة شيء وهمي لازلت أؤمن به بالرغم من أن كثيرين لم يتعرفوا عليها في حياتهم

• 
  كلما أتقدم في العمر أدرك أهمية طفولتي أكثر

• اسكندرية هي النداهة اللي بتندهك حتى وانت بعيد أما القاهرة فهي الساحرة الشريرة :)

* أوائل الثانوية العامة بكرة تندم يا جميــــــــــــــــــــــــــــل

• يا بكرة لسه شايفه فيك أمل

-----------------------------------------------

ملحوظة : يخربيت القوانين الهبلة والتطفيش

ملحوظة تانيه : جالي كتاب صغير في الأدب الأمريكي هديــــــــــة النهاردة ومعاه اهداء :) أنا سعيدة

ملحوظة تالتة : لغاية النهاردة شهادة الليسانس الأصلية اللي المفروض أعلقها عالحيطة لسه مطلعتش بعد سنة كاملة من التخرج ومش هقول غير حسبي الله ونعم الوكيل قربت أعمل دراسات عليا وشهادة الليسانس لسه مؤقته

اسمك ايه؟ تفااااااااااااهه

تعليمنا أحسن تعليم وصحتنا في أحسن حال وأكلنا من صنع ايدينا وبنمشي في الشوارع بإطمئنان

وبرغم ان التعليم مش مجاني الا ان اللي عايز يتعلم ممكن يلاقي شغل بسهولة ويشتغل علشان يبقى معاه مصاريف الجامعة وبعدين يقدر يدخل الجامعة اللي يحبها في الوقت اللي يحبه ويدرس ويبدع ويعمر الأرض في المجال اللي يحبه

اقتصادنا عال العال وكل شاب يقدر يفتح بيت في الوقت اللي يحبه يشتغل سنة او سنتين بالكتير فيقدر يوفر احسن شقة ويعمل احسن فرح وكمان يقضي شهر العسل في المكان اللي يختاره هو وعروسته

الناس بتحب بعض ومحدش فاضي يتكلم عن حد

كل مصري بيقرأ عالأقل 6 كتب في السنة والمصريين بيتطلبوا بالإسم في كل بلاد العالم علشانهم مبدعين

الديموقراطية عندنا حاجة طبيعية والكاتب مهنته عظيمه ومفيش ولا دار نشر بتستغله بالعكس بيعملوا عروض رائعة علشان يجذبوا بيها الكتاب

عندنا فن راقي في كل مجالات الفنون لما كل الناس بيشوفوه بيعرفوا اد ايه احنا عظماء

كل واحد مهتم بنفسه وازاي يطور نفسه ويحسن حياته ومفيش ولا حد بيأسفن في زمايله في الشغل ولا حد بيتدخل في شئون حد ويجرحه ويحسسه بالعجز ولا حد بيقول أسئلة من نوعية جبتي كام في الثانوية العامة؟

هاااااا هنحضر خطوبتك امتى؟

حددتوا فرحكو امتى؟ مش أن الأوان بقى انكو تجيبوا اول بيبي؟ طيب مش هتجيبي أخ أو أخت لأبنك او بنتك؟

.................. الخ طبعا ده مبيحصلش في مصر خالص

وكمان من اول يوم المخلوع اتحاكم ورموز الفساد ظهرت صورهم في كل مكان وهما في السجن وبيتحاكموا

والضباط والقناصة والبلطجية أخدوا أحكام مشددة وقلوب امهات الشهداء فرحت ان اللي قتل ابنها وضناها اتحاكم وأخد عقابه وإعلامنا أحلى من أي اعلام في الدنيا

ولذلك ولأجل كل ما سبق وأكثر ف احنا فاضيين بقى ومعندناش مشاكل وحياتنا بمبي بمبي بمبيييي

فلما نلاقي صور في النت لميكي وميني لابسين لبس ملوش علاقة بالإسلام أصلا

وأقصد بالإسلام الوسطية واللي فاكر ان ده الزي الرسمي للإسلام غلطان أوي لأن الرسول صلى الله عليه وسلم لبس كل الملابس وكمان الحجاب ملوش شكل ولا لون محدد لكن ليه صفات انه لا يصف ولا يشف

ولما واحد متخلف يقول هو المنقبات دول فاكرين نفسهم حلوين يعني كلام كتير تهزيء في المنقبات

