اللي مصبرني

الدفا والمودة والحب والإبتسامة الصافية اللي من القلب بص في وش أي حد في أي مكان في الشارع أو في الهايبر أو حتى في الكلية أو في الشغل ده لو أصلا لقيت شغل هتلاقي كل ده تلاشى لا في دفا ولا مودة ولا حب ولا ابتسامة صافية
زمان أيام الجامعة كنت بدرس حاجات وفهمتها أوي بعد ما خلصت كلية مصطلح الإغراق في المادية
materialism المادية اللي كل البشر غرقانين فيها ونسيوا حاجات كتيرة جدا حلوة وطحنوا نفسهم بنفسهم في مطحنة الحياة
والموضوع ده لكل البشر وبيلخص المعنى ده أغنية money money money by ABBA band وبيلخص ده وجوه الناس وحقدهم وحسدهم للإنسان اللي بيتمتع برزق وافر ده غير كمان انقطاع الاتصال بين الناس ومتأكده ان كل واحد فينا بيحصله كده
يبقى مهتم بموضوع وفجأه يلاقي اللي بيتكلم معاه مش معاه أو بيكلمه في موضوع تاني كل ده من سمات العصر الحديث اللي اتعرفت عليها في كتب الكلية واتعرفت عليها بجد لما اتخرجت من الكلية وفعلا أغلب الكلام اللي درسته طلع صح
ده غير كمان شعور عدم الأمان اللي مسيطر على الجميع بلا استثناء الغني خايف لا يخسر فلوسه والفقير خايف على رزقه والغريب أن كل خوف البشر من ناحية الرزق وطبعا الرزق مش بس فلوس لأ الرزق صحة وراحة بال ووقت وزوج أو زوجة صالحين وأطفال وصحبة طيبة وحاجات تانية كتير بس مفيش ناس كتير فاهمين كده
كمان انعدام الأمان وهتكلم عن نفسي أنا خلاص مبقتش حاسة بالأمان مش على النطاق العائلي لكن على النطاق العربي كل البلاد العربية بقى فيها دوشة بما فيها البلد اللي انا فيها مع انهم يعتبروا مرفهين بالنسبة للمعيشة في مصر وكفاية ان الباحثين عن عمل من العمانيين ليهم مصروف شهري ما يعادل 2000 جنيه ياللي بتطالبوا بأدنى حد للأجور 1200 جنيه وكمان السكن متوفر ليهم وموقفين عربياتهم الأحدث موديل زي اللاند كروزور والهامر والتويوتا بأنواعها والنيسان وبرضه عاملين اعتصامات وأهو تقليد أعمى وخلاص
ومع ان الوضع هادي بس أنا برضه مش حاسة بالأمان وبرضه الوضع في مصر ميشجعش عالرجوع لأن برضه في مصر مفيش أمان عالأقل حاليا
مصر وحشتني جدا ومش مصر كلها لكن الحاجات اللي بحبها في مصر وأهمهم -الكتكوتة- والأشخاص كمان اللي بحبهم في مصر لكن ما باليد حيلة هنزل مصر مش هعرف ابدأ دراسة في حاجة مفيدة ولا هعرف ألاقي شغل
اللي مصبرني ومهون عليا اني مش في بلدي اني مع اهلي وكمان التسوق او الshopping وده بيبقى أسعد وقت في حياتي والصورة اللي فوق بعدسة الكاميرا بتاعتي لأكبر هايبر في صلالة اسمه اللولو وفتح الأسبوع اللي فات
غير كده النهاردة زي بكرة زي بعده والناس بيزيدوا بعد عن بعض والرأسماليين بيزيدوا الفقراء فقر أكتر يمكن أكون محبطة ويمكن أكون بفكر بواقعية بس في كل الحالات أنا عايشة بالأمل وأحلامي الحمد لله بتتحقق
هي صحيح بتتحقق ببطء أوووووووووي وكأنها بيبي لسه متعلم يحبي بس المهم انها بتتحقق والمهم نتعلم نحلم ونمشي ورى أحلامنا

http://www.youtube.com/watch?v=t4scdbs8thQ&feature=related

ايه الغباء ده؟

مش عارفة مين الغبي تحديدا في شركة الإتصالات هنا اللي فصل عليا النت وأنا بشوف الفيديو ده عاليوتيوب

