الأحد، 6 فبراير 2011

كفاية سكوت



حد فاكر اسراء؟ حد فاكر بكائها الممزوج بالصريخ لما قابلت مامتها ؟هتقولوا اسراء مين؟هقولكم اسراء عبدالفتاح اللي اتقبض عليها علشان جروب 6 ابريل علشان كانت زي ما بتقول بتفضفض عالفيس بوك في الفترة دي كان في اعتقالات كتير للمدونين ولمستخدمي الفيس بوك واشتهر ان المدونين مشاغبين لدرجة ان في طبيب قاللي : انتي مدونة من اللي بيتقبض عليهم دول؟! فين بقى الحرية والديموقراطية والمهلبية اللي كل الناس بتتكلم عليها كتير ومن أهلنا اللي كانوا بيخافوا اننا نتكلم لدرجة ان بعض الأهالي منعوا بناتهم من دخول النت أصلا والبعض اكتفى بعدم مشاركة ابنهم او بنتهم في أي لقاء تدويني بيبقى أصلا هدفه الخير ومساعدة الأخرين
أي بنت فينا كانت معرضة انها تبقى مكان اسراء أنا عارفة ان السجن واحد بالنسبة للبنت وللولد بس عالبنت أصعب بكتير وعارفة أن السجن علشان كلمة حق شرف وحرية لكن أغلبية المجتمع بيحب يمسك في المجني عليه وينصر الجاني دي ثقافة عالمية بس موجودة أكتر عند الناس اللي أفقهم ضيق اللي بيسيبوا المغتصب أو المتحرش ويقولوا البنت كانت لابسة وحش !! اللي يسيبوا الحرامي ويقولوا اصل اللي اتسرقوا يستاهلوا السرقة والحرامي مظلوم واللي بيسرق بيروح مارينا وبيلاقوا لكل حاجة مبرر زي برضه ما بيقولوا ان حال البلد بينهار علشان المظاهرات في ميدان التحرير متعاطفين مع الجاني ومخليين اللي عايزين الحق هما الجناة
اللي بيحصل من يوم 25/1/2011 أنا فخورة بيه وبالشباب دول وربنا يرحم الشهداء هما وكل اللي قبلهم بجد ومن قلبي ومن غير خوف من أي حاجة وأي حد كان نفسي أكون معاكم بالرغم اني عارفة كويس ان اللي بيحصل ده موجود في بروتوكولات حكماء صهيون أنهم يشغلوا الشعوب بالثورات على حكامهم بس هو اللي وصل الشباب لكده وهو السبب واللي بيقولوا ان حتى لو ملاك من السما حكم مش هيعجب الناس عندهم حق لكن اللي بيحكم حاليا عمل حاجات كويسة لكن أضعاف أضعاف أضعافها حاجات بشعة أنا موجوعة على الشهداء اللي ضحوا بدمهم وحياتهم علشان بلدهم تعيش زي ما أنا لسه موجوعة من ضحايا العبارات الغارقة والطائرة المصرية اللي اضربت في الجو وقالوا انها وقعت لعطل في المحرك والمسرح المحروق وحزينة على ان المسيحين مفكرين ان المسلمين مضهدينهم وعلى فكرة دي كمان حاجة متبادلة المسلمين كمان مفكرين ان المسيحين مضهدينهم والاتنين ميعرفوش ان اللي مضطهدنا احنا الاتنين نظام كامل وراه ايد خفية عايزة النهرين من الفرات للنيل اللي متأكدة منه لو الشباب دول روحوا مفيش أي حاجة هتتحقق وكلهم هيتعجنوا في عجانة كبيرة ويطلع منهم متظهرين صغيرين واللي قطع النت والاتصالات ده عمل جريمة يا حسن يوسف ياللي بتقول ان فصل النت علشان المخربين ميتواصلوش احنا كل اللي بره مصر كانوا هيموتوا من القلق على أهلهم وأصدقائهم في مصر وكنا مبنامش وكل شوية نجرب التليفون ونحاول نتصل مفيش فايدة وبعدين هو انت فاكر ان لو في مخربين هيأثر معاهم فصل النت هيعرفوا يتصرفوا بأي طريقة ويدخلوا النت برضه
وكمان الست زعبلة سماح أنور اللي كنت بحترمها بتقول خلي المتظاهرين يولعوا مطالبهم اتحققت عايزين ايه تاني ؟ أنا أقولك عايزين بلد كويسة عايزين مصر ترجع مصر وافتكري ان لولا المتظاهرين دول كانت بلدنا هتفضل تتقدم بينا وهي عينيها في قفاها فاكرة انها بتتقدم وهي بترجع بسرعة للخلف الله أعلم ايه اللي جاي في المستقبل لكن أكيد مش هيبقى أسوأ من اللي فات واللي عرف يطلب حقه مره ويموت شهيد فداء بلده وأهله يعرف يطلبه بعد كده وميسكتش أبدا ربنا يوفق كل حر وحره عايزين بكرة أحسن في بلدنا

