الاثنين، 16 أغسطس 2010

الدنيا لسه فيها أكتر



بحب أوي الإعلان ده وبحس بتفاؤل مفتقداه بقالي كتير ، بحس بجنون الحلم وبمتعة تحقيقة ورؤيته كل يوم بيكبر وبيتطور وبيبقى أحسن
أنا من الناس اللي كنت متعصبة لفودافون لأنها أول شبكة عرفتها في مصر حتى من قبل موبينيل من ايام ما كان اسمها كليك وبابا جابلي خط فودافون اللي معايا حاليا في اولى كلية علشان كده كان صعب اغير لشبكة تانية غير فودافون ده غير ان احنا الفودافونيين مبنحبش نغير لشبكة تانية علشان معتقدين انها احسن شبكة في مصر وشبكة بتعمل بريستيج لصاحبها :) ! مع انها مش كده اصلا وانا اتسرقت كتير من الشبكة دي
المهم السنة دي غيرت ل اتصالات عجبني رقم مميز وقلت أجرب الشبكة الجديدة مش هيحصل حاجة وجازفت وجبت خط ذهبي مميز يعني مش خط ممكن ارميه ولقيت اتصالات شبكة جميلة جدا وواضحة وأي حاجة بعملها عالموبايل بتجيلي مسج بعدها اخدوا اد ايه من الرصيد ولسه معايا كام في الرصيد وناس واضحين بس المشكلة في ان الشبكة احيانا بتقع لكن ده ميمنعش انها شبكة اتصالات قوية حتى بعدما سافرت هنا وعملت رقمي تجوال ممكن استخدم الخط وفعلا دخلت منه نت اول يوم وصلت فيه عمان
نيجي للإعلان انا شخصيا الاعلان ده بيشجعني على الحلم حتى لو كل اللي حواليا مش مصدقين انني ممكن أحقق حلمي في يوم من الأيام وحتى لو انا نفسي استسلمت احيانا
"لما نشوف في الدنيا أكتر منبقاش مجانين نبقى متفائلين " " الدنيا لسه فيها اكتر "







"الشمس طالعة من سينا وفاردة توبها على الوادي
الطيبة دي أحلى ما فينا وطيبة ده اسم بلادي "

من كلمات تتر برنامج مصري أصلي لعمر طاهر واللي لسه مشوفتوش الا على النت
من كام يوم قبل رمضان قرأت كتاب الجسد حقيبة سفر لغادة السمان هي بتتكلم عن رحلاتها في فترة الستينات
وكانت بتوصف أد ايه اسرائيل عاملة جو ثقافي ودعايا ليها في البلاد الأروبية وغير انهم مسهلين السفر لإسرائيل كمان عاملين أغاني كان ليها شعبية كبيرة في المجتمعات الأروبية والأغاني دي بتبين أن العرب وحوش وهمج ومانعين المية عن اللي ما تتسمى وأد ايه انهم شعب مسالم طبعا الدم غلي في عروقي واتغاظت لأن فلسطين هي اللي كده وسألت نفسي نفس السؤال اللي سألته غادة السمان في الرواية فين شعرائنا وكتابنا – طبعا نايمين زي ما كل حاجة في بلدنا نامية او بيكتبوا عن الحب والخيانة وبس – المهم أغنية تتر برنامج مصري أصلي كلماته بجد جميلة وبيقول ان الشمس بتطلع من عندنا مش من عند اللي متتسماش وبيبين كمان اننا بلد طيبة وأسم بلدنا طيبة مهما حصل ودي حاجة نفسي بجد ترجع لذاكرة الناس
احنا الطيبين وبلدنا طيبة ولازم نفضل فاكرين
أغنية لايت ولذيذة احلى من أغاني كتير ملهاش لازمة ولما تسمعها تتشرف انك مصري

الكوبليه اللي فوق ده اكتر كوبليه عاجبني في الأغنية

هناك 24 تعليقًا:

P A S H A يقول...

جميلة الأغنية
:)
وحلوة اتصالات .. النت ببلاش خميس وجمعة
D:

كل سنة وأنتِ طيبة

Lady E يقول...

