الجمعة، 21 يناير 2011

الهم واحد .. و الملل مشــــــترك


الدنيا أوضة كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
عجبي !!

الله يرحمك يا جاهين كلامك بيلخص اللي بيحصل دلوقتي

في ناس متفائلين وبيقولوا يوم 25 يوم ثورة مصر يا حبايبي انتوا بتهزروا ولا بتتكلموا بجد

طيب اللي عايز يقلد تونس يقلدها من البداية مش يجي شوية شباب متحمسين قبل عيد ميلادي بيوم ويقولوا يوم الثورة ثورة ازاي يعني هي الثورة بتيجي في يوم وليلة هما فاكرين نفسهم رايحين يتفسحوا وهيقولوا لبعض يلا يا جامعة عندنا ثورة النهاردة هاتوا لابتوباتكو وموبايلتكو ويلا بينا طالعين ثورة حد يجي معانا؟

تونس استمرت الاحتجاجات فيها بشكل تصاعدي مش فجأه قرروا في يوم وليلة يعملوا ثورة وبعدين مين اللي هيثور أصلا نفسيات أغلب المصريين دلوقتي بقت متعودة على الخضوع وعلى فكرة ده مش رأيي لوحدي ده رأي الكاتب علاء الأسواني في كتابه نيران صديقة

أقولكو كام موقف حصل قدامي امبارح كنت في الهايبر وعجبني مزيج الألوان في لوحة متعلقة في الهايبر فبصورها فسمعت صوت مسرسع اخترق وداني –أذناي-

الصوت : لأ لأ لأ انا مش هعدي من هنا اصلها هتصورني

وشوية وهتيجي تضربني فبصيت على مصدر الصوت لقيت واحدة لابسة خمار أبيض طويل ومتجهمة وبنتها طفلة بتبصلي شذرا على اني من الأعداء وعادي يعني ملقيتهاش ملكة جمال زامبيا زامبيا زامبيا ولا حاجة علشان أصورها يعني وبعدين اللي عايز يصور هيخبي الموبايل اللي بيصور بيه او الكاميرا بس شوفوا تفكير المصريين ازاي نوع من انواع التفاهه الموقف ده بسيط بس بيوصف نفسية فئة كبيرة من المصريين في الداخل وفي الخارج بيحبوا يستقووا على بعض بس لكن يبقوا أقوياء على الظلم وعلى عيشتهم السودا مبيعرفوش بيجوا في الهايفة ويتصدروا وفي ناس مقتنعين أنهم كده كويسين واللي بالي بالكو مهنيهم وانهم أحسن دولة في العالم وكل الكلام الفارغ اللي عايشين على أطلاله ده موقف بسيط لكن في مواقف تانيه حرصا على القارئ مش هقولها لأنها تحرق الدم جدا

وبعدين اللي عايز يعمل تغيير وثورة زي ما الشباب عالفيس مسمينها هينبهوا الغولة أم عين حمرا قبلها ويقولوا لها خدي بالك يا غولة احنا جايين نثور عليكي في اليوم الفلاني حضري الرصاص الحي بقى

حقيقي مش متفائلة مش عارفة ليه النهاردة صباحي كان أغاني وطنية :) ده نوع من المشاركة الوجدانية عن بعد

وعالعموم كويس لو حصل ثورة بجد –وأنا معتقدش- هيبقى يوم 25 ويوم 26 يوم ميلادي احتفال وطني ويبقى اسمه عيد الثورة ولو حصلت لا قدر الله مشاكل مش هعرف احتفل بعيد ميلادي تاني منه له منه له .

ع الهامش : أنا ما أقدر أكون اللي تبيه انا ما أقدر أكون الا أنا الهوى احساس ليه ما تحس بيه ليه مستكثر علي أكون أنا !!!!!!!!!!!!!!!!!!!!!!!!!!!!!!!!!!!!!!!!!!!!!!!!! أصالة – قانون كيفك

ملحوظة : بقالي 8 أيام بدور على ملوخية في الهايبرات هو الحاكم بأمره منعها تاني ولا ايه :)

هناك 7 تعليقات:

MaNoO يقول...