ويقول من بين كل 10 تلاقي واحدة حلوة تستاهل تتنقب فعلا وانت ماااااااااااال اهلك هي شايفه نفسها حلوة

المهم اننا نشوف الكلام ده ونسكت عادي وملاقيش حملات عالمدونات ضد عدم توفيق عكاشة

لكن لما نجيب ساويرس يعيد نشر صورة زي دي منشورة اصلا عالنت يبقى عمل ذنوب الجبال وأخطأ الخطأ الذي لا يغتفر

واعتذر مرتين مرة عالتويتر ومرة عالفيس ولقيته كاتب نفس الكلام اللي انا فكرت فيه انه بيحترم الإسلام

وان اكتر من 95 % من الموظفين في شركاته مسلمين لكن ازاي لن نقبل الاعتذار دي اهانة ده بيسخر من المسلمين ولازمن وحتما ولابد نقاطع منتجاته ومش كده وبس كمان نبعتله أبو رجل مسلوووووخة

ولما يعتذر يبقى يلا يا شبااااب همتكو معانا المقاطعة جابت نتيجة يلا نقاطعه اكتر وده من باب ان لو حد غلط فيك اوعى تصالحه علشانه اعتذر لأنه محتاجلك ولأنك احسن منه ده ايه المنطق ده !!!!!!! منطق صنع في مصر

كل ده مش علشان صورة لأن حملة مش بفلوسنا يا ساويرس من زماااااااان اوي مش من النهاردة بس ومكنتش عارفه سببها لكن عرفت دلوقتي ان في حاجة اسمها حزب المصريين الأحرار وفي سياسة دخلوها في الدين وحاجات كده عملت كوكتيل معفن عمل تربنتينه في مخ الناس

أغلب الشعب للأسف جاهل وفاضي ومريض نفسيا وبيضحك عليه بالدين زي ما البريطانيين قالوا علينا في كتبهم

ان احنا شعوب نقبل نتمرمط لكن منقبلش ان ديننا حد يمسه وفي نفس ذات الوقت بننصر ديننا بإننا نتكلم أو نغني او نهاجم أشخاص لكن نبني ونعمر لأ نعمل حاجة تبين ان ديننا دين العالمين ودين التسامح ودين متصل بكل الأديان لأ نعمل حاجة تفيد الإنسانية لأ كل حاجة ايجابية اختصرناها في شوية هجوم على ناس وعمل المشانق لبعضنا ومن بعيد عمالين يتفرجوا علينا ويقولوا شوفوا العالم التالت بيعمل في بعضه ايه شوفو الناس اللي عالة على الدنيا وبيستوردوا كل حاجة من عندنا من أول المنتجات المختلفة لغاية العلم لغاية الخيابة لكن كويس انهم مبياخدوش حاجة كويسة من عندنا

المسلم من سلم المسلمون من لسانه ويده والدين مش للتربح زي مابيحصل فى قنوات اللى مسمين نفسهم قنوات دينية أبعت مليون رسالة لآ يا ساويرس يا ترى مين هيكسب من وراء الرسائل دي؟!!

ويا ترى حد عارف اصلا فودافون واتصالات ملك مين !!! ولا علشان مبيظهروش في التلفزيون ومحدش عارف هما مين ولا بيعملوا ايه يبقى خلاص طالما مبيتكلموش هما كده كويسين وبيشربوا اللبن قبل ما يناموا ونشتري خطوط تليفوناتهم وعجبي .

فتاة الرامن

عادة لما بشوف أفلام مبحبش أكتب عنها يعني مثلا السنة اللي فاتت شفت حوالي 100 فيلم لكن مفيش الا فيلمين بس هما اللي كتبت عنهم انما لما شوفت الفيلم ده مقدرتش غير اني اكتب عنه رجع لي تاني بهجة الكتابة بعدما كنت نسيتها في زحمة الحياة .
أولا : يعني ايه رامن؟ يعني نودلز أو ممكن نستعين بالقاموس المصري ونقول اندومي لأن في ناس مش بيسموه نودلز و بيسموه اندومي اللي هو شبه المكرونة الإسباجيتي بس على الطريقة اليابانية

