الأحد، 4 سبتمبر 2011

جامعة المنصورة فرع دمياط كمان وكمان

بدأت رحلة السفر النهاردة وحاليا مفيش حواليا غير صحرا عاليمين وصحراعالشمال ودرجة حرارة 39 درجة

الصحراء ليها قدرة غريبة على انها تفكرنا بمواجعنا وخيبات الأمل خصوصا لو كانت حديثة وليها القدرة كمان انها تفرحنا

وده في حالة لو كنا فرحانين

علي محمدين الزقزوق عنده 17 سنة لسه شاب وبيبدأ حياته بخطوات ثابته

هو كل امل اهله متدين وحافظ القرآن ومتميز في دراسته وكل الناس بتشهد بحسن أخلاقه

اتخرج من الثانوية العامة وأهله فرحوا بيه لما دخل كلية التربية علشان هيبقى مدرس أد الدنيا ومش كده وبس ده أملهم فيه انه يبقى معيد في الكلية ودكتور كمان

أصله طول عمره متميز وعمره ما زعل حد منه وأول لما سمع عن تغيير فساد الجامعات كان اول واحد يشارك فيه علشان يغير الفساد ويدافع عن زملائه اللي الفساد قتل طموحهم وأحلامهم البسيطة

وهو لسه بيبدأ مشواره الجامعي في سنة اولى كلية التربية قسم لغة عربية جامعة المنصورة فرع دمياط اتفاجئ وزمايله اتفاجئوا اكتر منه انه رسب في مادة وازاي وهو اللي كان بيراجع لهم وفاهم الكتاب وبيشرحه عن ظهر قلب؟

ف راح للدكتور في الجامعة يستفسر انا حليت ايه غلط فال...... بكل برود قال له : خلي المظاهرات تنفعك!!!

علي مستسلمش وذاكر اكتر ودخل الدور التاني في المادة دي وكان بيشجع كل زملائه وبيحمسهم

ومرت الأيام وجه الترم التاني واتفاجئ علي ان عنده 6 مواد رسوب وباقي المواد امتياز وجيد جدا !!!!!!

طبعا ده بسبب انه ضد العميد وأكلي احلام الطلاب اللي بيطلق عليهم للأسف دكاترة

تدهورت حالته الصحية لغاية لما توفي اول يوم العيد البقاء لله والموت علينا حق

لكن انا كلامي هنا هو احنا لحد امتى هنفضل نشوف نموذج خالد سعيد بيتكرر حتى بعد الثورة؟

هي جامعة المنصورة دي واخدة سند رسمي انها تقتل فينا براحتها ولا ايه؟ ده حتى الدكاترة الشرفاء فيها بيتأذوا !!! انا مش فاهمه بجد في ايه الناس دي جزارين ولا دكاترة ومين اللي ادالهم دكتوراه اصلا يغور العلم من غير أخلاق

كان ممكن انا أو أي حد نبقى في مكان علي محمدين الزقزوق اللي ممكن متشوفش اسمه في الجرايد

ولا في الاعلام لأنه شاب دمياطي ملوش ظهر مش ابن حد معروف وحالته بتتكرر كتير

المصيبة اني فكرت كتير مفيش حاجة تثبت ان الأشخاص دول مش هقول الدكاترة لأنهم ميستحقوش اللقب

هما السبب في وفاته !! الحل اللي انا شايفاه ان أوراق علي في الست مواد تتصحح ويتقارن خطه بباقي

المواد اللي حل فيها قبل كده ولو طلع فعلا حل عالأقل حل ينجحه مش امتياز زي مستواه

الدكاترة دول يتسحب منهم لقب الدكتوراه ويتأهلوا نفسيا وتربويا علشان يعرفوا ان الطلاب اللي قدامهم ولاد ناس ودمهم مش رخيص

هو احنا خلصنا من الضرب في المدارس والعاهات علشان يطلعلنا ناس بتموت الطلاب في الجامعات؟

وبعدين ازاي كلية التربية والأداب بيحصل فيهم كده الكليات اللي بيسموها بره كليات العلوم الإنسانية

انساااااااااااااااااانية

دي مش أول مرة أشوف حد بيتظلم في كليات جامعة المنصورة فرع دمياط وجامعة المنصورة نفسها

وانا نفسي اتعرضت للظلم اكتر من مرة في الجامعة دي وبعدين هيفضل الحال كده لغاية امتى؟

علي محمدين الزقزوق ممكن كان يبقى أي حد فينا والمصيبة ان دي مش حالة منفردة

انا مقدرتش اسكت وكان لازم احكي حكاية شاب مات مقهور وأهله ملحقوش يفرحوا بنجاحه وكل ده لأنه في جامعة مصرية

البقاء لله


هناك 13 تعليقًا:

غير معرف يقول...

إنا لله وإنا إليه راجعون
تقبله الله في رحمته ورزقه الفردوس الأعلي إن شاء الله

30 سنة من حكم مبارك والحزب الوطني جعلت الفساد يتغلغل في كل أنحاء البلد
الفساد اصبح كالمرض العضال في جسد ضعيف
أتمني أن لا تكون الفرصة في شفائه قد ولت وانتهت

رحم الله هذا الشاب الذي راح ضحية التعبير عن رأيه

Miss LoZa يقول...

بجد اصلا حسب الله ونعم الوكيل
انا لله وانا اليه راجعون
انا مش عارفة لحد امتى البلد دى هيفضل متأصل فيها الفساد كده !!!

حَنيّـن نِضال يقول...

انا لله و انا اليه راجعون

حسبي الله و نعم الوكيل في كل ظالم أثيم

اللهم اهلك الظالمين بالظالمين اخرجنا من بينهم سالمين @!!!