http://www.youtube.com/watch?v=D_olIAALNuc&feature=related
ودي مش أول مرة النت يفصل وأنا عاليوتيوب بشوف النوعية دي من الفيديوهات
بس كويس رب ضارة خير ان شاء الله انا مكنتش ناوية أعلق عالخطاب الأهبل الأخير بتاع الرز المعمر لكن بعدما شوفت الفيديو ده حسيت اني عايزة أقول تيييييييييييييييييييييييييييييييييت والإحساس ده مش بيجيلي كتير الا لما أشوف غباء بس أنا مؤدبة ومش هقول تيت عالنت هقول في سري بس وربنا عالظالم والمفتري
بيقولها في الفيديو انتي ليبية ولا من مصر يعني ايه؟ حد يفهمني قصده ايه ؟يمكن أكون فهمت غلط وبعدين أنا طول عمري مقتنعة ان اللبس حرية شخصية اللي ماشية بالبيكيني زي اللي ماشية بالنقاب مش من حق أي حد يعترض حريتهم بتغاظ أوي من الحركة دي طيب من حقك تعرف هوية اللي بتكلمك جيب أي واحدة تشوف وشها في مكان مقفول وبعدين تقولك انها فعلا واحدة وان دي فلانة بنت فلان مش هو اللي يكشف وشها وهو عارف كويس اوي ان بلده نظام قبائل وعيب أوي ان واحدة تكشف وشها قدام أي راجل غريب مش العدد المهول ده من الرجالة :(
أما عن الخطاب فمش هعلق عليه هسيب الزمن هو اللي يحكم بعد كده ع الكلام اللي اتقال في خطاب امبارح
ربنا معاهم

أما عن مصر فالحياة ماشية ببطء أوي بالمناسبة حد فرحان ان الصاوي بقى وزير السخافة وشالو ألدو جابوا شاهين والاتنين أكيد مش نافعين مع كل التقدير للصاوي على الساقية بس ميستحقش الوزارة

كم منزل في الأرض يألفه الفتى وحنينه أبدا لأول منزل

طب ايه؟ اتكلم عن ايه انا دلوقتي وحاجات كتير فاتت وعدت والمفروض كنت أتكلم عنها

عيد ميلادي ، عيد الثورة اللي بجد ثورة 25 يناير ، التناحة والتنحي ، ما بعد التنحي ، المولد النبوي الشريف ، أغنية ازاي؟ لمحمد منير ، أغنية بحبك يا بلادي ، المطبلاتيه قبل وبعد

حاجات كتير أوي عايزة اتكلم عنها ومن كتر ما أنا عايزة أتكلم كنت بفضل السكوت :)

طيب هتكلم عن شوية فيهم بإختصار

عيد ميلادي : جالي هدايا كتير فيه من مامتي وبابايا مالذ وطاب من هدايا ده غير التورتة الجميلة اللي ماما تعبت فيها وكمان قبل ما يقطعوا النت أصحابي المدونين والفيس بوكيين هنئوني بعيد ميلادي ومنكرش اني حسيت بسعادة شوية لكن السعادة اللي حسيت بيها عاملة زي حباية السكر الصغنونة وسط كوباية ماية كبيرة أيوة موجودة لكن طعمها ميتحسش أوي

في الوقت ده كنت بدأت أشوف الأخبار الأجنبية والجرائد الأجنبية – لأول مرة في حياتي- وأعرف منها ان بقى في شهداء يبقى ازاي أحس بفرحة حاجتين جوايا كانوا بيصارعوا بعض

حاجة تقوللي افرحي ده يوم عيد ميلادك وكل حبايبك بيحاولوا يسعدوكي اختشي بقى وبطلي نكد وحاجة تانية تقوللي عيب عليكي بلدك مجروحة وتعبانة وشبابها بيستشهد بإيد داخلية مش في حرب ! تفرحي ازاي

التناحة : كل الناس قالوا للكابير لازم ترحل وهو برضه مكنش عايز يرحل

التنحي : يا ليلة العيد أنستينا

ما بعد التنحي : الناس بيهنونا في كل مكان وعرفوا قيمة مصر بعدما ما كنت كرامة المصري متهببة بالهباب

