الجمعة، 24 ديسمبر 2010

حب الوطن فرض عليا





ايه كلكوا عليا ولا ايه رواية سفينة نوح من جهة والتلفزيون من جهة وكمان الجرائد من جهة تالتة
كل دول بيشتموا في بلدي ؟! طيب هنستفيد ايه كلنا لما نفضل نقول لها انتي وحشة انتي قاسية انتي اتغيرتي وبتتبعي مقولة : عشان ما نعلى ونعلى ونعلى لازم نطاطي نطاطي نطاطي ! طب وأخرتها ايه
صعبانة أوي عليا يا مصر عارفة أنا جاية النهاردة وكان نفسي أقول كلام كتير تاعبني منك لكن عارفة انتي كبيرة وهتفضلي طول عمرك كبيرة يمكن في كتير مش حاسين بقيمتك وفي كتير بيجرحوا فيكي لكن أنا عايزة أقولك اني بحبك واني لسه شايلالك ذكريات جميلة
وان برغم بعدي عنك لسه نفسي ارجع أعيش فيكي وأكمل دراستي فيكي

عارفة اني بفرح أوي لما بلاقي ناس في مراكز مرموقة مثقفين وأدباء وفنانين عرب بيقولوا احنا كنا بندرس في مصر
عارفة الأسبوع اللي فات عرفت شخصيتين عظيمتين والقاسم المشترك بين الشخصيتين انهم درسوا في مصر في جامعة القاهرة وفي جامعة الأسكندرية عارفه انهم بيتمنوا يرجعوا يوم من أيامك أصلهم حبوكي فترة دراستهم عندك
كان بإيدهم يختاروا أي بلد في العالم يدرسوا فيها لكن اختاروكي انتي عارفه ليه لأن فيكي روح مش موجودة في الدنيا كلها فيكي سحر وحنية وطيبة عارفه انك موجوعة لأن كل ده مداري لكن في وقت الشدة ولادك اللي بجد بتظهر جدعنتهم عارفة كام مرة ولادك بيساعدوا وبيعملوا الخير من غير أي مقابل من غير حتى ما يقولوا أساميهم عارفه حتى لو شكلهم شباب تايه ومش في دماغه لكن برضه فيهم جدعنه لسه مقدرش الزمان يمحيها

عارفة يا بلدي من فترة سمعت هشام الجخ بيقولك : بتخلفينا ليه لما انتي كارهانا ومن وقتها كل لما أزعل منك يجي في بالي بتخلفينا ليه لما انتي كارهانا ومين اللي قال انك كارهانا انتي كنتي فرحانه ومتفائلة بينا وبتحبينا وعندك أمل فينا وعارفه اننا ممكن نداوي جروحك وجينا احنا زودنا جروحك وانتي أصيلة ولا يوم اشتكيتي مننا عارفة قلبي وجعني لما شوفتك جريحة بتنزفي على صفحات مكتوبة بخط مش خط ولادك خط غريب عنك بيجرح فيكي لأنك هنتي على ولادك فهنتي على كل الناس
ااااااااااااه يا بلدي أنا دلوقتي بقولك بحبك بحبك بحبك مهما يقولوا الناس عنك

هناك 21 تعليقًا:

بنجاواتى يقول...

ليدى
ينفع اعلق ولا ايه؟؟؟؟
انا على فكرة سعيد بشعورك ده واحترمه جدا واسأل الله ان يستمر وانه يكون دافع للخير دايما

يمكن انتى وصلتى للقناعة دى بعد تجربة معينة ويمكن غيرك لهم تجارب اخرى شكلت تصورهم او تجارب اقل خلت تصورهم للفكرة متسرع شوية لكن عموما اكتر حاجة اسعدتنى ان كل صاحب رأى يوصل له بنفسه دون التأثر بالمؤثرات الخارجية

تحياتى يا ليدى

مدونة رحلة حياه يقول...

السلام عليكم
ياااااااااااااااااااااااااااااااه
اخيرا حد رجع يقول لبلده بحبك بالحرارة دية اخيرا حسينا ان فى حد لسه عنده احساس عايش بينبض بحب البلد دى اخيرا حد وجع شوقه ولهفته وعبر عنها
كلنا بنحبك يا بلدنا حتى لو قلنا غير كدا

AHMED SAMIR يقول...

لما الناس بتقول ان البلد وحشة و الحياة صعبة دة مش علشان بيكرهوها
بالعكس دة من حبهم و عشقهم لها بيتمنوا انها تصل لدرجة الكمال
ماسمعتيش صلاح جاهين و هو بيقول
و اكرهها و العن ابوها...بعشق زي الداء

غير معرف يقول...

