الجمعة، 6 يناير 2012

ذكريات جيل الثمانينيات


# UP 20ده هاشتاج على تويتر عجبتني فكرته وقولت أتكلم شوية على جيلي جيل العشرينات

• احنا الجيل اللي طلع على أيامه كل الحاجات الجديدة وقبله مكنتش مشهورة أو " مكنتش موجودة" زي الدش والكمبيوتر اللي كان بادئ بطريقة بدائية خالص والجيل برضه اللي شاف اللاب توب والبلاي ستيشن


• جيل لحق اخر شوية من بلده وهي هوليود الشرق


• جيل مجلة ماجد وسمير وبلبل وميكي وفلاش ورجل المستحيل وروايات للجيب


• جيل أغلبه بيحب فيلم ميل جيبسون Brave heart وyou have got mail لميج رايان وتوم هانكس وجيل أغلبه حافظ أغنية تايتانيك لسيلين ديون وشافوا الفيلم أكتر من مرة .

• الجيل اللي شاف تطور الموبايل من "فردة شبشب" لغاية ما بقى تاتش

• جيل الأتاري ولعبة ماريو وسباق العربيات والدبابات وهو نفس الجيل اللي شاف الأيباد وأي فون والبلاك بيري ...

• الجيل اللي درس في ابتدائي في "مصر" لغاية سنة خامسة ابتدائي بس والجيل اللي شهد رجوع سنة سادسة ابتدائي تاني

• جيل لحق الأكل البيتي قبل الوجبات السريعة والديلفري

• جيل كان في على أيامه أكلات دلوقتي مبقتش معروفة زي ال "بوفتيك"

• جيل بقلظ وماما نجوى وعمو فؤاد وبوجي وطمطم الأصلي وبكار

• جيل الشيخ الشعراوي يوم الجمعة وبرنامج العلم والإيمان

• جيل أماني وأغاني وجيل ميلودي ومزيكا

• جيل اليتيمات عاطفيا والأحلام الضائعة اللي بنحاول نرجعها

• جيل صداقة الفيس بوك اللي الأصدقاء فيه غالبا مجرد رقم بيزيد أو بيقل

• جيل الصداقة والحب من وراء شاشة كمبيوتر وجيل الهدايا مجرد صور عالمواقع الإلكترونية

• جيل الناس المزيفين الكتار أوووووي والحسد والحقد والوحدة والمدنية المزيفة

• جيل الثورات العربية وكلمة حق ضد الظلم الجيل اللي شايل روحه على كفه

• جيل كلمتين وبس لفؤاد المهندس وأبلة فضيلة والى ربات البيوت وصباحك معطر مفتح مزهر وبالسلامة يا حبيبي بالسلامة :) والجيل اللي شاف كل ده راح ومفضلش منه غير أبلة فضيلة

• الجيل اللي لحق المسحراتي في رمضان ولمة العيلة عالسفرة والفانوس الأصلي بشكله الأصلي مش الصيني زي دلوقتي

• الجيل اللي كان بيشوف مدرسين الإنجليزي والكمبيوتر "نجوم سينما" والجيل اللي شاف استغلال المدرسين وبدأت في عهده الدروس الخصوصية عيني عينك

• الجيل اللي كان فيه الطلاب مع بعض مسلم ومسيحي متصاحبين وبيذاكروا سوى لأن الدين ملوش علاقة بالصداقة

• الجيل اللي البنات فيه كانوا رومنسيات أوي وفي نفس الوقت بقوا عمليات أوي واختلفت طموحاتهم واولوياتهم ومتطلباتهم في شريك الحياة

• جيل أغاني فولا فولا وكوكو واوا والبطة أنتيكا وكاك كاك أنا الفرخة واحنا الكتاكيت وكان في بنت اسمها تررم والساعة ف ايدك كام يا عمو الساعه كام :)

• جيل أغنية ماكارينا ورقصتها كمان والرقصات السلو في الأفراح :)

ذكريات :)

هناك 9 تعليقات:

Miss LoZa يقول...

الللللللللللللللله

البوست ده فى حاجة حلوة أوى

فى روحانيات زمان ومحدش هيحسها غير الى عاش زمان

كميل اوى يا نوستى :)

P A S H A يقول...

:))

يا رب تكوني بخير وفي أحسن حال إن شاء الله انتي وأسرتك الكريمة وإن شاء الله يكون عام سعيد عليكم جميعاً .