بقيت فخورة اني مصرية وعلى فكرة هي لسه متهببة بالهباب بس مش أوي زي الأول وتحيا الوحدة العربية

المولد النبوي الشريف : يوم جميل أوي بيربطنا بجذورنا الإسلامية لكن مالوش طعم أوي واحنا بعيد عن مصر في مصر كل حاجة طعمها مختلف واحساسها ورؤيتها مختلفين لكن برضه اليوم مر جميل جدا بسبب "أهلي" والأهل مش بس عيلة الأهل كمان أصحاب وصحبة

الغريب أن قناة الحياة قرأوا اللي في دماغي وجابوا أغنية الشارع لنا والناس التانيين مش مننا اللي جت في بالي من أول ما الثورة بدأت أومال كان فين الكلام ده من زمان؟ أصل فجأه كده الناس بقوا وطنيين واللي كانوا بيسقفوا للي كانوا هنا مبقوش يسقفوا لهم لما راحوا هناك ازاي الناس دي بتقدر تتلون أوي كده وماشيين بمبدأ اللي تغلب به العب به هما مش فاهمين انهم سخيفين وحركاتهم دي مكشوفة أوي وبايخة أوي

على فكرة عجبني أوي اسم الثورة أو الانتفاضة لأنها مش مجرد مظاهرات وخلاص

أكتر أغنيتين حسيت انهم فعلا صادقين ازاي لمحمد منير كنت بسمعها كل شوية وحاليا أغنية أنا بحبك يا بلادي

لو حد هيقرأ الكلام ده وفي الجيل اللي أصغر من العشرينات ممكن ميعرفش ان أغنية أنا بحبك يا بلادي الأصلية كانت في فيلم العمر لحظة وغنوها على مدرسة بحر البقر اللي الاسرائليين قصفوها لأن عبدالناصر كان حاطط على المدرسة مدافع فأعتبروها مكان تخزين ذخيرة وضربوها والعهدة على الراوي "بابايا"

ومن وأنا طفلة وأنا بحب الأغنية دي لأنها بصوت الأطفال ولأن كلماتها جميلة أوي واللحن كمان بليغ أوي" لبليغ حمدي " خصوصا الكوبليه اللي اتعمل منه الأغنية الجديدة أنا بحبك يا بلادي

أما الأغنية الجديدة فبجد مؤثرة جدا أول مرة سمعتها دمعت وفي كل مرة بسمعها بحس بقشعريرة هو صوت عزيز الشافعي في الأغنية دي مش أوي ومش حلو زي صوت رامي جمال بس كفاية ان الكلمات الرائعة دي كلمات عزيز الشافعي علشان أستحمل صوته ونشازه أحيانا

لينك بحبك يا بلادي الأغنية القديمة : http://www.youtube.com/watch?v=Wi4q9xoR_uY

لينك بحبك يا بلادي بالكلمات والتوزيع الجديد : http://www.youtube.com/watch?v=uHuByxYENkI&feature=related

في أغنية كمان كنت بسمعها

violin

وأول مرة أسمعها النهاردة بالكلمات والموسيقى الأصلية

Tell Laura I Love Her

فظيعة الأغنية دي محستهاش على لورا وتومي بس

حسيتها على واحد ضحى بحياته علشان حاجة غالية أوي ايا كانت بقى الحاجة دي المهم انها حاجة تستحق حياته وحبه ليها هيفضل خالد .