كلام جميل و مؤثر و شعور راقي

MaNoO يقول...

مفيش حد فى الدنيا يقدر يقول بكرهها عارفه انتىق لتى نفس احساسى بالضبط والله بقينا نقول عيوب عيوب عيوب طيب ما نصلحها بقى نحسس بعض اننا بنحبها بجد لانها عمرها ما هتتغير الا بينا
هشام الجخ انا بحترمه وبحبه جدا بس بجد فى كلامه كلام قاسى اوى انا مبقدرش اتحمله بغير على بلدى ما بلاد الدنيا مليانه بلاوى لازم يعنى نظهرها وكمان ومش بنحلها طيب مانحاول نحلها الاول كدا
هيا فعلا مش كارهانا بس فى كتير بيحاولوا يكرهونا ويكرهوها فينا لكن عمرهم ما هيقدروا بنحبها وهنفضل طول عمرنا نحبها حتى لو موتنا فيها مش شده مشاكلها
تحياتى على احساسك الرائع اللى اكيد جوا كل واحد فينا

قلم رصاص يقول...

برافوا عليكي والله
بجد البوست دا علم جوايا جدا
سبحان الله مهما كانت ظروف بلدنا ومهما بنزعل منها ومن بعض ولادها بيفضل دايما جوا كل حد مصري جسر شعاع نور بينه وبين حبه ليها

المصري فيه ميزه جميله اوي مش موجوده في اي حد في العالم ، حب الوطن في قلبه شيئ راسخ.عارفه حتى واحنا اليومين دول بنعرف ان فيه جاسوس مصري لاسرائيل دا بردو مش هيخليني اغير رأيي دا لأن دي حاله فرديه لكن الغالبيه العظمى بيعشقوا تراب الوطن
بالظبط زي الام لما تقول ادعى على ابني واكره اللي يقول امين

بالظبط زي ما الأستاذ احمد سمير قبلي قال ان تعبير بعض الناس عن كرهم او زعلهم من البلد دا من حبهم فيها فعلا

واشاطرك نفس اللي قولتيه انه مصر رغم كل حاجه الوقتي مازالت محط جذب الدارسين العرب.. لأني شوفت دي بنفسي والله الأسبوع اللي فات وانا باسجل في ماجستير الاقتصاد بكلية الحقوق جامعة المنصوره..كان فيه شابين من الخليج واحد كويتي والتاني تقريبا اماراتي بيسجلوا دراسات عليا عندنا في الكليه

وقبل كدا من فتره لقيت على المنتدى بتاع الكليه ناس كتير من الخليج بيدخلوا يقولوا ان جامعة المنصوره ليها وضع خاص جدا هناك ومطلوب خريجيها بشكل كبير خاصة حاملي الدراسات العليا في مجالات القانون والاقتصاد وغيرها ..

فدا يوريكي اد ايه مصر لسه بخير مهما كانت ظروفنا الحاليه ومهما هنواجه من تحديات لسه.

بجد انا سعييييييييد جدا بالبوست دا
ربنا يكرمك

تقبلي مروري وتحيتي
^^

عمرو يسرى يقول...

اى حد لما بيقول البلد وحشه و يسئ ليها دا بيبقى كلام على اللسان ساعه غضب من شيئا ما ولكن هتلاقى فى قلب كل واحد مصر قاعده فيه ومربعه

هراء لا داعى له ..... يقول...

هو مين قال إن محدش يقدر يقول بكرهها


أنا شخصيا بكرهها


و مش طايقها

و مش طايق ظلم اهلها و فسادهم و إنحطاطهم ــ مع حفظ الإستثماءات طبعا ــ


بس دا وطن يجيب إهتراء فى الأدمية و إنحطاط عن المستوى الإنسانى لمرحلة وسطى ما بين النسان و الحيوان


و أكتر حاجة تضايق فيه

إن أهله مش بيعترفوا بكدا و مش بيصارحوا نفسهم بالحقيقة

رغم إن أول خطوات الحل فى علم المنطق

هو إدراك وجود مشكلة

و الإعتراف بيها


و من غير كدا مستحيل يبقى فى حلول



مش عيب لما نعترف إنها بلد مش حلوة و إننا ناس مش كويسين


العيب إننا نسكت و منحاولش نغير و نعدل و نحسن و نجتهد


و مش هنعرف ابدا نعمل كدا

غير لو وصلنا لرغبة التغيير ـ الحقيقة ـ

و دى مش هتيجى غير لما كلنا نعترف لنفسنا إننا ناس مش كويسين

و نذكر نفسنا دايما بكدا

و بضرورة و إلحاح و أهمية التغيير


هنا بس ممكن نتحسن و نتغير

احساس طفلة محبة للرومانسية بس واقعية يقول...