الشخصيات الأساسية للفيلم

1- فتاة الرامن : بنوتة امريكية شقراء دخلت الجامعة وخرجت منها زي كتير مننا مش عارفه هتعمل بشهادتها ايه ولا ايه الهدف من اللي هي بتعمله في حياتها ولا هي عايزة ايه وكمان بتسافر بلد تانيه " اليابان "غير بلدها
وفجأه حياتها كلها بتتغير لما بتحدد هي عايزة ايه

2- الشيف اللي بيطبخ الرامن : شخص كبير في السن ، حاد الطباع ، مفيش حد من اللي حواليه بيتحمله وفهمت مؤخرا ان الشخصيات اللي زي دي بتبقى بتعاني داخليا وبتبني حواليها جسر من الصرامة وقلة الذوق والرخامة علشان ميبينوش انهم ضعفاء جدا من جوه وعندهم مشاكل كتير .

3- زوجة الشيف اللي بيطبخ الرامن : عسولة عسولة عسولة عندهم حق يستوردوا زوجات من اليابان مش من الصين :) بالرغم ان عدد المشاهد بتاعتها مش كتير الا اني بعتبرها بطلة أساسية في الفيلم بهدوئها وحنيتها وتفهمها واحتوائها ومرحها كمان كل ده حببني في الشخصية بجد

الشخصيات اللي مش أساسية

الحبيب الندل : أمريكي بالرغم انه ظهر في مشاهد قليلة جدا في أول الفيلم الا انه هو السبب ان فتاة الرامن تسيب أمريكا وتروح تعيش معاه في طوكيو في اليابان على أساس انه يستاهل التضحية الفظيعة دي وان الحب مقطع بعضه بينهم وإذ فأجة بيسيبها وبيمشي لانها بتفرض نفسها عليه وده بيتضح لما بتسيب له رسائل صوتيه كتييييير عالموبايل حوالي 100 مرة وبتترجاه انه يكلمها وهو تيييييييييييييت ونفض لها
أنا بكره التصرف ده جدا من البنااااااات طالما كده كده هيبقى في فراق فبلاش تخسر الحب والكرامة كمان .

الأسرة السعيدة اللي بتيجي تاكل الرامن : سيدتين كبار في السن ومعاهم شاب ومعاهم كمان شابه بس مظهرتش كتير – دمهم خفيف- :)

الحبيب الوفي : ياباني طموح بيكره السجن في وظيفه بيكرهها مفروض عليه الحياة الروتينية ، أنيق ، وسيم
متحضر وبيعرف يتكلم انجليزي :) وفي ودي احسن حاجه فيه واتمرد على وضعه الحالي وعمل اللي بيحبه رجع للموسيقى وكمان رجع لحبيبته

الأحداث من وجهة نظري :-

تبقى الحياة – ملهاش معنى- الى أن نجد هدف وأول لما نلاقي هدف بتتغير حياتنا تماما بيبقى كل تركيزنا على تحقيق الهدف ده وتحقيق الأحلام والأهداف مش حاجة سهلة أبدا أبدا وكمان أبدا
لسه فاكرة دكتورة في كليتنا الموقرة قالت لنا : " اتمرمطوا زي ما احنا اتمرمطنا " :) قالتها بعصبية وبحقد دفين لكن للأسف كلمتها دي بيفهمها اللي اتخرج من الكلية وبدأ يبص للحياة فعلا
رامن جيرل لقت حلمها بعدما حبيبها "الندل" اتخلى عنها وده رمز لأن النهايات الغير جيدة بيبقى بعدها بدايات جيدة لو احنا عايزين نبتدي ولو مستسلمناش
رامن جيرل كمان تخلصت من وظيفتها اللي كانت بتكرهها وراحت لوظيفة تانيه في الاول كانت حاسة بالخجل انها تقول لأصحابها عليها وده كمان رمز للحاجات اللي بتقيدنا في حياتنا وممكن نستمر فيها فترة كبيرة واحنا كارهينها او مش حبينها وبنستمر بس علشان الأمان أيا كان بقى أمان اجتماعي او عاطفي او نفسي او مادي ...... الخ مع اننا لو غيرنا الحاجات اللي مش بنحبها بحاجات بنحبها ممكن نكسب كتير اوي عالأقل هنحس اننا فوق السحاب لما حلمنا يتحقق .
صاحب المطعم فنان بجد بيطبخ بقلبه وروحه وعواطفه وأنا سعيدة لأني بتبع نفس فلسفته في الطبخ بحط كل مشاعري في الطبخة اللي بعملها وحقيقة علمية أن الطاقة بتتغير بحاجات كتير جدا وممكن جدا تتنقل من اللي بيطبخ للأكل اللي بيطبخه وطبعا الطاقة العالية معروف انها بتبقى عاليه مع الكلام الطيب الإيجابي
وبتبقى سيئة جدا مع الكلام المحبط والسيء
انا كمان سعيدة لأني مطلعتش جايه من الفضاء الخارجي وطلع فعلا ان تفكيري صح في موضوع الطبخ بالروح وان الطهي فعل للحب .
كمان صاحب المطعم قاسي وعصبي وده حال أغلب اللي عندهم عملهم الخاص في منهم اللي بيبقى قاسي كده وفاكر انه كل ما يضغط على الانسان اللي بيعلمه فالانسان ده هيتعلم اكتر وفي اللي بيحبوا يستغلوا الانسان اللي معاهم أسوأ استغلال وبالرغم ان الجانب التاني من طيبته مكنش بيظهر للرامن جيرل لكن هي استحملت كل سخافاته لغاية لما وصلت لحلمها وكمان ورثت المطعم منه .

