الجمعة، 20 أغسطس 2010

للسخافة فنون



فرق كبير أوي بين مسلمين ومسلمين
مسلمين بيبينوا المسلمين بطريقة جميلة وراقية وان ديننا اللي بيختم جميع الأديان وبيوحد جميع الأديان ، دين الهدايا والرحمة والحب والتسامح وكل القيم الجميلة ، دين السعادة
في ناس بيظهروا الصورة جميلة أوي وتشجع أي حد انه يعرف أكتر عن الإسلام وروعته وسهل جدا أنه يآمن بيه لما يفهمه
ماهر زين من الناس دي موسيقي وبيحب الموسيقى بدل ما يعمل كليبات منيلة بأي كلمات واي حاجة وشوية موديلز بيرقصو وخلاص وبدل ما يعمل كليبات "بيئة" عمل حاجة جديدة موسيقى موضوعها الأساسي الإسلام بتتكلم عن الإسلام بإحساس غربي وروح شرقية
الفكرة جميلة جدا وأتمنى ان ماهر زين يستمر لأن فعلا فنه راقي ومحترم ورائع وميبقاش ظاهرة وتختفي زي سامي يوسف .

نيجي بقى لمسلمين تانيين بيبنوا الإسلام بصورة مش محببة وبيتفننوا في تتفيه العرب والمسلمين سيبنا من الإعلانات والمسلسلات اللي بيبينوا المسلمين والعرب "عندهم تاتش هطل" ونيجي لإعلانات للأسف مصرية وهي اعلانات الشحاتة بين كل اعلان واعلان اعلان شحاتة أو حرق دم ابتدائا ب قبل ما نزيد مولود نتأكد أن باسبوره موجود وانتهائاً باعلانات الجمعيات الخيرية مصر الخير ومستشفيات السرطان بأنواعها واللي أسخفها اعلانات 57357 السخيفة ، ليه يعني تشويه الصورة دي ليه؟ معروف اننا كمصريين بنحب نعمل خير ونعمل صدقات ونقف جنب المحتاج لكن اللي بيحصل في الاعلام ده قلة وعي وقلة فهم وقلة ذوق وقلة أدب
وهي يعني الإعلانات هي اللي هتخلي الناس تتبرع مثلا جمعية رسالة اللي الناس طالعة بيها لسابع سما وجمعية خيرية وجميلة من فترة قلت اشترك فيها اتصلت برقمهم استفسر عن فروعهم في دمياط الست الكتكوتة اللي ردت عليا مكنتش عارفة ترد فقفلت التليفون وقالتلي قبل ما تقفل انا مش عارفة في فرع في دمياط ولا لأ وتك قفلت الخط من غير أي مقدمات ولا حتى عندها ريحة الذوق ! دول منظر ناس عايزين يساعدوا حد يبقى معاهم ويعمل خير وبعدين لما هما طيبين اوي كده ما يوفروا اعلانات التلفزيون دي ويستسمروها مش رسالة بس لكن كل الجمعيات الخيرية والمستشفيات ولا هو غباء مستحكم
ده حتى البرامج الحوارية الإسلامية اتحولت لمنتدى شكاوى ومعظمها مالية هو ايه اللي حصل للناس لو واحد مش مسلم هيبقى احساسه ايه تجاه المسلمين
هو ليه أي بلد عربية تانيه معندهاش كل السخافة دي بالرغم من ان عندهم فقراء !
عمر المصريين ما كانوا كده طول عمرهم بتمر عليهم حروب واستعمار وبلاوي سودا وبيحاولوا يغيروا وضعهم للأحسن من غير شكوى ولا شحاتة من الأشقاء وغير الأشقاء طول عمرنا بنترييق على الأوضاع الصعبة ليه كده بجد الاعلام المصري بقى متخصص في فنون السخافة :(

ع الهامش : مضايقة جدا من موقع تدوينة هما مشكورين بينقلوا كل حاجة بكتبها لكن لما بمسح موضوع كتبته والاقيه لسه على موقعهم واقولهم يمسحوه عالفيس لا حياة لمن تنادي ، ياريت يا موقع تدوينة يا بيت المدونات العربية تهتموا شوية

هناك 14 تعليقًا:

sony2000 يقول...

بجد عندك حق
بالذات الاعلانات
حتي لما بتشتغل بحس بأحساس وحش اوي
الكل هنا لما بتشتغل الاعلانات دي
بيقومو بيعملو اي حاجه لحد ماتخلص
للاسف في ناس مفهمومها غلط بالنسبه للحاجات دي
ارجوكم قللوها لان الناس كدا بتضايق جداااااااااااا

د.آيه يقول...

غير كده كمان .. مش بعرف ابلع الأكل لما يجيبوها .. صعب أوى الصراحة..

ماعر زين فنان محترم جدا بسمعه حاليا على فكرة


تحياتى

د.آيه يقول...

غير كده كمان .. مش بعرف ابلع الأكل لما يجيبوها .. صعب أوى الصراحة..

ماهر زين فنان محترم جدا بسمعه حاليا على فكرة

همسات وبحــ الحياه ــر يقول...

اولا احب احييكى على اختيارك للاغنية دى لانى بحبها جدا
انما البوست فنو كومنت لانك لخصتيه فى كلمتين للسخافه فنون
تحياتى

R-H-S يقول...