كفاية سكوت

حد فاكر اسراء؟ حد فاكر بكائها الممزوج بالصريخ لما قابلت مامتها ؟هتقولوا اسراء مين؟هقولكم اسراء عبدالفتاح اللي اتقبض عليها علشان جروب 6 ابريل علشان كانت زي ما بتقول بتفضفض عالفيس بوك في الفترة دي كان في اعتقالات كتير للمدونين ولمستخدمي الفيس بوك واشتهر ان المدونين مشاغبين لدرجة ان في طبيب قاللي : انتي مدونة من اللي بيتقبض عليهم دول؟! فين بقى الحرية والديموقراطية والمهلبية اللي كل الناس بتتكلم عليها كتير ومن أهلنا اللي كانوا بيخافوا اننا نتكلم لدرجة ان بعض الأهالي منعوا بناتهم من دخول النت أصلا والبعض اكتفى بعدم مشاركة ابنهم او بنتهم في أي لقاء تدويني بيبقى أصلا هدفه الخير ومساعدة الأخرين
أي بنت فينا كانت معرضة انها تبقى مكان اسراء أنا عارفة ان السجن واحد بالنسبة للبنت وللولد بس عالبنت أصعب بكتير وعارفة أن السجن علشان كلمة حق شرف وحرية لكن أغلبية المجتمع بيحب يمسك في المجني عليه وينصر الجاني دي ثقافة عالمية بس موجودة أكتر عند الناس اللي أفقهم ضيق اللي بيسيبوا المغتصب أو المتحرش ويقولوا البنت كانت لابسة وحش !! اللي يسيبوا الحرامي ويقولوا اصل اللي اتسرقوا يستاهلوا السرقة والحرامي مظلوم واللي بيسرق بيروح مارينا وبيلاقوا لكل حاجة مبرر زي برضه ما بيقولوا ان حال البلد بينهار علشان المظاهرات في ميدان التحرير متعاطفين مع الجاني ومخليين اللي عايزين الحق هما الجناة
اللي بيحصل من يوم 25/1/2011 أنا فخورة بيه وبالشباب دول وربنا يرحم الشهداء هما وكل اللي قبلهم بجد ومن قلبي ومن غير خوف من أي حاجة وأي حد كان نفسي أكون معاكم بالرغم اني عارفة كويس ان اللي بيحصل ده موجود في بروتوكولات حكماء صهيون أنهم يشغلوا الشعوب بالثورات على حكامهم بس هو اللي وصل الشباب لكده وهو السبب واللي بيقولوا ان حتى لو ملاك من السما حكم مش هيعجب الناس عندهم حق لكن اللي بيحكم حاليا عمل حاجات كويسة لكن أضعاف أضعاف أضعافها حاجات بشعة أنا موجوعة على الشهداء اللي ضحوا بدمهم وحياتهم علشان بلدهم تعيش زي ما أنا لسه موجوعة من ضحايا العبارات الغارقة والطائرة المصرية اللي اضربت في الجو وقالوا انها وقعت لعطل في المحرك والمسرح المحروق وحزينة على ان المسيحين مفكرين ان المسلمين مضهدينهم وعلى فكرة دي كمان حاجة متبادلة المسلمين كمان مفكرين ان المسيحين مضهدينهم والاتنين ميعرفوش ان اللي مضطهدنا احنا الاتنين نظام كامل وراه ايد خفية عايزة النهرين من الفرات للنيل اللي متأكدة منه لو الشباب دول روحوا مفيش أي حاجة هتتحقق وكلهم هيتعجنوا في عجانة كبيرة ويطلع منهم متظهرين صغيرين واللي قطع النت والاتصالات ده عمل جريمة يا حسن يوسف ياللي بتقول ان فصل النت علشان المخربين ميتواصلوش احنا كل اللي بره مصر كانوا هيموتوا من القلق على أهلهم وأصدقائهم في مصر وكنا مبنامش وكل شوية نجرب التليفون ونحاول نتصل مفيش فايدة وبعدين هو انت فاكر ان لو في مخربين هيأثر معاهم فصل النت هيعرفوا يتصرفوا بأي طريقة ويدخلوا النت برضه
وكمان الست زعبلة سماح أنور اللي كنت بحترمها بتقول خلي المتظاهرين يولعوا مطالبهم اتحققت عايزين ايه تاني ؟ أنا أقولك عايزين بلد كويسة عايزين مصر ترجع مصر وافتكري ان لولا المتظاهرين دول كانت بلدنا هتفضل تتقدم بينا وهي عينيها في قفاها فاكرة انها بتتقدم وهي بترجع بسرعة للخلف الله أعلم ايه اللي جاي في المستقبل لكن أكيد مش هيبقى أسوأ من اللي فات واللي عرف يطلب حقه مره ويموت شهيد فداء بلده وأهله يعرف يطلبه بعد كده وميسكتش أبدا ربنا يوفق كل حر وحره عايزين بكرة أحسن في بلدنا

الهم واحد .. و الملل مشــــــترك

الدنيا أوضة كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
عجبي !!