مشاهد كتير عجبتني في الفيلم طبعا فيلم ساعتين محتاجة اكتب عنه اكتر من كده بس علشان اختصر
عجبني مشهد الجروب اللي أكلوا النودلز وبعدها فضلوا يعيطوا لأن مشاعر الرامن جيرل اتنقلت لهم
ولما زوجة صاحب المطعم فضلت تضحك وضحكتني لأن الجروب كان شكلهم يضحك وتعليقاتهم كمان تضحك .

عجبني مشهد ام صاحب المطعم لما قالت للبنوتة الرامن جيرل طبخك مفيهوش روح
ولأن مفيش تواصل باللغة فكانت بتعبر لها بلغة الاشارة اللغة اللي كل البشر يعرفوها وبيفهموها ووقتها ضوء الشمس انعكس على وش البنوتة لأنها فهمت معنى يعني ايه كل أكل تعمله يبقى فيه روح .

عجبني كمان المشاهد اللي بتوضح الثقافة اليابانية وأد ايه هما ليهم تقاليدهم العريقة اللي بيحترموها جدا وبيحافظوا عليها

وكمان عجبني ان الرامن جيرل كانت عايزة تتعلم تطبخ الرامن علشان تسعد الناس وتتعلم حاجة بتحبها

عجبني كمان موضوع التواصل مع ناس مش عارفين لغة بعض لأن دي من اكتر الحاجات اللي بترعب اللي بيدرسوا لغات انهم ميكونوش فاهمين اللي قدامهم وكمان عجبتني اليابان ولو مكنش موضوع الاشعاعات والمفاعل والزلازل والكلام ده كنت حطتها مع البلاد اللي عايزة ازورها :)

الفيلم عجبني جدا وتقييمه 6 من 10 لكن من وجهة نظري تقييمه 8 من 10

كله بينور

# كل ما الإنسان بيعيش أكتر كل ما بيتعذب أكتر وأكتر بتيجي حاجات كده ترفعه لسابع سما أحيانا لكن بيكمل في نفس وتيرة الدوامة

# التجربة القاسية علشان تستفيد منها لازم بعدما تتوجع وتتألم تفوت أيام وأيام وكمان أيام علشان تفهم ليه حصل معاك كده وساعتها ممكن تضحك وتقول الحمد لله اني مريت بالتجربة دي

# دكتورة هالة سرحان مبقتش أوبرا وينفري مصر بقت مذيعة مصرية علشان تعجب المصريين .

# في اتصال مع خالتي قالت لنا : " الدنيا في مصر أمان لكن من كتر ما الإعلام بيقول مفيش امان أنا مش حاسة بأمان "

# مش كل حاجة بنتمناها لما بتتحقق بنفرح بيها ومش كل حاجة بتتحقق زي ما بنحلم بيها

# الشمس والقمر واللمبة والنجفة والشمعة كلهم بينوروا الحياه بس مقدروش ينوروا القلوب بالعكس القلوب زادت ظلام في عصر الكهربا والنور

# اللهم أجعله خير نفسي نقولها لما نزعل مش لما نضحك ونخاف من اللي جاي بعد الضحك

# هيقولوا عنك ضعيف لأنك مؤدب وهيقولوا عنك فاشل لأنك متفوق أكتر منهم وهيحبطوا من عزيمتك علشان متبقاش أحسن منهم وهيقولوا انك غبي لأنهم مش مستوعبين ذكائك وهيقولوا انك عمرك ما هتتقدم وهتفضل محلك سر

المصيبة انك تصدق كل ده !!!