هناك 14 تعليقًا:

إيمان يقول...

مصر مهما حصل هتبقى احسن من قبل 25 يناير بفضل دم الابطال
واللى عرف يطلب حقه مره ومره ومره
مفيش حد رأيو غير التاني في الموضوع ده هم اللى عايزينا نحس بأننا مختلفين
بس احنا كلنا واحد 80 مليون ثائر ولو المرة دى عدت عليهم على خير اكيد المره الجايه لا

Days and Nights يقول...

الأخت الغالية

مليون شكر على المشاعر النبيلة ... وكل سنة وأنتى طيبة ... وعقبال 100 سنة ... جت متأخر شوية ... بس العشم أننا نآخد 25 و 26 يناير أجازة ... الأول عشان الثورة ... والثانى عشان الكلام الحلو الى بتكتبة صاحبة المدونة دى.

وياريت تزورينى ... إن شاالله كل سنة مرًة ... حرام تنسونى بالمرة.

غير معرف يقول...

ان شاء الله مصر هتكون بعد الثورة افضل واجمل من كل النواحي
ان شاء الله تكمل الثورة علي خير
ومتنتهيش في مهدها "ايوة في مهدها" لسه بدري
الطريق طويلة
ان شاء الله اكتب تعليقي هنا عن موضوع اخر بعد زمن يتكلم عن مصر مزدهرة وشعب حر وكلمة مباحة واخوة وكرامة.
لك كل التحية والتقدير

MaNoO يقول...

نزلنا الشوراع ولا نملك غير الامل
جالى تليفون يوميها الصبح من قطر حد بيقولى انتو املنا مفهمتش الكلمه الا اما جالى تليفون باليل من السعوديه من واحد مصرى بيبكى وبيقولى ياريتنى كنت معاكم مفهمتش برده الا اما انتفضت مصر فى تالت ورابع يوم وتشوفنى ست فى الشارع تقولى انتو صح احنا كنا فاهمينكو غلط ومش هنقول تخريب لان دى سيايات حكمه قذره تحتضر احنا ال80 مليون زى ماهما اللى كان بيحكمنا مكانش نبى كا انسان عادى مصر الجايه احسن بشبابها مصر الجايه احسن بحريه وعداله اجتماعيه مصر جايه

موديل يقول...