الله يرحمك يا جاهين كلامك بيلخص اللي بيحصل دلوقتي

في ناس متفائلين وبيقولوا يوم 25 يوم ثورة مصر يا حبايبي انتوا بتهزروا ولا بتتكلموا بجد

طيب اللي عايز يقلد تونس يقلدها من البداية مش يجي شوية شباب متحمسين قبل عيد ميلادي بيوم ويقولوا يوم الثورة ثورة ازاي يعني هي الثورة بتيجي في يوم وليلة هما فاكرين نفسهم رايحين يتفسحوا وهيقولوا لبعض يلا يا جامعة عندنا ثورة النهاردة هاتوا لابتوباتكو وموبايلتكو ويلا بينا طالعين ثورة حد يجي معانا؟

تونس استمرت الاحتجاجات فيها بشكل تصاعدي مش فجأه قرروا في يوم وليلة يعملوا ثورة وبعدين مين اللي هيثور أصلا نفسيات أغلب المصريين دلوقتي بقت متعودة على الخضوع وعلى فكرة ده مش رأيي لوحدي ده رأي الكاتب علاء الأسواني في كتابه نيران صديقة

أقولكو كام موقف حصل قدامي امبارح كنت في الهايبر وعجبني مزيج الألوان في لوحة متعلقة في الهايبر فبصورها فسمعت صوت مسرسع اخترق وداني –أذناي-

الصوت : لأ لأ لأ انا مش هعدي من هنا اصلها هتصورني

وشوية وهتيجي تضربني فبصيت على مصدر الصوت لقيت واحدة لابسة خمار أبيض طويل ومتجهمة وبنتها طفلة بتبصلي شذرا على اني من الأعداء وعادي يعني ملقيتهاش ملكة جمال زامبيا زامبيا زامبيا ولا حاجة علشان أصورها يعني وبعدين اللي عايز يصور هيخبي الموبايل اللي بيصور بيه او الكاميرا بس شوفوا تفكير المصريين ازاي نوع من انواع التفاهه الموقف ده بسيط بس بيوصف نفسية فئة كبيرة من المصريين في الداخل وفي الخارج بيحبوا يستقووا على بعض بس لكن يبقوا أقوياء على الظلم وعلى عيشتهم السودا مبيعرفوش بيجوا في الهايفة ويتصدروا وفي ناس مقتنعين أنهم كده كويسين واللي بالي بالكو مهنيهم وانهم أحسن دولة في العالم وكل الكلام الفارغ اللي عايشين على أطلاله ده موقف بسيط لكن في مواقف تانيه حرصا على القارئ مش هقولها لأنها تحرق الدم جدا

وبعدين اللي عايز يعمل تغيير وثورة زي ما الشباب عالفيس مسمينها هينبهوا الغولة أم عين حمرا قبلها ويقولوا لها خدي بالك يا غولة احنا جايين نثور عليكي في اليوم الفلاني حضري الرصاص الحي بقى

حقيقي مش متفائلة مش عارفة ليه النهاردة صباحي كان أغاني وطنية :) ده نوع من المشاركة الوجدانية عن بعد

وعالعموم كويس لو حصل ثورة بجد –وأنا معتقدش- هيبقى يوم 25 ويوم 26 يوم ميلادي احتفال وطني ويبقى اسمه عيد الثورة ولو حصلت لا قدر الله مشاكل مش هعرف احتفل بعيد ميلادي تاني منه له منه له .

ع الهامش : أنا ما أقدر أكون اللي تبيه انا ما أقدر أكون الا أنا الهوى احساس ليه ما تحس بيه ليه مستكثر علي أكون أنا !!!!!!!!!!!!!!!!!!!!!!!!!!!!!!!!!!!!!!!!!!!!!!!!! أصالة – قانون كيفك

ملحوظة : بقالي 8 أيام بدور على ملوخية في الهايبرات هو الحاكم بأمره منعها تاني ولا ايه :)

