الجمعة، 3 ديسمبر 2010

منوعات من واقع الحياة

-بيب بيب زمالك بيب بيب زمالك

زمالك يا مدرسة لعب وفن وهندسة

مبروك فوز الزمالك 4-3 النهاردة بجد الزمالك لعب كويس جدا النهاردة وخصوصا شيكا

وعقبال الدوري وعلى أي حال بالدوري أو من غيره برضه هفضل أحب الزمالك وأشجعه

- الانتخابات لا تعليق الا بقول سعاد حسني وجاهين في فيلم المتوحشة : " مش برضه أحسن نقتصر بدل ما نضرب بالألم- مش برضه احسن نقتصر بدل ما يضرب فينا الألم.

- مبرووووووووووك لقطر على الفوز في تنظيم كأس العالم 2022 وبرغم اني مبحبش جموع الشعب اللي مبتحبناش في قطر وبرغم ان قطر مساحتها صغيرة جداااااااااا كدولة لكن بجد أثبتوا ان الدولة مش بالمساحة الكبيرة ولا بالسكان الكتير وأنا فرحانه ليهم لسببين أولا ان قطر دولة عربية وأمريكا كانت مرشحة لتنظيم كاس العالم 2022 وفشلوا وبعدها كمان أوباما قال ان ترشيح قطر خطأ كبير! وتاني حاجة لأن من زماااااان وانا في اعدادي بنوتة قطرية سألتها : انتوا بتكرهونا ليه ؟ فقالتلي : انتوا مين؟ فقلت لها : انتوا القطريين فقالتلي مين اللي قال كده احنا بنحب مصر وانا بحب المصريين وبحب جدا معلميني وزميلاتي المصريين مبروك يا قطر وعقبال كل الدول العربية لما نشوفها في احسن حال

- عاصفة ثلجية تجتاح الدول الأروبية منهم المانيا وبريطانيا والمطارات متوقفة والمواصلات شبه متوقفه –طلعوا بشر زيينا مش سوبر بشر ومش عارفين يحلوا الأزمة دي- لأول مرة ابقى فرحانة اني مسافرتش لندن حاليا :)البرد السنة دي جاي بكل قوة وانا جربت فظاعة البرد السنة دي مرتين مرة لما كنا في مسقط ودرجة حرارة الجو وصلت ل15 درجة ومرة من يومين لما كان عندي حمى واسناني بتخبط عالجيران ومش قادرة أقوم اطفي التكييف البرد مبيرحمش علشان كده بقولكم شوفوا موضوع البؤجة الشتوية عند أ- خالد همس الأحباب http://hams07.blogspot.com/2010/11/blog-post_21.html وهنيالك يا فاعل الخير والثواب

- أحب أقول ان اللي بره مصر وبيفهم مش مريح دماغه ومش مرتاح من اللي بيحصل في مصر ده بيجيله النكد على طبق من فضة سواء من الاعلام المتعفن أو مباشر من المصريين ال..... اللي في الغربة واللي نفسي أشوف مثال واحد بس يدل ان الناس دي مصريين وحضارة 7000 سنة لكن كلهم مجمعين انهم يشوهوا صورتهم وكأنهم نفسيا بقو مدمنين انهم يبقوا – عكس عاليين- .

ويا حاسدين الناس مالكم ومال الناس ده كل قلب في ألم ولكل واحد كاس وربنا يحمينا من العين لأني بعاني منها حاليا وبتسائل سؤال بريء اومال لو كنت بحضر ماجيستير أو لقيت شغل كان هيحصل ايه !

(جمعة مباركة)


هناك 19 تعليقًا:

mrmr يقول...

مبرووووووووووووك يا ستى
بالرغم من انى مش بحب الكوره
لكن احب اشاركك فرحتك

وكل سنه وانتى طيبه بحلول فصل الشتاء
ربنا يجازيكى خير على التنويه عن البؤجه الشتويه

اقعدى بالعافيه

Lady E يقول...

mrmr : الله يبارك فيكي يا مرمر يا جميلة

تسلميلي


وانتي طيبة هو فصل الشتاء حل في كل الدنيا ما عدا هنا :)

جزاني واياكي

نورتيني

شمس النهار يقول...

مبروك للزمالك ومبروك لقطر

وانا بحب البرد والشتا

وفعلا الاجانب مش سوبر خالص
بس همه عندهم قوانين بتمشي علي رقبة الكبير فيهم

علشان كده قادرين يحافظوا علي النظام والعدل
فالناس حاسه بالامان وانها واخده حقها لحد كبير جدا
لكن برضوا بيضربوا لخمه في الاول تجاه الاشياء اللي ماتتحلش بالقوانين

اول مره ازور المدونه وان شاء الله مش هتكون الاخيره

:))

R-H-S يقول...

انتي زملكاويه ....امممممممممممم ومعترفتيش قبل كدا ليه؟
كويس انك مجتيش علي الاهلي حظك حلو

بالنسبه لقطر انا كنت متابع لما كانو بيقولو الدول اللي هتفوز وفرحت الصراحه لما قالو قطر ماهي روسيا كلها تلج يعني وبيلعبوا بكوره حمرا علشان تظهر في التلج قطر مش اقل يعني اي نعم الزقازيق اكبر منها بس يالا دوله عربيه تبعنا

تحياتي

MaNoO يقول...

