الثلاثاء، 21 يونيو، 2011

فتاة الرامن

عادة لما بشوف أفلام مبحبش أكتب عنها يعني مثلا السنة اللي فاتت شفت حوالي 100 فيلم لكن مفيش الا فيلمين بس هما اللي كتبت عنهم انما لما شوفت الفيلم ده مقدرتش غير اني اكتب عنه رجع لي تاني بهجة الكتابة بعدما كنت نسيتها في زحمة الحياة .
أولا : يعني ايه رامن؟ يعني نودلز أو ممكن نستعين بالقاموس المصري ونقول اندومي لأن في ناس مش بيسموه نودلز و بيسموه اندومي اللي هو شبه المكرونة الإسباجيتي بس على الطريقة اليابانية

الشخصيات الأساسية للفيلم

1- فتاة الرامن : بنوتة امريكية شقراء دخلت الجامعة وخرجت منها زي كتير مننا مش عارفه هتعمل بشهادتها ايه ولا ايه الهدف من اللي هي بتعمله في حياتها ولا هي عايزة ايه وكمان بتسافر بلد تانيه " اليابان "غير بلدها
وفجأه حياتها كلها بتتغير لما بتحدد هي عايزة ايه

2- الشيف اللي بيطبخ الرامن : شخص كبير في السن ، حاد الطباع ، مفيش حد من اللي حواليه بيتحمله وفهمت مؤخرا ان الشخصيات اللي زي دي بتبقى بتعاني داخليا وبتبني حواليها جسر من الصرامة وقلة الذوق والرخامة علشان ميبينوش انهم ضعفاء جدا من جوه وعندهم مشاكل كتير .

3- زوجة الشيف اللي بيطبخ الرامن : عسولة عسولة عسولة عندهم حق يستوردوا زوجات من اليابان مش من الصين :) بالرغم ان عدد المشاهد بتاعتها مش كتير الا اني بعتبرها بطلة أساسية في الفيلم بهدوئها وحنيتها وتفهمها واحتوائها ومرحها كمان كل ده حببني في الشخصية بجد

الشخصيات اللي مش أساسية

الحبيب الندل : أمريكي بالرغم انه ظهر في مشاهد قليلة جدا في أول الفيلم الا انه هو السبب ان فتاة الرامن تسيب أمريكا وتروح تعيش معاه في طوكيو في اليابان على أساس انه يستاهل التضحية الفظيعة دي وان الحب مقطع بعضه بينهم وإذ فأجة بيسيبها وبيمشي لانها بتفرض نفسها عليه وده بيتضح لما بتسيب له رسائل صوتيه كتييييير عالموبايل حوالي 100 مرة وبتترجاه انه يكلمها وهو تيييييييييييييت ونفض لها
أنا بكره التصرف ده جدا من البنااااااات طالما كده كده هيبقى في فراق فبلاش تخسر الحب والكرامة كمان .

الأسرة السعيدة اللي بتيجي تاكل الرامن : سيدتين كبار في السن ومعاهم شاب ومعاهم كمان شابه بس مظهرتش كتير – دمهم خفيف- :)

الحبيب الوفي : ياباني طموح بيكره السجن في وظيفه بيكرهها مفروض عليه الحياة الروتينية ، أنيق ، وسيم
متحضر وبيعرف يتكلم انجليزي :) وفي ودي احسن حاجه فيه واتمرد على وضعه الحالي وعمل اللي بيحبه رجع للموسيقى وكمان رجع لحبيبته