مصر

عارفة يا ليدى بقيت بحس بجد انها ام الدنيا
اصل هى مستحملة كتير ومحدش يستحمل اللى هى بتستحملة ويفضل صلب وقوى ومستمر فى العطاء دا غير الام بحنانها وخوفها على اولادها

كفاية ان لو موتنا فى سبيلها هنكون شهداء
دا دى تخليها عندنا بالدنيا ومفيها

يعنى هو مين اللى موحشها ومخلى فيها كل يوم كارثة غير التانية مش احنا
يعنى هى عبارة عن اية غير ارض ونيل وزرع وحضارة وتاريخ بنتباها بيهم لغاية النهاردة احنا اللى بنهملهم يبقى هى اللى من حقها تزعل مش احنا
عندك حق فى كل كلمه قولتيها

دمتى بكل خير
تقبلى مرورى

kmhmhgfd يقول...

الغريب فعلا ان اللى بيحسوا بقيمتها هما اللى بعيد عنها واللى فيها على رأى هشام الجخ خاربينها وهى طيبة عمرها ما اشتكت ربنا يخليكى لينا يا مصر
ميرسى ليدى بوست مميز

نيللي علي يقول...

اولا بحييكى على جمال مقالتك
تانى حاجه تعرفى مصر دى جميله اوى اوى وحنينه
ليه بيهنوها وهى ملهاش ذنب انى فى حد خلها وحشه
ده نيلها جميل والاثار تحفه فنيه مش عند اى حد
مصر فى قلوبنا

تعرفى ساعات بقول انا عملت ايه عشان مصر تبقى حلوه
نفسى اكون ايجابيه مش بالقول لا بالفعل

كتير بفكر اعملها ايه ..
بس بلدنا احلى البلاد مهما روحتى بتحسى بدفه فيها مش بتحسى فى اى بلد تانيه
وشعبها شعب طيب لكن الدنيا جارت عليه

وبجد انا بقيت مدمنه مقالاتك

MaNoO يقول...

رخم انا عارف جيت البوست دا مرتين بدعيكى تنورينى فى المدونه نبدأ العام الجديد

aL-NooR . يقول...

تحية حلوة من الكويت :)
و انا كمان بحب مصر

نيللي علي يقول...

على فكره اغنيه عبد الفتاح الجريتلى اللى انتى حطها تحفه تحفه تحفه

P A S H A يقول...

كل سنة وانتي طيبة وبألف خير وصحة وسعادة إن شاء الله

وبإذن الله عام جديد سعيد عليكي تحققي فيه كل اللي بتتمنيه

تحية بيضــاء

نيللي علي يقول...

نفسى اعرف اسمك مش عارفه اناديلك ايه
طيب لو عاوزه ادلعك اقولك ايه يالدوده
ههههه دلع ليدى يعنى
المهم انا كنت عاوزه اقولك كل سنه وانتى طيبه بالسنه الجديده ويارب تكون سنه كلها خير عليكى يارب امين
ويرزقك بابن الحلال يارب امين
ومنتظرين مقالتك الجميله اللى وحشتنا

Lady E يقول...

بنجاواتى : اكيد ينفع تعلق يا بنجا

اللهم أمين وشكرا على احساسك الطيب

كلامك سليم وده ميمنعش ان الإنسان بيحب بلده لأن بلادي وان جارت عليا عزيزة

دمت بخير

Lady E يقول...

مدونة رحلة حياه : وعليكم السلام

الله على كلامك في ناس كتير بتحب مصر وبتترجم حبها أفعال وأقوال

دمت بخير

Lady E يقول...

AHMED SAMIR : طيب ما بدل ما يفضلوا يتكلموا يعملوا أي حاجة ايجابية يغيروا بيها اللي شايفينه وحش يغيروا ولو حاجة بسيطة أوي

الكمال لله وبعدين هي لو وحشة هتبقى وحشة لواحدها ولا أفعال الناس هي اللي بتخليها وحشة؟!

اكيد قرأت القصيدة أنا مصر عندي أحب وأعظم الأشياء

دمت بخير

Lady E يقول...

يتبع الرد على باقي التعليقات

كل سنة وانتم طيبين وبصحة وسعادة

غير معرف يقول...

يارب تكوني بخير يارب