P A S H A : تصدق أنا كده اتغاظت :)

هما جايين يعملوا النت ببلاش وانا مش في مصر بيهزروا طبعا :)

وانت طيب وبخير وصحة وسعادة

رمضان كريم والله أكرم

فراشة يقول...

نونتي بجد وحشتيني قوي جدا خالص

انا كماااان بحب الاعلان دا فكرته لذيذة ودنيا غانم عسولة نفسي البس زيها كدا

على فكرة انا كمان من الفودافيون المتعصبين بما انه احمر زي الاهلي ههههههه بس كانت احسن واقوى شبكه على ايامي يعني ايامي الخط كان ب 400 جنية والدقيقه كانت ب 2 ج والله كسبوا مننا كتير قوي وكنا نشحن ب 100 كل 3 شهور عشان نعرف نعمل مكالمات المفروض يعملوا مميزات بقى للعملاء القدام دول

بس اتصالاات عروضها احلى دلوقتي ونفسي اغيرلها بس صعبان عليا رقمي فودافوني اللي ياااااما سرقتني عاتي جدا وبسامحها والله عن طيب خاطر عشره عمر بقى نعمل ايه :))

وربنا يحقق احلامك ياعسولتي

P A S H A يقول...

بمناسبة الأغاني ..أنتِ هجرتي مدونتك التانية ولا إيه ؟؟

سمعتي ده قبل كده ؟

http://www.youtube.com/watch?v=PgvJg7D6Qck&list=QL

http://www.youtube.com/watch?v=iimMKWF7SK0&list=QL

تحياتي

:)

شاب فقرى يقول...

عجبتنى اوى الجملة عنوان البوست
الله يفتح عليكى
تفاؤل بجد
هوا الاعلان عجبنى جدا
وكمان سياسة اتصالات فى متابعه الرصيد مع العميل
حلوة اوى والله
والاغنيه برده رايقة كدا
تحسى انها بترجعنا لوقت حلو او احساس جميل بالوطن مفتقدينه منذ زمن
سيبك إنتى
رمضان كريم
شاب فقرى

FAW يقول...

الأغنيه جميلة فعلا
و الإعلان عجبني قوي , بس واضح إن إتصالات كعت مبلغ و قدره علشان تعمله . . !!!
بس موضوع صعب قوي تغيير الرقم ده رغم إني معترف إن فودافون حراميه جدا . .
تعرفي إن النجده و الإسعاف 122 و 123
ب 25 قرش مش ببلاش !!!!!
يعني لو لقيت حد بيموت أقوله ثواني بس أشحن و أجيلك , أو أقوله طب هات موبايلك كده D:

طوبه فضه وطوبه دهب يقول...

انا ما جربتش اتصالات بصراحه بس برضو كنت متحيزه لفودافون اوى الاول وغيرت تلت ارقام فى فودافون لحد ما غلطت مره وجربت خط موبينيل اكتشفت اننا كنا بنتسرق عينى عينك يا بنتى انا جربت موبينيل لكن مقتنعه ان اكيد اتصالات كمان احسن واحسن كل سنه وانتى بالف خير

تيمور يقول...

كل عام وانتى بخير

رمضان كريم


تحياتى

sony2000 يقول...

انا بحب الاعلان دا مووت
وكل مايجي بقعد اتسمر قدامهه
بالذات كولكشن الممثلين والمغنين اللي فيه
اول مره يكون في كولكشن كدا
والاغنيه نفسها بالرتم حلو جدااا
بيدي احساس بالتفاؤل عكس اعلانات كتييييييييييييير

همسات وبحــ الحياه ــر يقول...

انا كنت زمان من انصار موبنيل
بس حولت اتصالات من زمان
الاغنية حلوة :)
كل سنة وانت طيبة ياقمر

غير معرف يقول...

بسم الله
أفضل مافي الإعلان خو الإخراج الرائع وسلاسة التنقل بين المشاهد وكأن الذي ألف الكلمات والذي لحنها والذي وزعها والذي أخرج الفيديو كليب هم واد يعني فيه تناسق رهيب لآتجده إلا في أغاني الأفلام

mrmr يقول...

