الثلاثاء، 24 أغسطس 2010

ما نقص مال من صدقة

ما نقص مال من صدقة مكنتش فاهمة المعنى ده وكنت بقول ازاي يعني ؟ وماما دائما كانت بتقوللي ان الصدقة بتبارك في المال مش بتقلله
وأن ثوابها كبير من ربنا سبحانه وتعالى وأن كل المصاريف اللي بنصرفها هتزول والصدقة بس هي اللي هيفضل لنا ثوابها
كلام جميل لكن الإنسان دائما مش بيتعلم الا لو حصلت معاه حاجة ملموسة حاجة عاشها علشان معنى الكلام يترسخ جواه

من فترة كنت لوحدي في البيت وبعدين جرس الباب رن ففتحت الباب لقيت سيدة طالبة المساعدة ووقتها مكنش معايا الا فلوس بسيطة وكنت محتاجاها
المهم رحت لشنطتي وأنا في قمة التردد وعقلي يقوللي يا بنتي دي الفلوس اللي معاكي دلوقتي تديها لحد متعرفيهوش ليه وبعدين حسمت المسألة انا عندي مبدأ الأية الكريمة : " وأما السائل فلا تنهر" وأخدت المبلغ ده بعد صراع مع نفسي وجه في بالي الأية الكريمة " لن تنالوا البر حتى تنفقوا مما تحبون" وأديته للسيدة دي فدعتلي كتير وبعدين قالتلي ممكن كوباية مية؟ من غير تردد المرة دي رحت المطبخ وفتحت التلاجة وجبت لها كوباية مية فشكرتني ودعتلي وأنا نسيت اني معرفهاش أساسا وممكن كانت تأذيني وخصوصا وأنا لوحدي في البيت وسايبة الباب مفتوح علشان ميصحش أقفله في وشها
المهم وهي ماشية قالتلي : ربنا يعوضك عن اللي اديتيهولي يارب
انا يمكن بنسى حاجات كتير بس مستحيل أنسى نظرات العيون ونظرة عينيها كان فيها صدق ودعوتها كانت صادقة بجد
ويوميها حكيت لماما عن اللي حصل ده وتاني يوم الصبح على غير العادة بابا صحاني من النوم وأدالي أد المبلغ اللي تصدقت بيه 20 مرة أنا طبعا أذبهليت واستغربت لأننا مش في العيد مثلا علشان أخد عيدية وفي العادة بابا بيديني مصروف بس أقل من المبلغ ده وكمان ساعات بينسى يديلي المصروف أساسا وأنا بقعد أرخم عليه لغاية لما بفكره بموضوع المصروف ده :) وسألت ماما هو بابا عرف بموضوع الصدقة قالتلي لأ مقولتلوش سبحان الله الصدقة فعلا مش ممكن تنقص مال .

الصدقة الكلام عنها مش ممكن يخلص وفضلها كبير بتطفئ غضب الرب وبتداوي المرضى وبتعمل بركة في الرزق والحياة وبتطهر المال وبتدفع البلاء وبتيسر الأمور وبتكون سبب في غفران الذنوب وبتطفئ الخطيئة كما يطفئ الماء النار وبتطهر المال ووالله اللي بيدي صدقة لحد وجها لوجه بيحس بفرحة أكتر من اللي أخد الصدقة زي ما قال دكتور عمرو خالد "سعادة العطاء "
كمان المتصدق في السر يوم القيامة بيكون من السبعة اللي بيظلهم الله تحت ظل عرشه .

ربنا يجعلنا من المتصدقين في السر والعلن اللهم أمين .


هناك 15 تعليقًا:

P A S H A يقول...

اللهم اجعلنا من المتصدقين يا رب العالمين اللهم آمين .. ربنا يتقبل منك ويجعلها في ميزان حسناتك إن شاء الله

:)

همسات وبحــ الحياه ــر يقول...

صباحك سكر زيادة
وحشانى ياقمرايه
يارب تكونى بخير
كلامك كله مظبوط
حصلت معايا واديتها فلوس مع انى كنت محتجاها سبحان الله يوم عيد ميلادى واللى محدش بيفتكروا اصلا الاقى اخويا مدينى اضعاف اضعاف اضعاف المبلغ انا
انا قولت اكيد فيه ان بسأله بيقولى كل سنة وانت طيبة فكرت اجيبلك هديه واللى عمره ماعملها ههههه قولت اديكى انت الفلوس وانت تجيبى اللى انت عايزاه سبحان الله
انت عارفة دايما ماما معودانى على كدا عمر ماحد ييجى ويسألك على حاجة وتخليه يمشى من غير ماياخد حاجة عارفة لو مشمعاكى فلوس خالص خالص اديلو حاجة من المطبخ اسأليها لو عندها طفل او بنت واديها حاجة من دولابك
وبجد ربنا بيبارك لنا وبيعوضنا
وفعلا مانقص مال من صدقه

Lady E يقول...