# الحرية أعظم نعمة اذا عرفنا معناها

# تبقى الأشياء العادية عادية في حياتنا الى أن تنتهي فتصبح أشياء مميزة

كل اللي فات ده بقلمي أو بالكيبورد ممنوع الاقتباس او الاقتراب والتصوير :)

افرح ...

حينما تصبح السعادة والفرحة في منتجات - ملهاش لازمة- وتسمن ولا تغني من جوع فبالتأكيد لن تجد الفرحة الحقيقية في الحياة

تذوق طعم السعادة وكل شوكولاته كادبوري

افتح كوكا كولا تفرح

والكثير الكثير من الاعلانات التي رأت ان أغلى مفقود الأن هو السعادة فقدمته للمستهلكين الكرام في صورة مشروب أو شوكولاته وياريتهم مفيدين ولكنهم يسجنوننا تحت طبقات الدهون فلا تعود لنا ملامحنا وبالطبع عزيزي القارئ يمكن أن تصبح مثل الكونغوفو باندا في أقل من أسبوعين ولكنك لن تستطيع أن تعود الغزالة الشاردة ثانية حتى ولو أردت
الخلاصة أننا جميعا نسعى وراء السعادة وهم قدموها لنا في اعلاناتهم المبهرة عن منتجاتهم الغير مبهرة بالمرة ولكن بالرغم من ذلك فإنك تشتريها وتلتمس منها الفرح والخروج عن المألوف

من ضمن الأحداث الكئيبة التي أصابتني بالإحباط هو خبر طلاق الأمير ويليم والأميرة كيت بعد 5 أسابيع من زواجهم الأسطوري الحالم الخيالي - الفوق الفظيع- وبالطبع كالكثيرين صدمني الخبر يعني اذا كان الحلم الملكي الجميل تدمر بهذا الشكل فماذا يمكن أن يحدث بعد ذلك لكل قصص الحب الجميلة التي بالتأكيد ينقصها قصة
مواقع كثيرة أكدت الخبر ومواقع أخرى نفت الخبر على أساس انها نكته وهع هع هع كنا بنهزر معاكو انتوا صدقتوا ! ولا اعلم حتى الأن ان كانت نكته فمن " الرخم" الذي أصدرها


الكثير من المصريون في الخارج ألغوا رحلات الأجازة والعودة لمصر هذا العام نظرا لأن الإعلام المتلون ينقل للمصرين بالخارج أن مصر أصبحت أفظع من العراق وأن واحد راح طلعوا بداله 10 يجلسون في مجلسهم ويصدرون اوامرهم التي تخيف الناس - ما بالنا بالسياحة-
وأنا بالرغم من كل ذلك أفكر جديا في العودة لبلدي ولكن كلام الإعلام أخيرا أثر في و " خوفني " وأذكر صور الشهداء كل يوم وأشعر انه لو قام احد منهم ورأى مصر الأن لبكى على حاله وأثر الرحيل ولكن بشكل ما أيضا يخبرني احساسي بأنه منذ متى والإعلام صادق جرائم مثل التي أراها الأن على شاشات التفزيون وأفظع كانت تتم في العهد البائد وكانوا يصورون مصر على انها شيكاغو وفي كل الحالات ف رب هنا رب هناك وهو الحافظ والحامي
ولكل شمس شروق بعد الغروب تحلى - من أغنية لكل عاشق وطن خالد سليم-