الأحداث من وجهة نظري :-


تبقى الحياة – ملهاش معنى- الى أن نجد هدف وأول لما نلاقي هدف بتتغير حياتنا تماما بيبقى كل تركيزنا على تحقيق الهدف ده وتحقيق الأحلام والأهداف مش حاجة سهلة أبدا أبدا وكمان أبدا
لسه فاكرة دكتورة في كليتنا الموقرة قالت لنا : " اتمرمطوا زي ما احنا اتمرمطنا " :) قالتها بعصبية وبحقد دفين لكن للأسف كلمتها دي بيفهمها اللي اتخرج من الكلية وبدأ يبص للحياة فعلا
رامن جيرل لقت حلمها بعدما حبيبها "الندل" اتخلى عنها وده رمز لأن النهايات الغير جيدة بيبقى بعدها بدايات جيدة لو احنا عايزين نبتدي ولو مستسلمناش
رامن جيرل كمان تخلصت من وظيفتها اللي كانت بتكرهها وراحت لوظيفة تانيه في الاول كانت حاسة بالخجل انها تقول لأصحابها عليها وده كمان رمز للحاجات اللي بتقيدنا في حياتنا وممكن نستمر فيها فترة كبيرة واحنا كارهينها او مش حبينها وبنستمر بس علشان الأمان أيا كان بقى أمان اجتماعي او عاطفي او نفسي او مادي ...... الخ مع اننا لو غيرنا الحاجات اللي مش بنحبها بحاجات بنحبها ممكن نكسب كتير اوي عالأقل هنحس اننا فوق السحاب لما حلمنا يتحقق .
صاحب المطعم فنان بجد بيطبخ بقلبه وروحه وعواطفه وأنا سعيدة لأني بتبع نفس فلسفته في الطبخ بحط كل مشاعري في الطبخة اللي بعملها وحقيقة علمية أن الطاقة بتتغير بحاجات كتير جدا وممكن جدا تتنقل من اللي بيطبخ للأكل اللي بيطبخه وطبعا الطاقة العالية معروف انها بتبقى عاليه مع الكلام الطيب الإيجابي
وبتبقى سيئة جدا مع الكلام المحبط والسيء
انا كمان سعيدة لأني مطلعتش جايه من الفضاء الخارجي وطلع فعلا ان تفكيري صح في موضوع الطبخ بالروح وان الطهي فعل للحب .
كمان صاحب المطعم قاسي وعصبي وده حال أغلب اللي عندهم عملهم الخاص في منهم اللي بيبقى قاسي كده وفاكر انه كل ما يضغط على الانسان اللي بيعلمه فالانسان ده هيتعلم اكتر وفي اللي بيحبوا يستغلوا الانسان اللي معاهم أسوأ استغلال وبالرغم ان الجانب التاني من طيبته مكنش بيظهر للرامن جيرل لكن هي استحملت كل سخافاته لغاية لما وصلت لحلمها وكمان ورثت المطعم منه .

مشاهد كتير عجبتني في الفيلم طبعا فيلم ساعتين محتاجة اكتب عنه اكتر من كده بس علشان اختصر
عجبني مشهد الجروب اللي أكلوا النودلز وبعدها فضلوا يعيطوا لأن مشاعر الرامن جيرل اتنقلت لهم
ولما زوجة صاحب المطعم فضلت تضحك وضحكتني لأن الجروب كان شكلهم يضحك وتعليقاتهم كمان تضحك .

عجبني مشهد ام صاحب المطعم لما قالت للبنوتة الرامن جيرل طبخك مفيهوش روح
ولأن مفيش تواصل باللغة فكانت بتعبر لها بلغة الاشارة اللغة اللي كل البشر يعرفوها وبيفهموها ووقتها ضوء الشمس انعكس على وش البنوتة لأنها فهمت معنى يعني ايه كل أكل تعمله يبقى فيه روح .

عجبني كمان المشاهد اللي بتوضح الثقافة اليابانية وأد ايه هما ليهم تقاليدهم العريقة اللي بيحترموها جدا وبيحافظوا عليها



وكمان عجبني ان الرامن جيرل كانت عايزة تتعلم تطبخ الرامن علشان تسعد الناس وتتعلم حاجة بتحبها




عجبني كمان موضوع التواصل مع ناس مش عارفين لغة بعض لأن دي من اكتر الحاجات اللي بترعب اللي بيدرسوا لغات انهم ميكونوش فاهمين اللي قدامهم وكمان عجبتني اليابان ولو مكنش موضوع الاشعاعات والمفاعل والزلازل والكلام ده كنت حطتها مع البلاد اللي عايزة ازورها :)

الفيلم عجبني جدا وتقييمه 6 من 10 لكن من وجهة نظري تقييمه 8 من 10

هناك 16 تعليقًا:

احساس طفلة محبة للرومانسية بس واقعية يقول...

مش بشبع منه الفيلم دا معمول صح اوى
ثقافه الشعب اللغه وعدم الاستيعاب دور الزوجة حتى ابن طباخ الرامن وتمرده واختلاف اراء الاجيال واحترامهم للتقاليد بعضها قبلوه وبعضها رفضوه بحب اصرارها وعدم فهمها بحب الحوار بينهم بحب احترام طباخ الرامن لكلمته وكل حاجة فى الفيلم دا من افلامى المفضلة ومبشبعش منه

اختيارك ممتاز
دمتى بكل خير

Ramy يقول...

طيب (:

1- حمد الله ع السلامةو نورتى بلوجر

2- جوعتينى بالرغم أنى مش مدمن نودلز (:

3- الدكتورة دى معندهاش دم
دة رأيى

لأنى بشفهم مُعقدين نفسياً

الحمد لله مطلعتش دكتور (:(:

دة على اساس انى مش مُعقد (:

بوست ممتع

شكراً

(:

E73 يقول...