لذيذ الاعلان
ولذيذه الاغنيه
اول مره اشوفهم سلمت يداكى
رمضان كريم
وكل سنه وانتى طيبه يا قمر

rack-yourminds يقول...

انا نفسي كمان احول لاتصالاات لاني زهقت من موبينيل

________________

مصر اولا اصبح شعارنا!!!!وشعار الدول العربيه بلدهم اولا!!!!ولتستفرد اسرائيل بفلسطين وهذا هو الحاصل بطبيعة الحال.,,,, ليس ثمة ظهير عربي يساند المفاوض الفلسطيني ومن ثم يخضع المفاوض الفلسطيني لاملاءات اسرائيل لانه ليس لديه اوراق ضغط

_____________

تحياتي

Lady E يقول...

فراشة : فراشتي حبيبتي وانتي اكتر

فعلا لبس دنيا جميل اوي

هههههههه ماشي يا اهلوية
ايوة ده كمان الخط في الاول خالص كان ب13 الف وطبعا مكنش منتشر اوي وانتشر لما بقى في حدود الفين ونص وفعلا كسبوا كتير اوي في الأول مصر كانت أغلى دقيقة موبايل على مستوى العالم وفعلا المفروض يبقى في مميزات أو يمكن في مميزات واحنا مش عارفينها

ممكن يبقى معاكي رقمك الأصلي واتصالات :) متلغيش فودافون

اللهم أمين وانتي كمان يا فراشتي

Lady E يقول...

P A S H A : لأ طبعا أكيد مهجرتهاش ومجهزة لها كذا موضوع هنشره فيها بعد رمضان ان شاء الله هو الوقت ضيق بس في رمضان

بالنسبة للكليبين عجبني جدا اول واحد وبدايته صوتيات اللي نفسي جدا ادرسها في الموسيقى اما الكليب التاني مع انه لنفس الشخص فمعجبنيش اوي لأنه فكرني بالترم اللي فات وبادب وثقافة السود اللي طلعت عيني في المذاكرة :)

شكرا على اهتمامك

دمت بخير

Lady E يقول...

شاب فقرى : ويلكم باك يا شاب فقري

رمضان عظيم

Lady E يقول...

FAW : :)

اول مرة اعرف ان ارقام الطوارئ بفلوس !!!!!!!!!! دي حاجة محصلتش في العالم كله

Lady E يقول...

طوبه فضه وطوبه دهب : للأسف ده اللي بيحصل فعلا فودافون واخدة شهرة كبيرة بس عالفاضي

وانتي طيبة وبخير وصحة وسعادة

Lady E يقول...

انسان ممتنع عن الزواج : وانت بخير وصحة وسعادة

الله اكرم

Lady E يقول...

sony2000 : فعلا ده اول اعلان يكون فيه ممثلين ومطربين كتير كده بس الاعلان معمول كويس اوي وفكرة ذكية من اتصالات

ربنا يكتر من تفاؤلنا :)

Lady E يقول...

دموع القمر : أيوة كده يا وديع :)

وانتي طيبة وبخير وصحة وسعادة يا جميلة

Lady E يقول...

غير معرف : انت ليك السبق حقيقي أول غير معرف يكون غير معرف فعلا :)

شكرا على ملحوظتك بس انا لفت نظري الفكرة والكلمات واللحن اكتر من الاخراج والصورة

Lady E يقول...

mrmr : زيارتك وكلامك هو اللي لذيذ يا مرمر

الله أكرم

وانتي طيبة وبخير وصحة وسعادة يا جميلة

Lady E يقول...

rack-yourminds : عن تجربة حول ومش هتندم بس برضه احتفظ بموبينيل
هي مشكلة اتصالات الوحيدة ان الشبكة ساعات بتقع لكن غير كده مفيش اي مشاكل بالنسبة لخدمة العملاء والرصيد

مصر اولا ممكن نقول كل واحد في مصر بيقول انا اولا ياريت حتى بيقولوا مصر اولا
اما بالنسبة للدول العربية ففي دول زي السعودية بتساعد الدول الاسلامية ولسه من كام يوم باعتين معونات لباكستان علشان الفيضان
اما موضوع فلسطين فالمهتمين بيه بعض الغرب اكتر من العرب

شكرا للإضافة