الثلاثاء، 28 يونيو 2011

اسمك ايه؟ تفااااااااااااهه


تعليمنا أحسن تعليم وصحتنا في أحسن حال وأكلنا من صنع ايدينا وبنمشي في الشوارع بإطمئنان

وبرغم ان التعليم مش مجاني الا ان اللي عايز يتعلم ممكن يلاقي شغل بسهولة ويشتغل علشان يبقى معاه مصاريف الجامعة وبعدين يقدر يدخل الجامعة اللي يحبها في الوقت اللي يحبه ويدرس ويبدع ويعمر الأرض في المجال اللي يحبه

اقتصادنا عال العال وكل شاب يقدر يفتح بيت في الوقت اللي يحبه يشتغل سنة او سنتين بالكتير فيقدر يوفر احسن شقة ويعمل احسن فرح وكمان يقضي شهر العسل في المكان اللي يختاره هو وعروسته

الناس بتحب بعض ومحدش فاضي يتكلم عن حد

كل مصري بيقرأ عالأقل 6 كتب في السنة والمصريين بيتطلبوا بالإسم في كل بلاد العالم علشانهم مبدعين

الديموقراطية عندنا حاجة طبيعية والكاتب مهنته عظيمه ومفيش ولا دار نشر بتستغله بالعكس بيعملوا عروض رائعة علشان يجذبوا بيها الكتاب

عندنا فن راقي في كل مجالات الفنون لما كل الناس بيشوفوه بيعرفوا اد ايه احنا عظماء

كل واحد مهتم بنفسه وازاي يطور نفسه ويحسن حياته ومفيش ولا حد بيأسفن في زمايله في الشغل ولا حد بيتدخل في شئون حد ويجرحه ويحسسه بالعجز ولا حد بيقول أسئلة من نوعية جبتي كام في الثانوية العامة؟

هاااااا هنحضر خطوبتك امتى؟

حددتوا فرحكو امتى؟ مش أن الأوان بقى انكو تجيبوا اول بيبي؟ طيب مش هتجيبي أخ أو أخت لأبنك او بنتك؟

.................. الخ طبعا ده مبيحصلش في مصر خالص

وكمان من اول يوم المخلوع اتحاكم ورموز الفساد ظهرت صورهم في كل مكان وهما في السجن وبيتحاكموا

والضباط والقناصة والبلطجية أخدوا أحكام مشددة وقلوب امهات الشهداء فرحت ان اللي قتل ابنها وضناها اتحاكم وأخد عقابه وإعلامنا أحلى من أي اعلام في الدنيا

ولذلك ولأجل كل ما سبق وأكثر ف احنا فاضيين بقى ومعندناش مشاكل وحياتنا بمبي بمبي بمبيييي

فلما نلاقي صور في النت لميكي وميني لابسين لبس ملوش علاقة بالإسلام أصلا

وأقصد بالإسلام الوسطية واللي فاكر ان ده الزي الرسمي للإسلام غلطان أوي لأن الرسول صلى الله عليه وسلم لبس كل الملابس وكمان الحجاب ملوش شكل ولا لون محدد لكن ليه صفات انه لا يصف ولا يشف

ولما واحد متخلف يقول هو المنقبات دول فاكرين نفسهم حلوين يعني كلام كتير تهزيء في المنقبات

ويقول من بين كل 10 تلاقي واحدة حلوة تستاهل تتنقب فعلا وانت ماااااااااااال اهلك هي شايفه نفسها حلوة

المهم اننا نشوف الكلام ده ونسكت عادي وملاقيش حملات عالمدونات ضد عدم توفيق عكاشة

لكن لما نجيب ساويرس يعيد نشر صورة زي دي منشورة اصلا عالنت يبقى عمل ذنوب الجبال وأخطأ الخطأ الذي لا يغتفر

واعتذر مرتين مرة عالتويتر ومرة عالفيس ولقيته كاتب نفس الكلام اللي انا فكرت فيه انه بيحترم الإسلام

وان اكتر من 95 % من الموظفين في شركاته مسلمين لكن ازاي لن نقبل الاعتذار دي اهانة ده بيسخر من المسلمين ولازمن وحتما ولابد نقاطع منتجاته ومش كده وبس كمان نبعتله أبو رجل مسلوووووخة

ولما يعتذر يبقى يلا يا شبااااب همتكو معانا المقاطعة جابت نتيجة يلا نقاطعه اكتر وده من باب ان لو حد غلط فيك اوعى تصالحه علشانه اعتذر لأنه محتاجلك ولأنك احسن منه ده ايه المنطق ده !!!!!!! منطق صنع في مصر

كل ده مش علشان صورة لأن حملة مش بفلوسنا يا ساويرس من زماااااااان اوي مش من النهاردة بس ومكنتش عارفه سببها لكن عرفت دلوقتي ان في حاجة اسمها حزب المصريين الأحرار وفي سياسة دخلوها في الدين وحاجات كده عملت كوكتيل معفن عمل تربنتينه في مخ الناس

أغلب الشعب للأسف جاهل وفاضي ومريض نفسيا وبيضحك عليه بالدين زي ما البريطانيين قالوا علينا في كتبهم