فلرب مغلوب هوى ثم ارتقى

أحيانا يتصرف الأخرون تجاهنا تصرفات لا نستطيع تفسيرها الا بالمقولة الفلسفية الشهيرة والعميقة والمتعمقة التي تقول : شرب السبيرتو واللي جالو جالو

أدرك الأن جيدا أنني لو أخذت المواقف الجادة التي تحدث في الحياة بتراجيدية ومأساوية ودراما لقضيت عمري كله في البكاء والحزن ولكنني أدع الألم يتسلل لي قليلا الى أن يطمئن ثم أرى المواقف والمشاهد التي تحدث بشكل كوميدي وأبتسم فينحسر الألم كشبح خائف مذعور ويتوارى خلف تلال الرماد المحترقة

لكن حينما أتأمل حال العديد من البلاد العربية لا أجد للكوميديا أو للطرافة أي مكان فالبداية كانت فلسطين التي تحولت لإسم أخر على كل الخرائط الحالية وأخشى أن لا تعرف الأجيال القادمة بوجود بلد عربية تسمى فلسطين

وبعدها ضاعت العراق التي كان بها أكبر عدد من العلماء وحاملي الماجيستير والدكتوراة وأصبحت ممزقة جريحة لا يسمع أحد عنها أي خبر سار ثم تونس التي سائت أحوالها بسبب الفقر والبطالة وسوء الأحوال والسودان التي تتمزق وتنقسم والفتنة الطائفية في مصر التي يحاول الكثير من الناس احتوائها قبل أن تصبح نارا ضارية تبتلع الجميع وعدم الاستقرار السياسي في لبنان وتدهور المعيشة في سوريا

كل ذلك يدعوني أن أسترجع أغنية وطني حبيبي الوطن الأكبر يوم ورى يوم أمجاده بتصغر وانكساراته ماليه حياته وطني بيخسر وبيدمر :( وأعود لأتذكر ابيات ابن النيل حافظ ابراهيم

لا تيأسوا أن تستردوا مجدكم

فلرب مغلوب هوى ثم ارتقى

فتجشموا للمجد كل عظيمة

إنى رأيت المجد صعب المرتقى

عار على ابن النيل سباق الورى

مهما تقلب دهره أن يُسبقا

فتعلموا فالعلم مفتاح العلا

لم يبق بابا للسعادة مغلقا

ثم استمدوا منه كل قواكم

إن القوى بكل أرض يتقى

تبقى جديدة وبعد ساعات تبقى ديموديه

النت كان معمول له عمل راكب جمل معايا بقى له كام يوم وأخرها النهاردة دخلت كود النت ودخلت عالنت مفيش ثواني وفصل :( كلمت شركة الاتصالات قالوا زي وردة بالضبط : قالوا معرفوش مكلمتوش ومعرفتوش قال يعني مش فاكرنا :) اخدوا الرصيد والنت كمان ومسابوليش حاجة قولتلهم دي غلطتكوا قالولي اشحني الرصيد تاني :) وما كان مني الا ان رميت خط التليفون وافتكرت كل شبكات المحمول اللي بتعيشنا احلى ما في اللحظة بإنها تسرقنا

من كام يوم كنا بنتفرج على فيلم في التلفزيون أنا واتنين

الأولى شخصية جميلة بجد بحبها اوي مش مصرية وواحدة من الناس مصرية المهم الفيلم كان شاطح شطحة غريبة أوي ومبين أن مصر كلها حرامية وناس سكيرة وكالعادة كباريهات وفتيات ليل !!!!!!!!!! على فكرة دي فكرة عرب كتير عن مصر والمصريين وبتوع السينما زي خالد يوسف مش فاهمين بيعملوا ايه بأفلامهم اللي فيها فكر بس للأسف الابتذال فيها اكتر بكتير ومصر مش ناقصة بجد

