السبت، 4 يونيو 2011

افرح ...


حينما تصبح السعادة والفرحة في منتجات - ملهاش لازمة- وتسمن ولا تغني من جوع فبالتأكيد لن تجد الفرحة الحقيقية في الحياة

تذوق طعم السعادة وكل شوكولاته كادبوري

افتح كوكا كولا تفرح

والكثير الكثير من الاعلانات التي رأت ان أغلى مفقود الأن هو السعادة فقدمته للمستهلكين الكرام في صورة مشروب أو شوكولاته وياريتهم مفيدين ولكنهم يسجنوننا تحت طبقات الدهون فلا تعود لنا ملامحنا وبالطبع عزيزي القارئ يمكن أن تصبح مثل الكونغوفو باندا في أقل من أسبوعين ولكنك لن تستطيع أن تعود الغزالة الشاردة ثانية حتى ولو أردت
الخلاصة أننا جميعا نسعى وراء السعادة وهم قدموها لنا في اعلاناتهم المبهرة عن منتجاتهم الغير مبهرة بالمرة ولكن بالرغم من ذلك فإنك تشتريها وتلتمس منها الفرح والخروج عن المألوف

من ضمن الأحداث الكئيبة التي أصابتني بالإحباط هو خبر طلاق الأمير ويليم والأميرة كيت بعد 5 أسابيع من زواجهم الأسطوري الحالم الخيالي - الفوق الفظيع- وبالطبع كالكثيرين صدمني الخبر يعني اذا كان الحلم الملكي الجميل تدمر بهذا الشكل فماذا يمكن أن يحدث بعد ذلك لكل قصص الحب الجميلة التي بالتأكيد ينقصها قصة
مواقع كثيرة أكدت الخبر ومواقع أخرى نفت الخبر على أساس انها نكته وهع هع هع كنا بنهزر معاكو انتوا صدقتوا ! ولا اعلم حتى الأن ان كانت نكته فمن " الرخم" الذي أصدرها


الكثير من المصريون في الخارج ألغوا رحلات الأجازة والعودة لمصر هذا العام نظرا لأن الإعلام المتلون ينقل للمصرين بالخارج أن مصر أصبحت أفظع من العراق وأن واحد راح طلعوا بداله 10 يجلسون في مجلسهم ويصدرون اوامرهم التي تخيف الناس - ما بالنا بالسياحة-
وأنا بالرغم من كل ذلك أفكر جديا في العودة لبلدي ولكن كلام الإعلام أخيرا أثر في و " خوفني " وأذكر صور الشهداء كل يوم وأشعر انه لو قام احد منهم ورأى مصر الأن لبكى على حاله وأثر الرحيل ولكن بشكل ما أيضا يخبرني احساسي بأنه منذ متى والإعلام صادق جرائم مثل التي أراها الأن على شاشات التفزيون وأفظع كانت تتم في العهد البائد وكانوا يصورون مصر على انها شيكاغو وفي كل الحالات ف رب هنا رب هناك وهو الحافظ والحامي

ولكل شمس شروق بعد الغروب تحلى - من أغنية لكل عاشق وطن خالد سليم-

هناك 6 تعليقات:

فراشة يقول...

كفايه بس يجيلس تحديث باسم مدونتك ان فيه بوست جديد " ده بيفرحني "

كفايه اسمع منك اني وحشتك " ده بيفرحني "

كفايه اعرف انك مبسوطه " ده بيفرحني جدا "


الحمد لله مش محتاجه كوكا وبيبسي ولا حتى شيكولاته حلوة تخليني افرح


ربنا يفرح قليك يارب

وإن كان ع مصر " لها الله وربنا يسلمها من كل شر "

احساس طفلة محبة للرومانسية بس واقعية يقول...