احم احم اهلاوى انا ولكن اختلاف الراى مش عارف ماله ونحب ان الزمالك يقوم بقى من النوم خلينا نشوف كوره
انا مبسوط جدا جدا لفطر برده بعيد عن الكلام الكتير اللى بييجى منها
عجبنى من يومين زياره امير قطر السريه لمصر تخيلى كان جاى ليه ؟؟؟
يعزى فى مدرس درس ليه ولاهله وهو مصرى
وفىا لاول والاخر بلد عربيه نتمنى ان كل بلادنا العربيه تعمل اى حاجه تشرفنا

SHAPE YOUR LIFE (ABOALI) يقول...

ازيك يا انسانة
جيت اسلم بقالى كتير مدخلتش عندك
اعمل ايه بقى
الانسان ساعات فى وسط الزحمة بيفقد بعض من الياسمين
بس مهما درات بيه الدنيا لابد يشتاق لاريج الياسمين اللى فقده

حلوة المنوعات
ومتفق مائه فى المائه
مع عدا فى فوز الزمالك لانى دمائى حمراء

هههههههههههه
خالص التقدير

sony2000 يقول...

مبروووووكون مبروووووووووووووووك
ويلا عوذين نشوفك يوم البؤجه

فراشة يقول...

نونتي
بييب بييييب زمالك مبارك للي يلعب كويس ويستاهل الفوز
لسه واخده قرار من اسبوع مشجعش كوره:)

الانتخابات .. لاتعليق معادش فيه كلام يتقال

قطر ... اعلاناتها كانت عجباني كان باين فيها الحماس بجد وفرحتها لما عرفت عشان دوله عربيه زينا

المصريين ف الغربه أحسن مثال لتشويه سمعه مصر ههههههه آه والله

الناس حسدينك يا حبيبتي اقرأي كل يوم قبل النوم المعوذتين وفيه ادعيه عشان الحسد على ما اعتقد

وسلامتك كنت حاسه انك فيكي حاجه ... وحشتيني جدا ويارب أشوفك ع خير

قلم رصاص يقول...

عشان انا ولله الحمد معتدل كرويا
فباقولك : ألف مبروك للزمالك

وطبعا قطر أثبتت بما لايدع مجالا للشك ان الثقه بالنفس والامكانات المتاحه بتعطي الأمل في تحقيق الانجازات
لم تقل قطر عندي 7000 سنه حضاره ووقفت عد كدا ومشتغلتش ..انما عملت عكسنا لما اخدنا صفر كبير في تصويت الفيفا واحنا مقدمين على بطولة 2010

مصر مش قليله بوضعها وحضارتها واولادها انما مصر قليله بمسئوليها الغير مسؤليين..فرحان طبعا عشان الانجاز دا رغم الخلاف السياسي بين مصر وقطر ، سيحسب للعرب والمسلمين بشكل عام

البرد فعلا شكله السنه دي متربص لنا
ربنا يستر ماهو دا طبيعي اوي لأن التغييرات المناخيه كبيره اوي الكام سنه اللي فاتوا بسبب الاحتباس الحراري وغيرها من افعال الانسان على الأرض

اتمنى لكِ أيام وشهور وسنوات سعيده

^^

صبح يقول...

كاس العالم قطر حقلك انا كنت مروحة من البيت للشغل اه اصل الشغل بقعد فيه اكتر من البيت فاصبح هو اللي بروحلو ههههه
المهم ففاتحه الرادي بيقولو ان بعد كام ساعه حيعلن نتيجة الترشيحات و قطر مترشحة
قلت في عقل بالي ياااه لازم اعرف ان كانت حتكسب و بعدين راحت الفكرة من بالي في زحمة الشغل رجعت فتحت الرادي قطر نجحت
جيت افرح

قام جالي احسساس غريب مش زي بتاع اليسا لا احساس غريب

ان ليه افرح ليه افرح ان قطر حتنضم كاس البتنجان

هو ده حيفيد العرب بايه

ايه يعني لما نبقى نضمنا كاس البرتقال ده فادنا بايه

تكنولجيا اخترعناها نصرة للاسلام فلسطين خليناه تتف على اسرائيل

لا و لا حاجه من دي

رفعنا العمالة في العرب و نطحنا البطالة لا

كل فلوس بعزقة على لفاضي و ليه البذخ ده كلو و ليه برنامج بالضخامة دي
الغرب بيعملو كام استاد و خلاص اي كلام و احنا تكييف بتاع ناقص يركبو للعيبة مكيفات في تيشيرتاتهم

عبط في عبط و ماشيين للعبط لحد الفين و عشرين يااااااااه والله كان عندي حلم ان بعد عشرين سنة مانبقاش عبيطين بس في ناس بتخطط للعبط لبعد عشرين سنة نعمل ايه

خلينا بستعبط لحد ما نشوف اخر العبط ده ايه


على فكرة

زورينا في مدونتة اختنا مخبوطة حكايات الف خيبة و خيبة
الرابط ده يا اختي
http://1000khybawkhyba.blogspot.com/

Lady E يقول...

