السبت، 7 أغسطس 2010

شمة مودم

أولا كل سنة وأنتم طيبين وبخير وصحة وسعادة ورمضان كريم ويارب ربنا يبلغنا رمضان ويتقبل مننا يارب

حيث اني في قارة تانية فنظام النت هنا مختلف عن مصر واللي دائما كل ما كنت بقعد عالكمبيوتر وبالتحديد قدام صفحات النت كنت بقولها أكتر حاجة بحبها فيكي هو ده انترنت 24 ساعة حتى النت من الموبايل بجنيه في اليوم وافتح مواقع براحتك من اتصالات لكن من فودافون أكيد رصيدك هيخلص

هنا بقى كان عندنا نت ثابت ورحل ودلوقتي في اسم الله عليه يو اس بي مودم ومشاكلي معاه كتير

على سبيل المثال مش الحصر المودم ده بيتشحن بكروت والكارت بيستمر 24 ساعة متواصلين يعني يوم كامل

اول مرة دخلت عالنت من المودم ده منمتش غير لما خلصت الرصيد :) مش عارفة ليه تقريبا كنت بحتفل بالمودم

ولاحظت حاجة كل لما النت بيخلص لازم لازم المودم يختفي في ظروف غامضة وأفضل أدور عليه في البيت كله ومش بلاقيه خااااالص ولازم ماما اللي تلاقيه مرة في المطبخ ومرة كان بيتمشى بره البيت مع اصحابه ومرات كتير مختفي في ظروف غامضة

زي النهاردة مثلا قلبت الأوضة بتاعتي رأسا على عقب اني الاقي المودم ابدا اختفى في ظروف غامضة وداب زي السكر في المية

وفضلت أقوله : غاب المودم يا ابن عمي يلا روحني وأخيرا لقيت غطا المودم هيييييييييه بسم الله الرحمن الرحيم أخدوا المودم والغطا معايا كويس اهي حاجة من ريحته

وفضلت ألف حوالين نفسي وأفتكرت فرقة رضا وآغنيتهم الشهيرة ودي رقصة المجنونة يابا يابا عاللمونة

ولسان حالي بيقول أنا عايزة شمة مودم شمة واحدة بس وهو ما يعرف بإدمان الإنترنت ومن أعراضه انك تنام حاضن الكمبيوتر أو اللاب :) وتقوله دائما كل يوم مش هتنازل عنك ابدا مهما يكوووون مهما يكون

وتبص لروحك فأجه في المرايا تلاقي انسان تاني اتحول وبقى نسخة بشرية من الكمبيوتر أو اللاب

نسخة بقت بتفضل القعاد قدام الكمبيوتر بالساعات ومبتهتمش بالرياضة ولا بأي حاجة تانية في الحياة

امبارح قلت مش كل يوم نت بقى لازم يبقى فيه يوم اعمل "دايت ويياضة ويياضة ودايت" وقلت لماما يلا نخرج نتمشى النهاردة

وافتريت ومشينا مشوار حسيت انه طويل اوي وعلى ما وصلنا للسوبر ماركت كنت هنجت وعايزة اعادة تشغيل وفرحت جدا اني مش مشهورة ولا معروفة وفي الحالة دي مش مهم البريستيج خالص وهي دي متعة انك تبقى انسان مش معروف وطلعت على أول السلالم بتاعت السوبر ماركت - اللي اسمه km- ومش عارفة ليه km يعني بس قعدت على أول بتاعه رخام جنب السلم وبالنسبة للبرستيج مع نفسه بقى
ده غير اني بعت رسالة لبابا وقولتله مش هقدر ارجع تاني البيت مشي يسعدك تعالى روحنا عااااااا
وعلشان التزم بالدايت جبت 3 أنواع شوكولاتة :) اييييييييييه محدش واخد منها حاجة :)

هناك 21 تعليقًا:

sweet angel يقول...

هههههههههههه

ايه العذاب ده

معلش

بس جيبيلي حته شيكولاته صغنونه

Lady E يقول...

sweet angel : لا مش عذاب اطلاقا :)

ولا يهمك هبعتلك شوكولاتاية حجم عائلي في ايميل :)

R-H-S يقول...