لسه مش مصدقة

الجو هنا حر جدااااااا وبيتساقط علينا عرق الشعوب أما في مصر فالجو عندنا ربيع الوقت ده من السنة مش كل السنة :)
أما الجو المطير اللي بدور عليه فمش موجود حاليا الا في بلاد أنا لسه مزورتهاش وأكيد مش عارفه جوها ايه بس بسمع ان بروطانيا مثلا الجو عندهم غيوم طول السنة وأنا بحب الجو ده مع الشمس الخفيفة
المطر فين بجد كان سؤال يطرح نفسه لدرجة اني بقيت أسمع صوت المطر عاللاب وخلاص من كتر ما المطر وحشني أقربها النهاردة شغلت فيديو فيه صور المطر مع صوته ومن شوية سمعت سيلين ديون وهي بتقول

Let the rain come down and wash away my tears
Let it fill my soul and drown my fears
Let it shatter the walls for a new, new sun
A new day has...come

قولت في نفسي أدي دموعي موجودة يا سيلين فين المطر بقى :) وأنا أصلا من زمااااان مبقيتش أسهر لغاية دلوقتي لكن مش عارفة ليه صحيت لغاية دلوقتي النهاردة ومارست هواياتي لما بكون مضغوطة ومضايقة غالبا مبقتش أحب أتكلم مع حد وانا مضايقة حتى صحباتي الانتيم حتى المدونة قولت مش هكتب فيها غير عن حاجات مفرحة وحاجات جميلة وده بيفسر أنا ليه مبقتش أكتب كتير زي الأول
المهم كلمت ربنا في قارئين هيحطوا ايديهم على قلبهم ويقولوا البونيه اتجننت دي كانت طيبة طيب تعالوا لما أقربها شوية لما بنشتري أي حاجة جديدة وبعد الشر بتبوظ مش بنوديها التوكيل تتصلح علشان هما اللي صنعوها فهما اللي عارفين ايه المشكلة اللي بتعاني منها تمام كده؟ متفقين ؟ موافقة :)
طيب احنا البشر كلنا على بعضينا كده مش ربنا سبحانه وتعالى خلقنا؟ أيوة واللي يقول غير كده صعبان عليا طيب يبقى ربنا سبحانه وتعالى خلقنا ومعاه دوا أرواحنا ومفاتيح تحقيق أحلامنا وهو اللي بيرزقنا وبيوفقنا وبينجحنا وبيسعدنا طيب يبقى ليه متكلمش مع ربنا وأدعي أنا متأكده انه سامعني وفاهمني اكتر من أي حد من البشر هيطبطب عليا شوية وخلاص
الغريب كمان النهاردة ان في الحر ده مفتحتش التكييف وفتحت البلكونة الصغنونة بتاعت الأوضة بتاعتي وفجأه طلعت أخد حاجة من البلكونة واتفاجئت على اندهشت على انذهلت - من الذهول- ووقفت مكاني الدنيا بتمطر !!!!!!!!! بجد بتمطر ولسه بتمطر وأنا بكتب دلوقتي وحسيت بإن فعلا المطر غسل روحي وقلبي وخرجني من المود اللي كنت فيه ووقفت أحس بقطرات المطر وأشم رائحة المطر المخلوطة بالرمل والطين - رائحة مميزة- ومستمتعة جدا بمنظر المطر اللي أكيد هخلص البوست وأطلع أشوفه تاني ودخل المطر على البلكونة وأنا برضه لسه مش مصدقة ان في مطر في الوقت ده من السنة مطر في الصيف
هو أنا قولت اني لقيت البطاقة بتاعتي بكل اوراقها ومصروفي كمان فيها ؟ بجد الحياة دي غريبة أوي حاجات بسيطة بتفرح أوي وحاجات بسيطة بتزعل أوي
حد لسه بيقول ان احلامنا مستحيلة؟ مطر في الصيف وصورته بالكاميرا بس بلوجر الرخم مرضاش يعمل داون لود للصورة لأن حجمها كبير ولسه كمان الصبح ان شاء الله هصور وأشوف المطر عمل ايه هو حاليا ملا الشارع
أنا فرحانة :)