P A S H A : اللهم امين

مليش دعوة انا عايزة فانوس عااااااا

كل تعليقاتك فيها فوانيس اشمعنى لما بتيجي المدونة مش بتجيب الفوانيس معاك عاااااااا

mrmr يقول...

يا ليت الكل يعلم جيد فائده الصدقه
وربنا بيعوض صاحبه عشرات الاضعاف
شكرا يا قمر

كل سنه وانتى طيبه

rack-yourminds يقول...

يمحق الله الربا ويربي الصدقات"

صدق الله العظيم

_____________

بارك الله فيكي

P A S H A يقول...

۩۩۩۩۩۩۩۩۩۩۩۩

:)

ولا يهم سموك دستة فوانيس بحالها

كل سنة وأنتِ طيبة وبألف خير وصحة وسعادة ورضا وراحة بال إن شاء الله اللهم آمين .. بالمناسبة كنتِ كتبتِ تحليل -أثق فيه- عن رأيك في رواية إبراهيم عبد المجيد الأخيرة "في كل أسبوع يوم جمعة" .. اللي ما قريتهاش لحد دلوقت .. مع إنه من كتابي المفضلين .. كنت باقترح عليكي تقري له "بيت الياسمين" ، "لا أحد ينام في الإسكندرية" ، "طيور العنبر" ، "البلدة الأخرى" .. جايز تغيري رأيك فيه !
وجزاكي الله كل خير على رأيك بخصوص الكتاب اللي فادني جداً .. لإنه تقريباً كان إنطباع عندي بإن الرواية مش جيدة !
حالياً ماسكني - مش أنا اللي ماسكه- عمنا جمال الغيطاني .. دفاتر التدوين .. الجزء الأول "خلسات الكرى" .. ولا تعليق !
:)

آسف على الإطالة والمداخلة اللي مالهاش علاقة بالبوست .. بس حبيت أشكرك وأجيب لك الفوانيس

:)

تحياتي

Lady E يقول...

دموع القمر : يسعد صباحك ومسائك يا قمرايا

الحمد لله ماشي الحال

جميل اوي الموقف ده بجد ودي بركة الصدقة في الدنيا ولسه كمان ثواب الصدقة واللي حسناتها كتير جدا وربنا سبحانه وتعالى بيضاعفها

حلوة أوي الأفكار دي وربنا يجزيكي خير عليها

شكرا ع الاضافة القيمة يا قمرايا

نورتيني

TWEETY يقول...

ازيك ياطانت
اخبارك ايه
انا جيت ازورك
يارب تكونى كويسه
ابقى زورينى ماشى
مع السلامة
كل سنة وانت طيبة

FAW يقول...

آمين يارب العالمين

سندباد يقول...

امين يارب العاملين
جزاكي الله خيرا وجعله في ميزان حسناتك
ربنا يكرمك
تحياتي

Unknown يقول...

موقف جميل ..
بس ابقي خدي بالك الله يكرمك من الناس اللي بتخبط على الباب دي ..
احسن فعلاً ممكن يؤذوكي بأي شكل ..
هتعملي ايه لو معاها حد تاني مستخبي و اتهجموا عليكي ؟؟
خدي بالك الله يخليكي .
ربنا يحفظك.

Lady E يقول...

مرمر : أكيد ربنا بيعوض الانسان في الدنيا قبل الأخرة كمان

لا شكر على واجب

وانتي طيبة وبخير وصحة وسعادة يا حبيبتي

Lady E يقول...

rack-yourminds : صدق الله العظيم

دائما تعليقات حضرتك قيمة وبكون سعيدة بيها

جزاك الله خير وبارك فيك

Lady E يقول...

P A S H A : شكرا على دستة الفوانيس

اللهم أمين وليك مثل دعائك ان شاء الله

الكلام اللي كتبته من وجهة نظر شخصية بحتة انا كتبت ان الرواية ليها مميزات وعيوب من وجهة نظري المتواضعة مميزاتها انها رواية عصرية وبتتكلم عن عالم الانترنت وبتوصف انواع كتير من البشر لكن فيها كتير من الكلمات والمواقف والوصف الفج لبعض الحاجات اللي اكيد مش هقولها علشان عنصر المفاجأه لما تقرأ الرواية فيما عدا ذلك الرواية عجبتني فكرتها وأسمها ده غير ان الرواية متكاملة من الناحية الأدبية

وكمان انا مستحيل احكم على كاتب من رواية واحدة بيتهيألي كده ابقى سطحية جدا !

ان شاء الله اكيد هقرأ ليه روايات تانيه بس حاليا بقرأ كذا حاجة منهم كتاب تائه في لندن لمحمد عفيفي

الرائع جمال الغيطاني درستله قصة جميلة جدا ايام الكلية كتاباته فعلا فيها ابداع وبتشدك وعرفت مؤخرا انه دمياطي

لا داعي للأسف خالص والشكر ليك وقراءة ممتعة واقرأ رواية في كل أسبوع يوم جمعة ولا تقلق

دمت بخير

Lady E يقول...

اقصوصه : والله اكرم

وانتي بخير وصحة وسعادة يا اقصوصة