بصى هي وجهات نظر بس بخصوص مستشفي السرطان دي فعلا محتاجه الناس تساعد بجد لا المريض مبيدفعش ولا نكله فيها فهيجيبوا مرتبات للناس اللي فيها ازاي ؟ والمريض نفسه بيتكلف تكاليف عاليه جداا

وبالنسبه لجمعيه رساله انا متعاملتش معاها صراحه بس مش من معامله شخص هتحكمى على الجمعيه ككل

وربنا يستر ومتزعليش من تعليقي D:

تحياتى

~ISLAM~ يقول...

والله قلتى كلام بفكر فيه من بدرى ومخنوق منه جدا ومش عارف ليه كده يا مصر
موضوع مؤسف جدا ومخنق جدا جدا
تحياتى ليكى
كل سنه وانتى طيبه

أع ـقل مـ ج ـنـونــة يقول...

السلام عليكم

كل سنة وانتي طيبة أولا

ثانيا .. ماهر زين شخصية جميلة جدا واغانيه هادفة ويارب يستمر علي هذا المنوال

ثالثا .. بالنسبة لاعلانات الجمعيات الخيرية .. انا شايفة ان ليها ضرورة

اولا .. تعريف الانسان المصري البسيط اللى مش عارف انه بايديه ممكن يساعد ناس غلابة !

ثانيا .. لو بتركزي ف الاعلانات دي .. هتلاقي في اخر كل اعلان كلمة برعاية .. كذا ..

يعني شركات بتكون متبرعة بقيمة الاعلانات دي !

ثالثا .. هتكلم عن علاقتي الشخصية برساله !

انهم ناس كويسين جدا محترمين

ليا اصدقاء مقربين كانو بيطلعوا معاهم قوافل خيرية
غير انها مؤخرا بتعمل كورسات في مختلف المجالات مجانا
غير اني لما بتصل وباستفسر عن اي حاجة بلاقي ذوق عالي منهم

فمش عشان تجربة فردية نحكم علي الكل !

دي وجهة نظر شخصية ياريت تتقبليها
وياريت متقوليش اني جاية اعمل اعلان حمضان زي اللى ف التليفزيون :D :D

كل سنة وانتي طيبة ياقمر ^_^

Antika يقول...

بالعكس .. الاعلانات دى مهمة جدا

ناس كتير تطوعت ف رسالة بسبب الاعلانات دى
وعرفنا منها انشطة وحاجات نقدر نشارك فيها بسهولة بس ماكناش نعرف عنها اى حاجة قبل كدة

انتى بتقولى اعلانات شحاتة .. مستشفى 57357 مثلا .. من غير ما الناس تشوف الاعلان بتاعها ماحدش هاييجى ف باله يتبرع او يشارك ف زيارة مثلا او اى حاجة

ايوة فيه ناس بتتضايق من انها تشوف اطفال مرضى او معاقين ف الاعلانات .. بس ده واقع موجود عندنا .. اكيد مش هانهرب منه !!

وتوعية الناس ان الحاجات دى موجودة فعلا .. بتديهم حماس وتطلع الشخص الكويس اللى جواهم ف بيروحوا يتبرعوا او يتطوعوا

ف الحقيقة .. الواقع اسوأ كتير من النماذج اللى بتيجى ف الاعلانات

بالنسبة للى ردت عليكى من رسالة .. واضح انها ماعندهاش معلومات كافية بس هى اتصرفت بطريقة غلط فعلا وكانت سبب ف انك اخدتى انطباع وحش عن الجمعية كلها !!

بس كان ممكن تحاولى تتصلى تانى .. لو لسة مهتمة بالموضوع .. ده لينك الويب سايت بتاع رسالة
http://www.resala.org/
فيه تعريف بالانشطة الموجودة ..

وممكن توصلى لنمرة تليفون الفرع القريب منك عن طريق دليل التليفون مثلا

همسات وبحــ الحياه ــر يقول...

دعوة خاصه
قلوب بلامرسى
هستنى تعليقاتكم لانها هتفرق معايا كتير

قلم رصاص يقول...

عندك حق جدا
كفانا اسفاف وتزييف للواقع
الاسلام دين سماحه وبسيط مش محتاج تكلف
لكن الاهم العمق والجوهر

اما بخصوص موضوع اعلان 57357
ارجو ان تقرأي هذا الموضوع عندي تحت عنوان
المواطن بدرجة عبيط
http://2lamrosas.blogspot.com/2009/10/blog-post.html

هتلاقي فيه وجهة نظري بشكل واضح عن المسألة دي لأنها بصراحه غيظاني جدا

وكل سنه وانتي طيبه واتمنى ان تكوني في احسن حال

تقبلي مروري وتحيتي

Lady E يقول...

sony2000 : هو مش على ضيق بس يا سوني

ربنا يشفي كل المرضى يارب ويخفف عنهم

هو على صورة مصر بره مصر بجد حاجة تكسف

Lady E يقول...

يتبـــــــــــــــــع

Lady E يقول...

د.أية : ربنا يهدي اللي بيستغلوا الأطفال في الاعلانات دي وربنا يشفي الاطفال وكل مريض

نورتيني

Lady E يقول...

دموع القمر : هي اغنية جميلة فعلا ومتفائلة جدا

نورتيني