السبت، 27 نوفمبر 2010

تهطل الهطل هطلا

ايه كمية الهطل المنهطل علينا كالأمطار في التلفزيون ده تفتح التلفزيون تلاقي واحد فلاح بيقول ايه انا هنتخب اللي معاه مصلحتي حاجة كده يعني اصل غالبا انا مبتفرجش على الحاجات اللي تحرق الدم دي بمر عليها مرور الكرام وبعدين تلاقي صور لمدارس وخلفية بتقول بنينا 3000 مدرسة ومش عارفة كام مستشفى والخ الخ الخ انجازات رهيبة بصراحة
انجاز لما تتبنى مدارس وجامعات ونسبة الجهل تزيد
انجاز لما تتبنى مستشفيات ونسبة المرض تزيد
انجاز لما يشتغل أقل من 10% من الشباب
ايه الهبل اللي بيحصل في الاعلانات دي
ولا اعلان تاني متصور على الطريقة الامريكية ان المحقق أمريكي قاعد مع واحد بيقول له اتكلم علشان اساعدك وفي الأخر الواحد ده بيقوله هتكلم وهدي صوتي : هنتخب
لولولولولوي ستار ميكر سمعنا صوتك
والاعلان بتاع النجوم اللي واقفين طابور ورايحين ينتخبوا يا سلاااام هما مش لا مؤاخذه واخدين فلوس ع الاعلان ده لكن يا ترى هيعملوا كده في الحقيقة !
واعلانات تانيه فيها كمية هطل لا يصدقه عقل وبعيده عن أرض الواقع بعد شديد
ده غير بقى اعلانات الوفد المستفزة برضه اللي كفاية اوي اني اعرف ان السيد البدوي اللي خرب الدستور فيه علشان اكره الحزب باللي فيه جمعاء
حقيقي الشعب كله عارف الانجازات الكبيرة اللي مرت وبتمر بيها بلدنا
وكلنا عارفين ان بلدنا احسن بلد في العالم بالتأكيد - كانت كده أيام الفراعنة وحاليا احسن بلد بالكلام بس-

الحكاية من اخرها ان لو كان في انتخابات نزيهه لاتحاد الطلبة اللي هبطوا علينا بالبراشوت هتكون في انتخابات نزيهه في أي حاجه مهمه في مصر عمركو في حياتكو شوفتو حد يطلع رحلات الجامعة برقم البطاقة أنا شوفت كليتنا كانت كده واتحاد الطلبة والكلية كلها كانت وتني وتني وبتنتن أصلهم بيدو كورسات كمبيوتر وانجليزي ببلاش واللي معاهم بينجح بأعلى الدرجات وبيشوف الهنا كله اما الباقي خليهم نايمين وخلي الكورة تنفعهم

للاسف حظي العاثر قادني النهاردة لاني اشوف بداية برنامج 48 ساعة ولقيت الباشمهندز الاعلامي الأستاذ سيد علي بيقول واحد قابله في النادي - ايوه لو مكانش الناس دي تروح النادي مين هيروح- وقال له ان دايرتهم مفيش فيها حد يصلح للانتخاب فقاله لو مفيش حد صالح للانتخاب انتخب واحد مسيحي
يا سبحان الله ايه اللي حصل للراجل ده ! ده انا انبهرت بثقافته لما جه كليتنا وقبل الندوة اتحاد الطلبة بقو يترجوا الطلاب علشان يحضروا الندوة وانا مكنتش عارفه مين اللي جاي اساسا الندوة حتى لما عرفت الاسم مكنتش عارفه مين يعني بيعمل ايه

يا حضرة الاعلامي احنا بننتخب بالدين ولا باللي هيفيدنا انا عندي انتخب واحد معندوش دين أصلا بس هيراعي مصالح دايرته ولا اني انتخب واحد متدين بأي دين بالإسم بس وبعدين عالمة الذرة المذيعه اللي في نفس البرنامج اللي مش فاكره اسمها عملت اضافة واضافت كتير الحقيقة انه لو مش لاقيين حد ننتخبه ننتخب المرأه اللي في دايرتنا ياااااااه ايه ده يا شيخة انتي بتجيبي الكلام ده منين فعلا قطعت جهيزة قول كل خطيب الحقيقة هي دائما بتضيف اضافات زي دي .

خبر عاجل : كان في موقع مليان كتب pdf والموقع ده مرتبط بجوجل والموقع اتشال بكل الكتب اللي فيه انا زعلانه هيبقى لا قراءة تعييش في عالم خيالي ولا عارفين نعيش في عالم واقعي بجد والله ده حرام

هناك 8 تعليقات:

أميرة علي كوكب مهجور يقول...

الخلاصه لك الله يا شعب مصر

VÖltaa يقول...

الهطل شر لابد منه طول ماحنا فى مصر ياليدى
,

بالنسبة للكتب جربى ادخلى على 4shared
وابحثى عن الكتب
عليه كمية مش بطالة
وممكن تجربى ديفيدى فور اراب او رويات 2

مدونة رحلة حياه يقول...

الطبيعى ان من حق كل مواطن ان يقول اللى عاوزه ومن حق اللى مش مواطنين انهم يعملوا اللى عايزينه ود مش عشانهم دا عشان المواطنين بس هيعملوا ايه الغلابه ما المواطنين مش فاهمين

P A S H A يقول...

احم احم
هو أنا لو هاعلق حضرتك يبقى على آخر فقرة بتاعة موقع الكتب اللي اتحذف لان دي تقريبا الحاجة الوحيدة اللي متابعها هنا
‏:(
دمتي بخير

mrmr يقول...

هو التليفزيون وراه حاجه غير الاعلانات والهتافات والمسخره وتطلعى بالنتيجه
غليان الدم ثم الفوران ثم الحرق ثم ينقل البنى ادم الى الرفيق الاعلى

MaNoO يقول...

مع انى مش بحب الاسلوب المتشائم حبيتين دا او يمكن انا دايما احب بعد كل مشكله نقولها ندى حته تفاؤل بس انا معاكى فى كل كلمه قلتيهااحنا بقينا بنتعاير بالمستشفيات والمدارس اللى بتتبنى بفلوسنا وسمعنى سلام خلينا نايمين احسن
الحاجه هناء والمعلم سيد انا مسميهم كدا لانه ولا اللى قاعدين على مصطبه ام ابراهيم وباين عليهم اوى حبهم للحزب الوطنى ماهو اللى خلى الاشكال دى تبقى فى الاعلام لازم يتحمل الفتنه اللى فى البلد والتمييز وبرغم كل دا هروح وانتخب لسبب واحد هو الايجابيه مش اكتر
اه على فكره عجبنى اعلان الفنانين دا كفكره لذيذ

sony2000 يقول...

ههههههههههههه
يلا نتهطل اكتر
ونعمل جروب اسمو
هطلني شكرا:)))))))

غير معرف يقول...

لا ارى فيه أي (هطل)، وحتى إن كنا نختلف عليه فمن الحصافة أن نصفه بشكلٍ آخر غير هذا (الهطل) ولنضع البديل ما دام لا يرضينا

دمتِ بود