ياخبر ابيض
انا لما بصحي قبل ما اغسل وشي ولا اعمل اي حاجه لازم اقوم فاتح الجهاز دوغري واطمن علي النت موجود والميل موجود

دا درجه فظيعه من الادمان
الواحد كل حين ومين يتمشي ومبيقدرش من التكتيفه اللي بيقعدها قدام الجهاز دي

بس اكيد في القريب العاجل هيعملوا حاجه تعمل رياضه وانت قاعد قدام الجهاز تبقي حاجه فل خالص

تحياتي

Lady E يقول...

R-H-S : ده طبيعي لأن فيلمك المفضل you have got mail :) ميج رايان كانت بتعمل كده برضه وكمان دراستك عالكمبيوتر وطدت علقتك بيه أكتر

لأ وكمان لو انت بره البيت او نايم ومكسل تقوم تفتح الكمبيوتر بتفتح النت من الموبايل :) دي فعلا أقصى مراحل الادمان

هههههههه تصدق فكرة برضه هو في فعلا الات رياضية ممكن تعمل رياضة عليها وانت قدام الكمبيوتر بس مش لدرجة انك تكون قاعد يعني

دمت بخير

طوبه فضه وطوبه دهب يقول...

هههههههههههه كلنا لها يا بنتى دايت ايه وبتاع ايه هو فى احلى من الشيكولاته والايس كريم والتيك اواى ولا يا سلام على الكنز المشبر فى الحر دا يجى خمسه سته ها حلو كدا الدايت اسيبك والحق اخدلى اتنين كنز مشبرين بقى ههههههه بس اقولك الاول كل سنه وانتى بالف خير وصحه وسعاده

7akwena يقول...

يا حول العالم
احنا نعملك حقن مودم بحيث ان لو ملقتيش المودم يبقى عند السرنجه بتاعتك وتعيشى
اما بالنسبه لليياضه يا بنتى على رأى الشاعر ( بلا جرى بلا دروخه كفايه علينا الانتخه)
بالنسبه للشيكولاته فأكيد مش هتاكليها لوحدك
واخده بالك معايا ولا ايه

Lady E يقول...

طوبه فضه وطوبه دهب : على رأي دكتر أحمد خالد توفيق كل حاجة لذيذة وبنحبها بتتخن :)

بالنسبة للكان ف انا مش بحبه اطلاقا يمكن بشرب فيروز أحيانا بس مش كييفه كان

ممكن عصير مشبر وبالتحديد اورنج جوس :)

وانتي طيبة وبخير وصحة وسعادة يا قمرايا

نورتيني

Lady E يقول...

7akwena : مش هينفع الحل ده برضه علشان بخاف من الحقن :)

ده مين الشاعر الفوق الفظيع ده :)

لاااااااااا مش واخدة بالي اطلاقا كله الا الشوكولاته

اسيره الاحزان يقول...

يالهووووز دا احنا فى مصر فى نعمه بقى ومش حاسين بيها

مش عارفه هى دى حاجه عدله ولا لا بس اكيد النت ضروره من ضروريات الحياه السوده اللى احنا عايشينها D:D:

دا لما فكروا بس يعملوا الانترنت المحدود قمنا عليهم كنا هناكلهم هههههههههههههههه مش بس ناكل الشيكولاته

كمان شويه هنلاقيكى تقولى ادينى المودم بسرعه ارجوك محتاجه الجرعه

Lady E يقول...

اسيره الاحزان : شوفتي بقى النت احلى حاجة في مصر :) اهو نعمة ومش حاسين بيها

هنا مطبقين موضوع الاستخدام العادل من زمان

ههههههههههههههههه بقى كده الله يسامحك هو عشان عندك نت كويس يعني 24 ساعة في اليوم و30 يوم في الشهر بتغظيني يعني وقدرتي تقوليها :)

اهو بعد الكلمتين دول ممكن اوي النت يفصل عندك نياهاهاهاها

الزهرة البرية يقول...