المهم الشخصية اللي مش مصرية قالت ايه الفيلم اللي كله ناس بيطاردوا بعض ومعاهم مسدسات دول ايه دي مصر ولا شيكاغو وبعدين أنا علقت على مشهد سواق التاكسي ماسك ازازة خمرة وعمال يأربع فيها –يشربها- ولا كأنها عصير تفاح فقولت : عمري ما شوفت سواق تاكسي بيشرب كده ! ردت المصرية بحماس وقالتلي : ما هما مبيشربوش خمور وبيشربوا حشيش ! جت تكحلها عمتها :) فقولتلها على فكرة سواقين الترلات هما اللي بيعملوا كده لأن للأسف حصل معايا كذا موقف يؤكد الحقيقة المنيلة دي يعني مرة مثلا مرة بعدي تريلا او مقطورة مش فارقة وصلت لنص المقطورة ولقيت السواق بيحود على الكتكوتة – العربية- عادي جدا وطبعا العربية في الحالة دي ممكن يحصلها حاجة من الاتنين مش حابة اقولهم وربنا يكفينا شر الحاجات دي ومرة تانيه مقطورة محملة كونتنر ماشيين عالطريق السريع فوقف قدامي فجأه من غير أي إنذار وطبعا كنت ماشية بسرعة ولما عديت بيقولي أسف فما كان مني الا اني هزقته أصل متموتنيش وبعدين تقولي اسف وأمثلة تانية كتير عن العربيات الكبيرة اوي دي

الاعلام كل شوية بجد بيثبت بجدارة انه منفصل عن الواقع وملوش أهمية برغم أنه بيدخل كل بيت بدليل الأغاني الوطنية اللي طلعت في ثواني الأيام اللي فاتت من باب السبوبة والاسترزاق والموضة اللي بتاخد لها ساعات وبعد كده تتنسى وملهاش لازمة ولا هتحل أزمة ولا هتعقل أغبيا

وردة بتقول كنا بنلحن الأغنية في 3 شهور ودلوقتي اغلب الملحنين بيلحنوا في 3 ساعات وغالبا بينقلوا الألحان الأجنبية لسه هيقعدوا يفكروا وبدون ذكر أسماء عمرو مصطفى من أشهر الناس اللي بيعملوا كده

انا بحترم اعلاميين قليلين أوي وأغلبهم بقيت بحترم موهبته مش بحترمه شخصيا

المهم بعدما الشخصية المش مصرية اللي بحبها مشيت جت واحدة من الناس وفضلت تقول كلام مش لطيف عنها

وأنا في الحالة دي بسكت وبعرف ان اللي قدامي وبيتكلم وحش عن حد كويس بيعامله بنبل وأناقة هو اللي مش كويس وبينطبق عليه في الوش مرايه وفي القفا سلايه واحترت جدا اروح انبه الانسانة اللي بحبها ان اللي عامله صاحبتها بتشتمها من وراها ولا اسيبها لغاية ما هي تكتشف

بجد الحياة فيها حاجات كده مكلكعة مينفعش فيها الصراحة وربنا يحمينا من الناس اللي بوشين لأن اكتشاف انهم بوشين بيوجع ويضايق أوي

ملحوظة :العنوان مأخوذ من أغنية اسمها موضات لفريق الأصدقاء

ملحوظة كمان : تخيلوا انكم بتسمعوا اغنية من البوم محمد عدوية الجديد علشان انا كسلانة احط اغنية عالمدونة دلوقتي :)

نقطة نور

حينما ينسانا الزمان كما ينسى كل شيء بعد حين سيذكر التاريخ نقطة نور حدثت في ليل الظلام الحالك سيذكر شباب وبنات وسيدات ورجال استطاعوا برغم أشباح السفسطائية والغوغاء والفكر المضمحل أن يشعروا بجراح بلادهم ويساندوا اخوتهم المسيحيين والمسلمين ويكونوا على قدر كبير من المسؤلية والحب والرحمة والسلام وسيذهب المتطرفين الذين يشعلون النيران من الطرفين مع كل من أراد البلاد بسوء الى قمامة التاريخ
لا أتخيل حتى الأن أن يميز انسان في معاملة أخوه الإنسان على أساس دينه أو لونه أو عرقه فكلنا من أصل واحد وكلنا متشابهين وكلنا يجمعنا نفس المصير
رحم الله شهداء العبارات والقطارات والمواصلات وشهداء الأحداث الأخيرة ورحم الله الشهداء في كل البلاد العربية المذبوحة
وأرجو من الله أن يخفف غمامة الحزن الرمادية عن قلوب جميع المكلومين والمهمومين في كل أنحاء العالم

حداد على ضحايا التفجيرات في الأسكندرية