زمان يا حب

اكتشفت أن كل ما يحركني في الحياة هو احساس واحد هو فقط " الحب" فلا أستطيع أن أفعل أي شيء في الحياة بغير حب وشغف واذا حدث وارغمت على شيء فأقوم بأدائه كلوحة باهتة الألوان أو كلحن ناقص النغمات
تصيبني لطشة حب قبل أن أنام كل يوم لطشة حب ممزوجة بالحنين لطيور بعيدة ولوجوه مبتسمة متفائلة ولطعم أعياد وفرح وألوان زاهية وكلمات معسولة صادقة من القلب
لطشة حنين للوطن الضائع في الأفق الذي يفصلني عنه مئات الأميال ولطشة حب تقربني من سمائه وبحاره وعطره الساحر الممزوج بفرحتي ودموعي وحبي وابتساماتي وتميمته التي تحيط قلبي كلما مرت على خيالي ذكراه كأنها تعويذه خرافيه وشفرة سرية لا أستطيع فك رموزها

يا مالكة القلب بإيدك ده عيد الحياه يوم عيدك

"لو لو لو لو كان الأمر أمري لو كان في شيء بيدي كنت أقدر اشتريلك جزيرة ويخت فضي وذهبي "

ماما بستنى اليوم ده من السنة للسنة ومش عارفة أقول بقى كلام شبه انتي النجمة المتألقة في السماء- مع انك كده فعلا- بس هقولك انك بجد حيرتيني بقالي شهور بفكر هجيبلك ايه في عيد ميلادك وكنت خلاص استقريت عالهدية بس الخطة اتغيرت وفكرت في حاجات تانيه دايما بحتار أهديكي بإيه وانتي هداياكي ليا كل يوم جديدة ومتواصلة وكل يوم بحس بيها وبدعي انها تستمر وربنا يباركلي فيكي وفيها بحس ان أي هدية صغيرة أوي وضئيلة أوي ومبتوصلش ولو واحد في المية من احساسي بيكي وحبي ليكي

ماما انتي بجد كل احساس حلو في حياتي كل فرحة وكل ضحكة كل نور نورلي وأنا في عز الضلمة كل الحب وكل الحنية والملاك الحنين اللي بيديني الحياة والحب غير مشروط حتى لو أنا معبرتش عن حبي ليكي وكنت أنانية وسخيفة أحيانا بس أنا عايزة أقولك ان بيني وبين نفسي ضميري بيمسكني وبيديني بالبوكس في مناخيري وبياخد حقك مني من غير ما تعرفي واني عمري ما حبيت ولا هحب زيك لأن مكانك في قلبي محدش يقدر يوصل له

بفرح أوي لما بلاقي كتير بيغيروا من اننا فاهمين بعض أوي وبنحب بعض أوي ومتصحابين أوي ونادرا لما صداقتنا بتتحول لعلاقة أم وبنتها أوامر ونواهي الام اللي بتخاف عليا - زيادة عن اللزوم- من الهوى الطاير وبتقوللي لأ متعمليش كذا والمشكلة ان كلامك دائما بيطلع صح :)

في عيد ميلادك بتمنى حاجات كتير أوي أولها ان ربنا يديكي الصحة ويقويكي ويسعد قلبك وروحك وأيامك

وتاني حاجة بتمنى أني أعرف اجيبلك هدية حلوة وزي ما قولتلك كان نفسي أجيب نجمة في السما وأسميها على اسمك

وتالت حاجة ربنا يخلينا لبعض وربنا يديم علينا نعمة الحب والود والتفاهم

ورابع حاجة بتمنى الاقي البطاقة بتاعتي لأن فيها كل مصروفي وأوراقي وكارنيهات الجامعة ورخصة القيادة وكل حاجة :) لأني لو فقدت الأمل ولقيتها ضاعت بجد هدوشك بأغنية والملاحة والملاحة وحبيبتي لابسة الطوراحة شقىىىىىىىىىى عمررررررررررري :))

وأخيرا بهديكي أغنية : مبحبش حد الا انت ولا نفسي كمان يا حياتي من بعد ما حبك وحده غطى على حبي لذاتي حبك شال الأنانية خلى مكانها الحنية وصبحت بكل كياني مبحبش حد الا انت

كل سنة وانتي طيبة يا مامتي

-----------------------------------

ملحوظتين : التورتة بيضاء لأنك بتحبي اللون الأبيض والفانيليا وفي معنى في قلب الشاعر اللي هو انا لأن الأبيض بيدل على الغيرة :)

ملحوظة كمان : انا بتلكك وبحتفل بعيد ميلادي معاكي لأني معرفتش أستمتع بيه أيام الثورة