عارفة ، انت المفروض تحمدي ربنا ان لكي موقف و رؤية ثبتت ،
انا مبلبلة تماما ، اشوف ثوار و مظاهرات اتاثر بشدة
اسمع خطاب أبكي و انزوي و يصعب علي
اسمع عن جرائم.. و دماء .. دمي يتحرق و اشعر اني عبيطة
اقرا في ابي بي سي عن ثروة ريس بالمليارات
اقول كذابين و افاقين و عايزين يضعوا زيت على النار و فتنة و يولعوا فينا
طب ما لما معاه 70 ممليار دولار زي ما بيشنعوا عليه
كان مستحمل الامريكان ده كله ليه الا عشان ال مليار دولار اللي بيوهاله
اشوف مسيرات ابقى نفسي اشارك فيها و اقول اخخيرا ما بقناش انهزاميين
اسمع عن تحسين اوضاع في البلد و تنازلات من الحكومة
اقول طب ما اهو مش لازم نزل الكبار و صبرنا الكتير ما بقى الا القليل و ليه نمشيه منكس الراس
اشوف دم الشهداء و اسمع تاوهات اهلهم احسبن و اقول لو ده ابني كنت زماني شربت من دمهم
اتابع تقارير بتقول ان امريكا ارسلت فرقاطات على السواحل المصرية بخحة الدفاع عن مصالخها في المنطقة و السفارة الامريكية بتدعي ان في سيارات سرقت منها و كالبة اجلاء رعاياها و خايفة و مرعوبة و اسرائيل غيرت رئيس الاركان و هددت ان لو الغاز المصري لم يصلها فستعتبر هذا تهديد للامن القومي السرائيلي
اشوف ده
اقول طب و الجيش سايب ثكناته و قلب شرطة و بوليس
يا خبر
طيب ما سبتمبر قريب بس الامريكان ما يدخلوش
فعلا انا اشعر ببلبلة
اللهم ولي من يصلح

موديل
صاحبة مدونة عايزة اخس

مجرد حلم صغنتوت يقول...

انا كمان قلقانة لو هم مشيوا ايه اللي هيحصل
بس متأكدة ان اللي هيحصل ساعتها هيبقى مش كويس
ربنا يسترها معاهم ومعانا كلنا والايام دي تعدي على خير ومصر تبقى احسن واحسن لان فيها ناس كتير بتحبها بجد

model يقول...

فعلا فرق كبير بين سماح و اسراء ، قال يولعوا ، ربنا يهديها
نفسي اعرف ازاي جالها قلب تقول كده
تكونش زلوة لسان
طيب هي ست متحققة و عايشة في مستوى مستور و لا تعاني البطالة
لام تشعر بملايين العاطلين وة الفقرا و الفساد المستشري و السرقة الفجة
و لم الناس تثور تقلهم يولعوا
حسبي الله و نعم الوكيل
اللهم ولي من يصلح
تفاعلت معامي جدا
موديل

قلم رصاص يقول...

ألف مبرووووك علينا كلنا
بلدنا رجعت لينا
عاشت مصر حره مستقله
وتحيا مصر للمصريين


كيف احوالك؟

^^

mallouk يقول...

ألف ألف مبروك لشعب المصري العزيز
وعقبى لباقي الشعوب المضطهدة
تحيتي ومودتي

Lady E يقول...

إيمان : الله على كلامك اللي كله حماس يا ايمي كلامك هينطق بجد

Lady E يقول...

Days and Nights : ما هي المشكلة اننا دائما بنفكر في الأجازة حتى لو احنا أصلا في أجازة

لا شكر على واجب

Lady E يقول...

ماشي بنور الله : فعلا لسه في مهدها في حاجات اتحققت وفي حاجات لسه بس مشوار الألف ميل بيبدأ بخطوة

أتمنى فعلا أن كلامك يتحقق

ملحوظة : اسمك المستعار جميل جدا بيفكرني بإبتهال اسمه ماشي بنور الله بدعي وأقول يارب تباركلي ف عيالي وف صحتي ومالي وف كل أعمالي بسعى لما ترضاه ماشي بنور الله

Lady E يقول...

MaNoO : مصر رفعت راسها بيك وبكل شبابها وبناتها وشعبها جوه مصر وبره كمان وكويس ان الناس فهمت اخيرا وفعلا كتير من اللي بره مصر كانوا بيتمنوا يكونوا موجودين في مصر ويشاركوا في ثورة الكرامة

يارب فعلا اللي جاي يكون احسن

Lady E يقول...

يتبـــــــــع