شمس النهار : الله يبارك فيكي

وأنا كمان بس مش لدرجة الثلج :)

أينعم
من دراستي للأدب بتاعهم فهمت كده بس الناس شايفاهم سوبر ناس وهما مش كده

دي حاجة تسعدني يا أحلى شمس أهلا بيكي دائما

نورتيني

Lady E يقول...

R-H-S : هههههههههههه اعترفت كتير قبل كده هي بقت جريمة يعاقب عليها القانون ولا ايه أيون أنا زملكاوية وبحترم الأهلي

قطر عملوا شغل كويس اوي بيجهزوا لليوم ده من سنتين
في ناس بتقول انهم نجحوا بالواسطة طب يا ترى الشقيقة المصرية اخدت صفر ليه في تنظيم مونديال 2010 طالما الحكاية بالواسطة !

Lady E يقول...

MaNoO : بأحييك على الروح الرياضية دي
والزمالك حاليا في مرحلة أنه بيغسل وشه يعني الحمد لله قام من النوم خلاص :)

على اد ما الحركة دي تبين وفاء ونبل أمير قطر
لكن اللي خلى امير قطر يعمل كده المدرس أكيد المدرس ده الله يرحمه كان متحضر وبيحب طلابه وكان فيه صفات المعلم بجد فلازم طلابه يحترموه
للأسف لو بصيت على كتير من جيل المصريين اللي بيدرس في الخليج من زمان وحاليا هما عكس الصورة دي
انا الحمد لله لحقت شوية من أخر المدرسين اللي بجد وعلى أيامي برضه كان في مدرسين يستاهلوا يضربو بالبوكس في مناخيرهم
تحية لأمير قطر ورحم الله معلمه

يارب ربنا يتقبل منك

Lady E يقول...

SHAPE YOUR LIFE (ABOALI) : الحمد لله

سبحان الله قبل التعليق ده أنا كنت عايزة أدخل مدونتك وبعدين لمحت تعليق لحضرتك بتقول انك مش بتقرأ الا لناس معينة بس كلامهم مفيد - ده معنى الكلام مش حرفيا- وفي نفس ذات الوقت ملقتش مدونتي في ضمن المدونات اللي حضرتك بتتابعها :) فأكيد زعلت لأني افتكرت اني خسرت مدون بحترمه جدا ورأيه قيم جدا زي حضرتك

حضرتك دمائك حمراء وأنا قلبي أبيض فيه خطين حمر :)

نورتني وأسعدتني بجد بالتعليق ده

Lady E يقول...

sony2000 : الله يبارك فيكي يا سوني

يارييييييت كان نفسي بجد أكون معاكم
ربنا يجعله في ميزان حسناتكم

Lady E يقول...

فراشة : الله يبارك فيكي

ان شاء الله يا فراشتي

ربنا يكرمك ويسعد قلبك

Lady E يقول...

قلم رصاص : الله يبارك فيك هي دي الروح الرياضية

قطر فعلا عملوا عرض تقديمي كويس جدا وأشتغلوا في العرض ده بنظام الإقناع بالإيحاء والتأثير في الأخر لما تفهم دماغه وتفكيره مش كده وبس ده غير الملعب والإمكانيات الكبيرة اللي حضروها والكلام ده مجاش من يوم وليلة ده مجهود سنتين متواصلين زي ما بيقولوا ووصل مجهودهم انهم يوصلوا فكرة انهم يعملوا كأس العالم في الشتا لأول مرة لأن قطر بتبقى حر في الصيف وفي الشتا جوها بيكون معتدل

البرد بيبقى قاسي أوي على الناس اللي مفيش عندهم امكانيات يواجهوه

اللهم أمين وأنا كمان بتمنى نفس الامنية :)شكرا وليك مثل دعائك

Lady E يقول...

صبح : ربنا يعينك على الشغل

برغم اختلافي معاكي بس بحترم رأيك

قطر أول دولة عربية تنظم كأس العالم والدولة اللي بتنظم كأس العالم بتستفيد ماديا وبتشغل شباب كتير زي ما قولتي ده غير طبعا تذاكر الطيران والمباريات والحجز في الفنادق .... الخ كل دي فلوس هترجع لقطر وهتغطي التكلفة اللي صرفتها وزيادة
ده غير الإستفادة الأدبية أن قطر هتاخد شهرة عالمية كبلد عربي وبيتنظم فيه المونديال وبالتالي هيتسلط الضوء على الدول العربية انهم متحضرين والغرب هياخدوا فكرة أحسن شوية عن العرب

نورتيني واكيد زرت مدونة مخبوطة :)

همس الاحباب يقول...

ههههههههه مبروك للزمالك
بالرغم من ان اهلاوى قلبا وقالبا
بس الفرحة حلوة وانتم بتفرحوا فى السنة مرة هههههههه
جزاكى الله خيرا وجعله فى ميزان حسناتك
وترجعلينا بالسلامة لن شاء الله
تحياتى