مش من طبعى انى ابعد عن حاجه مقتنع بيها بس طبعى الملل انا زهقت بجد من معارضه زى الزفت ولا عارفه تعمل حاجه عشان كدا سايبين التانيين يتحركوا براحتهم يوم 25 مش متفائل ليه خالص ولا عايزه على فكره
لان قبل الثوره السياسيه احنا ثوره فى عقولنا كدا نرجع بيها لأصلنا ثوره تعرفنا ايه الصح وايه الواجب وايه الاصول اللى نسيناها فى كل مكان
وتنبؤ منى مصر مش هيحصل فيها ثوره ولا دلوقتى ولا بعدين بكل بساطه لان فى فرق بينا وبين تونس انهم كانوا مكبوتين فعلا
انما احنا البعدا فتحولنا توك شو وجرائد معارضه خرجت فيها الطاقه فى الكلام
يلا بقى سورى طولت لو عايزه ملوخيه نبعتلك

R-H-S يقول...

كل سنة وانتي طيبة اولا
ثانيا بقي لو الثوره اللي عايزين يعملوها دي منفعتش هناخد علي دماغتنا كلنا مع الاسف
واليوم دا هكون مع الاسف في القاهره فربنا يستر علينا جميعا

وف العادي باقول يارب يكون خير ويحصل حاجه غير متوقعه حاجه حلوه كدا وربنا يهد الظالمين

تحياتي

Ramy يقول...

كلامك منطقى جداً على فكرة

و سننتظر و نرى ما سوف يحدث مع الأيام

و بأذن الله تلاقى ملوخية

(:

FAW يقول...

يللا بينا طالعين ثورة حد جاي !!
ضحكتيني والله :)

كل سنة وإنتي طيبه بقي أهم .

فراشة يقول...

قلت اعلق المره دي بقى كل مره امشي من بره بره لازم مره ادخل وايدي مليانه .... صح ولا ايه :)

المهم ... مع اني مش بحب اتكلم ف السياسه لأني شايفاها وجهه نظر كل واحد شايف حاجه من منظوره وبيقولها

عجبني قوي بتاع يالا طالعين ثوره زي رحله كدا نستجم :)

بس مش معنى كدا اني ضدها ولا حتى معاها ... أنا مش هقول رأيي ماما محلفاني متكلمش :((((

انا بس خايفه من اليوم دا ماما مسافره فيه وربنا يستر :(

واخيرا بعد الرغي بتاعي دا ... وحشتيني جدا ع فكره

Gehad mousa يقول...

كلام رائع جدا
سلمت اناملك دوما
دوما نتتظر الجميل من الاجمل فقط

White Knight يقول...

لأول مرة أشارك فى المدونات بجدية وكل سنة وانتى طيبة وربنا يعديها على خير
بس أدى الثورة اللى محدش متوقعها حصلت وروح اليأس اللى كانت فينا كلنا بتقول اننا شعب مش بنقول لا
قولنا لا كتييييييييير لحاد ما ضربونا وغيروا بعض الشخصيات الهامة نسبيا
وحصلت ثورة بجد والشباب طلع وقال رأيه بصراحة رغم أعمال الفوضي والسرقة والنهب وغيرها من جهات معنية وأحب أقول اننا لازم نتعلم نقول لا بس نعرف نقولها امتى وازاى
ودلوقتى البلد فى حالة فوضي وبلبلة غريبة وكل واحد رأيه فى ناحية

بس دايما ندعي ربناودة المهم
اللهم اهدنا إلى الطريق الصواب والصلاح ولا تشمت فينا أعدائناوأصلح حالنا دوما
وشكرا ،،،