ممكن اقولك حاجة متكتئبيش وقت الحزن والمشاكل جى جى بس بقضاء ربنا فى حوادث فى مصر اه وكلها عار علينا ونتكسف انها عندنا بس الحقيقى والواقع ان دا رد فعل طبيعى لبنت عندها 15 سنة وهربت من بيتهم ولقت نفسها فى الشارع وولد مكملش تعليمة وعمال كل يوم يسمع كلام سئ طول عمره رد فعل طبيعى للفقر والمرمطة وقله القيمة اللى كنا فيها مصر حلوه ولسة زى ما هى انا صحيح فى محافظة هادية بس انا حتى محستش بصداع :) يمكن فى احباط وحاجات بتخض بس مش بقف عندها انا عندى الاهم انا وبنتى واسرتى الشهداء دول ماتو عشانا يبقى لازم نكون افضل وانا ازعم ان من ساعة الثورة اتغير فينا اشياء كتير ايجابية فمتخليش حلقة عن الفتنة تضايقك ولا خبر عن جريمة قتل تضايقك ولا استاذ بيضرب الاطفال بعنف يضايقك زى ما مصر مش احنا المدونين ولا المثقفين بس زى ما مصر مش فلاحين وصنايعية بس زى ما مصر مش مغتربين بس زى ما مصر فى قلوبنا كلنا عمرها ما هتختصر وتكون مجموعة اخبار تخليها تضايقنا وتموت حلمنا وامالنا ومتخليش حاجة تأثر عليكى وحتى لو جيتى ولقيتى حاجات سلبية متندميش دى ضريبة التغير الشهدا دفعوا عمرهم واحنا بندفع مجهود وضغط نفسى وعقلى وبنفرم عقولنا تفكير

الاعلانت الكارثية دى ممله ورخمة انا بقى عندت معاهم ومبقتش بشرب كوكاكولا ولا شيكولاتة رخامة برخامة بقيت بشرب عصير بيور وباكل مولتو وتشيتوس فى يوم اللخبطة عشان انا عاملة رجيييييم وناجح الحمد لله طلعت اقوى وارخم منهم وقربت ابقى غزالة شاردة لسالى عشرتاشر كيلو كدا ادعيلى

نيللي علي يقول...

طبعا انتى يانوس عرفتى ردى النهارده لما تنقشنا

بجد البوست رائع

Lady E يقول...

فراشة : كفاية بس اشوف اسمك والفراشه البمبية الجميلة علشان افرح :)

وانتي بتوحشيني دايما يا فراشتي

بجد من كل قلبي نفسي اشوفك ونقضي يوم تاني سوى زي يوم لما اتقابلنا بس مش عارفه على ما انزل مصر هتكوني انتي سافرتي ولا ايه

ربنا يسعد قلبك وقلوبنا كلنا

Lady E يقول...

احساس طفلة محبة للرومانسية بس واقعية : ياااااااااااااااااااااه يااااااه بجد
ليكي وحشة كبيرة كبيرة كبيرة 3 مرات كبيرة :) متتخيليش فرحت اد ايه لما لقيت اسمك عندي عالمدونة تاني

فعلا الاكتئاب وقت الحزن مضر بالصحة :))

ايه ده انتي طلعتي اكاليم زينا :)

اتغير فينا كتير وفيا انا شخصيا ايجابيات كتير

حلقة العربجي اللي كان بيضرب الأطفال لأنه مينفعش نقول عليه استاذ نرفزتني لكن اللي نرفزني اكتر واكتر رد فعل الأهالي اللي طالبوا بخروج المدرس من الحبس لأنهم اتعودوا على المعاملة الغير ادمية للأسف

الشهدا ارتاحوا لكن احنا مش هنرتاح الا لما بلدنا ينصلح حالها ونحاول ان احنا نصلحها على اد ما نقدر ومنخافش تاني

ربنا يوفقك في الريجيم وعقباااالي :) هههههههه وبدعيلك من كل قلبي تبقي غزالة شاردة واحلى من الغزالة كمان

ملحوظة : هحتفظ بتعليقك ده للأيام الجايه وكل لما ازعل من بلدي هقرأه تاني انا صحيح لسه مرجعتش بس لما ارجع عارفه ان الدنيا مش هتبقى وردية :)

Lady E يقول...

نيللى : أيون أيون

ببقى سعيدة اوي وانا بتناقش معاكي يا نيللي هي دي الناس اللي بتفكر :))