الاثنين، 2 أغسطس 2010

صباح من صباحاتي الملخبطة


في اللحظة دي مشتاقة جدا للبحر ولبرودة أمواجه واحساس المشي على رمله ، بدأت صباح يوم جديد النهاردة بأغنيتين لسيلين ديون أغنية كئيبة بس عجبتني وأغنية تانية كئيبة برضه بس رومانسية بتحكي حكاية اتنين اتفارقوا وبعدين هي من فرط سذاجتها رجعتله تاني اول لما رجعلها
عمالة اسمع في الأغنيتين دول من الصبح ومزهقتش ! وساعات باخد فاصل من فيروز أو ماجدة الرومي او بلاك تيما او هيثم نبيل اللي في رأيي ألبومه الأخير أحلى البوم نزل السنة دي

كتبت حاجات كتير في اليومين اللي فاتوا وكالعادة بعد كده مش بنشرهم شفت فيلم ولاد العم وكتبت كلام كتير عنه والفيلم عجبني جدا وعجبني جدا تمثيل كريم عبد العزيز وبعده شريف منير حسيت انهم الشخصيات فعلا
انتيمتي مخصماني وانا بفكر فيها كل 5 دقايق وبسمع اغنيتنا عو عو عو ونفسي لما انزل القاهرة نروح ناكل كشري عند أبو طارق ونركب المترو وبفتح موقع الجامعة كل شوية علشان اشوف بيان الدرجات مع اني عارفة النتيجة واني ناجحة وبعمل داون لود لفيلم فرنسي مترجم بالانجليزي عن حياة اديت ابيتاف ام كلثوم فرنسا والفيلم أسمه الحياة باللون الوردي
LaVie En Rose ورابد شير مطلع عيني في الداون لود
بابا سألني السؤال اليومي لسه منمتيش! وكان ردي هو السؤال ده مقرر كل يوم ولا ايه؟ فبابا قاللي : أه فقولتله على فكرة انا مش هجاوب

كنت بتفرج على التلفزيون في أمان الله وفأجه كله ضاع كله راح كله اتكسر كله اتغير صاحب البيت عقبال امالتكو هيبني دور كمان وكسروا كل الدشوش - جمع دش- والله اعلم بقى امتى ارسال التلافازيون هيرجع لنا تاني وهما بيخبطوا فوق دماغي مباشرة كان نفسي أبقى هركليز وزينة في بعض وأطلع أرميهم من فوق السطح لأنهم جابولي صداع ده غير اني كنت بتفرج على برنامج من سيربح البنبون ومكملتوش بسببهم وطول ما هما بيكسروا وبيخبطوا وعاملين دوشة بفتكر الأفلام بتاعت الكفار لما واحد بيجي يكسر الكعبة فيقول شلت يدي شلت يدي ياااااااااقوم ودوني المستشفى بس متكونش القصر العيني علشان الداخل فيه مفقود والخارج ده لو خرج مولود
عملت داون لود لأخر فيلم لميل جيبسون زي ما قاللي المدون مصطفى فوزي في تعليقه عالبوست اللي فات والجزء الأول عملتله داون لود مرتين والتاني نفس الموضوع الفيلم زهقني بصراحة في الداون لود وبعدين دلوقتي حاولت افك الضغط عن الفيلم وراسه وبرانيط البلد انه error هو ايه اللي غلط مش عارفة !
كل لما بدخل المطبخ بغني أغنيتين عبالي حبيبي ل اليسا واو بحار لبلاك تيما
بحب في نفسي حاجة اليومين دول اني بحب أجرب أي حاجة جديدة في الأكل خصوصا ومش فاهمه احنا ليه مقتصرين في أكلنا على المطبخ المصري اليومين دول بتعلم أكلات جديدة وتبقى المكرونة بالصلصة أحب أكلة لقلبي ممكن اطبخها علشانها سهلة التحضير وكمان كباب الحلة والفتة بس اللي لسه متعلمتوش ومش ناوية اتعلمه المحشي
وعلشان يبقى ختامها فل امبارح عملت داون لود لكورس انجليش بيعلم النطق الصحيح والمحادثة وبيتهيألي مش هعرف أوصف تعبيرات وشي أول لما سمعت أول محادثة كانوا بيتكلموا هنولولي مش انجليش ودار في ذهني سؤال لولبي هو ده الانجليش ولا اللي درسناه في الكلية اومال لو مكنتش اتعلمت في مدارس لغات كان ايه اللي حصل !
وافتكرت ايمي سمير غانم في فيلم عسل أسود لما كانت مدرسة انجليش ونطقها في الانجليش يفطس من الضحك
ويا كلياتك يا مصر يا كلياتك يا كلياتك
ونطلع من كل اللي انا قولته ده بإيه اني بقول أي كلام لأني متنرفزة ونفسي الناس اللي عاملين دوشة وبيكسروا السطح دول يذهبوا الى الجحيم والمشكلة ان الموضوع مش هيستمر النهاردة بس لأ ده هيستمر ويتوغل وينتشر لغاية لما يبنوا الدور التاني وبيتهيألي المشكلة عندي لأن لما كنا في مصر كانوا الجيران بيهدوا بيتهم وبيبنوه تاني فكان فيه نفس الدوشة :) وصيتكو المدونة لو جرالي حاجة لأني بقيت خايفة فعلا السقف يقع علينا

هناك 15 تعليقًا:

rack-yourminds يقول...