السلام عليكم

أهلا ايناس

أحب أقولك ان طريقة سردك للأحداث خلتني عاوزة أشوف الفيلم

وبجد فعلا حتة المشاعر أثناء الطبخ دي انا مؤمنة بيها فعلا سبحان الله بجد بتفرق معرفش ازاي

حاجة كمان فرحتني لما عرفت ان اسمك ايناس اصل انا كمان اسمي كدا :)

الرامن اللي بياكلها ناروتو :)

هي فعلا اليابان بلد ملفتة للنظر وكتير بتابع مسلسلات ياباني بنزلها على الجهاز بحس ان الفن بتاعهم هادف بحب نظامهم وتمسكهم بهدف معين والسعي بأقصر الطرق لتحقيقه والتغاضي عن أي معوقات قد تكون ليست ذات معنى

شمس النهار يقول...

ماشاء الله كأني شفت الفيلم

انا كمان من انصار ان اي حاجه تتعمل بيد الانسان لازم يكون فيها روحه

والطبخ بالذات وهو ده النفس
الحب مفتاح الحياة

mrmr يقول...

حمد الله بالسلامه نورتى البلوجر

بوست جميل

تحياتى

حنين الذكريات يقول...

بيقولوا فى الأمثال ان الطبيخ نفس وهو فى الحقيقة نفسية
كل شئ بيتعمل بحب بيكون جميل
ولو الدكتوره بتاعتك كانت بتحب التدريس وماتقوم بعمله مش مجرد واحده كانت بتصم مافى الكتب دون فهم كانت بقت أحسن من كده وحبتوها قبل ماتحبو ماتعطى من علم
كأنى رأيت الفيلم من تحليلك للمواقف
أسلوبك ممتع

Sheroo يقول...

أعتقد إنى هشوف الفيلم بعد التحليل المشوّق ده

FAW يقول...

بحب الممثلة دي قوي

ومن وصفك باين عليه فيلم جميل

تعبناكي معانا :)

Lady E يقول...

احساس طفلة محبة للرومانسية بس واقعية : مين يشهد لليابان غيرك :)

كنتي في بالي جدا وانا بكتب البوست وكنت منتظره تعليقك بفارغ الصبر وفرحت بيه جدا :)

نورتيني يا ام سومة

Lady E يقول...

Ramy : الله يسلمك بلوجر منور بأهله

اومال لو كنت شوفت الرامن اللي في الفيلم شكله لذيذ جدا واكيد بيجوع
وعلشان كده مجبتش صورة للرامن في البوست :)

ههههههههههههه ايه ده تشخصيك لحالة الفسفس الهستيري اللي عندها صحيحة ودي مجرد كلمة بسيطة من الهبل اللي كانت بتقوله

ان شاء الله انا هبقى دكتورة بس يارب أخد الدكتوراه ومتعقدش نفسيا على الطلاب :)

يا عزيزي كلنا مكلكعون ومعقدون عقد وبشنيطة :)

شكرا

Lady E يقول...

E73 : وعليكم السلام ورحمة الله وبركاته

يا مرحبا يا مرحبا يا ايناس :) يا اسم غالي :)

ايوة اسم ايناس ده أجمل اسم أصلا :))

فعلا اليابان اكتشاف متأخر
السنين اللي فاتت كنت بدرس عن اوروبا وأمريكا لكن واضح ان الأيام الجايه ههتم اني اعرف اكتر عن اليابان وتقاليدهم ولغاتهم

تسلمي على التعليق الجميل ده

Lady E يقول...

شمس النهار : لااااااا يا شموسة الوصف ميكفيش الفيلم أحلى بكتير من الوصف

الله عليكي هو ده الكلام

Lady E يقول...

mrmr : بلوجر منور بأهله يا مرمر

الله يسلمك يا جميله

Lady E يقول...

حنين الذكريات : ايوه ايه نفس دي :) بيتنفسوا في الأكل يعني الطبيخ نفسية :)

اكيد والحب في الأرض بعض من تخيلنا لو مكناش لقيناه لأخترعناه :)

هي واضح انها كانت صميمه ودحاحه وجت تبص لقت نفسها دكتورة وقالت اما اعذب الطلاب المعذبون في الأرض :)

تسلميلي يا حنين يا حبيبتي يا رافعه معنوياتي بس الفيلم احلى من وصفي بكتييييير

Lady E يقول...

Sheroo : وأنا هستنى رأيك بعدما تشوفيه :)

Lady E يقول...

FAW : ده اول فيلم أشوفه للممثلة دي وأقنعتني ان هي الرامن جيرل فعلا محستش انها بتمثل

فيلم جميل جدا جدا

ولا تعب ولا حاجة يا باش كاتب انا كتبت عن فيلم فعلا يستحق الكتابة عنه