الأربعاء، 24 نوفمبر 2010

ماركة مسجلة



صباح ومساء الورد على حسب التوقيت المحلي أحب انوه في البداية ان الموضوع ممكن ميهمش الشباب وقد فعذر من بعجر

عرفت الأسبوع اللي فات معنى انك تكون مشغول لدرجة ان ميبقاش في وقت للنت وبجد احساس لطيف جدا ورخم في نفس الوقت تركيبة غريبة :)
الكام يوم اللي فاتوا قضيتهم في مسقط
في فروقات كتير بين مسقط وصلالة يعني في مسقط مثلا في كليات ومعاهد كتير جدا لو عايزة أدرس أي حاجه هلاقيها وطبعا البريتش كونسل وامديست هناك
أما عن أسعار أي حاجة ففي فرق كبير بين الأسعار في مسقط والأسعار في صلالة زي الفرق بين الأسعار في القاهرة وفي دمياط المفروض ان العواصم في أوروبا والدول المتقدمة بتبقى كل حاجة فيها أغلى لكن العكس صحيح في مسقط وفي القاهرة الأسعار أقل من المدن البعيدة
ودي حاجة غاظتني بصراحة لأن الأسعار في صلالة زايدة بطريقة مبالغ فيها جدا بالنسبة لمسقط

اكتر حاجة فرحتني في الرحلة دي هو اني حققت حلم بسيط من أحلامي والحلم بإختصار بدأ بإني كنت بشوف محلات ماركات الماكياج العالمية ومكنتش بحب أدخل المحلات دي وطالما مش هشتري أضيع وقتي ليه فكنت بشوفها من بعيد لبعيد وفي يوم وأنا في تانيه كليه كنت مع زميلة بنشوف الاكسسوارات والميك أب وهي اشترت ميك أب من ماكس فاكتر فقولتلها انتي متأكده ان ده الأصلي ! وطبعا كانت ماركة مقلدة ميك أب ماكس فاكتور وقالتلي يومها : احنا عمرنا ما هنقدر نشتري ماكس فاكتور الأصلي !!!!!! قولتلها ليه يعني ان شاء الله هنجيبه بس أكيد مش دلوقتي -أيام الكلية- المهم في العيد بعد العيدية وشوية مدخرات اخيرا اشتريت lipstick من ماكس فاكتر ومن ريميل لندن والeye shadow من صبايا مكياجي وبلاشر كمان وكلهم ماركات مشهورة وطبعا كنت فرحانه جدا يوميها اني اشتريتهم أخيرا واكتشفت اكتشافين أول واحد أن كل lipstick في الدنيا فيه كمية رصاص رهيبة والرصاص أقل حاجة بيجيب تخلف عقلي وليه أضرار تانيه كتير - وده يفسر ليه كتير من الممثلات والمذيعات أغبيا لكن يا ترى المذيعين والممثلين الأغبيا عذرهم ايه
وعلشان كمية الرصاص دي لازم يكون في بلسم شفاه أو مرطب شفاه قبل الlipstick .

تاني اكتشاف أكتشفت ان الإنسان كل ما بيعدي مرحلة في حياته بتيجي مرحلة تانيه أعلى منها يعني الطموح والأحلام ملهاش سقف .

عرفت ماركات تانيه بنفس أسعار ماكس فاكتور زي مايبلين ونيفيا وريميل وبوبا وريفلون وماك وفي ماركات تانيه تعتبر تحف مش ميك أب لأن تصميم شكل علبة الماكياج نفسها شبه تصميم المجوهرات والماركات دي أغلى بكتير من ماكس فاكتور وأخواتها زي كلينك ولوريال وديور وشانيل ودول طبعا هبقى مجنونة لو اشتريتهم بالأسعار دي - حاليا- .

الشوبينج أو التسوق متعة بجد وبيريح نفسيا وبيفرح بشرط ان الإنسان يشتري احتياجاته مش يبقى مبذر ويشتري حاجات ويرميها زي ما ناس كتير في دول كتير غير بلدنا طبعا بيعملوا كده.