انتى هتقوليلى على ادمان النت اااااااااااااااااه بلاش تفكرينى ده كان شهر ما يعلم بيه إلا ربنا النت أخد بعضه وفلسع وكنت خلاص هعيط بس صعبت عليهم ورجعوه

أما بقى الدايت مقولكيش بقيت بعمل دايت الشكولاته والأيس كريم واوعى تقولى لماما أحسن هى فاهمة إن عاملة دايت بصحيح مش عارفة انى أدمنت الشكولاتات والأيس كريم ومش تطمعى ها هههههههههههههه

كل سنة وانتى طيبة يا قمراية ورمضان كريم عليكى وعلى الجميع

دمتى بكل الخير والحب والسعادة

Alaa Salim - علاء سالم يقول...

فعلا مشكله كبيرة إدمان الكمبيوتر والنت
والمشكله الأكبر فعلا في الكسل المصاحب للقعده أوقات طويلة قدامة

موضوعك جميل بأحييكي علي

دموع القمر يقول...

هههههههه
حلو الدايت دا
امال لو عايزة تتخنى هتاكلى ايه خروف
وبعدين الجهاز من غير نت ملوش لزمة :) دا اول حاجة الواحد بيعملها لازم يمضى حضور ويحط يصمته ههه دا اكتر من ادمان
كب سنة وانت طيبة ياقمر

حَـبآيـۃْ.بـטּـدۉڷ يقول...

KM ?

إنتي فـ صلاله اللي هيا فـ عمان .. صح ولا ليه فروع تانيه ده ؟

اصل دايماً لما كنت فـ عمان كنا بننزل المركز ده يوميا .. وتلاقي كل الناس اللي فيه حفظونا ..

في حد يبقى فـ صلاله ويقول نت .. حرام عليكي يابنتي .. ده الجو دلوقت اكيد خريف ورزاز وعيشه تانيه ..

مش حر نار ولعه زي مصر حالياً ..

يلا مش بنحسد اهوو

بس فكرتيني بالغالي .. :(

اوستمتعي بقى .. وفكك من النت .. هترجعي مصر هتلاقيه موجود زي ما هو ..

أنا عايزه شوكولاته من دي بقى :D

أميرة علي كوكب مهجور يقول...

ههههههههههه
كل سنه وانتي طيبه يا قمر
رمضان كريم

Silver Eyes يقول...

ليييييييدى
مساء الخير :)
يارب تكونى بخييير

بعتذر انى مقصرة جدااا معاكى ومش بسأل :(
كل سنة وانتى طيبة وبخير يارب
ورمضان كريم عليكى

تصدقى احنا فى نعمة فعلا .. ربنا يسهل وتنزلى مصر قريب

وحلو اوووى الدايت اللى انتى عملاه دا
استمرى :p

تحياتى يا ليدى
وهابى فاااااااانوس :):)

rack-yourminds يقول...

بجد دمك خفيف
___________

حقيقة بعد علاج مكثف لادمان النت خفيت شويه ,لكن احيانا بتحصل ليا نكسات طفيفه ,سرعان ما اتعافي منها ,,,وهكذا

Timo.. يقول...

ههههه...
على رايك..ماحدش واخد منها حاجة..
بس....
تلات انواع شوكولاتة ...!!
مش كتير شوية.. (وش خبيث جدا)

كل سنة وانت بكل الخير والسعادة

فتافيت يقول...

كل سنة وانتي طيبة

طيب بالنسبة للشكولاتة فيها شوكولاتة بالبندق.. عشان لو فيها يسعدك عايزة حتة عااااااااااا :))

ستيتة حسب الله الحمش يقول...

كل عام وانتي بألف خير وسعادة
ربنا يتقبل منا ومنك رمضان
ويعيده عليكي وعلى اسرتك الجميلة بكل خير وسعادة يارب
تحياتي

P A S H A يقول...

كل سنة وحضرتك طيبة وبألف خير وصحة وسلامة إن شاء الله
:)
رمضان كريم