الاثنين، 30 يناير 2012

سنة تالتة ابتدائي


أنا درست لأطفال ولكبار لكن بالرغم من كده سنة تالتة ابتدائي مأثرين فيا بطريقة كبيرة هحكيلكو شوية عليهم

سنة تالتة ابتدائي أنا اعتمدت معاهم أسلوب اللعب علشان يحبوا اللغة ويتعلموا ده غير أن فيهم كتير شطار كمان فبيساعدوني أني ابتكر العاب جديدة وحاجات تفرحهم

سنة تالتة ابتدائي هما الفصل اللي بيفضلوا طول اليوم يسألوني أستاذه متى حصتنا؟ ولما الحصة بتاعتهم تقرب وأقولهم انا عليكم الحصة الجاية يفضلوا يقولوا هيه هيييييييييه هييييييييييه ويتنططوا علينا انجليزي علينا انجليزي هيييييييييييه

سنة تالتة ابتدائي هما " الفصل البسكوتة" اللي مشاعرهم بتظهر عليهم على طول وأنقياء أوي لسه متعلموش الكدب والنفاق

سنة تالتة ابتدائي هما الوحيدين اللي بيبقوا عايزين يشيلوا الشنطة بتاعتي او اللاب توب وبيحبوا يساعدوني

امبارح خرجت خروجة اجبارية مع ماما وجيراننا برغم اني كنت تعبانة شوية ولقيت طالب من تالتة ابتدائي أول لما شافني برق وكإنه شاف نجمة سينما :) وجري عليا وسلم عليا واللي انا اتفاجئت بيه انه كان عايز يبوسني طبعا انا وشي احمر مع ان الطفل بيتصرف بعفوية قولتله كلام أهبـــــــــــل تبريرا اني مش هينفع أبوسه طبعا الواد يا عيني اتحرج وانا طلع عليا شبح يلا نمشي يلا نمشي حتى ماما متعرفش انا اتعصبت كده ليه :) مبحبش طلابي يشوفوني وأنا تعبانه وهما كانوا كتير في "ماكس" امبارح

سنة تالتة ابتدائي لو ربنا أراد ورجعت شغلي هيبقى علشانهم وبس

سنة تالتة ابتدائي أكتر أطفال هفتقدهم لما ارجع مصر ان شاء الله علشان الدبلومة اللي قالوا امتحاناتها في شهر 5 ومازلت مستغربة لغاية دلوقتي من ان الكلية يقدموا الامتحان ويخلوه بدري اوي كده !!

سنة تالتة ابتدائي لازم أتصور معاهم إن شاء الله وأخليهم ذكرى جميلة عندي

هناك 9 تعليقات:

E73 يقول...

{بنا يخليهملك يا رب

فعلا السن الصغير هم أكتر ناس ممكن تديكي تشجيع ودافعية وتديكي عائد معنوي لشغلك أكتر من أي سن تاني

وأنا بموووووووت في الأطفال اللي عندي في الحضانة لما يفضلوا يقولوا ميس ايناس جت
^_^

بس بيني وبينك مكنلكيش حق تكسري بخاطره ومتديلوش بوسة هو لسة صغنون *_^

mohamed amer يقول...

مش اي حد يقدر يتعامل مع الاطفال , وطالما بيحبوكي اوي كدا تبقي اكيد حاجه جميلة جدا ودليل علي انك مدرسة ممتازة وربنا يخليهم ليكي ويخليكي ليهم
بس اكيد اما ترجعي ان شاء الله حيكونوا في رابعه ابتدائي... هتعملي ايه
وربنا يوفقك في الدبلومة ان شاء الله
وخلوا الامتحانات بدري لانه المفروض ان انتخابات الرئاسه حتبقي في شهر 6
تحياتي
محمد عامر

Miss LoZa يقول...

بجد اصلا لما الاطفال يكونوا مطعين وبيسمعوا الكلام بتبقى حاجة حلوة أوى

كنت لسه بقول أنى بحب الاطفال عشان بيحسسونى بقيمتى اصلا :)

المرة الجاية مش تحرجى الولد وأبقى بوسيه اصلا هههههههههههههههههه

βent Pasha يقول...

:-)
أنا كمان درست لأطفال وكبار
الأطفال كانت عليهم تصرفات وردود أفعال عفوية وجميلة أوي ف السن ده ، بس فعلا فترة استمتعت فيها كتير بجد وزعلت جامد لما سبتهم.
وحصل معايا نفس الموقف إن طفل منهم أول ماشافني ف الشارع ساب باباه ومامته وجري عليا وعاوزني أخده بالحضن طبعا عشان ما أحرجوش وما أحرجش نفسي اتصرفت معاه بنفس العفوية دي ، وعلى أد ماكنت مكسوفة بصراحة على أد ماحسيت إني مبسوطة وإني مهمة أوي ف حياة الطفل ده .

بوست جميل
:)
تقبلي مروري

نونو الرومانسية يقول...

المدرس بيفرق طبعا يا ليدى وخاصة فى المراحل الابتدائى الاولى لان الاطفال بيقعدوا فى المدرسة فى حالة ملل طول اليوم ومطلوب منهم انتباه كمان فأى تغير واى مدرس مهتم وفايق فى حصته بيفرق كتير طبعا معاهم ربنا معاكى لازم صورة طبعا ومش تنسى تبوسى انتى الكتكوت الصغيور اللى كان عايز يبوسك يا بنوتة دا انا اصحاب اختى بقوا اصحابى فى الفصل عشان كنت بروحلها مرة فى الاسبوع واقعد معاهم فى البريك وكانو بيحضنونى وبيبعتولى سلام طول الاسبوع وانا مش مدرستهم :))

ربنا يوفقك
دمتى بكل خير :)

rona ali يقول...

كدة كدة تمشي عريسك مكثوف كدة هههههههههههههههه
ايه يا اينو بتقطعى علي رزقك ليه يا شابه

بجد بوست خلانى افرح وافتكرنى وانا في تالته ابتدائي كانت احلى ذكريات العمر :):)

Bent Men ElZman Da !! يقول...

ربنا يخليهم مفرحينك دايماً كده
ربنا بيبعت حاجات بسيطه عشان تفرحنا
ودى الحاجه اللى بتفكرنا مهما حصل ان ربنا بيحبنا اوى :))

A. Ibrahim يقول...

كلام معبر وجميل :))
تقبلي مروروي

Timo.. يقول...

سنة تالتة ابتدائي
خلتيني اشوفها بعيونك..

سنة تالتة ابتدائي
خلتيني حبيتها قوي..

سنة تالتة ابتدائي
لازم تاخدي صورة معاهم ونشوفها :)