ان احنا شعوب نقبل نتمرمط لكن منقبلش ان ديننا حد يمسه وفي نفس ذات الوقت بننصر ديننا بإننا نتكلم أو نغني او نهاجم أشخاص لكن نبني ونعمر لأ نعمل حاجة تبين ان ديننا دين العالمين ودين التسامح ودين متصل بكل الأديان لأ نعمل حاجة تفيد الإنسانية لأ كل حاجة ايجابية اختصرناها في شوية هجوم على ناس وعمل المشانق لبعضنا ومن بعيد عمالين يتفرجوا علينا ويقولوا شوفوا العالم التالت بيعمل في بعضه ايه شوفو الناس اللي عالة على الدنيا وبيستوردوا كل حاجة من عندنا من أول المنتجات المختلفة لغاية العلم لغاية الخيابة لكن كويس انهم مبياخدوش حاجة كويسة من عندنا

المسلم من سلم المسلمون من لسانه ويده والدين مش للتربح زي مابيحصل فى قنوات اللى مسمين نفسهم قنوات دينية أبعت مليون رسالة لآ يا ساويرس يا ترى مين هيكسب من وراء الرسائل دي؟!!

ويا ترى حد عارف اصلا فودافون واتصالات ملك مين !!! ولا علشان مبيظهروش في التلفزيون ومحدش عارف هما مين ولا بيعملوا ايه يبقى خلاص طالما مبيتكلموش هما كده كويسين وبيشربوا اللبن قبل ما يناموا ونشتري خطوط تليفوناتهم وعجبي .

هناك 10 تعليقات:

Noha Saleh يقول...

اولا اى حد هيفكر يقاطع ساويرس هيبقى مش فاهم ان ده فى مصلحة ساويرس شخصيا
بمعنى ان لما مبيعاته تقل اسهم البورصة هتنزل الارض هو هيشتريها كلها تانى بأسعار رخيصة وكده كده هتبقى ازمة وهتعدى فهيرجع يبيعها تانى بأسعار عالية ويكسب اكتر
الحركة دى عملها احمد عز قبل كده
اما توفيق عكاشة ده شخص سفيه بيتكلم وهو مش عارف بيقول ايه ومفيش حد فى مصر مايعرفش كده عنه
احييكى على البوست الهايل
المفروض نكون فاهمين اكتر من كده معاكى حق

Noha Saleh يقول...

نسيت اقول ان موضوع ساويرس والاسهم ده مش كلامى ده مقال شوفته واقتنعت باللى فيه:)

Bent Men ElZman Da !! يقول...

ان ساويرس غلط ده شئ مؤكد
وان المقاطعه فى البدايه كانت فى محلها
بس بعد ما اعتذر بيتهيألى الموضوع اختلف
هو اه الاعتزار بتاعه وانه يقول كنت "بهزر" ده رد مش طبيعى
بس انه فى الاخر حس بغلطه ده كفايه
وبعد ربنا قال فى كتابه "والكاظمين الغيظ والعافين عن الناس والله يحب المحسنين"
صدق الله العظيم
دينا قالنا اننا نسامح
والدين معامله

نيللي علي يقول...

اولا بوست رااااااااااااااائع
هرد عليه بمقولتى المشهوره عن كاتبى الحبيب يوسف ادريس

"اذا كنا قادرين على العظمه فلماذا التفاهه""

كلنا بنختار السهل مظاهرت ..جعجعه فى التلفزيون وكلام فى ضهر الناس
كلام كلام كلام كلام لكن فعل لااااااااااااااااا

اما بتاعت قناه العفريت مش الفراعين ده واحد سفيح وجاهل...

مشكلتنا اننا مش بنحب مصر لو بنحبها كنا حاولنا ننهض بيها لكن لاسف بنحاول نموتها .ولو على اللى بيحصل فينا فنستهل لاننا لو كنا ايد واحده مكنش حصل المهزل اللى بتحصل دلوقتى

Unknown يقول...

عندك حق في كل كلمة قولتيها
و ازود معاك .. بافتراض ان ساويرس فعلا اهان الدين و بافتراض سوء النية و كل اسواء النية في الدنيا .. الحل مينفعش يبقى كده ابدا
دي حلول نتائج و حلول خايبة .. الحل الحقيقي انك انت و هو تظهر كمسلم فعلا و تحاول توصل للناس الفكرة الصح عن دينك للدرجة اللي تخلية يقول قد ايه الدين دا عظيم ..

mohamed ghalia يقول...

احنا محتاجين نعمل فورمات لكل مورثناالثقافى القديم
ونعمل ثورة على هعتقداتناالقديمة كلها

sony2000 يقول...

عوزين ثوره
بعد الثوره:)

AhMeD RaDy يقول...

تصدقى لو قولت انى بقيت تعليقاتى معظمها على الموضوعات دى هو علامات استفهام

لان فعلا اللى بيحصل غررررررررررريب بجد

~ISLAM~ يقول...

انا متفق معاكى فى كل حاجه
وعايز احط مليون خط احمر تحت الجمله دى
(أغلب الشعب للأسف جاهل وفاضي ومريض نفسيا وبيضحك عليه بالدين)

بس مش هقول حاجه
انتى قلتى اللى عايز اقوله

Lady E يقول...

Noha Saleh

Bent Men ElZaman Da !!

نيللى

Ahmed Mustafa - zema

mohamed ghalia

sony2000

AhMeD RaDy

iـــــــــــsــــــــــlــــــــــــaـــــــــm

شكرا

نورتوني