نجاح الثورات لا يكم باسقاط مبارك ولكن يكمن بتطهير كافة المؤسسات و المجتمع و الوطن مهكذا علقات تقتات على دم اخواتهم

reemaas يقول...

اسألينى انا عن جامعه المنصورة
فيها خمس سنين لما طلعت عينى

الله يرحمهويحسن اليه
لو مظلوم حقه عمره ما هيروح

سُـمـيّـة يقول...

سلام عليكم
إنا لله وإنا إليه راجعون
بجد شئ محزن أوى
كل الظلم دا بجد بيخلينى أفكر فى كلمة أبى لما قال احنا لسه منستاهلش الثورة ولا نستاهل التغيير اللى بجد عشان الناس من جواها وحشة
البقاء لله وبجد ربنا يصبر أهله

Sarah .. يقول...

البقاء لله
..
الموضوع دا بالنسبالى يبقى كلاكيت تانى او تالت مرة
حصل بالظبط فى جامعتى .. اللى هىّ جامعة المنصورة .. ان دكتور اتسبب فى ان طالب ينتحر!
بنفس الطريقة والاسلوب والظلم دا .
والابشع .. ان الطلبة لما ثاروا على عميد الكلية والدكتور .. طلعوا ورق يثبت ان الطالب دا ما سقطش ودا عكس اللى حصل تماما .... وبعد الاعتصام فى الكلية عشان حق الطالب دا ميروحش .. كانت النتيجة ولا حاجة !
والمرة التانية .. كان ان الدكاترة وقّعوا طالب فى تيرم كامل وهو فى الليسانس .. لمجرد انه عمل منتدى بيساعد فيه الطلبة بالمحاضرات وغيره ...
لان الدكاترة كانوا معترضين ومعرفوش يقفلوه .. فقالوله _ بنفس المنطق _ خلى اللى بتعمله ينفعك !
والموضوع موصلش للطلبة بس .. كان للمعيدين كمان
رؤساء القسم كانوا بيماطلوا فى مناقشة رسالة الدكتوراه لمعيدة عندى واتسببوا فى وفاتها .. لاسباب شخصية بحتة .
...
الحل من وجهة نظرك يا ليدى .. منطقى
بس مش هيحصل .. الدكاترة مش هيرضوا بان ظلمهم يتكشف .. بسهولة جدا زى ما حصل فى كليتى انهم يغيروا الدرجات والتقديرات وتبقى دى مستنداتهم الرسمية !
الفساد مكنش فى النظم بس .. دا للأسف فى كل المؤسسات وكل الشخصيات المسئولة .
كلنا اتعرضنا للظلم بشكل أو بآخر .. و ولا مرة عرفنا ناخد حقنا
بس اللى عند ربنا مش هيضيع ابدا .
..
حسبى الله ونعم الوكيل .. وكفى .

غير معرف يقول...

المشكلة ان المعروف فى كل انحاء الجمهورية ان جامعة المنصورة اسوء جامعة وطبعا وفرعها دمياط بالتبعية الدكاترة ميعرفوش ربنا والطلاب طالع عينهم وعين اهلهم وفى الاخر يسقطوهم ويشيلوهم مواد ويدفعوا ثمن الكتاب تانى حتى لو معاهم من السنة اللى فاتت وطبعا سعر الكتاب معروف انه غالى فى دمياط والمنصورة امال هيركبوا عربيات اخر موديل منين من فلوس الطلبة خلاص بقى كفاية عليهم كده لازم نصحى بقى ونفوق ونعمل مظاهرات لحد ما يبعدوا عننا زى ما حصل فى كتير من جامعات مصر

MaNoO يقول...

الله يرحمه ويجعل مثواه الجنه
وينتقم من كل ظالم ظلم حد فى يوم من الأيام
هو الموضوع دا عد الثوره ؟
هستأذنك انا عايز تفاصيل اكتر عنه ورق او ناس تشهد او وصلينى بأهله اى حاجه لو سمحتى

قلم رصاص يقول...

انا لله وانا اليه راجعون
حسبنا الله ونعم الوكيل

الثوره لم تدخل الجامعة بعد
لكن التأخير دا شيئ طبيعي لحد ما على سطح اﻷحداث يهدى شويه خاصة في محاكمة قتلة الشهداء وعودة اﻷمن وعجلة الانتاج تدور من تاني.. دور الجامعة جي جي لامفر ان شاء الله.. ومعادش هيبقى فيه ظلم تاني ان شاء الله

وإصلاح الجامعات يبدأ- في رأيي- من اختيار قياداتها بالانتخاب بديلا عن التعيين.. وتستبعد قبضة الامن بقى وكفانا مذلة وقلة قيمة

ان شاء الله حقه لن يضيع حتى لو اتأخر شوية

شمس النهار يقول...

لا حول ولا قوة الا بالله

معقول كده هو لسه في كده

ان شاء الله من الصالحين في جنة النعيم
وقاتله ربنا يقتص منه

The illusionist يقول...

كفره

rona ali يقول...

لا اله الا الله
ربنا يصبر اهله وان لله وان اليه راجعون
حاجه محزنه لما تشوفي شباب زى الورد بيموتوا حواليكى قبل حتى مايحققوا اي شئ في حياتهم
ومع ذلك مازال شباب كتير حابين المرمطه في البلد دى عن انهم يتغربوا ويدوا مجهودهم لبلد اخري فعلا حاجه تحزن :(

بنت قلبى يقول...

حسبى الله ونعمه الوكيل
ان لله وانا اليه راجعون
استغفر الله العظيم يارب
لعند امتى بقا هنفضل كده
ما تفوقوا بقا لديكم حرام كده والله
ليه الفساد الا بقينا فيه داا
يوم ليك ويوم عليك
ياااااااااااااااااااااارب على الظالم