ويا سلام بقى لما دخلت محلات الميك أب في كارفور طبعا عايزين يبيعوا لي كل حاجه حتى لو كانت مش مناسبة لنوع بشرتي لكن لأني عارفه ايه اللي مناسب ليا كنت بشتري اللي انا عايزاه وبس ودي نصيحة لأي بنوتة بتشتري ميك أب محدش هيقولك ايه المناسب والأحسن ليكي ومحدش هينصحك لازم انتي تكوني عارفه ايه المناسب ليكي وأسماء واستخدامات الميك أب علشان اللي بيبيعوا في المحلات يهمهم انك تشتري وبس ميهمش أي حاجة تانيه .

لاحظت كمان ان الأجانب بيشتروا من أغلى محلات وأغلى مولات تقريبا بتفكرهم ببلدهم علشان كده بيشتروا منتجات بلادهم
الغريب بقى اني مشوفتش ولا ماركة ماكياج عربيه كله امريكي أو ايطالي أو بريطاني أو حتى تركي لكن مفيش مصري أنا عارفة ان ايفون ماركة مصرية لكن فين منتجاتها بره مصر ! يعني انا لما أحب أجيب منتج مصري افتكر مصر بيه مش بلاقي غير أكل ملوخية او مشروب فيروز أو جبنة مصرية لكن منتجات حقيقية مفيش .

بدأت في قراءة رواية سفينة نوح في العيد وانا مسافرة في الطريق وكمان وأنا راجعه في الطريق ومن كتر واقعيتها بتباطأ في تكملة قرائتها لأن لغاية دلوقتي فيها حاجات كتير جدا مؤلمه لأنها للأسف واقعيه نصيحة محدش يقرأها في العيد أبدا :(

هناك 10 تعليقات:

بنوتة مصرية يقول...

روح طفلة مش غايزة تكبر تسمحيلى اشاركك فى اسم مدونتك اصل انا كمان مش عايزة اكبر روحى متعلقة بروح الآطفال وحبهم للحياة .....
ثانياَ احيكى على معلوماتك القيمة دى اللى افدتنى كبنت بستخدم ميك اب غير كدة انتى مش غايشة فى مصر ؟؟

تحياتى

Qatarat Nada يقول...

اكيد اكيد اكيد مش اول تعليق
طريقتك وانتى بتحكي لذيذة :)
وبالنسبة للماكياج دلوقتي ماحدش بيبص للماركات زيك كدا الكل بيشتري وخلاص
بياخدوا الارخص وتقولك " وحتفرق ايه يعني ماهو دا بيعمل نفس اللى بيعمله دا "
دمتى في سعادة و " شوبينج " دايما
^^

أميرة علي كوكب مهجور يقول...

مليش في الميك اب :((
بس احب اروح اتفرج :D
خلصي الكتاب علشان اخده منك :))
يارب تكوني بخير

قوس قزح يقول...

البؤجة يا جدعاااان
متنسوش يوم 10 ديسمبر تجيبوا البؤجة و تيجوا
و لو مش هتقدروا يا ريت تبلغوا اكبر قدر ممكن من الناس
و التفاصيل هنا
http://hams07.blogspot.com/2010/11/blog-post_21.html
او هنا
http://kouskoza7.blogspot.com/2010/11/blog-post.html

Lady E يقول...

بنوتة مصرية : كلنا عندنا روح أطفال مش عايزة تكبر يا بنوتة

سعيدة ان المعلومات عجبتك

نورتيني

ميرام يقول...

من قلب مصرر العظيمة(:
ارسل تحياتي
والنبي هاتيلي معاكي واحد ليبستيك (:
ههههههههههه

Lady E يقول...

Qatarat Nada : اكيد اكيد أول مكرر يا ندى :)

تسلمي انتي اللي جميلة علشان كده شوفتي كلامي لذيذ

اللهم أمين وأنتي كمان :)

نورتيني

Lady E يقول...

أميرة علي كوكب مهجور : الكتاب فيه كتير من أخوه اللي أخدته منك يا مرمر

الحمد لله

تسلميلي ويسعد اوقاتك

Lady E يقول...

قوس قزح : شكرا انك فكرتيني يا قوس قزح يا وش الخير

Lady E يقول...

ميرام: اسمعكي بوضوح حول

بس كده اجمل ليبستك مليان مادة الرصاص لأحلى مرام :)

نورتيني