موضوع البوست جميل فعلاً ، فكرت أكتب واحد شبيه بيه من فترة ، بس يمكن من زاوية مختلفة شوية .. عن تحيز كل جيل لزمنه أو الفترة اللي عاشها بالأخص جيلي الأربعينات والخمسينات .. اللي دايماً نسمع منهم نقد لكل ما هو تالي لجيلهم من فن وأدب وأخلاق مجتمع وأحوال معيشة وخلافة !
باعتقد إن لكل جيل إيقاعه وظروفه وأحواله اللي بالتأكيد اتأثر بيها لأنه نشأ فيها وبيها وعليها .. على سبيل المثال : ارتبطت مع ابناء جيلي في الغناء بمنير وعمر فتحي وعماد عبد الحليم والحجار وغيرهم ممن ظهروا أيامنا ، علشان كده تلاقينا نحِن لأغانيهم القديمة اللي كنا بنسمعها لهم أول ما طلعوا واللي تقريباً كانت معظمها شكل بعض في الموسيقى بالنسبة لتلك الفترة ، إنما حماقي وتامر حسني ما اتعودناش عليهم أو لما ظهروا كنا خلاص كبرنا واتعودنا على قالب موسيقي معين !

لكن في النهاية الأصيل والجيد بيفرض نفسه سواء من موسيقى أو أدب أو أفلام أو غيرها .. لأني ما اعتقدش إن الأذواق بتتغير مع الزمن .. يعني أسمع الجديد وانتقي منه ما يشبعني ويطربني وكذلك القديم .. مش كل أغاني أم كلثوم بتعجبني (بالنسبة لي ع الأقل) .. وهكذا

آسف ع الإطالة

تقبلي مروري وتحياتي
:))

P A S H A يقول...

فيه ملحوظة بسيطة إذا سمحتيلي ، اللي هايقرا العنوان قد يظن بإنك تقصدين مواليد 1920 وليس المولودين في أواخر الثمانينات وأوائل التسعينات :)

AhMeD RaDy يقول...

lady E

يااااااااااااااااه انتى لسه فاكرة

دى كانت ايام ما يعلم بها الا ربنا ههههههههه

انا لسه فاكر النايتى ابو بريزة

ولسه فاكر البسكويت ابو عجوة القديم وكاراتيه يا لهوى يا جدعان

لا لا ولا اول لما ظهر باور رينجرز

وفاكر فيلم سوبر مان ... وفيلم اسمه تقريبا راس ابو توزة حاجة زى كدا كان اجنبى

لا لا لا ولا فاكرة بقى الفيلم الهندى فى العيد الكبير

فكرتينى بالذى مصى

ربنا يسمحك بقى دا الواحد بجد عمره قصير اوى

شكرا على التذكرى باحلى ايام كانت بجد حلوة فعلا

وجع البنفسج يقول...

انت قصدك جيل الثمانينات .. مش العشرينات !! بس عموما فعلا احنا جيل فلاش ورجل المستحيل .. وتايتنك وميج راين وتوم هانكس وميل جيبسون وجوليا روبرتس كمان ههههه

وتطور الكمبيوتر والجوال .. ولعبة ماريو ..

رجعت ثلاثين سنة لورا !! وعلى فكرة انا كتبت بوست مثل هيك بس ع اكبر وبالصور كمان بعنوان " رحلة إلى الطفولة " راح تلاقيها في المشاركات الشائعة ع مدونتي .. اذا حبيتي تسترجعي ذكرياتك بالتفصيل الممل !!

amiraali يقول...

هههههههههههههههههههههههه...
الجيل كله كان بيدور علي الجادون في غطيان الكاكولا مكنش اسمها بيبسي

Zawag alnaddy زواج النادى يقول...

السلام عليكم ورحمة الله وبركاته جزاكم الله خيرا على هذا الموضوع الجميل ومن قلبي بدعى ان اى حد هنا ربنا يرزقه بزوج او زوجه ويبقي تعارف فى الحلال ** بجد موضوع جميل ومشوق... بارك الله فيكم يا شباب

تحت العشرين يقول...

احلى سنوات العمر استفيدوا منها

حواء اليوم يقول...

عاوزنا نرجع زي زمان قول للزمان ارجع يا زمان