كلامك عن البحر فكرني برحلتي لمرسي مطروح وشواطئها اللي اكثر من ساحره لدرجة اني بفكر اروح كمان مره بس صعب عشان الاسبوع اللي غبته حصل لغبطة في شغلي ,,,,,

بالنسبه لصديقتك فمكالمه منك تعتذريلها او تزوريها في بيتها هتنهي خصامك معها وبعدين طول فترة الخصام بيزيد الاحتقان والجفاء

اما بخصوص البيت ان شاء الله ربنا يستر

~ISLAM~ يقول...

حرام عليكى
لأ حقيقى حرام عليكى
انتى رغايه طحن
بجد دماغى صدعت
اينعم اسلوبك لذيذ ومضحك
بس مش كده
كل ده عشان الدش اتشال والسقف هيقع
يلا عالعموم دى اول زياره ليا لمدونتك
وان شاء الله مش هتكون الاخيره
شفتى بردو انا مبحرمش
والسلامو عليكم

FAW يقول...

انا تقريبا سامع الخبط من هنا , ربنا معاكي . .
إنتي ممكن تخرجي شويه و هما أكيد هيتعبوا و يمشوا مش هيشتغلوا طول اليوم يعني .
يارب الفيلم يشتغل . .
نصيحه تانيه : أغنية ( cry ) لـ ( rihanna ) تحفه

Kholoud Kamal يقول...

يذكرني أسلوبك و بعض كلماتك بصديقة قديمة لي و التي لاطالما شعرت انها تسكن في منزل في غابة تحوي الفراشات و عصافير الكاناريا و في ذاك البيت تربي قطة شيرازي مشمية اللون و على اذنها اليسرى (فيونكة بيضا) .. اشعر و كأنها هي التي دونت هذه التدوينة .. أطال الله عمرك و بارك في ابامك و زادك صحة :)
أنتظر منك المزيد في القريب العاجل

غير معرف يقول...

ميييين دة الى نسيك تعرف لو قلبى بيكلم كان رد عليك
مييييييين ده الى نسيك قبل مانتعاتب طب سلم الله يخليك
عوعوعوعوعوعو

ديالا يقول...

انا رجعت تاني بس في مدونه بنفس الام لان مدونتي نسيت الباس ورد بتاعها كل سنه وانتي طيبه هنتواصل تاني

sony2000 يقول...

لاتقلقي
معلشي فتره وتعدي
ويخلصوا وتقعدي فهدووووووووووووء تقولي ياريت الدوشه كان كملت:)

ديالا يقول...

وحشتني ووحشني كلامك ولماضتك

مش عارفه فاكراني ولا لسه بس انا مدونتي رقم السري بتاعها نسيته بس عمله مدونه بنفس الاسم وهبقي معاكوا دايما باذن الله بس بجد وحشتيني

Lady E يقول...

rack-yourminds : اهلا بيك

بيقولو يا ساكني مطروح جنية في بحركم

بلدنا جميلة أوي والشواطئ فيها رائعة وأكيد رحلتك لمرسى مطروح كانت رائعة

ربنا يعينك ويوفقك في شغلك

ياريت اعرف ازور صديقتي هي في قارة وأنا في قارة تانية لكن الحمد لله احنا مش بنعرف نتخاصم ونزعل من بعض لكن مفيش مانع ان يبقى في عتاب برضه

يارب

سعيدة جدا بتعليق حضرتك
دمت بخير

Lady E يقول...

7akwena : لأني ديموقراطية مصرية فهقولك تكلم بلااااااااا خوف :)

يا ترى ده مدح في صورة ذم ولا ذم في صورة مدح ! طب أجل رأيك شوية مش أول مرة تزور المدونة تقول رأيك بصراحة كده

يلا عفونا عنك بس خد بالك المرة الجاية طالما محرمتش وهتزور المدونة تاني :)

وعليكم السلام ورحمة الله وبركاته
دمت بخير

Lady E يقول...

moustafa fawzy : مش مستبعدة انك تكون فعلا سامع الخبط من هنا لأن الضوضاء والدوشة وصلوا لأخر مرحلة لدرجة اني ساعات بكلم ماما بالإشارة علشان مبنبقاش سامعين بعض :)

عملت كده وخرجت امبارح بس مفيش فايدة هما بيشتغلوا من بدري جدا لغاية غروب الشمس

لسه الفيلم برضه مش عايز يشتغل :( لكن أنا وراه لغاية لما اشوفه

شكرا على نصائحك القيمة
سمعت الأغنية طلعت فعلا حلوة

Lady E يقول...

Kholoud Kamal : أهلا بيكي

أكيد حاجة تشرفني إني أفكرك بصديقتك اللي وصفتيها بكل الجمال والرقة دي
واللي كلامك عنها بيدل على روعة شخصيتك ورقتك

اللهم أمين

ربنا يتقبل دعائك ويجعل ليكي حظ منه

سعيدة جدا بزيارتك وبتعليقك وبجد التعليق ده من التعليقات اللي مستحيل تتنسي

نورتيني وهستنى زيارتك دائما

Lady E يقول...

حبيبتي حبيبتي واعمل لك ايه بقول هنسى ومبنساش ليه هواك لسه انا عايشه عليه ومش هقدر أعيش غير بيه:)

نورتيني يا أنتيمتي

Lady E يقول...

ديالا : هييييييييييييه ويلكم باك

طبعا فاكراكي

اخيييييييرا يا بنت بلدي عاش مين شافك

سعيدة بجد انك رجعتي تاني للتدوين وحشاني بجد

اوعي تغيبي تاني ومبروك المدونة الجديدة واكيد هزورك

Lady E يقول...

سوني : أينعم فترة وتعدي حوالي 6 شهور ولا حاجة :)

وتصدقي فعلا شكلي هدمن الدوشة دي وهاخد على الصداع :) ربنا يستر